༄༅།། ༢༠༢༣་ལོའི་ཕྱི་ཟླ་དང་པོ་ནས་ཕྱི་ཟླ་༦་པའི་བར་དུ་འབྲུག་ཡུལ་གྱི་གཞུང་ཞབས་པ་༢༩༠༠་ལྷག་གིས་རང་གི་ལས་གནས་ནས་རྩ་དགོངས་ཞུས་པའམ། ཡང་ན་རྒས་ཡོལ་དུ་ཕྱིན་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༡༥་ཉིན་འབྲུག་ཡུལ་གྱི་ཀུན་གསལ་ཁང་གིས་གནས་ཚུལ་སྤེལ་བ་ལྟར་ན། ལོ་འདིའི་མགོ་སྟོད་ཟླ་བ་༦་གི་རིང་འབྲུག་ཡུལ་གྱི་གཞུང་ཞབས་པ་༢༩༣༤་རང་གི་ལས་གནས་ཁག་ནས་ཕྱིར་འཐེན་བྱས་པ་ནི་ཉེ་བའི་ལོ་ཤས་ནང་དུ་བྱུང་མྱོང་མེད་པའི་གཞུང་ཞབས་པས་དགོངས་པ་ཞུས་པ་དང་རྒས་ཡོལ་དུ་ཕྱིན་པ་མང་ཤོས་ཤིག་ཡིན་འདུག འབྲུག་རྒྱལ་ཡོངས་ཞི་གཡོག་ལྷན་ཚོགས་ཀྱི་གཞི་གྲངས་སུ་འགན་འཛིན་དང་དམིགས་བསལ་ཆེད་སྦྱོང་གི་ལས་གནས་འཛིན་པའི་སྲི་ཞུ་བ་༡༤་ཡིས་དགོངས་པ་ཞུས། དེ་བཞིན་ཆེད་ལས་དང་འཛིན་སྐྱོང་གི་ཁྱབ་ཁོངས་ནས་སྲི་ཞུ་བ་༡༤༥༢་ཡིས་དགོངས་པ་ཞུས་པ་དང་སྟངས་འཛིན་དང་རྒྱབ་གནོན་སྲི་ཞུ་བའི་ཁོངས་ནས་མི་༡༢༤༡་གིས་དགོངས་པ་ཞུས་འདུག སྲི་ཞུ་བ་དཀྱུས་མ་༢༢༧་གྱིས་རང་གི་ལས་གནས་ཁག་ནས་དགོངས་པ་ཞུས་སོང་ཞེས་གསལ་བསྒྲགས་སྤེལ་འདུག
སྔ་ལོ་འབྲུག་ཡུལ་གྱི་གཞུང་ཞབས་བརྒྱ་ཆ་༨.༦༢་ཀྱིས་དགོངས་པ་ཞུས་པ་དང་ལོ་འདིའི་ཟླ་བ་༦་གི་རིང་གཞུང་ཞབས་པ་དགོངས་པའི་ཞུས་པའི་གྲངས་འབོར་བརྒྱ་ཆ་༡༠་ལ་འཕར། ༢༠༢༠་ནས་འབྲུག་ཡུལ་གྱི་གཞུང་ཞབས་པ་ཚོས་རང་གི་ལས་གནས་ནས་དགོངས་པ་ཞུ་རྒྱུ་མང་དུ་ཕྱིན་ཡོད་ཅིང་། ༢༠༢༠་ལོའི་ཕྱི་ཟླ་དང་པོ་ནས་ཕྱི་ཟླ་༦་པའི་བར་དུ་འབྲུག་ཡུལ་གྱི་གཞུང་ཞབས་པ་༥༩༠་ཐམ་པས་དགོངས་པ་ཞུས། ༢༠༢༡་གི་མགོ་སྟོད་ཟླ་བ་༦་གི་རིང་འབྲུག་ཡུལ་གྱི་གཞུང་ཞབས་པ་༨༡༠་དང་༢༠༢༢་ཀྱི་མགོ་སྟོད་ཟླ་བ་༦་གི་རིང་གཞུང་ཞབ་སཔ་༩༡༨་ཀྱིས་རང་གི་ལས་གནས་ནས་ཕྱིར་འཐེན་བྱས། ༢༠༢༣་གྱི་ཕྱི་ཟླ་༧་པའི་ཚེས་༥་ཡི་མཚམས་སུ་འབྲུག་གཞུང་ལ་སྲི་ཞུ་བ་༢༩༡༤༡་ལས་མེད་ཅིང་། སྔོན་ཆད་འབྲུག་རྒྱལ་གཞུང་གི་སྲི་ཞུ་བར་འགྱུར་རྒྱུ་ནི་ཀུན་གྱིས་རེ་སྨོན་བྱ་སའི་ཆེད་ལས་དེ་ཡིན་མོད། ཏོག་དབྱིབས་ནད་ཡམས་འཇོམས་པ་དང་རྒྱལ་སྤྱིའི་ཐོག་ཏུ་འགྲིམ་འགྲུལ་སྒོ་ཕྱེ་པའི་རྗེས་སུ་འབྲུག་ཡུལ་གྱི་གཞུང་ཞབས་པ་རྣམས་ཨོ་གླིང་དང་ཁེ་ན་ཌ་སོགས་ནུབ་ཕྱོགས་རྒྱལ་ཁབ་ཁག་ཏུ་བསྐྱོད་འགོ་ཚུགས།།
