ཊམ་གྱིས་མཁྲེགས་འཛིན་པ་ཚོ་བསྐོས་ཀྱང་རྒྱ་ནག་བློ་བདེ་བྱུང་དོན་ཅི་རེད།

༄༅།། ཨ་རིའི་འདེམས་ཐོན་སྲིད་འཛིན་ཌོ་ནལ་ཊམ་གྱིས་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་(Mike Pompeo)་དང་རྒྱལ་སྲུང་སློབ་སྟོན་པ་ཟུར་པ་རོ་བྷར་ཊི་ཨོབ་རེན་(Robert O’Brien)་གཉིས་སྲིད་གཞུང་གསར་པའི་མཐོ་རིམ་ལས་སྣེའི་གྲས་སུ་བསྐོས་མེད་པར་རྒྱ་ནག་བློ་བདེ་བྱུང་བའི་གནས་ཚུལ་ཐོན་འདུག ཕྱི་ཟླ་༡༡་པའི་ཚེས་༡༣་ཉིན་ཝོལ་སི་ཊི་རི་ཊི་འཇར་ནལ་ཚགས་པར་ལ་གནས་ཚུལ་ཐོན་པ་ལྟར་ན། ཌོ་ནལ་ཊམ་གྱི་གྲོས་ཚོགས་གོང་མའི་འཐུས་མི་མར་ཀོ་རུ་བྷིའོ་(Marco Rubio)་ཨ་རིའི་ཕྱི་སྲིད་དྲུང་ཆེ་དང་གྲོས་ཚོགས་འོག་མའི་འཐུས་མི་མེཀ་ཝོལ་ཛི་(Mike Waltz)་རྒྱལ་སྲུང་སློབ་སྟོན་པར་བསྐོ་རྒྱུ་རེད་ཅེས་གླེང་། གྲོས་ཚོགས་འཐུས་མི་མར་ཀོ་རུ་བྷིའོ་དང་མེཀ་ཝོལ་ཛི་གཉིས་ཀ་རྒྱ་ནག་ལ་སྐྱོན་བརྗོད་དྲག་པོ་བྱེད་མཁན་གྲས་སུ་གཏོགས། གལ་སྲིད་ངེས་གཏན་བྱུང་ན་མར་ཀོ་རུ་བྷིའོ་ནི་རྒྱ་ནག་ཏུ་ཡོང་མི་ཆོག་ཅེས་འགྲིམ་འགྲུལ་བཀག་སྡོམ་བྱས་ཡོད་པའི་ཨ་རིའི་ཕྱི་སྲིད་དྲུང་ཆེ་དང་པོ་དེར་འགྱུར་རྒྱུ་ཡིན་འདུག

རྒྱ་ནག་གི་ཉམས་ཞིབ་པ་ཚོས་ཝོལ་ཛི་དང་རུ་བྷིའོ་གཉིས་རྒྱ་ནག་གི་ཐོག་ཏུ་མཁྲེགས་པོ་ཡིན་པ་དང་ཞིས་ཅིན་ཕིང་ལ་བློ་འཚབ་ཡོང་དགོས་ངེས་ཤིག་རེད། ཡིན་ནའང་ཌོ་ནལ་ཊམ་གྱི་སྲིད་གཞུང་གསར་པའི་མཐོ་རིམ་ལས་སྣེའི་གྲས་སུ་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་མེད་པ་ནི་རྒྱ་ནག་དགའ་དགོས་པ་ཞིག་རེད་ཅེས་བསྟན། ཝ་ཤིང་ཊོན་གྱི་ས་ཊིམ་སན་ལྟེ་གནས་ཀྱི་རྒྱ་ནག་ཉམས་ཞིབ་ཚན་པའི་འགན་འཛིན་སུན་ཡུན་(Sun Yun)་གྱིས་བཤད་པ་ལྟར་ན། ཌོ་ནལ་ཊམ་གྱིས་བློན་ཆེན་ཚོ་གདམ་སྟངས་དེ་རྒྱ་ནག་ལ་མཚོན་ན་ཡག་ག་ཞིག་མིན་མོད། འོན་ཀྱང་ད་ལྟའི་ཆར་གྲོས་མོལ་གྱི་ཁོར་ཡུག་ཅིག་ཡོད་པར་སྣང་། ཌོ་ནལ་ཊམ་གྱིས་རྒྱ་ནག་དམར་ཤོག་ཚོགས་པའི་རྩ་བའི་ཁེ་ཕན་ལ་ཐད་ཀར་ཉེན་ཁ་ཡོད་པའི་མི་རྣམས་བདམས་ཡོད་ན་པེ་ཅིང་གི་ངོས་ནས་གྲོས་མོལ་གྱི་ཁོར་ཡུག་རྦད་དེ་མེད་པ་ཞིག་ཏུ་མཐོང་གི་ཡོད་པ་རེད་ཅེས་བཀྲལ།།

༢༠༢༠་ལོའི་དབྱར་དུས་ཤིག་ལ་ཕྱི་སྲིད་དྲུང་ཆེ་ཟུར་པ་ཕོམ་ཕིའོ་ནས་རྒྱ་ནག་མི་དམངས་ཀྱིས་ཨ་མི་རི་ཀར་མཉམ་འབྲེལ་བྱས་ནས་དམར་ཤོག་ཚོགས་པའི་སྤྱོད་པར་འགྱུར་བ་གཏོང་དགོས་ཞེས་ནན་གྱིས་བསྐུལ། ༢༠༢༣་ལོའི་འགོ་སྟོད་དེར་རྒྱ་ནག་གི་ཁྲོམ་རའི་ནང་དུ་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་ཡིས་བྲིས་པའི་རང་རྣམ་ཁྱབ། རང་རྣམ་དེའི་ཚན་པ་ཞིག་ཏུ་མེཀ་ཕོམ་ཕིའོ་ཡིས་རྒྱ་ནག་ལ་ནམ་ཡང་སོར་གང་ལྷོད་མི་ཉན། ཨ་མི་རི་ཀས་ཐེ་ཝན་ལ་ཕྱི་འབྲེལ་ཆ་ཚང་བཙུགས་ནས་ངོས་འཛིན་བྱ་དགོས་ཞེས་འཁོད། དེར་བརྟེན་ཞིས་ཅིན་ཕིང་ཁོང་ཁྲོ་དྲག་པོ་ལངས་ཏེ་ཕོག་ཐུག་ཤོར། རྒྱ་ནག་གིས་ཨ་མི་རི་ཀར་ཐེ་ཝན་གྱི་གནད་དོན་ལ་ཐེ་ཇུས་བྱེད་མི་ཆོག ཐེ་ཝན་ནི་རྒྱ་ནག་གི་མངའ་ཁོངས་ཡིན་ཞེས་དགག་པ་བརྒྱབ། རྒྱ་ནག་གིས་དོགས་ཟོན་ཆེན་པོ་བྱ་ཡུལ་གཞན་ཞིག་ནི་ཌོ་ནལ་ཊམ་གྱི་རྒྱལ་སྲུང་སློབ་སྟོན་པ་ཟུར་པ་རོ་བྷར་ཊི་ཨོབ་རེན་ཡིན་ཞིང་། ཨོབ་རེན་གྱིས་ཨ་མི་རི་ཀས་ཡུཀ་རེན་གྱི་དམག་འཁྲུག་མཇུག་བསྒྲིལ་དུ་ཆུགས། ར་ཤི་ཡ་རྒྱ་ནག་གི་ཕྱོགས་ནས་ཨ་རིའི་ཕྱོགས་སུ་འགུགས་དགོས་ཞེས་ཐབས་ཇུས་བཏོན།།

