མར་ཀོ་རུ་བྷིའོ་ཕྱི་སྲིད་དུང་ཆེ་དང་ཝོལ་ཛི་རྒྱལ་སྲུང་སློབ་སྟོན་པར་བསྐོ་སྲིད།

༄༅།། ཨ་རིའི་འདེམས་ཐོན་སྲིད་འཛིན་ཌོ་ནལ་ཊམ་གྱིས་སྲིད་གཞུང་གསར་པའི་མཐོ་རིམ་ལས་སྣེ་ཁག་བསྐོ་བཞག་བྱ་རྒྱུ་འགོ་ཚུགས། ཧྥུ་ལོ་རི་ཌ་མངའ་སྡེའི་གྲོས་ཚོགས་གོང་མའི་འཐུས་མི་མར་ཀོ་རུ་བྷིའོ་(Marco Rubio)་ཕྱི་སྲིད་དྲུང་ཆེ་དང་གྲོས་ཚོགས་འོག་མའི་འཐུས་མི་མེཀ་ཝོཀ་ཛི་(Mike Waltz)་རྒྱལ་སྲུང་སློབ་སྟོན་པར་བསྐོ་རྒྱུའི་གནས་ཚུལ་ཐོན་འདུག ཕྱི་ཟླ་༡༡་པའི་ཚེས་༡༡་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། མར་ཀོ་རུ་བྷིའོ་དང་མེཀ་ཝོལ་ཛི་གཉིས་ཀ་རྒྱ་ནག་གི་སྟེང་དུ་ཧ་ཅང་ལངས་ཕྱོགས་མཁྲེགས་པོ་འཛིན་པའི་གྲོས་ཚོགས་གོང་འོག་གི་འཐུས་མི་གཉིས་ཡིན་ཞིང་། ལྷག་པར་དུ་རྒྱ་ནག་གཞུང་གིས་མར་ཀོ་རུ་བྷིའོ་སོགས་ཧོང་ཀོང་དང་ཨོ་མེན་དམིགས་བསལ་ས་ཁུལ། རྒྱ་ནག་བཅས་ལ་ཡོང་མི་ཆོག་ཅེས་ཉེས་ཆད་བཅད། ཌོ་ནལ་ཊམ་གྱི་སྲིད་གཞུང་གསར་པའི་ནང་དུ་མར་ཀོ་རུ་བྷིའོ་དངོས་སུ་ཕྱི་སྲིད་དྲུང་ཆེར་གྱུར་ན་རྒྱ་ནག་གི་སྲིད་ཇུས་དེར་འགྱུར་བ་མ་བཏང་ཐབས་མེད་དུ་འགྱུར་རྒྱུ་ཡིན་འདུག

མར་ཀོ་རུ་བྷིའོ་ནི་ཨ་རིའི་ས་ཁམས་ཆབ་སྲིད་ཀྱི་ཁ་གཏད་པ་རྒྱ་ནག་དང་ཨི་རན། ཀུ་པ་བཅས་ཀྱི་སྟེང་དུ་ཧ་ཅང་མཁྲེགས་པོ་ཡིན་པ་ཡོངས་སུ་གྲགས། ཌོ་ནལ་ཊམ་མི་ཚོད་དཔག་དཀའ་བ་དང་འགྱུར་བ་ཐེབས་ཆོག་ཆོག་ཅིག་མོད། གལ་སྲིད་ཁོ་པའི་བསམ་བློར་འགྱུར་བ་མ་ཐེབས་ན་མར་ཀོ་རུ་བྷིའོ་ཕྱི་སྲིད་དྲུང་ཆེར་བསྐོ་འཆར་འདུག་ཅེས་མིང་འདོན་མ་བྱས་པའི་ནང་འཁོར་ཞིག་གིས་གསར་འགོད་པར་གནས་ཚུལ་མཁོ་སྤྲོད་བྱས་འདུག ད་ལྟ་ཌོ་ནལ་ཊམ་གྱིས་༢༠༡༧་ལོར་སྲིད་དབང་བཟུང་བ་དང་མ་འདྲ་བར་ཡུཀ་རེན་དང་དཀྱིལ་ཤར་ས་ཁུལ་དུ་དམག་འཁྲུག་ལངས། རྒྱ་ནག་དང་ར་ཤི་ཡ། ཨི་རན་དང་བྱང་ཀོ་རི་ཡ་བཅས་ཀྱིས་དཔུང་སྟོབས་བསྒྲིགས་ཏེ་འཛམ་གླིང་ཧྲིལ་པོར་འཁྲུག་རྩོད་ལངས་ནས་ཉེན་ཀ་ཆེ་རུ་སོང་། ཌོ་ནལ་ཊམ་གྱིས་རང་གི་སྲིད་གཞུང་གསར་པའི་མཐོ་རིམ་ལས་སྣེ་ཁག་བསྐོ་བཞག་བྱ་རྒྱུ་མ་ནོར་བ་ཞིག་དགོས་ཀྱི་འདུག་ཅེས་གླེང་།།

ལོ་ན་༥༣་ལ་སོན་པའི་མར་ཀོ་རུ་བྷིའོ་གཙོས་སྤྱི་མཐུན་ཚོགས་པའི་ལྟ་བ་མཁྲེགས་འཛིན་པ་ཚོ་དམག་འཁྲུག་བརྒྱབ་དང་སྟོབས་ཤུགས་ལྡན་པའི་ཕྱི་སྲིད་འཛིན་རྒྱུར་མོས་པ་ཆེ། ཉེ་དུས་ཤིག་ནས་དེ་དག་གི་ལངས་ཕྱོགས་ལ་འགྱུར་བ་ཐེབས་ནས་ཡུ་རོབ་ཀྱི་མཐུན་གྲོགས་རྒྱལ་ཁབ་ཁག་གིས་དམག་དོན་འགྲོ་གྲོན་གཏོང་གི་མི་འདུག་ཅེས་འཁང་ར་བཤད། ཁ་སྔོན་ཕྱི་ཟླ་༤་པའི་ནང་མར་ཀོ་རུ་བྷིའོ་ཡིས་ཡུཀ་རེན་དང་ར་ཤི་ཡས་གྲོས་མོལ་བྱས་ནས་དམག་འཁྲུག་ཐག་གཅོད་བྱ་དགོས། ལོ་བཅུའི་སྔོན་དུ་ཤོར་ཟིན་པའི་ས་ཆ་རྣམས་ཕྱིར་ལེན་བྱ་རྒྱུ་ཡིན་ཞེས་འཐབ་རྩོད་བྱས་ན་ཕན་ཐོགས་མེད་ཟེར། ཡང་ཕྱི་ཟླ་༩་པའི་ནང་ང་ར་ཤི་ཡའི་ཕྱོགས་སུ་ལངས་པ་མིན། སྟབས་མ་ལེགས་པ་ཞིག་ལ་ཡུཀ་རེན་གྱིས་གྲོས་མོལ་གྱི་ལམ་ནས་དམག་ཐག་གཅོད་དགོས་ཞེས་ནན་གྱིས་བརྗོད། ཨ་རིས་ཡུཀ་རེན་ལ་ཨ་སྒོར་ཐེར་འབུམ་༩༥་རོགས་དངུལ་སྤྲོད་རྒྱུར་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་བཅོ་ལྔས་རྒྱབ་སྐྱོར་མ་བྱས་པ་དེ་དག་གི་གྲས་སུ་མར་ཀོ་རུ་བྷིའོ་འདུས།།

ཨ་རིའི་གྲོས་ཚོགས་གོང་མའི་ནང་དུ་མར་ཀོ་རི་བྷིའོ་ཡིས་བོད་དང་ཞིན་ཅང་། ཧོང་ཀོང་དང་ཐེ་ཝན་ལ་རྒྱབ་སྐྱོར། རྒྱ་ནག་གི་འགྲོ་བ་མིའི་ཐོབ་ཐང་གི་ཟིན་ཐོར་སྐྱོན་བརྗོད། ༢༠༡༩་ལོར་མར་ཀོ་རུ་བྷིའོ་ཡིས་ཨ་རིའི་ནོར་སྲིད་ལྷན་ཁང་ལ་རྒྱ་ནག་གི་ཊིག་ཊོག་བཀོལ་ཆས་དེ་ཨ་མི་རི་ཀའི་བདེ་འཇགས་ལ་ཉེན་ཁ་ཡོད་མེད་ཞིབ་འཇུག་བྱ་དགོས་ཞེས་ནན་གྱིས་བསྐུལ། ༢༠༢༠་ལོར་རྒྱ་ནག་གིས་ཨ་རིའི་གྲོས་ཚོགས་གོང་མའི་འཐུས་མི་མར་ཀོ་རུ་བྷིའོ་དང་ཊེ་ཌི་ཁུ་རུ་ཛི། ཊོམ་ཀོ་ཊོན་དང་ཇཱོ་ཤི་ཧོ་ལེ། གྲོས་ཚོགས་འོག་མའི་འཐུས་མི་སི་མཱི་ཐེ་ཚུད་པའི་ཨ་རིའི་སྤྱི་དམངས་༡༡་རྒྱ་ནག་ཏུ་ཡོང་མི་ཆོག་ཅེས་འགྲིམ་འགྲུལ་བཀག་སྡོམ་གྱི་ཉེས་ཆད་བཀལ། ད་ལོ་མར་ཀོ་རུ་བྷིའོ་ཡིས་སྲིད་འཛིན་བྷ་ཌན་གྱི་གཞུང་ལ་རྒྱ་ནག་གི་ཧྭ་ཝེ་ཁ་པར་གསར་པ་དང་དེའི་བཅོས་རིག་གི་བརྡ་འཕྲིན་མ་ལག་རྣམས་ཨ་རིའི་ནང་དུ་ཚོང་འགྲེམ་བྱེད་མི་ཆོག་པའི་བཀག་སྡོམ་བྱ་དགོས་ཞེས་གནོན་ཤུགས་སྤྲད། མར་ཀོ་རུ་བྷིའོ་ཡི་མེས་པོ་ནི་༡༩༦༢་ལོར་ཀུ་པ་ནས་ཨ་མི་རི་ཀར་བཙན་བྱོལ་དུ་ལྷགས།།

