ཨ་རིའི་གྲོས་ཚོགས་འཐུས་མི་ཚོ་ལས་ཞུགས་དང་ཊམ་གྱི་སྲིད་དབང་འོག་འགྲབ་འགོ་འཛུགས།

ཨ་རིའི་ནང་བདམས་ཐོན་སྲིད་འཛིན་ཊམ་གྱི་གཡས་ཐལ་ཆེ་བའི་སྲིད་ཇུས་ལག་བསྟར་གྱི་འོག་གྲབ་བྱེད་བཞིན་པའི་སྐབས་འདིར་ཨ་རིའི་གྲོས་ཚོགས་གོང་འོག་གི་འཐུས་མི་ཚོ་འོས་བསྡུ་ཟིན་ནས་གྲོས་ཚོགས་ཀྱི་ལས་དོན་མཇུག་འཁྱོངས་ཆེད་རྒྱལ་ས་ཝ་ཤིན་ཌོན་དུ་ཕྱིར་ལོག་བྱས་འདུག་པ་དང་། སྤྱི་མཐུན་ཚོགས་པས་སྲིད་འཛིན་དང་གྲོས་ཚོགས་ཀྱི་འོས་བསྡུའི་ནང་རྒྱལ་ཁའི་གྲུབ་འབྲས་བྱུང་ནས་བདམས་ཐོན་སྲིད་འཛིན་ཊམ་གྱི་ལས་འཆར་ཁག་ལ་གཞོགས་འདེགས་ཇི་ལྟར་བྱེད་དམིགས་ཚད་བཟུང་གི་ཡོད་པ་དང་ཆབས་ཅིག མང་གཙོ་ཚོགས་པའི་འགོ་ཁྲིད་ཚོས་འོས་བསྡུའི་བརྒྱུད་རིམ་ནང་ཕམ་ཉེས་བྱུང་བའི་ནོར་སྐྱོན་ཇི་ཡིན་ལ་དབྱེ་ཞིབ་བྱེད་ཀྱི་ཡོད་པ་རེད།

ད་ལྟའི་འཆར་འོས་བསྡུའི་གྲུབ་འབྲས་ཆ་ཚང་བ་གྲངས་བཤེར་ཟིན་མེད་ནའང་། སྤྱི་མཐུན་ཚོགས་པའི་གྲོས་ཚོགས་གོང་འོག་གཉིས་ཀྱི་འགོ་ཁྲིད་ཚོས་འཐུས་མི་གྲངས་མང་གི་རྒྱལ་ཁ་ཐོབ་ནས་བདམས་ཐོན་སྲིད་འཛིན་ཊམ་གྱི་ལས་རྒྱུན་གཉིས་པ་མདུན་བསྐྱོད་བྱ་རྒྱུར་བསམ་བློ་གཏོང་འགོ་ཚུགས། བདམས་ཐོན་སྲིད་འཛིན་ཊམ་གྱིས་ཁྲིམས་འགལ་གྱིས་ཨ་རིའི་ནང་གནས་སྡོད་བྱེད་མཁན་ཕྱི་མི་ཚོ་སྡེབ་གཅིག་ལ་ཕྱིར་འབུད་གཏོང་རྒྱུ་དང་བཟོ་ཚོང་ཁང་ཚོའི་སྒྲིག་ཁྲིམས་ལ་གུ་བཤང་བྱ་རྒྱུ། དབུས་གཞུང་གི་ལས་ཁུངས་ལ་བསྐྱར་སྒྲིག་བྱ་རྒྱུ་བཅས་ཀྱི་ལས་འཆར་ལ་ཨ་རི་བ་མང་ཚོགས་ཀྱིས་མང་མོས་རྒྱབ་སྐྱོར་ཐོབ་ཡོད་ཅེས་གསུངས་ནས་མང་ཚོགས་ཀྱི་བློ་མོས་བཞིན་སྲིད་གཞུང་སྐྱོང་གི་ཡིན་ཞེས་གསུངས་ཀྱི་ཡོད།

ཌོ་ནལྜ་ ཊམ་གྱིས་སྲིད་དབང་འཕོ་ལེན་གྱི་དུས་ཚོད་འདིར་སྲིད་དབང་སྐྱོང་སྟངས་ལ་ཚོད་ལྟ་བྱས་ནས་གྲོས་ཚོགས་གོང་མར་ཁོང་གི་ལམ་སྟོན་དང་ཐག་གཅོད་ལ་ངོས་ལེན་བྱས་ཏེ་བློན་ཆེན་ལྷན་ཚོགས་ཀྱི་མི་འགྲོ་རྣམས་གཏན་འབེབས་་མྱུར་བོ་བྱེད་དགོས་ཞེས་གསུངས་པ་མ་ཟད། འཛིན་སྐྱོང་གི་ལས་བྱེད་གཉེར་བཞིན་པའི་ཁོངས་སུ་ལམ་སྲོལ་དེ་རིགས་ནང་ཞུགས་འདོད་ཡོད་པའི་གྲོས་ཚོགས་འཐུས་མི་འཚོལ་གྱི་ཡོད་ཅེས་གསུངས་འདུག

སྤྱི་མཐུན་ཚོགས་པའི་རྙིང་ཞེན་ཅན་གྱི་ཚོགས་ཁག་ནས་ཡིན་པ་གྲོས་ཚོགས་འོག་མའི་འཐུས་མི་རལཕ་ ནོར་མན་གྱིས་ཊམ་གྱིས་ཕྱི་མི་སྡེབ་འབུད་དང་རྡོ་སྣུམ་སྔོགས་འདོན། ས་མཚམས་རྩིག་གྱང་བཅས་ལག་བསྟར་བྱ་རྒྱུ་ཡིན་པ་དང་། དེའི་ཕྱོགས་སུ་ཚང་མ་ཁྲིད་ཀྱི་རེད་ཅེས་འགྲེལ་བརྗོད་བྱས་འདུག

འོན་ཀྱང་དང་ཐོག་སྤྱི་མཐུན་ཚོགས་པའི་གྲོས་ཚོགས་གོང་འོག་གི་འཐུས་མི་ཚོས་རང་ཁོངས་འོས་བསྡུ་བྱས་ནས་གྲོས་ཚོགས་ཀྱི་འགོ་ཁྲིད་འོས་འདེམས་བྱ་རྒྱུ་ཡིན་པ་དང་། སྤྱི་མཐུན་ཚོགས་པའི་གྲོས་ཚོགས་ཀྱི་འགོ་ཁྲིད་སུ་ཞིག་འོས་འདེམས་བྱུང་བ་ཡིན་ནའང་། དེ་དག་གིས་ཆབ་སྲིད་མདུན་ལམ་དེ་ཌམ་ལ་གུས་ཞེན་ཡོད་པའི་རྣམ་འགྱུར་བསྟན་ནས་ཌམ་གྱིས་སྲིད་ཇུས་ལ་ཤར་བསྐྱོད་བྱ་རྒྱུ་ཡིན་པ་རེད།

གྲོས་ཚོགས་འོག་མིའི་འོས་བསྡུའི་གྲངས་བཤེར་ཆ་ཚང་བ་ཟིན་མེད་པ་དང་གྲོས་ཚོགས་ཀྱི་ཚོགས་གཙོ་ལས་ཐོག་མའིག་ ཇོན་སོན་གྱིས་སྲིད་དོན་ཚོགས་པ་གཉིས་ལ་གྲོས་ཚོགས་འཐུས་མིའི་གྲངས་འབོར་ཁྱད་པར་ཧ་ཅང་ཆུང་ཆུང་ཐོག་འཛིན་སྐྱོང་བྱ་རྒྱུའི་ཚོད་དཔག་བྱེད་ཀྱི་ཡོད་པ་དང་། ད་རིང་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་འོས་བསྡུའི་རྒྱལ་ཁའི་ཚོགས་འཛོམས་བྱས།

གྲོས་ཚོགས་གོང་མའི་ནང་སྤྱི་མཐུན་ཚོགས་པས་མང་གཙོ་ཚོགས་པའི་་འཐུས་མི་གསུམ་ཕམ་ཉེས་བཏང་ནས་སྤྱི་མཐུན་ཚོགས་པའི་འོས་མི་གསུམ་གསར་འདེམས་བྱུང་སྟེ་འཐུས་མི་གྲངས་མང་གི་རྒྱལ་ཁ་ཐོབ་འདུག་ཅིང་། སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་བགྲེས་པ་གསུམ་གྱིས་གྲོས་ཚོགས་གོང་མའི་འཐུས་མི་གྲངས་མང་གི་འགོ་ཁྲིད་ཐོབ་རྒྱུར་འབད་བརྩོན་བྱེད་ཀྱི་ཡོད་པ་དང་། དེ་དག་གིས་བདམས་ཐོན་སྲིད་འཛིན་ཊམ་གྱི་ལས་འཆར་ལ་མོས་མཐུན་བྱ་རྒྱུའི་རྣམ་འགྱུར་བསྟན།

སྤྱི་མཐུན་ཚོགས་པའི་གྲོས་ཚོགས་གོང་མའི་འགོ་ཁྲིད་ལ་རེ་བ་བྱེད་མཁན་གྲོས་ཚོགས་གོང་མའི་འཐུས་མི་ཇོན་ ཐུན་གྱིས་ཕོཀྶ་གསར་འགྱུར་ལས་ཁང་ལ་བསམ་ཤོག་རྩོམ་ཡིག་བྲིས་པའི་ནང་ གྲོས་ཚོགས་འཐུས་མི་ཚོ་ཝ་ཤིན་ཌོན་ལ་ཕྱིར་ལོག་བྱས་རྗེས་བདམས་ཐོན་སྲིད་འཛིན་གྱི་ཁྲིམས་འཆར་མདུན་བསྐྱོད་དང་བློན་ཆེན་སོགས་མིང་འདོན་བྱུང་བ་རྣམས་གང་མགྱོགས་གཏན་འཁེལ་བྱེད་ཕྱོགས་ཀྱི་ལས་རིམ་གོ་སྒྲིག་བྱེད་དགོས་ཀྱི་རེད་ཅེས་གསུངས་འདུག

ཕྱི་ཟླ་དང་པོའི་ནང་ཌོ་ནལྜ་་ཊམ་ཕོ་བྲང་དཀར་པོར་སླེབས་པ་དང་གྲོས་ཚོགས་གོང་འོག་གཉིས་སྤྱི་མཐུན་ཚོགས་པར་འཐུས་མི་གྲངས་མང་བྱུང་རྗེས་ཝ་ཤིན་ཌོན་གྱི་་སྲིད་དབང་སྒྲོམ་གཞིར་རྨང་གཞིའི་འགྱུར་བ་ཡོང་རྒྱུ་ཡིན་པ་མ་ཟད། སྲིད་དབང་སྐྱོང་ཕྱོགས་ལའང་འགྱུར་བ་ཆེན་པོ་ཡོང་རྒྱུ་ཡིན་ཅིང་། གནས་སྟངས་དེ་ལོ་བརྒྱད་གོང་ཊམ་སྲིད་འཛིན་ལ་འོས་འདེམས་བྱུང་བ་དང་མི་འདྲ་བ་ཡོང་རྒྱུ་རེད།

མང་གཙོ་ཚོགས་པའི་གུ་བཤང་ཅན་གྱི་ཤོག་ཁའི་ཚོགས་གཙོ་གྲོས་ཚོགས་འཐུས་མི་པྲ་མི་ལ་ ཇ་ཡ་པལ་གྱིས་ད་ཆ་གདོང་ལེན་ཧ་ཅང་ཆེན་པོ་བྱེད་དགོས་འགྱུར་གྱི་རེད་ཅེས་གསུངས་འདུག ཁོང་གིས་མུ་མཐུད་གསུངས་དོན་ལ་ ཌོ་ནལྜ་ ཊམ་གྱིས་ཤིན་ཏུ་འཇིགས་སྣང་ཆེ་བའི་ཕྱི་མི་གཞིས་ཆགས་ཀྱི་སྲིད་ཇུས་བཟུང་རྒྱུར་ཁས་ལེན་བྱས་ཡོད་པ་དང་། གྲོས་ཚོགས་ནང་གུ་བཤང་ཅན་གྱི་གྲོས་ཚོགས་འཐུས་མི་ཚོས་ཌམ་གྱི་ལས་རྒྱུན་དང་པོའི་སྐབས་འཕྲོད་བསྟེན་ལྟ་སྐྱོང་གི་ལས་རིམ་ལ་མང་གཙོ་ཚོགས་པས་གདོང་ལེན་བྱས་པ་ལས་ཡིད་གཟབ་ཆེ་ལ་ལྟ་སྲུང་ནན་པོ་བྱེད་ཀྱི་རེད་ཅེས་གསུངས་འདུག

གནད་དོན་དེ་དག་ལ་ཚོད་ལྟ་དང་པོ་དེ་སྲིད་འཛིན་གསར་རྙིང་འཕོ་ལེན་གྱི་དུས་ཚོད་ཀྱི་རིང་གི་གྲོས་ཚོགས་ལས་རྒྱུན་དེ་ཡིན་པ་དང་། ཕྱི་ཟླ་ ༡་ཚེས་ ༣ ཉིན་གྲོས་ཚོགས་གསར་པས་ལས་ཡུན་འགོ་འཛུགས་མ་བྱས་བར་བདུན་ཕྲག་བརྒྱད་ཙམ་ཡོད་པ་དེའི་རིང་ལས་དོན་གང་འདྲ་བྱེད་ཀྱི་ཡོད་པ་དེ་ཡིན་ཅིང་།