འབྲུག་ཡུལ་གྱི་སྲི་ཞུ་བ་ཁག་ཅིག་གིས་རང་ཉིད་གཞུང་ཞབས་ཁོངས་ནས་དགོངས་པ་ཞུ་དོན་གཙོ་བོ་ནི་རང་ཡུལ་དུ་མདུན་ལམ་ཆེན་པོ་མེད་པ་དང་ལས་ཀ་བརྟན་པོ་མེད་པ། ཕྱི་རྒྱལ་ཡུལ་གྲུ་ཁག་ཏུ་ན་ལས་ཀའི་གོ་སྐབས་དང་དཔལ་འབྱོར་ཡོང་འབབ། མདུན་ལམ་སོགས་གང་ཅིའི་ཐད་དུ་འབྲུག་ཡུལ་ལས་བརྟན་པོ་རེད་ཅེས་རྒྱུ་མཚན་བགྲངས། འབྲུག་ཡུལ་གྱི་གཞུང་ཞབས་པ་ཕོན་ཆེན་ཞིག་གིས་རང་གི་ལས་གནས་ནས་དགོངས་པ་ཞུ་བཞིན་ཡོད་པས་སྲིད་གཞུང་ལ་ཆེད་ལས་པ་སོགས་མི་ཆ་གནད་འགག་ཅན་རྣམས་ཉུང་དུ་ཕྱིན་ནས་དཀའ་ངལ་ཆེན་པོ་འཕྲད། འབྲུག་ཡུལ་གྱི་གཞུང་ཞབས་པ་ཞིག་གིས་ང་ཚོས་གོ་ཐོས་ལྟར་ན་ཁྲལ་བསྡུ་ལྷན་ཁང་དང་རྒྱལ་གཞུང་དངུལ་གཉེར་ཁང་སོགས་ལ་སྲི་ཞུ་བ་འགའ་ཤས་ལས་མི་འདུག་ཟེར་གྱི་འདུག དེས་ན་སྤྱི་དམངས་ལ་སྲི་ཞུ་སྒྲུབ་རྒྱུ་དེར་འཐུས་ཤོར་འགྲོ་ངེས་རེད་ཅེས་ཀུན་གསལ་གསར་ཁང་གི་གསར་འགོད་པར་ནང་མོལ་བྱས་འདུག
འབྲུག་ཡུལ་གྱི་གཞུང་ཞབས་པ་རྣམས་རང་གི་ལས་གནས་སུ་སྡོད་འདོད་མེད་པའི་རྒྱུ་རྐྱེན་གཞན་ཞིག་ནི་སྲི་ཞུ་བ་བསྡུ་སྟངས་དྲང་སྙོམས་མེད་པར་ཐུག་འདུག འབྲུག་ཡུལ་གྱི་གཞུང་ཞབས་པ་བསྡུ་བའི་དུས་སུ་འཇོན་ཐང་མེད་ཀྱང་ལྟག་སྒོ་ཡོད་ན་མཐོ་རིམ་ལས་སྣེ་གྲས་སུ་འདེམས་བསྐོ་ཐུབ། འཇོན་ཐང་ཡོད་ཀྱང་ལྟག་སྒོ་མེད་པ་དམའ་རིམ་ལས་བྱེད་པའི་གྲས་སུ་བསྐོ་གཞག་བྱེད་ཀྱི་ཡོད་པར་སྲི་ཞུ་བ་ཇི་སྙེད་ཅིག་སེམས་ཤུགས་ཆག་གི་ཡོད་པའི་གནས་ཚུལ་ཐོན་འདུག འབྲུག་པའི་གཞུང་ཞབས་པ་རྣམས་ཨོ་གླིང་དུ་བསྐྱོད་དགོས་པའི་རྒྱུ་རྐྱེན་གཞན་པ་ཞིག་གླ་ཕོགས་ཡིན་ཞིང་། ཀུན་གསལ་གསར་ཁང་གི་སྐད་ཆ་འདྲི་ཡུལ་མི་གྲངས་བརྒྱ་ཆ་༦༧་གྱིས་ཨོ་གླིང་དུ་ཟླ་བ་རེར་ཡོང་འབབ་འབྲུག་པའི་དངུལ་སྒོར་འབུམ་༢་ལྷག་ཡོད་ཟེར། མི་མང་སྐད་ཆ་འདྲི་