ཕྱི་ཟླ་༡༡་པའི་ཚེས་༡༡་ཉིན་སི་ཨེན་ཨེན་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་འདེམས་ཐོན་སྲིད་འཛིན་ཌོ་ནལ་ཊམ་གྱིས་ཧྥུ་ལོ་རི་ཌ་མངའ་སྡེའི་གྲོས་ཚོགས་འོག་མའི་འཐུས་མི་མེཀ་ཝོཀ་ཛི་(Mike Waltz)་རྒྱལ་སྲུང་སློབ་སྟོན་པར་བསྐོ་འཆར་ཡོད་ཅིང་། ཁོ་པ་ཨབ་གྷ་ཎི་སི་ཐན་དང་དཀྱིལ་ཤར་ས་ཁུལ། ཨ་ཧྥི་རི་ཀ་སོགས་སུ་འཐབ་འཁྲུག་ལ་ཞུགས་ཏེ་བྱས་རྗེས་ཅན་གྱི་དམག་མི་ཟུར་པ་ཞིག་རེད། ལོ་རྗེས་མར་མེཀ་ཝོལ་ཛིས་རྒྱལ་སྲུང་སློབ་སྟོན་པའི་ལས་ཁུར་བཞེས་ཏེ་ཡུཀ་རེན་དང་ར་ཤི་ཡའི་དམག་འཁྲུག ཨི་སི་རལ་དང་ཧ་མ་སི་ཤོག་ཁག་གི་དམག་འཁྲུག་རྣམས་ཇི་ལྟར་མཇུག་བསྒྲིལ་དུ་འཇུག་དགོས་མིན་གྱི་ཐབས་ལམ་བཙལ་ནས་ས་ཁམས་ཆབ་སྲིད་ཀྱི་འཐབ་འཁྲུག་ཞི་འཇམ་གཏོང་དགོས་པ་རེད་ཅེས་གནས་ཚུལ་སྤེལ་འདུག སྲིད་འཛིན་ཟུར་པ་ཌོ་ནལ་ཊམ་ལས་དུས་དང་པོའི་སྐབས་སུ་རྒྱལ་སྲུང་སློབ་སྟོན་པ་ཇཱོན་བྷོལ་ཊོན་(John Bolton)་དམག་སྤྱི་ཟུར་པ་མེཀ་མ་སི་ཊར་(McMaster)་གཉིས་ལ་མ་འཆམ་པར་འགལ་ཟླ་བྱུང་།།

ཌོ་ནལ་ཊམ་གྱི་ལས་དུས་གཉིས་པའི་སྐབས་སུ་གཞུང་དྲང་བློ་དཀར་བ་ཚོ་མཐོ་རིམ་ལས་སྣེ་ཁག་ཏུ་བསྐོས་ཏེ་བཟང་ལན་འཇལ། འོས་བསྡུའི་དྲིལ་བསྒྲགས་ལས་འགུལ་སྐབས་དང་ཌོ་ནལ་ཊམ་གྱི་སྲིད་ཇུས་ལ་སྐྱོན་བརྗོད་དམ། ཟུར་ཟ་དང་ཡི་རང་མ་བྱུང་བའི་རྣམ་འགྱུར་བསྟན་པའི་ལས་སྣེ་ཟུར་པ་རྣམས་བསྐྱར་དུ་སྲིད་གཞུང་གསར་པའི་ནང་དུ་བསྐོ་བཞག་བྱ་རྒྱུ་མིན་ཞིང་། ཉམས་ཞིབ་པ་ཚོས་ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་(Mike Pompeo)་རྒྱལ་སྲུང་དྲུང་ཆེར་བསྐོ་སྲིད། མཉམ་འབྲེལ་རྒྱལ་ཚོགས་ཀྱི་ཨ་རིའི་རྒྱུན་བཞུགས་སྐུ་ཚབ་ཟུར་པ་ཎི་ཀི་ཧེ་ལི་(Nikki Haley)་ཡང་སྲིད་གཞུང་གསར་པའི་མཐོ་རིམ་ལས་སྣེ་གྲས་སུ་བསྐོ་སྲིད་ཅེས་བསྒྲགས། ཡིན་ནའང་ཌོ་ནལ་ཊམ་གྱིས་རང་གི་བདེན་པའི་དྲྭ་ཚིགས་སུ་སྲིད་གཞུང་གསར་པའི་ནང་དུ་མེཀ་ཕོམ་ཕིའོ་དང་ཎི་ཀི་ཧེ་ལི་གཉིས་སྲི་ཞུ་བསྒྲུབ་ཏུ་ཤོག་ཅེས་འབོད་འགུགས་བྱ་རྒྱུ་མིན་པའི་གསལ་བསྒྲགས་སྤེལ།།

