འཇམ་དབྱངས་བསྟན་འཛིན་ལགས་ཀྱིས་ཕྱི་ཟླ་ ༡༠ ཚེས་ ༡༢ ཉིན་བཞུགས་སྒར་རྡ་རམ་ས་ལ་ནས་གནས་མཆོག་རྡོ་རྗེ་གདན་བར་ང་ཚོས་བོད་ནམ་ཡང་མ་བརྗེད་ཅེས་པའི་རྐང་འཁོར་སྐོར་བསྐྱོད་ཀྱི་ལས་འགུལ་ཞིག་འགོ་འཛུགས་གནང་སོང་། སྐབས་དེར་དབུས་བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ་གཙོས་པའི་ཚོགས་སྒེར་ཁག་ཅིག་གི་སྐུ་ཚབ་དང་མི་མང་ཚོས་འཇམ་དབྱངས་བསྟན་འཛིན་ལགས་ཀྱི་རྐང་འཁོར་གྱི་ལས་འགུལ་ལ་བསྔགས་བརྗོད་གནང་བ་དང་འབྲེལ་མཇལ་དར་བསྒྲོན་གནང་བ་དང་། དེ་བཞིན་འཇམ་དབྱངས་བསྟན་འཛིན་ལགས་ཀྱིས་ལས་འགུལ་འདི་སྤེལ་དགོས་དོན་དེ་ཡང་རྒྱ་གར་ཡུལ་མིའི་ཁྲོད་བོད་ཀྱི་གནད་དོན་དང་བོད་མི་ཞེས་པ་གང་ཡིན་མིན་སྐོར་གོ་རྟོགས་སྤེལ་རྒྱུ་དང་། གཞན་འཆར་ལོའི་ནང་དབུས་བོད་མིའི་སྒྲིག་འཛུགས་ཀྱི་ལས་དོན་ཁག་ལེགས་འགྲུབ་ཡོང་རྒྱུའི་སྨོན་ལམ་དང་། མ་འོངས་པར་བོད་རིགས་གཞོན་སྐྱེས་ཚོས་བོད་དོན་ལས་འགུལ་སྤེལ་རྒྱུའི་ཐད་ལ་སེམས་ཤུགས་སྤེལ་ཆེད་དུ་ཡིན་པའི་སྐོར་ལ་གསུངས་གནང་སོང་།
རང་ལོ་ ༦༣ ལ་ཕེབས་པ་འཇམ་དབྱངས་བསྟན་འཛིན་ལགས་ནི། ལྡེ་ར་རྡུན་བོད་མིའི་གཞིས་ཆགས་ནས་ཡིན་པ་དང་། ཁོང་ནི་དུས་རྒྱུན་གཞོན་ནུའི་ལས་འགུལ་ཁག་ནང་མཉམ་བཞུགས་གནང་མཁན་ཞིག་ཡིན་པ་འགྲེལ་བརྗོད་གནང་གི་འདུག་ལ། བཞུགས་སྒར་རྡ་རམ་ས་ལ་ནས་གནས་མཆོག་རྡོ་རྗེ་གདན་བར་ལམ་ཐག་ཀི་ལོ་མེ་ཊྲར། ༢༠༠༠ ལྷག་ཡོད་པས། རྐང་འཁོར་སྐོར་བསྐྱོད་ཀྱི་ལས་འགུལ་འདི་བཞིན་ཉིན་གྲངས་ ༥༥ ལྷག་འགོར་སྲིད་པས། དུས་ཡུན་འདིའི་རིང་གནས་སྟངས་ཇི་ལྟར་ཡང་རང་ངོས་ནས་གདོང་ལེན་བྱ་རྒྱུའི་ཆོད་སེམས་ཡོད་པ་ཡང་འགྲེལ་བརྗོད་གནང་སོང་།
གཞི་རྩའི་ད་རེས་ཀྱི་རྐང་འཁོར་སྐོར་བསྐྱོད་ཀྱི་ལས་འགུལ་གྱི་གསར་འགོད་བསྒྲགས་གཏམ་ནང་གནས་ཡུལ་རྒྱ་གར་ཡུལ་མིའི་ཁྲོད་བོད་དོན་དྲིལ་བསྒྲགས་དང་། བོད་མིའི་སྤྱིའི་ཚོགས་ནང་བོད་སྤྱིའི་རྩ་དོན་འཐབ་རྩོད་གལ་འགངས་ཆེན་པོ་ཡིན་པའི་དྲན་སྐུལ། དེ་བཞིན་འཆར་ལོའི་ནང་དབུས་བོད་མིའི་སྒྲིག་འཛུགས་ཀྱི་ལས་དོན་དང་གྲོས་ཚོགས་སོགས་གང་སྤྱིའི་ཐད་ཚགས་ཚུད་ལེགས་གྲུབ་ཡོང་བའི་སྨོན་འདུན། བོད་རིགས་གཞོན་སྐྱེས་ཚོར་མ་འོངས་བོད་དོན་ལས་འགུལ་སྤེལ་རྒྱུའི་ཐད་སྐུལ་མའམ་སེམས་ཤུགས་སྤེལ་རྒྱུ་བཅས་དོན་ཚན་བཞིའི་ཐོག་ཡིན་པ་འཁོད་འདུག
