༄༅།། འབྲུག་གཞུང་གིས་རྒྱལ་ཁབ་དེར་ཕྱི་རྒྱལ་གྱི་ཡུལ་སྐོར་སྤྲོ་འཆམ་དུ་ཡོང་ནས་དུས་ཡུན་རིང་ཙམ་བསྡད་ན་འགྲུལ་ཁྲལ་ཐོག་ཏུ་ཁེ་ཕན་སྤྲོད་རྒྱུའི་ཐབས་ཇུས་ཤིག་ལག་ལེན་བསྟར་རྒྱུ་ཡིན་ཞེས་གསལ་བསྒྲགས་སྤེལ། ཕྱི་ཟླ་༦་པའི་ཚེས་༦་ཉིན་རྒྱས་སྤྲོས་འགྲིམ་འགྲུལ་དུས་དེབ་ལ་གནས་ཚུལ་ཐོན་པ་ལྟར་ན། འབྲུག་གཞུང་གིས་རྒྱ་གར་བ་མ་རྩིས་པར་ཕྱི་རྒྱལ་གྱི་འགྲུལ་པ་ཚོའི་ལག་ནས་ཉིན་ཞག་རེར་འགྲུལ་ཁྲལ་ཨ་སྒོར་༢༠༠་རེ་བསྡུ་རྒྱུ། རྒྱ་གར་བ་ཚོའི་ལག་ནས་ཉིན་ཞག་རེར་འགྲུལ་ཁྲལ་ཁྲལ་ཧིན་སྒོར་༡༢༠༠་བསྡུ་རྒྱུ་དང་བྱིས་པ་ལོ་༥་མན་ཆད་ཚོར་འབྲུག་ཡུལ་གྱི་འཛུགས་སྐྲུན་རྒྱུན་འཁྱོངས་འགྲུལ་ཁྲལ་བསྡུ་མི་དགོས་པའི་ཆག་ཡང་སྤྲོད་རྒྱུ། བྱིས་པ་ལོ་༦་ནས་༡༢་བར་དུ་སོན་པ་ཚོར་འགྲུལ་ཁྲལ་བརྒྱ་ཆ་༥༠་རེ་བསྡུ་རྒྱུའི་ཐག་བཅད། ༢༠༢༣་གྱི་ཕྱི་ཟླ་༦་པ་ནས་མགྲོན་ཁང་མངགས་ལེན་བྱས་པའི་འགྲུལ་པ་ཚོར་༢༠༢༤་ལོའི་ཕྱི་ཟླ་༡༢་པའི་ཚེས་༣༡་བར་དུ་འགྲུལ་ཁྲལ་གྱི་ཁེ་ཕན་སྤྲོད་རྒྱུ་ཡིན་འདུག
ད་ནས་འགྲུལ་པ་ཚོས་འབྲུག་ཡུལ་དུ་ཉིན་ཞག་རེར་ཨ་སྒོར་༢༠༠་རེ་འགྲུལ་ཁྲལ་སྤྲད་ནས་ཉིན་ཞག་༤་བསྡད་ན་དེའི་གཞུག་ཏུ་ཉིན་ཞག་༤་ལ་འགྲུལ་ཁྲལ་སྤྲོད་མི་དགོས་ཤིང་། མི་ཞིག་གིས་ཉིན་ཞག་༧་ལ་འགྲུལ་ཁྲལ་སྤྲད་ནས་བསྡུད་ན་དེའི་འཕྲོ་ནས་ཉིན་ཞག་༧་ལ་འགྲུལ་ཁྲལ་སྤྲོད་མི་དགོས་པར་འདུག་ཆོག མི་ཞིག་གིས་ཉིན་ཞག་༡༢་ནས་༡༨་བར་དུ་ཨ་སྒོར་༢༠༠་རེ་འགྲུལ་ཁྲལ་སྤྲད་ནས་བསྡད་ན་དེའི་གཞུག་གི་ཉིན་ཞལ་༡༢་ནས་༡༨་ལ་འགྲུལ་ཁྲལ་སྤྲོད་མི་དགོས་པར་འདུག་ཆོག བྱིས་པ་རྣམས་ལའང་གོང་གི་ལོ་ཚད་ལྟར་གཅིག་པ་ཡིན་ཞེས་གསལ་བསྒྲགས་སྤེལ་འདུག