༄༅།། རྒྱ་ནག་དམར་ཤོག་གི་འགོ་ཁྲིད་ཞིས་ཅིན་ཕིང་དང་ཨུ་རུ་སུའི་སྲིད་དབང་གཅིག་སྡུད་པ་ཕུ་ཊིན་གཉིས་ཀྱིས་ཨ་རི་སོགས་ནུབ་ཕྱོགས་ཀྱི་དམངས་གཙོའི་ལམ་ལུགས་ལ་ཁ་གཏད་བཅག ཁོ་ཚོས་བཙན་དབང་རིང་ལུགས་དར་ཁྱབ་གཏོང་བར་ཨུ་རྒྱ་གཉིས་ཀྱི་འབྲེལ་བ་ནི་མུ་མཐའ་མེད་པ་ཞིག་ཡིན་ཞེས་སྔ་ལོ་པེ་ཅིང་དུ་ཚུགས་པའི་རྒྱལ་སྤྱིའི་དགུན་དུས་ཀྱི་ཨོ་ལིམ་ཕིཀ་རྩེད་འགྲན་གྱི་མཛད་སྒོའི་ཐོག་ཏུ་འུད་ཤོབ་ཆེན་པོ་བྱས་པ་ཀུན་གྱི་དྲན་ཡུལ་དུ་གསལ། ཕྱི་ཟླ་༦་པའི་ཚེས་༢༨་ཉིན་ཚོང་ལས་ནང་ཚགས་གསར་ཁང་གིས་གནས་ཚུལ་སྤེལ་བ་ལྟར་ན། བདུན་ཕྲག་སྔོན་མའི་གཟའ་མཇུག་དེར་ཨུ་རུ་སུའི་ཝེ་གྷ་ནར་གླས་དམག་ཚོགས་པས་ཕུ་ཊིན་ལ་གྱེན་ལོག་བྱས་པ་ནི་རྒྱ་ནག་གི་འགོ་ཁྲིད་ཞིས་ཅིན་ཕིང་ངོ་གནོང་དགོས་པ་ཞིག་ཏུ་གྱུར། རྒྱ་ནག་གིས་ཕུ་ཊིན་གྱི་ལངས་ཕྱོགས་ལ་རྒྱབ་སྐྱོར་བྱེད་ཀྱི་ཡོད་ཀྱང་ཨུ་རུ་སུར་ནང་འཁྲུག་ལངས། ཡུ་རོབ་རྒྱལ་ཁབ་ཁག་གིས་ཡུཀ་རེན་ལ་རྒྱབ་སྐྱོར་བྱས་ནས་རྒྱ་ནག་ལ་དཔལ་འབྱོར་འབྲེལ་བ་བཅད་ན་ཞིས་ཅིན་ཕིང་གིས་ཕུ་ཊིན་ལ་མཐུན་གྲོགས་བསྒྲིགས་པ་རྒྱ་ནག་གི་ཁེ་ཕན་ལ་གནོད་གཞི་ཞིག་ཏུ་འགྱུར་རྒྱུ་གདོན་མི་ཟ་ཞེས་གནས་ཚུལ་སྤེལ་འདུག
གལ་སྲིད་ཨུ་ཡུཀ་དམག་འཁྲུག་ནང་དུ་ཨུ་རུ་སུ་ཕམ་པ་ཡིན་ན་རྒྱལ་སྤྱིའི་ཐོག་ཏུ་ཞིས་ཅིན་ཕིང་འཕྱ་སྨོད་བྱ་ཡུལ་ཞིག་ཏུ་འགྱུར་རྒྱུ་དང་ཨུ་རུ་སུར་འབྲེལ་བ་བཅད་ན་འཛམ་གླིང་རྒྱལ་ཁབ་ཁག་གི་མིག་ལམ་དུ་ཞིས་ཅིན་ཕིང་དེ་བས་ཀྱང་མགོ་བོ་འགྱོག་ས་མེད་པ་ཞིག་ཏུ་འགྱུར་རྒྱུ་ཡིན་ཞིང་། ཡུ་རེ་ཤི་ཡ་ཞིབ་འཇུག་ཁང་གི་ཉམས་ཞིབ་པ་གྷ་རེམ་ཐོམ་སན་གྱིས་ཚོང་ལས་ནང་ཚགས་གསར་ཁང་ལ་ཞིས་ཅིན་ཕིང་ནས་ཡུཀ་རེན་གྱི་དམག་འཁྲུག་གིས་ཕུ་ཊིན་གྱི་དབང་ཐང་ཉམས་དམས་སུ་གཏོང་རྒྱུ་ཡིན་པ་སྔོན་དཔག་མ་ཐུབ་པ་ནི་ཐབས་རྡུགས་རེད། དམག་འཁྲུག་གིས་རྒྱལ་ཁབ་ཀྱི་སྟོབས་འབྱོར་ཉམས་ཟད་དུ་བཏང་སྟེ་སྲིད་དབང་སྒེར་གཅོད་ཀྱི་རྒྱལ་ཁབ་ཁག་གི་ཆབ་སྲིད་བརྟན་ལྷིང་མེད་པར་གཏོང་གི་ཡོད་པ་ཞིས་ཅིན་ཕིང་དང་ཕུ་ཊིན་གཉིས་ཀས་ཚོད་དཔག་མ་ཐུབ་པ་འདྲ། དེ་ནི་ཕྱི་ལ་རྫིག་ཉམས་བསྟན་ཡང་ནང་དུ་བཟོད་གླེགས་མེད་པའི་ན་ཟུག་ཅིག་ཡིན་ཤས་ཆེ། རྒྱ་ནག་གི་འགོ་ཁྲིད་ཚོས་ཨུ་རུ་སུའི་སྲིད་དབང་སྒེར་གཅོད་པ་ཚོར་མིག་དཔེ་བལྟས་ནས་ཉམས་མྱོང་བཟང་ངན་གཉིས་ཀ་བསླབས། ཞིས་ཅིན་ཕིང་གིས་ཡུཀ་རེན་གྱི་དམག་འཁྲུག་གི་འཕེལ་རིམ་ལ་གཞིགས་ནས་ཐེ་ཝན་ལ་སྲིད་ཇུས་གང་འདྲ་ཞིག་འཛིན་དགོས་མིན་ཐག་གཅོད་བྱ་སྲིད་ཅེས་བསྟན།།
ཚོང་ལས་ནང་ཚགས་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཞིས་ཅིན་ཕིང་གིས་ཕུ་ཊིན་གྱི་དབང་ཐང་དང་ཨུ་རུ་སུའི་སྲིད་གཞུང་སྲ་བརྟན་ཡིན་པར་གདེང་འཇོག་བྱ་རྒྱུ་ཐལ་དྲགས་པར་སྣང་། ད་ལྟ་ཕུ་ཊིན་ལ་གྱེན་ལོག་བྱུང་སྟེ་སྲིད་དབང་བརྟན་རྒྱུ་ཡིན་མིན་གྱི་མཚམས་སུ་བསླེབས་ཡོད་པས་ཞིས་ཅིན་ཕིང་གི་སྲིད་དབང་ཡང་བརྟན་རྒྱུ་ཡིན་མིན་ལ་འབྲེལ་བ་ཆགས། ཐོག་མར་ཨུ་རུ་སུའི་དམག་གིས་ཡུཀ་རེན་གྱི་རྒྱལ་ས་ཉི་མ་གསུམ་གྱི་ནང་དུ་ལེན་ཐུབ་ཅེས་ཁ་ཕོ་བཟློས་པར་དོན་འབྲས་མ་སོན། འདས་པའི་ལོ་གཅིག་ལྷག་ལ་ཨུ་རུ་སུའི་དམག་དཔུང་ཡུཀ་རེན་གྱི་དམག་འཁྲུག་གི་རྙོག་འཛིང་ནང་དུ་ཚུད་ནས་ཐར་གྱི་མེད་པས་ཞིས་ཅིན་ཕིང་གིས་བསམ་བློ་གཟབ་ནན་ཞིག་མ་བཏང་བར་ཐེ་ཝན་ལ་དམག་བརྒྱབ་ནས་ཡ་ཡུད་རྩེད་མི་ཕོད། རྒྱ་ནག་ལ་ཐབས་ཇུས་འབའ་ཞིག་ཡོད་པ་ནི་ཨུ་རུ་སུའི་ནང་ཁུལ་གྱི་འགལ་ཟླ་དང་གྱེན་ལོག་དེ་རྒྱལ་ཁབ་དེའི་ནང་སྲིད་རེད་ཅེས་གནད་འགག་ཆུང་དུ་གཏོང་རྒྱུ། མོ་སི་ཀོ་དང་པེ་ཅིང་གི་མཛའ་འབྲེལ་ལ་འགྱུར་བ་མེད་ཅེས་མུ་མཐའ་མེད་པའི་འབྲེལ་བ་ཟེར་བ་དེ་རྒྱུན་འཁྱོངས་བྱེད་ཀྱི་ཡོད་པའི་རྣམ་འགྱུར་སྟོན་རྒྱུ་ལས་ཅི་ཡང་མ་མཆིས་ཞེས་གནས་ཚུལ་སྤེལ་འདུག
ཨེ་ཊ་ལ་སི་ཞིབ་འཇུག་ཁང་གི་སྤྱི་ཁྱབ་འགན་འཛིན་ཇཱོ་ནེ་ཐན་ཝར་ཌིས་ཞིས་ཅིན་ཕིང་གིས་ཕུ་ཊིན་ལ་ཟླ་གྲོགས་སྒྲིག་གི་ཡོད་པ་ནི་རྒྱ་ནག་གིས་འཛམ་གླིང་ཡོངས་ལ་འཛིན་པའི་འཐབ་ཇུས་ལ་འབྲེལ་བ་ཡོད་པར་མ་ཟད། ཞིས་ཅིན་ཕིང་དང་ཕུ་ཊིན་གཉིས་ཀས་འཛམ་གླིང་ཡོངས་ལ་ནུབ་ཕྱོགས་ཀྱི་དམངས་གཙོའི་ལམ་ལུགས་ཀྱི་ཚབ་ཏུ་ཨུ་རུ་སུ་དང་རྒྱ་ནག་གི་བཙན་དབང་རིང་ལུགས་དར་སྐྱབ་གཏོང་རྒྱུའི་དམིགས་ཡུལ་བཅངས། ཞིས་ཅིན་ཕིང་གིས་རང་གི་སྲིད་དབང་སྲ་བརྟན་དང་ཆབ་སྲིད་ཀྱི་ཧམ་སེམས་དོན་དུ་ཕུ་ཊིན་ལ་འབྲེལ་བ་གཅོད་རྒྱུ་བློ་ཡུལ་དུ་ཤོང་དཀའ། ཝེ་གྷ་ནར་གླས་དམག་ཚོགས་པའི་འཐབ་མོ་བ་རྣམས་རྒྱལ་ས་མོ་སི་ཀོའི་ཕྱོགས་སུ་དཔུང་སྐྱོད་བྱས་པའི་རྗེས་སུ་རྒྱ་ནག་ལ་ཕུ་ཊིན་གྱི་སྲིད་དབང་བརྟན་རྒྱུ་ཡིན་མིན་བློ་འཚབ་བྱུང་འདུག ཞིས་ཅིན་ཕིང་གིས་སྒེར་ངོས་ནས་ཀྱང་ཕུ་ཊིན་ལ་འབྲེལ་བ་ཟབ་ཏུ་གཏོང་བར་ཆབ་སྲིད་ཀྱི་མ་རྩ་ཆེན་པོ་བཙུགས། ཁོ་པས་འཛམ་གླིང་རྒྱལ་ཁབ་གཞན་གྱི་འགོ་ཁྲིད་ཚོར་སྒེར་གྱི་འབྲེལ་བ་དམ་ཟབ་འཛུགས་པར་འབད་སྒྲུབ་དེ་འདྲ་ཞིག་བྱས་མི་འདུག ཞིས་ཅིན་ཕིང་གིས་རང་གི་ཆབ་སྲིད་ཀྱི་ཧམ་སེམས་མངོན་དུ་འགྱུར་བར་ཕུ་ཊིན་བློས་གཏོང་མི་སྲིད་ཅེས་གནས་ཚུལ་སྤེལ་འདུག