གཟའ་མིག་དམར་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཅན་(Lin Jian)་གྱིས་ཨ་རིའི་སྲིད་གཞུང་གསར་པའི་བློན་ཆེན་ཁག་གི་ས་མིག་དེར་སུ་ཞིག་བསྐོས་ཀྱང་ང་ཚོར་བཤད་རྒྱུ་ཅི་ཡང་མེད་ཅེས་གསར་འགོད་པའི་དྲི་བར་ལན་བཏབ། ཝ་ཤིང་ཊོན་གྱི་ཆབ་སྲིད་ཉམས་ཞིབ་པ་ཚོས་རྒྱ་ནག་གིས་ཌོ་ནལ་ཊམ་གྱི་འདོད་མོས་ལྟར་ནང་ཚོང་བརྒྱབ་སྟེ་ཁེ་ཕན་ལེན་ཐབས་བྱ་སྲིད། ཌོ་ནལ་ཊམ་གྱིས་བསྐོས་པའི་བློན་ཆེན་གཉིས་ཀྱིས་རྒྱ་ནག་ལ་ཚོང་འབྲེལ་གཅོད་དགོས་ཞེས་ཤུགས་རྒྱག་གི་ཡོད་པས་ཞིས་ཅིན་ཕིང་གིས་ནང་ཚོང་བརྒྱབ་ནས་ཁེ་ཕན་ལེན་མི་ཐུབ། རོ་བྷར་ཊི་ལཱ་ཡེ་ཊེ་ཛར་(Robert Lighthizer)་ནི་ཌོ་ནལ་ཊམ་གྱི་ལས་དུས་དང་པོའི་སྐབས་ཀྱི་ཨ་རིའི་ཚོང་དོན་སྐུ་ཚབ་ཡིན་ཞིང་། ཁོ་པ་སླར་ཡང་ཨ་རིའི་ཚོང་དོན་སྐུ་ཚབ་ལ་བསྐོ་བཞག་བྱ་འཆར་ཡོད་པར་མ་ཟད། ལཱ་ཡེ་ཊེ་ཛར་གྱིས་རྒྱ་ནག་ལ་ཨ་མི་རི་ཀའི་འཕྲུལ་རིག་ལག་རྩལ་ཕྱིར་ཚོང་བྱ་རྒྱུ་ཆ་ཚང་འགོག་དགོས་པའི་ལངས་ཕྱོགས་བཟུང་འདུག

ཞིས་ཅིན་ཕིང་དང་རྒྱ་ནག་གི་འགོ་ཁྲིད་ཚོ་ཟླ་བ་མང་པོར་ཨ་རི་དང་དཔལ་འབྱོར་གྱི་འཐབ་རྩོད་འབྱུང་རྒྱུའི་གྲ་སྒྲིག་ལ་གཞོལ། རྒྱ་ནག་གིས་ཡུ་རོབ་དང་ཨེ་ཤི་ཡའི་ཨ་རིའི་མཐུན་གྲོགས་རྒྱལ་ཁབ་ཁག་ལ་འབྲེལ་བ་ཡར་རྒྱས་བཏང་སྟེ་དཔལ་འབྱོར་སྲུང་སྐྱོབ་ཀྱི་ཐབས་སུ་འབད། ཨ་རིའི་ཁྲོམ་རའི་ནང་དུ་རྒྱ་ནག་གི་དངོས་ཟོག་འགོག་རྩིས་ཡོད་པར་ཡ་ལན་ཇི་ལྟར་སློག་དགོས་མིན་གྱི་ཐབས་ལམ་བཙལ། དེ་བཞིན་རྒྱ་ནག་གཞུང་གིས་ཚོགས་ཆུང་ལོགས་སུ་བཙུགས་ཏེ་ཨ་རིའི་ཚོང་ལས་ཁག་གི་འགོ་ཁྲིད་ཚོ་བཀུག་ནས་མཁྲེགས་འཛིན་པ་དེ་དག་ལ་ཁ་གཏད་གཅོག་ཏུ་འཇུག་རྒྱུའི་གྲབས་བཤམས། རྒྱ་ནག་གིས་འགུགས་ཐབས་བྱེད་བཞིན་པ་དེ་དག་གི་གྲས་སུ་ཨ་རིའི་ཕྱུག་བདག་ཨེ་ལོན་མ་སིཀ་(Elon Musk)་འདུས། ཨེ་ལོན་མ་སིཀ་ཡིས་རྒྱ་ནག་གི་ཧྲང་ཧེ་གྲོང་ཁྱེར་དུ་བཟོ་གྲྭ་བཙུགས་ནས་གློག་གི་རླངས་འཁོར་བཟོས། ད་ལྟ་རྒྱ་ནག་གཞུང་གིས་ཨེ་ལོན་མ་སིཀ་ཡི་གློག་གི་རླངས་འཁོར་ཊེ་སི་ལཱ་ཉོ་རྒྱུ་མང་དུ་གཏོང་སྲིད།།

