ལྷོ་ཀོ་རི་ཡའི་གྲོས་ཚོཊ་ཀྱིས་སྲིད་འཛིན་ལ་ཉེས་འཛུགས་བྱ་རྒྱུའི་གྲོས་ཆོད་བཞག

༢༠༢༤།༡༢།༡༤།

ཨ་རིའི་རླུང་འཕྲིན་ཁང་།

༄༅།། ལྷོ་ཀོ་རི་ཡའི་རྒྱལ་ཡོངས་གྲོས་ཚོགས་ནས་སྲིད་འཛིན་ཡོན་སུག་ཡོལ་(Yoon་Suk Yeol )་གྱིས་དམག་ཁྲིམས་བསྡམས་པའི་ཁྱབ་བསྒྲགས་བྱས་པར་ཉེས་འཛུགས་བྱ་དགོས་པའི་གྲོས་ཆོད་བཞག་ཅིང་། ཕྱི་ཟླ་༡༢་པའི་ཚེས་༡༤་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ལྷོ་ཀོ་རི་ཡའི་གྲོས་ཚོགས་འཐུས་མི་༢༠༤་ཡིས་སྲིད་འཛིན་ལ་ཉེས་འཛུགས་བྱ་དགོས་པའི་འོས་ཤོག་འཕངས། འཐུས་མི་༨༥་ཡིས་སྲིད་འཛིན་ལ་ཉེས་འཛུགས་བྱ་རྒྱུ་མིན་པའི་འོས་ཤོག་འཕངས་འདུག རྒྱལ་ས་སོལ་གྲོང་ཁྱེར་དུ་ལྷོ་ཀོ་རི་ཡའི་མི་མང་ཁྲི་ཚོ་མང་པོས་སྲིད་འཛིན་ལ་ཉེས་འཛུགས་ཀྱི་ཐག་གཅོད་བྱུང་བར་དགའ་བསུ་ཞུས། གཟའ་སྤེན་པའི་ཕྱི་དྲོ་ནས་སྲིད་འཛིན་གྱི་དབང་ཚད་ཕྱིར་བསྡུ་དང་སྲིད་བློན་ཧན་ཏུག་སུ་(Han Duck-soo)་ལ་རྒྱལ་ཁབ་འཛིན་སྐྱོང་གི་འགན་དབང་སྤྲད།།

ལྷོ་ཀོ་རི་ཡའི་ཆེས་མཐོའི་ཁྲིམས་ཁང་གིས་ཉི་མ་༡༨༠་ཐམ་པའི་ནང་ཚུད་དུ་སྲིད་འཛིན་གནས་དབྱུང་གཏོང་བའམ། ཡང་ན་སྲིད་འཛིན་གྱི་དབང་ཚད་བསྐྱར་གསོ་བྱ་རྒྱུའི་ཐག་གཅོད་བྱ་དགོས། གལ་སྲིད་ཆེས་མཐོའི་ཁྲིམས་ཁང་གིས་སྲིད་འཛིན་ཡོན་སུག་ཡོལ་གནས་དབྱུང་གཏང་དགོས་པའི་བཅད་ཁྲ་བསྒྲགས་ཚེ། ཉི་མ་༦༠་ཐམ་པའི་ནང་ཚུད་དུ་ལྷོ་ཀོ་རི་ཡར་འོས་བསྡུ་བྱས་ནས་སྲིད་འཛིན་ཡོན་སུག་ཡོལ་གྱི་རྗེས་འཛིན་པ་ཞིག་གདམ་དགོས་ཤིང་། བདུན་ཕྲང་སྔོན་མའི་གཟའ་སྤེན་པའི་ཉིན་ལྷོ་ཀོ་རི་ཡའི་གྲོས་ཚོགས་འཐུས་མི་ཚོས་སྲིད་འཛིན་ལ་ཉེས་འཛུགས་བྱ་རྒྱུའི་འོས་ཤོག་འཕངས་ཀྱང་གཞུང་འཛིན་མི་དམངས་སྟོབས་ཤུགས་ཚོགས་པའི་འཐུས་མི་ཁག་ཅིག་གིས་རྒྱབ་སྐྱོར་མ་བྱས་པར་གྲོས་ཆོད་འཇོག་མ་ཐུབ། དེ་རིང་གཟའ་སྤེན་པའི་ཉིན་སྲིད་འཛིན་ཡོན་སུག་ཡོལ་གྱི་མི་དམངས་སྟོབས་ཤུགས་ཚོགས་པའི་གྲོས་ཚོགས་འཐུས་མི་ཁག་ཅིག་གིས་སྲིད་འཛིན་ལ་ཉེས་འཛུགས་བྱ་དགོས་པའི་འོས་ཤོག་འཕངས་ཏེ་གྲོས་ཆོད་འཇོག་ཐུབ་པ་བྱུང་འདུག

