རྒྱང་སྲིང་དུས་ཚོད།

བདུན་ཕྲག་རྗེས་མའི་གཟའ་མིག་དམར་ཉིན་ཨ་རིའི་སྲིད་འཛིན་འོས་འདེམས་བྱེད་ཀྱི་ཡོད་ལྟར། སྲིད་འཛིན་འོས་མི་གཉིས་ནས་མུ་མཐུད་དུ་ཨ་རིའི་གནད་འགག་ཅན་གྱི་མངའ་སྡེ་ཁག་གི་ནང་འོས་བསྡུའི་གཏམ་བཤད་ཀྱི་ལས་འགུལ་སྤེལ་བཞིན་པ་དང་། ད་སྔ་ཨ་རིའི་མི་གྲངས་བྱེ་བ་བརྒྱད་ལྷག་གིས་སྲིད་འཛིན་འོས་འདེམས་ཀྱི་འོས་ཤོག་འཕངས་ཟིན་པ། བོད་ཀྱི་ས་ཁུལ་འབྲི་རྫོང་དུ་བོད་མི་རྣམས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྡུག་རུ་ཕྱིན་ཡོད་པའི་ཐད་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྙན་ཐོ་ཞིག་བཏོན་ཡོད་པ་དང་། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་དེའི་ཐད་གསར་འགོད་གསལ་བསྒྲགས་སྤེལ་ཡོད་པ། རྒྱ་གར་གྱི་རྒྱལ་ས་ལྡི་ལིར་ཡོད་པའི་བོད་མི་ན་གཞོན་ཁག་ཅིག་གིས། སྤྱི་ལོ་ཉིས་སྟོང་བཅུ་ལོར་བོད་ཀྱི་ས་ཁུལ་རེབ་གོང་དུ་སློབ་མ་སྟོང་ཕྲག་ཁ་ཤས་ཀྱིས་བོད་ཀྱི་སྐད་ཡིག་ཐོབ་ཐང་སྲུང་སྐྱོབ་ཀྱི་ལས་འགུལ་སྤེལ་ནས་ལོ་འཁོར་བཅུ་འཁོར་བར་ངག་མེད་མགྲིན་ཚབ་པ་ཅེས་པའི་རྗེས་དྲན་གྱི་ལས་འགུལ་ཞིག་སྤེལ་ཡོད་པ་བཅས་ཀྱི་གནས་ཚུལ་ཡོད།

ཉིན་ལྟར་ཐོན་བཞིན་པའི་བོད་དང་ཨ་རིའི་གསར་འགྱུར་ཁག་དང་། འཛམ་གླིང་གསར་འགྱུར་ཁག་རྒྱང་སྲིང་ཞུས་པ་ཕུད། དེ་མིན་དམིགས་བསལ་ལེ་ཚན་ཁག་ཅིག་རྒྱང་སྲིང་ཞུ་བཞིན་ཡོད།