ཕྱི་ཟླ་༦་པའི་ཚེས་༢༨་ཉིན་ཡུ་རོབ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཝེ་གྷ་ནར་གླས་དམག་ཚོགས་པས་ཨུ་རུ་སུའི་མཐའ་མཚམས་ཀྱི་དམག་སྒར་གཉིས་བླངས། པ་རི་གྷོ་ཞིན་གྱིས་རང་གི་གླས་དམག་རྣམས་རྒྱལ་ས་མོ་སི་ཀོར་དཔུང་སྐྱོད་བྱ་དགོས་པའི་བཀའ་བཏང་ཡང་རྒྱ་ནག་གི་འགོ་ཁྲིད་ཚོས་སྣང་མེད་དུ་བཞག་སྟེ་ཕུ་ཊིན་གྱིས་ཨུ་རུ་སུའི་རྒྱལ་ནང་དུ་ཁྲིམས་དང་སྒྲིག་སྲོལ། ཞི་བདེ་བརྟན་ལྷིང་དགོས་ཞེས་ཁྱབ་བསྒྲགས་བྱས་པ་བསྐྱར་ཟློས། པ་རི་གྷོ་ཞིན་གྱིས་ཅིའི་ཕྱིར་ཨུ་རུ་སུའི་གཞུང་ལ་གྱེན་ལོག་བྱེད་ཀྱི་ཡོད་པ་སོགས་ལ་གླེང་སློང་ཙམ་ཡང་བྱས་མེད་པ་སྟེ། ཕྱི་ཚེས་༢༥་ཉིན་བྷེ་ལོ་རུ་སིའི་སྲིད་འཛིན་ལུ་ཁ་ཤན་ཀོས་བར་འདུམ་བྱས་པ་དང་ཝེ་གྷ་ནར་གླས་དམག་ཚོགས་པའི་འཐབ་མོ་བ་རྣམས་རྒྱལ་ས་མོ་སི་ཀོར་དཔུང་སྐྱོད་བྱེད་ཀྱི་ཡོད་པ་མཚམས་འཇོག་བྱས་པའི་རྗེས་སུ་རྒྱ་ནག་གིས་ད་གཟོད་གནད་དོན་དེ་ཨུ་རུ་སུའི་ནང་སྲིད་རེད། ཨུ་རུ་སུའི་བརྟན་ལྷིང་སྲུང་སྐྱོབ་དང་རྒྱལ་ཁབ་ཡར་རྒྱས་གཏོང་རྒྱུ་དེར་རྒྱ་ནག་གིས་རྒྱབ་སྐྱོར་བྱེད་ཀྱི་ཡོད་ཅེས་གསལ་བསྒྲགས་སྤེལ། ཉིན་དེར་ཨུ་རུ་སུའི་ཕྱི་སྲིད་བློན་ཆེན་གཞོན་པ་རྒྱ་ནག་ལ་འཚམས་འདྲིར་བསླེབས་ནས་ཕྱི་སྲིད་བློན་ཆེན་གཞོན་པ་མ་ཀྲའོ་ཤུའི་ལ་གྲོས་མོལ་བྱས་འདུག
ཡུ་རོབ་རང་རླུང་འཕྲིན་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཕུ་ཊིན་གྱི་སྲིད་དབང་ཡུན་རིང་བརྟན་ཐུབ་རྒྱུའི་ངེས་པ་མེད་པས་ཞིས་ཅིན་ཕིང་གིས་ངེས་པར་དུ་ཨུ་རུ་སུའི་འགོ་ཁྲིད་དེར་རྒྱབ་སྐྱོར་བྱེད་ཀྱི་ཡོད་པར་འགྱུར་བ་གཏོང་དགོས། ཕུ་ཊིན་དང་ཞིས་ཅིན་ཕིང་གི་འབྲེལ་བ་དེ་སྒེར་གྱི་སྲིད་དབང་སྲ་བརྟན་གྱི་ལྟ་གྲུབ་དང་དོན་དངོས་སུ་མཉམ་འབྲེལ་མ་བྱས་ཐབས་མེད་ཀྱི་འབྲེལ་བ་ཞིག་རེད། རྒྱ་ནག་གི་ཉམས་ཞིབ་པ་འགའ་ཞིག་གིས་པ་རི་གྷོ་