ལྷོ་ཀོ་རི་ཡའི་རྒྱལ་ཡོངས་གྲོས་ཚོགས་ཀྱི་ཚོགས་གཙོ་ཝུ་ཝོན་ཤཱིག་(Woo Won Shik)་གིས་སྲིད་འཛིན་ཡོན་སུག་ཡོལ་ལ་ཉེས་འཛུགས་བྱ་དགོས་པའི་གྲོས་ཆོད་འཇོག་ཐུབ་པ་ནི་མང་ཚོགས་དམངས་གཙོར་མོས་པ་ཡོད་པ་དང་མི་དམངས་ཀྱིས་སྙིང་སྟོབས་བསྐྱེད་ནས་ངོ་རྒོལ་བྱས་པའི་གྲུབ་འབྲས་རེད་ཅེས་བསྔགས་བརྗོད་བྱས་པར་མ་ཟད། སྲིད་འཛིན་གྱིས་དམག་ཁྲིམས་བསྡམས་ནས་སྲིད་དབང་གཅིག་སྡུད་བྱ་ཐབས་བྱས་པར་ངོ་རྒོལ་ལས་འགུལ་སྤེལ་མཁན་འགོ་ཁྲིད་ཚོས་སྡིངས་ཆའི་ཐོག་ཏུ་མང་ཚོགས་ལ་ང་ཚོས་རྩ་ཁྲིམས་ཀྱི་སྒྲིག་སྲོལ་སྲུང་སྐྱོབ་ཐུབ་པ་རེད་ཅེས་བསྒྲགས། ཀིམ་སུ་པང་ཞེས་པའི་ངོ་རྒོལ་བ་ཞིག་གིས་མི་དམངས་ཀྱིས་དགོས་འདུན་བཏོན་པ་ལྟར་སྲིད་འཛིན་ལ་ཉེས་འཛུགས་བྱ་རྒྱུའི་གྲོས་ཆོད་འཇོག་ཐུབ་པ་རེད། ང་ནི་ཧ་ཅང་དགའ་པོ་བྱུང་བ་དང་སེམས་འགུལ་ཡང་ཐེབས་བྱུང་། ངས་ནི་གྲོས་ཚོགས་ཀྱི་ཐག་གཅོད་འདི་མི་དམངས་ཀྱི་རྒྱལ་ཁ་ཞིག་ལ་ངོས་འཛིན་བྱེད་ཀྱི་ཡོད་ཅེས་གསར་འགོད་པར་གླེང་མོལ་བྱས་འདུག

སྲིད་འཛིན་ཡོན་སུག་ཡོལ་གྱི་རྒྱབ་སྐྱོར་བ་ཚོས་ལོགས་སུ་གྲོས་ཚོགས་ཀྱི་ཐག་གཅོད་ལ་ངོ་རྒོལ་ལས་འགུལ་སྤེལ་མོད། འོན་ཀྱང་སྲིད་འཛིན་ལ་ཉེས་འཛུགས་བྱ་དགོས་ཞེས་ལས་འགུལ་སྤེལ་མཁན་ཤོག་ཁག་དེར་སྟོབས་ཤུགས་ཆེ་དྲགས་པ་དང་མི་གྲངས་མང་དྲགས་ཏེ་སྲིད་འཛིན་གྱི་རྒྱབ་སྐྱོར་བའི་ལས་འགུལ་དེ་ཟིལ་གྱིས་མནན། སྲིད་འཛིན་ཡོན་སུག་ཡོལ་གྱིས་ངས་ནམ་ཡང་འཐབ་རྩོད་བྱ་རྒྱུ་མཚམས་འཇོག་བྱེད་ཀྱི་མིན། ངའི་སྲིད་དབང་གནས་སྐབས་རིང་ཕྱིར་བསྡུ་བྱས་པའི་སྐབས་དེར་འབྲེལ་ཡོད་ལས་སྣེ་ཚོས་ལྷོ་ཀོ་རི་ཡའི་སྲིད་གཞུང་གི་ལས་དོན་བསྒྲུབ་རྒྱུ་འཐུས་ཤོར་གཏོང་མི་ཉན། ང་ལ་སྐྱོན་བརྗོད་དང་རྒྱབ་སྐྱོར། ཡར་སྐུལ་བྱས་པ་རྣམས་སེམས་ལ་བཟུང་ཡོད། ངས་མཐའ་མཇུག་བར་དུ་རྒྱལ་ཁབ་ལ་ཕན་པའི་ལས་དོན་གང་ལེགས་བསྒྲུབ་རྒྱུ་ཡིན་ཞེས་གསལ་བསྒྲགས་སྤེལ།།