ཡུལ་བརྒྱ་ཆ་༣༢་ཀྱིས་ཨོ་གླིང་དུ་ཟླ་བ་རེར་འབྲུག་པའི་དངུལ་སྒོར་འབུམ་༣་ལྷག་ཡོང་འབབ་ཡོད་པར་མ་ཟད། འབྲུག་ཡུལ་དུ་གཞུང་ཞབས་པ་ཚོར་ཆ་མཉམ་གླ་ཕོགས་དངུལ་སྒོར་༥༠༠༠་ལས་མེད། འབྲུག་པ་སྐད་ཆ་འདྲི་ཡུལ་བརྒྱ་ཅ་༧༩་རང་ཡུལ་གྱི་ལས་ཀ་དེར་བློ་ཁ་མ་ཚིམས་པ་དང་ཨོ་གླིང་གི་ལས་ཀ་དེར་བློ་ཁ་ཚིམས་ཡོད་པ་ཤེས་རྟོགས་བྱུང་འདུག
ཁ་སྔོན་ཕྱི་ཟླ་༥་པའི་ཚེས་༡༧་ཉིན་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། འབྲུག་ཡུལ་གྱི་རྒྱལ་ཡོངས་གྲོས་ཚོགས་མ་ཚོགས་གོང་དུ་དཔྱ་ཁྲལ་ལམ་ལུགས་དང་གླ་ཕོགས་ཀྱི་ལམ་ལུགས་ལ་ལེགས་བཅོས་གཏོང་དགོས། འབྲུག་པའི་གཞུང་ཞབས་པ་རྣམས་དགོངས་པ་ཞུས་ནས་ཨོ་གླིང་དུ་སྐྱོད་ཀྱི་ཡོད་པ་ནི་རང་ཡུལ་དུ་གླ་ཕོགས་དམའ་དྲགས་པས་རེད་ཅེས་གླེང་སློང་བྱ་རྒྱུ་ཤུགས་ཆེ་རུ་སོང་། ཡིན་ནའང་གླ་ཕོགས་ཅི་ཙམ་སྤར་རྒྱུ་ཡིན་མིན་དང་གཞུང་ཞབས་ཁོངས་སུ་མེད་པའི་ལས་བྱེད་པའི་གླ་ཕོགས་སྤར་དགོས་པའི་ཐག་གཅོད་བྱ་རྒྱུ་ཡིན་མིན་བཅས་ལ་གསལ་ཁ་མ་ཐོན། འབྲུག་ཡུལ་གྱི་གཞུང་ཞབས་པ་ཁག་ཅིག་གིས་གླ་ཕོགས་སྤར་བའི་རྗེས་སུ་བགྲེས་ཡོལ་དུ་འགྲོ་རྒྱུའི་རྩིས་བརྒྱབ། སྲི་ཞུ་བ་ཁག་ཅིག་གིས་གླ་ཕོགས་སྤར་བ་དེ་འདང་ངེས་ཤིག་ཡོད་མེད་དང་འཆར་གཞི་བསྒྱུར་དགོས་མིན་ལ་བསྒུག་རྒྱུའི་བློ་ཐག་བཅད། གླ་ཕོགས་སྤར་ཡང་རང་ཡུལ་དུ་འདུག་འདོད་མེད་པ་དང་གླ་ཕོགས་སྤར་རྗེས་བགྲེས་ཡོལ་དུ་འགྲོ་བ་སོགས་ཅི་ཞིག་བྱུང་ཡང་འབྲུག་གཞུང་ལ་གྱོང་གུད་འཕོག་རྒྱུ་ནི་ཉག་གཅིག་རེད་ཅེས་གནས་ཚུལ་སྤེལ།།
ཕྱི་ཟླ་༥་པའི་ཚེས་༡༧་ཉིན་འབྲུག་པའི་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། འབྲུག་ཡུལ་གྱི་གཞུང་ཞབས་པའི་གྲས་ནས་དགོངས་པ་ཞུ་མཁན་མང་ཆེ་བ་ནི་དགེ་རྒན་དང་སློབ་སྤྱི། སློབ་སྤྱི་གཞོན་པ་དང་ལམ་སྟོན་པ། སྨན་པ་དང་སྨན་ཞབས་པ། སྲོལ་རྒྱུན་གྱི་གསོ་བ་རིག་པའི་སྨན་པ་དང་སྨན་སྦྱོར་ཁང་གི་ལས་བྱེད་པ། དཔྱད་བརྟག་ཁང་གི་ལས་བྱེད་པ་དང་སེམས་ཁམས་སྨན་པ་བཅས་ཆེད་ལས་པ་རེད། ད་དུང་རྒེད་འོག་ཁག་གི་འཛིན་སྐྱོང་བ་དང་རྫོང་རིམ་པ། གྲོང་པ་རིམ་པའི་འཛིན་སྐྱོང་ལས་སྣེ་ཁག་དང་དྲུང་ཡིག