སྲིད་འཛིན་ཟུར་པ་ཌོ་ནལ་ཊམ་གྱིས་འོས་བསྡུའི་དྲིལ་བསྒྲགས་ལས་འགུལ་སྐབས་སུ་རྒྱ་ནག་གི་དངོས་ཟོག་ལ་སྒོ་ཁྲལ་བརྒྱ་ཆ་༦༠་སྤར་རྒྱུ་ཡིན་ཞེས་ཁས་བླངས། རྒྱ་ནག་གི་ཐོན་སྐྱེད་ལ་དངོས་སུ་སྒོ་ཁྲལ་སྤར་ན་ཞིས་ཅིན་ཕིང་གིས་དྭངས་ལྕགས་དང་གློག་གི་རླངས་འཁོར། ཉི་གློག་ཤེལ་པང་བཅས་ཀྱི་ཐོན་སྐྱེད་རྣམས་འཛམ་གླིང་ཡོངས་སུ་བཙོངས་ནས་དཔལ་འབྱོར་སླར་གསོ་བྱ་རྒྱུའི་དམིགས་ཡུལ་འཆང་ཡོད་པ་འགྲུབ་དཀའ། གཟའ་ཟླ་བའི་ཉིན་རྒྱ་ནག་གི་དཔལ་འབྱོར་འཆར་འགོད་པས་རྒྱལ་ནང་གི་ཚོང་ལས་ཡག་ཏུ་གཏོང་དགོས། དམར་ཤོག་ཚོགས་པས་རྒྱལ་ནང་གི་ཐོན་སྐྱེད་གོང་འཕེལ་གཏོང་རྒྱུ་གཙིགས་སུ་བཟུང་ནས་དཔལ་འབྱོར་ཡར་རྒྱས་གཏོང་བའི་སྲིད་ཇུས་ཤིག་འཛིན་གྱི་ཡོད་ཅེས་རྩོམ་ཡིག་སྤེལ། ཨ་མི་རི་ཀའི་གྲོས་ཚོགས་འཐུས་མི་ཁག་ཅིག་རྒྱ་ནག་ཏུ་ཡོང་མི་ཆོག་པའི་ཉེས་ཆད་བཅད་ཡོད་པའང་ཕྱིར་འཐེན་བྱ་སྲིད་པའི་རྣམ་འགྱུར་ཞིག་ཐོན།།

རྒྱ་ནག་གི་མི་དམངས་སློབ་གྲྭ་ཆེན་མོའི་རྒྱལ་སྤྱིའི་འབྲེལ་ལམ་སློབ་དཔོན་ཝང་དབྱི་ཝེས་(Wang Yiwei)་མར་ཀོ་རུ་བྷིའོ་སོགས་རྒྱ་ནག་ལ་ཡོང་མི་ཆོག་པའི་བཀག་སྡོམ་བྱས་པ་ནི་སྐྱེ་བོ་སྒེར་ལ་ཁྱབ་ཀྱི་ཡོད་པ་རེད། མར་ཀོ་རུ་བྷིའོ་ཨ་རིའི་ཕྱི་སྲིད་དྲུང་ཆེའི་ངོས་ནས་རྒྱ་ནག་ཏུ་ཡོང་ན་འགྲིམ་འགྲུལ་བཀག་སྡོམ་གྱི་ཉེས་ཆད་དེ་ཁྱབ་ཀྱི་ཡོད་པ་མ་རེད། ཨ་རྒྱ་གཉིས་ཀྱིས་དེ་ལ་གྲོས་སྡུར་བྱེད་ཆོག་གི་རེད་ཅེས་བརྡ་ཞིག་བཏང་འདུག ༢༠༢༡་གི་འགོ་སྟོད་དུ་མེཀ་ཕོམ་ཕིའོ་འཕོ་འགྱུར་འགྲོ་ཁ་དེར་རྒྱ་ནག་ལ་ཡོང་མི་ཆོག་ཅེས་འགྲིམ་འགྲུལ་བཀག་སྡོམ་གྱི་ཉེས་ཆད་བཅད། ཝོལ་ཛི་ནི་དམག་མི་ཟུར་པ་དང་འཐབ་འཁྲུག་ལ་ཞུགས་མྱོང་བ། ཨ་རིའི་གྲོས་ཚོགས་སུ་རྒྱ་ནག་གི་སྟེང་དུ་ཧ་ཅང་ལངས་ཕྱོགས་མཁྲེགས་པོ་འཛིན་མཁན་གྲས་སུ་ཚུད། ཁོང་གིས་༢༠༢༡་ལོར་ང་ཚོ་རྒྱ་ནག་དམར་ཤོག་ཚོགས་པར་གྲང་འཐབ་བྱེད་པའི་དམག་འཁྲུག་ལ་ཞུགས་ཡོད་ཅེས་བསྒྲགས། ཨོབ་རེན་དང་འདྲ་བར་མར་ཀོ་རུ་བྷིའོ་དང་ཛོལ་ཛི་གཉིས་ཀས་རྒྱ་ནག་ལ་དཔལ་འབྱོར་དང་དམག་དོན་གཉིས་ཐད་ནས་ཁ་གཏད་ནན་པོ་གཅོག་དགོས་ཟེར། ༢༠༢༢་ལོར་མར་ཀོ་རུ་བྷིའོ་ཡིས་དུས་རབས་འདིའི་ཉེན་ཁ་ཆེ་ཤོས་ནི་རྒྱ་ནག་རེད་ཅེས་གཏམ་བཤད་བྱས་འདུག

ཌོ་ནལ་ཊམ་གྱིས་རྒྱ་ནག་ལ་ཚོང་ལས་ཐོག་ཏུ་ལངས་ཕྱོགས་མཁྲེགས་པོ་འཛིན་གྱི་ཡོད་ཀྱང་རྒྱ་ནག་གིས་ཐེ་ཝན་ལ་བཙན་འཛུལ་བྱས་ན་ཨ་མི་རི་ཀས་མཚོ་གླིང་དེར་སྲུང་སྐྱོབ་བྱ་རྒྱུ་ཡིན་མིན་གསལ་ཁ་མ་ཐོན། ཟླ་བ་སྔོན་མར་ཝོལ་སི་ཊི་རི་ཊི་འཇར་ནལ་ཚགས་པར་གྱི་རྩོམ་སྒྲིག་ཚོགས་ཆུང་གིས་ཌོ་ནལ་ཊམ་ལ་བཅར་འདྲི་ཞུས། ཁོ་པས་ངས་རྒྱ་ནག་ལ་སྒོ་ཁྲལ་སྤར་ནས་ཐེ་ཝན་ལ་བཙན་འཛུལ་བྱེད་མི་ཕོད་པ་ཞིག་ཏུ་བསྒྱུར་རྒྱུ་ཡིན་ཞེས་ལན་བསློགས། གཟའ་མིག་དམར་ཉིན་ཐེ་ཝན་ཕྱི་སྲིད་ལྷན་ཁང་གི་བྱང་ཨ་རིའི་སྐུ་ཚབ་དོན་གཅོད་ཁང་གི་འགན་འཛིན་ཝང་ལེང་ཡུས་(Wang Liang-yu)་ཌོ་ནལ་ཊམ་གྱི་སྲིད་གཞུང་གསར་པའི་ལས་སྣེ་ཁག་གི་ས་མིག་དེ་ཚོར་སུ་སུ་བསྐོ་རྒྱུ་ཡིན་མིན་ཐད་ང་ཚོས་དོ་སྣང་གཟབ་ནན་བྱེད་ཀྱི་ཡོད་ཅེས་བཤད། སྔོན་ཆད་སྲིད་འཛིན་ནེཀ་སིན་གྱིས་རྒྱ་ནག་ལ་འབྲེལ་བ་ཡག་ཏུ་བཏང་ནས་ཨུ་རུ་སུར་ཁ་གཏད་བཅག ད་ལྟ་ཌོ་ནལ་ཊམ་གྱིས་ར་ཤི་ཡར་འབྲེལ་བ་ཡག་ཏུ་བཏང་ནས་རྒྱ་ནག་ལ་ཁ་གཏད་གཅོག་སྲིད། མེཀ་ཕོམ་ཕིའོ་དང་ཨོབ་རེན་གཉིས་སྲིད་གཞུང་གསར་པའི་ཁོངས་སུ་མེད་པར་ཞིས་ཅིན་ཕིང་དགའ་ཆོག་ཀྱང་ཨ་རི་དང་ཚོང་འབྲེལ་གྱི་དཀའ་ངལ་འཕྲད་རྒྱུ་གཡོལ་ཐབས་མེད་པའི་གནས་ཚུལ་ཐོན་འདུག