རྒྱ་ནག་གཞུང་གིས་རྒྱ་ནག་གཞུང་གི་མཐུན་ཕྱོགས་རྒྱལ་ཁབ་ཁག་གི་གསར་འགོད་པ་དང ཕྱི་རྒྱལ་དུ་ཡོད་པའི་བོད་པ་བོད་དུ་ལྟ་སྐྱོར་དུ་ཁྲིད་ནས་ཁོ་ཚོ་བརྒྱུད་ནས་རྒྱལ་སྤྱིར་རྒྱ་ནག་གིས་བོད་ཐོག་ཡར་རྒྱས་དང་རང་དབང་ཡོད་ལུགས་ཁྱབ་བསྒྲགས་བྱེད་འཇུག་རྒྱུའི་སྲིད་ཇུས་ཤིག་ལག་བསྟར་བྱེད་བཞིན་ཡོད་པ་རེད།
ཕྱི་ཟླ་བཅུ་པའི་ནང་ཀྲུང་གོའི་གསར་འགྱུར་སྤེལ་རེས་ལྟེ་གནས་ཞེས་པས་གོ་སྒྲིག་བྱས་ཏེ་རྒྱ་ནག་གི་མཐུན་ཕྱོགས་ཡིན་པའི་རྒྱལ་ཁབ་༢༢ ཀྱི་གསར་འགོད་པ་༣༣ ལྷ་ས་དང་མངའ་རིས་ཀོང་པོ་བཅས་ལ་ལྟ་སྐོར་དུ་ཁྲིད་ཡོད་པ་དང་ལྷ་སའི་ཁུལ་དུ་གདན་ས་སེ་འབྲས་དགེ་གསུམ་དང་པོ་ཏ་ལ་གཙུག་ལག་ཁང་དེ་བཞིན་སྟོད་ལུང་ནང་གསར་དུ་འཛུགས་སྐྲུན་བྱས་པའི་ཡུལ་གཞན་ནས་གནས་སྤོའི་གྲོང་ཚོ་ཆེ་ཤོས་འཆམ་མཐུན་དགའ་ཚལ་གླིང་། བོད་ལྗོངས་སློབ་ཆེན་སོགས་ལ་ལྟ་སྐོར་བྱས་པ་མ་ཟད་ཁོང་ཚོར་བོད་ལ་ཆོས་ལུགས་རང་དབང་དང་མང་ཚོགས་ཀྱི་འཚོ་བ་ཡག་པོ་ཡོད་པ་རིག་གཞུང་སྲུང་སྐྱོབ་བྱས་ཡོད་ཚུལ་སོགས་འཁྱོག་བཤད་བྱས་ཡོད་པ་མ་ཟད།
ཕྱི་རྒྱལ་གསར་འགོད་པས་ཁས་བླངས་དོན་བོད་དང་ཞིན་ཅང་ལ་འགྲོ་དུས་་ཁོ་ཚོའི་རང་དབང་ལ་སྲུང་སྐྱོབ་ཧ་ཅང་ཡག་པོ་ཐོབ་ཡོད། ནུབ་ཕྱོགས་ཀྱི་གསར་འགྱུར་བརྒྱུད་ལམ་ཁ་ཤས་ཀྱིས་བོད་དང་ཞིན་ཅང་སྐོར་གྱི་རྫུན་གཏམ་མང་པོ་རྫུན་བཟོ་བྱས་ཡོད་ཚུལ་བཤད་པ་དང་ ད་དུང་བོད་ནང་གི་གཏན་འཇགས་སློབ་གྲྭའི་ནང་ཡོད་པའི་བྱིས་པ་རྣམས་ལ་འདྲ་མཉམ་ཀྱེ་ཁེ་དབང་ལོངས་སུ་སྤྱོད་རྒྱུ་ཡོད་པའི་སྐོར་གནས་ཚུལ་རྒྱལ་སྤྱིར་ཁྱབ་བསྒྲགས་བྱེད་རྒྱུ་ཡིན་ལུགས་བཤད་པའི་གནས་ཚུལ་སྤེལ་ཡོད་པའི་སྐོར་དང་ད་དུང་ཕྱི་རྒྱལ་ཁབ་ལ་གནས་སྡོད་བོད་མི་ཁག་ཅིག་ཀྱང་ལྟ་སྐོར་དུ་མགྲོན་འབོད་བཀོད་སྒྲིག་བྱས་ཏེ་བོད་དོན་འཁྱོག་བཤད་ཁྱབ་བསྒྲགས་བྱེད་ཀྱི་ཡོད་པའི་སྐོར་གྱི་གནས་ཚུལ།