ཁ་སྔོན་ཕྱི་ཟླ་༡༢་པའི་ཚེས་༣་གྱི་མཚན་མོར་སྲིད་འཛིན་ཡོན་སུག་ཡོལ་གྱིས་དམག་ཁྲིམས་བསྡམས། གྲོས་ཚོགས་འཐུས་མི་ཚོས་སྲིད་འཛིན་གྱིས་དམག་ཁྲིམས་བསྡམས་པར་ངོ་རྒོལ་གྱི་འོས་ཤོག་འཕངས། དེ་ནས་ཆུ་ཚོད་༦་གི་རྗེས་སུ་སྲིད་འཛིན་གྱིས་དམག་འཁྲུག་བསྡམས་པ་ཕྱིར་འཐེན་བྱ་དགོས་བྱུང་ཞིང་། འདས་པའི་བདུན་ཕྲག་གཉིས་ཡས་མས་ཤིག་གི་རིང་ལྷོ་ཀོ་རི་ཡར་ཆབ་སྲིད་ཀྱི་ཟིང་ཆ་ལངས་ཏེ་དཔལ་འབྱོར་ལ་གནོད་སྐྱོན་དང་དངུལ་རྩའི་ཁྲོམ་ར་ཁག་གི་མ་རྐང་ཆག་སྟེ་བརྡབ་གསིག་ཕོག སྲིད་འཛིན་ལས་ཚབ་སྲིད་བློན་ཧན་ཏུག་སུ་ཡིས་ལྷོ་ཀོ་རི་ཡའི་དམག་དཔུང་ལ་རྒྱལ་ཁབ་སྲུང་སྐྱོབ་ཐད་གཟབ་ནན་བྱ་དགོས། བྱང་ཀོ་རི་ཡ་རྩིས་ལོག་ཐེབས་པ་དང་ཡུལ་དུས་ཚོད་རྩིས་བྱས་ནས་འཁྲུག་རྩོད་སློང་རྒྱུའི་ཉེན་ཁ་ཆེ། ཕྱི་སྲིད་བློན་ཆེན་གྱིས་ལྷོ་ཀོ་རི་ཡའི་སྲིད་ཇུས་ལ་འགྱུར་བ་གང་ཡང་ཕྱིན་མེད་ཅེས་ཕྱི་འབྲེལ་བཙུགས་ཡོད་པའི་རྒྱལ་ཁབ་ཁག་ལ་བརྡ་རྒྱག་དགོས་པའི་བཀའ་ཕབ།།

ལྷོ་ཀོ་རི་ཡར་བཅའ་སྡོད་ཨ་རིའི་གཞུང་ཚབ་པ་ཧྥིབ་ཨེ་སི་གྷོལ་ཌ་བྷག་(Philip S. Goldberg)་གིས་ཨ་མི་རི་ཀས་ལྷོ་ཀོ་རི་ཡའི་དམངས་གཙོའི་ལམ་ལུགས་དང་རྩ་ཁྲིམས་འཛིན་གྱི་ཐག་གཅོད་ལ་རྒྱབ་སྐྱོར་བྱ་རྒྱུ་ཡིན། ང་ཚོ་ལྷོ་ཀོ་རི་ཡའི་མི་དམངས་ཀྱི་ཕྱོགས་སུ་ལངས་ཡོད་ཅེས་ཨེག་སི་དྲྭ་ཚིགས་སུ་འཕྲིན་ཐུང་ཞིག་སྤེལ། དེ་བཞིན་ཉི་ཧོང་གི་སྲིད་བློན་ཨི་ཤཱི་བྷས་(Shigeru Ishiba)་ལྷོ་ཀོ་རི་ཡའི་ཆབ་སྲིད་ཀྱི་འཕོ་འགྱུར་དེར་ང་ཚོས་གཟབ་ནན་བྱས་ནས་དོ་སྣང་བྱེད་ཀྱི་ཡོད། ཉི་ཧོང་དང་ལྷོ་ཀོ་རི་ཡའི་འབྲེལ་བར་དོ་ཕོག་མི་འབྱུང་བ་བྱ་རྒྱུ་གནད་འགག་ཆེན་པོ་ཡིན་ཞེས་གསར་འགོད་པའི་དྲི་བར་ལན་བཏབ། སྲིད་འཛིན་ཡོན་སུག་ཡོལ་གྱིས་དམག་ཁྲིམས་བསྡམས་ནས་ལྷོ་ཀོ་རི་ཡའི་མཐོ་རིམ་ལས་སྣེ་འགའ་ཞིག་གིས་རང་རང་གི་ལས་གནས་ནས་དགོངས་པ་ཞུ་དགོས་བྱུང་བ་དང་ལས་སྣེ་ཁག་ཅིག་འཛིན་བཟུང་བྱས་པའི་གནས་ཚུལ་ཐོན་འདུག