ཞིན་གྱིས་གྱེན་ལོག་བྱས་ནས་ཞིས་ཅིན་ཕིང་དང་ཕུ་ཊིན་གྱི་འབྲེལ་བ་སྔར་བཞིན་རྒྱུན་འཁྱོངས་བྱེད་མི་ཐུབ་པ་ཞིག་ཏུ་འགྱུར་སྲིད་པའི་གླེང་སློང་བྱེད་ཀྱི་འདུག་ཅེས་བཀྲལ། རྒྱ་ནག་གི་སྤྱི་དམངས་ཤེས་ཡོན་ཅན་ཡུའི་ཅན་རོང་ལ་ཝི་པོ་དྲྭ་ཚུགས་སུ་རྗེས་འབྲང་བ་ས་ཡ་༧་ཡོད་ཅིང་། ཁོ་པས་ཨུ་རུ་སུའི་མི་དམངས་ཀྱིས་རོ་སི་ཊོབ་གྲོང་ཁྱེར་དུ་ཡེབ་གྷེ་ཎི་པ་རི་གྷོ་ཞིན་ལ་དགའ་མོས་དང་ཝེ་གྷ་ནར་གླས་དམག་ཚོགས་པར་རྒྱབ་སྐྱོར། ཨུ་རུ་སུའི་ཉེན་རྟོག་པར་ཁ་རྡུང་གཏོང་གི་ཡོད་པའི་བརྙན་ཐུང་ཞིག་བཀྲམ་སྟེ་ངས་རྒྱལ་ཁབ་འདིར་ཅི་ཞིག་འབྱུང་གི་ཡོད་པ་དངོས་གནས་ཤེས་ཀྱི་མི་འདུག་ཅེས་མཆན་བྲིས།།
རྒྱ་ནག་གི་དེང་རབས་འཛམ་གླིང་ཞིབ་འཇུག་ཁང་གི་སློབ་དཔོན་ཡུའི་སུའི་ཞེས་པ་ཞིག་གིས་རྒྱ་ནག་ཉིན་རེའི་ཚགས་པར་གྱི་གསར་འགོད་པར་གྱེན་ལོག་འབྱུང་གི་ཡོད་པ་ནི་ཨུ་རུ་སུའི་གཞུང་ལ་ཉེན་ཁ་ཆེན་པོ་ཞིག་རེད། ངས་ནི་སྟག་གསོས་ནས་ཉེན་ཁ་རང་སྟེང་དུ་བླངས་ཞེས་པའི་རྒྱ་ནག་གི་གཏམ་དཔེ་དེ་དྲན་གྱི་འདུག་ཅེས་བཤད། ཧྲང་ཧེ་གྲོང་ཁྱེར་དུ་གནས་འཁོད་རྒྱལ་སྤྱིའི་འབྲེལ་ལམ་རིག་པའི་མཁས་པ་ཧྲེན་ཏིང་ལིས་ཕུ་ཊིན་ལ་གྱེན་ལོག་བྱུང་བའི་རྗེས་སུ་རྒྱ་ནག་ལ་བསྙེ་རྒྱུ་མང་དུ་གཏོང་ངེས་རེད། རྒྱ་ནག་གིས་དེ་ལ་དོགས་ཟོན་གྱི་ལངས་ཕྱོགས་ཤིག་འཛིན་རྒྱུ་ཤུགས་ཆེ་རུ་གཏོང་ས་རེད་ཅེས་སྨྲས། ཨ་རིའི་ཁེ་ལི་ཧྥོར་ཎི་ཡ་མངའ་སྡེར་ཚུགས་ཡོད་པའི་ཁེ་ལེར་མོན་ཊི་མེ་ཀེན་ན་མཐོ་སློབ་ཀྱི་སློབ་དཔོན་པེ་མིན་ཞིན་གྱིས་ཡུཀ་རེན་ལ་བཙན་འཛུལ་བྱུང་བ་དང་དེའི་གཞུག་གི་ཕུ་ཊིན་གྱི་སྤྱོད་པ་དེ་ཚོས་ཞིས་ཅིན་ཕིང་ལ་སྣ་སུན་མང་པོ་ཕོག