འགྲུལ་པ་ཚོས་རང་ལ་གདམ་ཀ་གང་འཚམས་མིན་དང་ས་གནས་གང་དུ་ལྟ་སྐོར་ལ་བསྐྱོད་དགོས་སོགས་འབྲུག་ཡུལ་གྱི་ཆ་འཕྲིན་ལྷན་ཁང་གི་དྲྭ་ཚིགས་སུ་བལྟ་དགོས་ཞེས་འཁོད། འབྲུག་གཞུང་གིས་ཉིན་ཞག་རེའི་འགྲུལ་ཁྲལ་བསྡུ་རྒྱུ་མཐོ་དྲགས་འདུག་ཅེས་བསམ་འཆར་བཤད་པའི་རྗེས་སུ་བཅོས་བསྒྱུར་བཏང་འདུག
རྒྱས་སྤྲོས་འགྲིམ་འགྲུལ་དུས་དེབ་ལ་མུ་མཐུད་དུ་གནས་ཚུལ་ཐོན་པ་ལྟར་ན། འབྲུག་ཡུལ་གྱི་འགྲུལ་ཁྲལ་ཁོངས་སུ་མགྲོན་ཁང་དང་ཟ་ཁང་། ལམ་གྲོན་དང་གནས་ཤན་པའི་གླ་ཆ་སོགས་ཅི་ཡང་མ་འདུས། དེ་ནི་ཉིན་ཞག་རེར་འབྲུག་ཡུལ་གྱི་ས་ཐོག་ཏུ་འདུག་ཆོག་པའི་འགྲུལ་ཁྲལ་འབའ་ཞིག་ཡིན་ཞིང་། ཐོག་མར་འབྲུག་གཞུང་གིས་མི་རེའི་ལག་ནས་ཨ་སྒོར་༦༥་རེ་འགྲུལ་ཁྲལ་བསྡུས་ཀྱང་ན་ནིང་ཕྱི་ཟླ་༩་པ་ནས་ཉིན་ཞག་རེར་འགྲུལ་ཁྲལ་ཨ་སྒོར་༢༠༠་ཐམ་པ་བསྡུ་མགོ་བརྩམས། འབྲུག་གཞུང་གིས་འགྲུལ་ཁྲལ་གྱི་ཁེ་ཕན་སྤྲད་ན་རྒྱལ་ཁབ་དེར་རྫོང་ཁག་༢༠་ཡོད་པ་དེ་དག་གི་མཐོ་སའི་འབྲོག་ས་ཁག་ནས་རྩི་ཤིང་སྣ་ཚོགས་སྐྱེས་སའི་རོང་གི་གྲོང་གསེབ་ཁག འབྲུག་ཡུལ་གྱི་མཐའ་གྲུ་ཀུན་ཏུ་མྱུལ་ནས་འབྲུག་པའི་ཡུལ་སྲོལ་གོམས་གཤིས་དང་རིག་གཞུང་བཅས་པ་ཉམས་སུ་མྱོང་ཐུབ་པའི་གནས་ཚུལ་ཐོན་འདུག
འབྲུག་ཡུལ་དུ་འཛམ་གླིང་གི་འདབ་ཆགས་དཀོན་རིགས་དང་རི་སྐྱེས་སེམས་ཅན་དཀོན་རིགས་ཁག་ཅིག་བལྟ་རྒྱུ་ཡོད་ཅིང་། འགྲུལ་པ་ཚོ་གསར་དུ་སྒོ་ཕྱེ་པའི་འབྲུག་གི་ཚོང་ལམ་འགྲིམས་ནས་གྲོང་གསེབ་ཁག་གི་དུས་སྟོན་ལ་ཞུགས་ཏེ་ཟས་རིགས་སྣ་ཚོགས་ཀྱི་བྲོ་བཅུད་མྱོང་ཐུབ་པར་མ་ཟད། འགྲུལ་པ་ཚོར་འབྲུག་ཡུལ་ཡར་རྒྱས་གཏོང་བར་མིང་དོན་མཚུངས་པའི་ལེགས་སྐྱེས་རེ་འབུལ་རྒྱུའི་གོ་སྐབས་སྤྲོད་ཀྱི་ཡོད་པ་སྟེ། མི་རེས་ཤིང་སྡོང་རེ་བཙུགས་ནས་འབྲུག་ཡུལ་དུ་ཤིང་སྡོང་ས་ཡ་༡་འཛུགས་ཐུབ་རྒྱུའི་དམིགས་ཚད་བཟུང་། ཤིང་སྡོང་གིས་རླངས་འཁོར་དང་བཟོ་གྲྭ གནམ་གྲུ་སོགས་ནས་ཐོན་པའི་ནག་རྫས་དུད་རླངས་དང་རྡོ་སོལ་གྱི་དུ་བ་ནག་པོ་རྣམས་བཞིབ་སྟེ་མཁའ་དབུགས་གཙང་མ་གཏོང་བའི་དགེ་མཚན་ཆེ། འགྲུལ་པ་ཚོས་བཙུགས་པའི་ཤིང་སྡོང་དེ་ཚོར་འབྲུག་གི་རྒྱལ་ཡོངས་བདེ་སྲུང་ཁང་གི་ལྟ་རྟོག་བྱ་རྒྱུའི་གནས་ཚུལ་ཐོན་འདུག
ཕྱི་ཟླ་༦་པའི་ཚེས་༥་ཉིན་ཊི་ཊི་ཇཱི་གསར་ཁང་གིས་གནས་ཚུལ་སྤེལ་བ་ལྟར་ན། འབྲུག་ཡུལ་གྱི་སྲིད་བློན་བློ་གྲོས་ཚེ་རིང་གིས་ང་ཚོས་མགྲོན་ཁང་དང་འགྲིམ་འགྲུལ་ལས་ཁུངས་སོགས་ཡུལ་སྐོར་སྤྲོ་འཆམ་གྱི་ཚོང་ལས་གཉེར་གྱི་ཡོད་པའི་ཚན་པ་ཁག་གི་བསམ་འཆར་ལ་མཉན། དེ་བཞིན་འབྲུག་ཡུལ་གྱི་ཡུལ་སྐོར་ཐབས་ཇུས་བསྐྱར་ཞིབ་ཀྱི་འབྲུ་དོན་ཁག་ལའང་བསམ་ཞིབ་ཀྱིས་འགྲུལ་ཁྲལ་ཐོག་ཏུ་ཁེ་ཕན་སྤྲོད་རྒྱུ་དང་འགྲུལ་པ་ཚོ་འབྲུག་ཡུལ་དུ་དུས་ཡུན་རིང་ཙམ་འདུག་ཐུབ་པའི་བསམ་བློ་བཏང་བ་ཡིན། འབྲུག་གཞུང་གིས་ཚད་མཐོ་དང་སྤུས་ལེགས་ཀྱི་ཡུལ་སྐོར་སྤྲོ་འཆམ་ལས་རིགས་ཤིག་གཉེར་གྱི་ཡོད་པར་གུ་བཤངས་གཏན་ནས་བྱས་མེད་ཅེས་བཀྲལ། བལ་ཡུལ་སོགས་ལ་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་མང་དྲགས་ཏེ་ཁོར་ཡུག་འབག་བཙོག འགྱིག་ཤོག་སོགས་ཀྱི་གད་སྙིགས་གང་སར་གཏོར་ནས་དཀའ་ངལ་ཚབས་ཆེན་ཞིག་འཕྲད་ཀྱི་ཡོད་པས་འབྲུག་གཞུང་གིས་འགྲུལ་ཁྲལ་བསྡུས་ནས་ཡུལ་སྐོར་སྤྲོ་འཆམ་པ་ཚོད་འཛིན་གྱི་ཐབས་ཇུས་བསྟེན།།
ཊི་ཊི་ཇཱི་གསར་ཁང་གིས་སླར་ཡང་གནས་ཚུལ་སྤེལ་བ་ལྟར་ན། འབྲུག་གཞུང་གིས་ལོ་རེར་འགྲུལ་པ་འབུམ་༡་མ་ཟིན་ཙམ་ཞིག་ཡོང་དུ་འཇུག་རྒྱུ་དང་རྒྱ་གར་གྱི་འགྲིམ་འགྲུལ་སྤྱི་གཉེར་ཁང་གི་འགན་འཛིན་ཨམ་རི་ཏ་སིང་གིས་འབྲུག་པའི་ཐག་གཅོད་དེ་ཡག་པོ་བྱུང་སོང་། འབྲུག་གཞུང་གིས་འགྲུལ་ཁྲལ་སྤར་རྒྱུ་མཐོ་དྲགས་པ་རེད། འབྲུག་ཡུལ་དུ་ལྟ་སྐོར་ལ་འགྲོ་དགོས་བསམས་ཡོད་པ་མང་པོ་འགྲོ་མི་ཐུབ་པར་གྱུར། ཁོ་ཚོས་དགོས་མཁོ་ཡག་པོ་ཞིག་ལ་དམིགས་ནས་འགྲུལ་ཁྲལ་སྤར་བ་ཡིན་ཤས་ཆེ། འོན་ཀྱང་འགྲུལ་ཁྲལ་མཐོ་དྲགས་པ་རེད། འབྲུག་གཞུང་གི་གསལ་བསྒྲགས་དེ་བདུན་ཕྲག་སྔོན་མར་བྱས་པས་ད་སྔ་འབྲུག་ཡུལ་དུ་ལྟ་སྐོར་ལ་འགྲོ་མཁན་མང་དུ་འགྲོ་རྒྱུ་ཡིན་མིན་བཤད་ཚོད་ཐིག་གི་མི་འདུག་ཅེས་གསར་འགོད་པར་གླེང་མོལ་བྱས་འདུག འབྲུག་ཡུལ་གྱི་འགྲུལ་ཁྲལ་མཐོ་དྲགས་པ་རེད་ཅེས་རྒྱལ་སྤྱིའི་ཐོག་ཏུའང་གླེང་སློང་ཆེན་པོ་བྱུང་།།
རྡོ་རྗེ་དགྲ་འདུལ་ནི་འབྲུག་ཡུལ་གྱི་ཡུལ་སྐོར་སྤྲོ་འཆམ་ལྷན་ཁང་གི་སྤྱི་ཁྱབ་འགན་འཛིན་ཡིན་ཞིང་། ཁོང་གིས་ང་ཚོས་འགྲུལ་ཁྲལ་གྱི་ཁེ་ཕན་དང་ས་མཚམས་ཀྱི་གྲོང་རྡལ་ཁག་ཏུ་ཆུ་ཚོད་༢༤་རིང་བསྡད་ན་འགྲུལ་ཁྲལ་མེད་པར་བཏང་བ་བཅས་ཀྱིས་འབྲུག་ཡུལ་དུ་འཛམ་གླིང་གི་ས་ཕྱོགས་ཀུན་ནས་ཡུལ་སྐོར་སྤྲོ་འཆམ་པ་མང་དུ་འགྲོ་ཐུབ་པའི་རེ་བ་འཆང་གི་ཡོད་ཅེས་བཤད་འདུག འདས་པའི་ལོ་གསུམ་ལ་འཛམ་གླིང་ཡོངས་སུ་ཏོག་དབྱིབས་ནད་དུག་ཁྱབ་ནས་ཕྱི་ལ་སྒོ་རྒྱ་བསྡམས། རྒྱལ་སྤྱིའི་ཚོང་ལས་དང་ཡུལ་སྐོར་སྤྲོ་འཆམ་གྱི་ཚོང་ལས་སོགས་ལ་དོ་ཕོག་ཆེན་པོ་བྱུང་བ་ལྟར་འབྲུག་ཡུལ་གྱི་ཚོང་ལས་དང་དཔལ་འབྱོར། འགྲིམ་འགྲུལ་བཅས་ལ་བརྡབ་གསིག་ཕོག ༢༠༢༢་ལོའི་ཕྱི་ཟླ་༩་པའི་ཚེས་༢༣་ཉིན་འབྲུག་གཞུང་གིས་ད་གཟོད་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་ཚོར་སྒོ་མོ་ཕྱེ། འབྲུག་གཞུང་གིས་ལོ་གསུམ་གྱི་དཔལ་འབྱོར་དང་ཚོང་ལས་ཀྱི་གྱོང་གུད་གསབ་པར་འགྲུལ་ཁྲལ་ལྡབ་འགའ་ཞིག་སྤར་དགོས་བྱུང་བའི་གནས་ཚུལ་ཐོན་འདུག