གྲོས་ཚོགས་འཐུས་མི་ཚོ་ཝ་ཤིན་ཌོན་ལ་ཕྱིར་ལོག་བྱེད་ཀྱི་ཡོད་པ་དང་དུས་མཉམ་གསར་དུ་བདམས་ཐོན་བྱུང་བའི་གྲོས་ཚོགས་འཐུས་མི་ཚོ་གྲོས་ཚོགས་ཀྱི་ལས་དོན་བྱེད་ཕྱོགས་ཀྱི་ཟབ་སྦྱོང་ཆེད་འཛོམས་ཀྱི་ཡོད་པ་དང་། སྲིད་དོན་ཚོགས་པ་གཉིས་ཀྱིས་རང་རང་གི་གྲོས་ཚོགས་ཀྱི་འགོ་ཁྲིད་འོས་འདེམས་བྱེད་ཀྱི་ཡོད་པ་རེད།

བདུན་ཕྱག་འགའ་ཤས་ཀྱི་རྗེས་དབུས་གཞུང་གི་ལས་ཁུངས་ཚོའི་སྔོན་རྩིས་ཐག་གཅོད་བྱེད་དགོས་ཀྱི་ཡོད་ཅིང་། ད་ལྟའི་འཕྲལ་སེལ་སྔོན་རྩིས་དེ་ཕྱི་ཟླ་ ༡༢་ཚེས་ ༢༠ ཉིན་རྫོགས་ཀྱི་ཡོད་པ་དང་། དེའི་གོང་གཏན་འབེབས་མ་བྱུང་ན་དབུས་གཞུང་གི་ལས་ཁག་ལས་མཚམས་འཇོག་བྱ་རྒྱུ་ཡིན་པ་རེད། སྤྱི་མཐུན་ཚོགས་པའི་རྙིང་ཞེན་ཅན་གྱི་གྲོས་ཚོགས་འཐུས་མི་ཚོས་གྲོས་ཚོགས་ཀྱི་ཚོགས་གཙོ་ཇོན་སན་ལ་གནོན་ཤུགས་འཕར་མ་སྤྲོད་རྩིས་བྱེད་ཀྱི་ཡོད་པ་དང་། དེའི་གོང་འཕྲལ་སེལ་སྔོན་རྩིས་གཏན་འབེབས་བྱ་རྒྱུར་གྲོས་ཚོགས་ཀྱི་ཚོགས་གཙོ་ཇོན་སོན་གྱིས་མང་གཙོ་ཚོགས་པའི་དབུ་ཁྲིད་ལ་བསྟུན་མཁས་བྱེད་དགོས་བྱུང་ཡོད་པ་རེད།

དེ་བཞིན་ཉེ་དུས་ཨ་རིའི་མངའ་སྡེ་མང་པོའི་ནང་དྲག་འཆར་རླུང་ཚུབ་ཀྱིས་གནོད་སྐྱོན་བྱུང་ཡོད་པ་དེ་དག་གི་ཆེད་ཛ་དྲག་ཉེན་སྐྱོབ་ཀྱི་མ་དངུལ་བསྐྱར་གསོ་གནང་དགོས་ཀྱི་ཡོད།

སྲིད་འཛིན་བྷའི་ཌན་ལས་འཁུར་འཁྱུར་རྒྱུའི་གྲ་སྒྲིག་གནང་བཞིན་པའི་སྐབས་འདིར་ཛ་དྲག་གི་མ་དངུལ་བསྐྱར་གསོ་བྱ་རྒྱུར་མང་གཙོ་ཚོགས་པས་གྲོས་ཚོགས་གོང་མར་རེ་བ་བྱེད་ཀྱི་ཡོད་་དང་། མང་གཙོ་ཚོགས་པ་ད་ཡོད་གྲོས་ཚོགས་གོང་མའི་ནང་འཐུས་མི་གྲངས་མང་ཡིན་པར་བརྟེན་གྲོས་ཚོགས་ཀྱི་ལས་འཕྲོས་ཁོངས་སུ་ཁྲིམས་དཔོན་གསར་པའི་འོས་མི་མང་པོ་གཏན་འཁེལ་དང་ཁྲིམས་འཆར་གཞན་གཏན་འབེབས་བྱེད་དགོས་ཀྱི་ཡོད་པ་དང་། ཊམ་གྱིས་སྲིད་འཛིན་དམ་བཅའ་མ་བཞག་གོང་དེ་དག་ལས་དོན་གྲུབ་པ་བྱེད་དགོས་ཀྱི་ཡོད་པ་རེད།