ཞིས་ཅིན་ཕིང་ལ་ཕུ་ཊིན་ལྟར་སྒེར་དམག་མེད། ཁོ་པར་རྒྱ་ནག་གི་དམག་གི་རྒྱབ་སྐྱོར་ཐོབ་སྟེ་རྒྱལ་ཁབ་ཀྱི་སྲིད་དབང་སྒེར་སྡོམ་བྱ་དགོས་ན་ཉམས་མྱོང་དེ་ཚོ་མ་བསླབས་ཐབས་མེད་རེད། པ་རི་གྷོ་ཞིན་གྱིས་ཕུ་ཊིན་ལ་གྱེན་ལོག་བྱས་ནས་ཞིས་ཅིན་ཕིང་ལ་མི་རིགས་རིང་ལུགས་ནི་རལ་གྲི་སོ་གཉིས་མ་ལྟ་བུ་ཞིག་ཡིན་པ་ངོ་འཕྲོད་དུ་བཅུག་ཡོད་ངེས་རེད་ཅེས་བཤད་འདུག
ཕྱི་ཟླ་༦་པའི་ཚེས་༢༧་ཉིན་ཕྱི་སྲིད་དུས་དེབ་ལ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཨུ་རུ་སུའི་ཝེ་གྷ་ནར་གླས་དམག་ཚོགས་པས་ཕུ་ཊིན་ལ་གྱེན་ལོག་བྱས་པར་ལངས་ཕྱོགས་གང་འདྲ་ཞིག་འཛིན་དགོས་པ་ཐག་མ་ཆོད་པར་ལུས་འདུག དཔེར་ན་རྒྱ་ནག་གི་མི་རིགས་རིང་ལུགས་པའི་རྩོམ་པ་པོ་ཧུ་ཤི་ཅིན་གྱིས་ཨུ་རུ་སུའི་གྱེན་ལོག་ལ་འཕྲལ་དུ་གླེང་སློང་མ་བྱས་པ་ནི་རྒྱ་ནག་གི་འགོ་ཁྲིད་ཚོ་མགོ་བོ་འཐོམས་པའི་རྟགས་སུ་མངོན། གཟའ་མཇུག་དེར་ཨུ་རུ་སུའི་ཁེ་རིམ་ལིན་སྲིད་འཛིན་ལས་ཁུངས་ཀྱི་ཕྱི་ལོགས་སུ་ཀུན་གྱིས་གྱེན་ལོག་འབྱུང་གི་ཡོད་པ་མཐོང་ཡང་པེ་ཅིང་གི་འགོ་ཁྲིད་ཚོ་མུན་འཐོམས་བྱས་ནས་ལུས་པ་མིན་ནམ། རྒྱ་ནག་གི་འགོ་ཁྲིད་ཚོས་ཅི་ཞིག་འབྱུང་གི་ཡོད་པ་གསལ་པོ་ཞིག་གཏན་ནས་ཤེས་ཀྱི་ཨེ་ཡོད་སྙམ་ཞེས་སྤྱི་ཚོགས་དྲྭ་ལམ་དུ་འཕྲིན་ཐུང་ཞིག་སྤེལ། པ་རི་གྷོ་ཞིན་གྱིས་ཕུ་ཊིན་ལ་གྱེན་ལོག་བྱས་ནས་རྒྱ་ནག་དམར་ཤོག་ཚོགས་པའི་མཐོ་རིམ་འགོ་ཁྲིད་ཚོར་འཇིགས་སྣང་བྱུང་། ཝེ་གྷ་ནར་གླས་དམག་གི་གྱེན་ལོག་དེས་རྒྱ་ནག་ལ་འགྱུར་བ་ཆེན་པོ་ཞིག་ཐེབས་མི་ཐུབ་ཀྱང་རྒྱ་ནག་གི་བྱུང་རབས་སུ་དམག་མི་རྣམས་གོང་མ་ལས་ཀྱང་རང་གི་དམག་སྤྱི་ཚོར་གཞུང་དྲང་བློ་དཀར་ཡིན་པའི་ལོ་རྒྱུས་མང་དུ་བྱུང་ཡོད་པ་རེད་ཅེས་གནས་ཚུལ་སྤེལ་འདུག