རླངས་འཁོར་ཁ་ལོ་བ་སོགས་སྤྱི་ཚོགས་ཀྱི་ཉིན་རེའི་ལས་དོན་ཁག་ལ་དགོས་མཁོ་ཆེན་པོ་ཡོད་པའི་སྲི་ཞུ་བ་རྣམས་རེད། ཨོ་གླིང་གཞུང་གིས་འབྲུག་པ་ཐེངས་གཉིས་པ་ལེན་གྱི་ཡོད་པས་ཕྱི་ཟླ་༦་པ་དང་༧་པའི་ནང་དུ་ལས་བྱེད་པས་དགོངས་པ་ཞུ་རྒྱུ་མང་དུ་འགྲོ་ཤས་ཆེ། ད་ལོའི་ལོ་མཇུག་ཏུའང་གཞུང་ཞབས་པའི་གྲས་ནས་དགོངས་པ་ཞུ་མཁན་མང་དུ་འགྲོ་སྲིད་ཅེས་གནས་ཚུལ་སྤེལ། ༢༠༠༨་ནས་༢༠༢༡་བར་དུ་ཁྱོན་བསྡོམས་འབྲུག་ཡུལ་གྱི་གཞུང་ཞབས་པ་༤༧༤༦་གིས་རང་གི་ལས་གནས་ནས་དགོངས་པ་ཞུས་པའི་གནས་ཚུལ་ཐོན་འདུག
ཉེ་ཆར་ཕྱི་ཟླ་༧་པའི་ཚེས་༧་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། འབྲུག་ཡུལ་དུ་དགེ་རྒན་འདང་ངེས་མེད་པའི་དཀའ་ངལ་འཕྲད་འགོ་ཚུགས། འདས་པའི་ཟླ་བ་༦་གི་ནང་དུ་ཕུན་ཚོགས་གླིང་ཁྲོམ་སྡེའི་སློབ་གྲྭ་ཁག་གི་དགེ་རྒན་༢༢་ཀྱིས་རྩ་དགོངས་ཞུས། ལོ་འདིར་ཉི་མ་༨་རེའི་མཚམས་སུ་དགེ་རྒན་རེས་རྩ་དགོངས་ཞུས། ཕུན་ཚོགས་གླིང་ཁྲོམ་སྡེར་མཐོ་འབྲིང་སློབ་གྲྭ་༢་དང་གཞི་རིམ་སློབ་གྲྭ་༢་བཅས་གཞུང་གཉེར་སློབ་གྲྭ་༤་འདུག ཁྲོམ་སྡེའི་ཤེས་ཡོན་འགན་འཛིན་འཆི་མེད་རིག་འཛིན་གྱིས་དགེ་རྒན་མང་ཆེ་བ་ཕྱི་ཟླ་༦་པའི་ཟླ་མཇུག་ཏུ་དགོངས་པ་ཞུས་སོང་། ད་ལོའི་སློབ་སྐབས་གཉིས་པར་དགེ་རྒན་༡༩་ཚང་གི་མེད། སློབ་སྐབས་དང་པོའི་ཟླ་བ་༧་གྱི་རིང་དགེ་རྒན་ལས་ཚབ་༡༠་བསྐོས་ཏེ་མཐོ་འབྲིང་སློབ་གྲྭ་གཉིས་ལ་སློབ་ཁྲིད་བྱེད་དུ་བཅུག་པ་ཡིན། དགེ་རྒན་གྱི་ས་མིག་ཡོད་ཀྱང་སློབ་ཚན་ཚང་མ་སློབ་ཐུབ་པའི་དགེ་རྒན་འོས་ཆོས་ཚང་བ་ཞིག་རྙེད་ཁག་པོ་འདུག་ཅེས་བསྟན། འབྲུག་ཡུལ་གྱི་སློབ་གྲྭ་ཁག་གི་དགེ་རྒན་གྱི་ས་མིག་ལ་སྙན་ཞུ་འབུལ་མཁན་ཚོར་ལས་ཀ་སྤྲད་ཀྱང་མི་ཁག་ཅིག་གིས་སྙན་ཞུ་ཕྱིར་འཐེན་བྱས་ནས་དགེ་རྒན་གྱི་ཆེད་ལས་སྒྲུབ་འདོད་མེད་པའི་གནས་ཚུལ་ཐོན་འདུག