གཟའ་འཁོར་སྔོན་མར་སི་ཨེན་ཨེན་གསར་ཁང་གིས་གྲོས་ཚོགས་འཐུས་མི་ཝོལ་ཛི་ལ་བཅར་འདྲི་ཞུས། ཁོང་གིས་ཨ་མི་རི་ཀར་ཕྱི་མི་གཞིས་ཆགས་པ་ཡོང་སྟངས་ནི་དྲང་སྙོམས་ཤིག་གཏན་ནས་མ་རེད། མི་སྟོང་ཕྲག་མང་པོས་ཁྲིམས་མཐུན་གྱི་ལམ་བརྒྱུད་ནས་ལོ་མང་པོར་བསྒུགས། ཁོ་ཚོས་དགོས་ངེས་ཀྱི་ཆ་རྐྱེན་ཚང་མ་བསྒྲུབས་ཀྱང་བྷ་ཌན་དང་ཧེ་རི་སིའི་གཞུང་གིས་ཁྲིམས་འགལ་དུ་ཡོང་བ་རྣམས་སྣང་མེད་དུ་བཞག་སྟེ་སྐྱབས་བཅོལ་བའི་ཐོབ་ཐང་སྤྲད། ཨ་མི་རི་ཀར་བློ་ཕམ་ཆེ་ཤོས་བྱུང་ཡོད་པ་ནི་ཨབ་ཧན་རྣམས་རེད། ཁོ་ཚོས་ཨ་རི་དང་དཔུང་པ་མཉམ་གཤིབ་བྱས་ནས་ཚེ་སྲོག་འབེན་དུ་བཙུགས་ཀྱང་མཐའ་མཇུག་ཨ་མི་རི་ཀར་མ་ཐར། ང་ཚོས་ལྷོ་ཕྱོགས་ཀྱི་ས་མཚམས་སྲུང་སྐྱོབ་དམ་དུ་གཏང་དགོས་པ་དང་ཕྱི་མི་གཞིས་ཆགས་པ་ཚོད་འཛིན་མེད་པར་ཡོང་གི་ཡོད་པ་དེ་འགོག་དགོས་ཀྱི་འདུག ས་མཚམས་མ་བཀག་ན་ཁྲིམས་འགལ་གྱི་ཕྱི་མི་གཞིས་ཆགས་པ་ཡོང་རྒྱུ་ཇེ་མང་དང་ཇེ་སྡུག་ཏུ་འགྲོ་ངེས་རེད་ཅེས་བཀྲལ།།

ཕྱི་ཟླ་༡༡་པའི་ཚེས་༡༢་ཉིན་བི་བི་སི་གསར་ཁང་གིས་གནས་ཚུལ་སྤེལ་བ་ལྟར་ན། མར་ཀོ་རུ་བྷིའོ་ཕྱི་སྲིད་དྲུང་ཆེར་བསྐོ་རྒྱུ་དེར་ཐ་མའི་གྲོས་འཆམ་བྱུང་མེད་ཀྱང་མེཀ་ཝོལ་ཛི་རྒྱལ་སྲུང་སློབ་སྟོན་པར་བསྐོ་རྒྱུར་འཐད་པ་བྱུང་འདུག ད་ལོ་སྤྱི་མཐུན་ཚོགས་པར་སྲིད་འཛིན་འོས་འདེམས་དང་གྲོས་ཚོགས་གོང་མར་འཐུས་མི་གྲངས་མང་ཐོབ། དེ་བཞིན་གྲོས་ཚོགས་འོག་མའི་ནང་དུའང་འཐུས་མི་གྲངས་མང་གི་རྒྱལ་ཁབ་ཐོབ་རྒྱུའི་རྟགས་མཚན་མངོན། ཕྱི་སྲིད་དྲུང་ཆེ་ལྟ་བུའི་ལས་སྣེ་ཁག་ལ་གྲོས་ཚོགས་གོང་མའི་བཀའ་འཁྲོལ་ཐོབ་དགོས། ཌོ་ནལ་ཊམ་གྱིས་སྲིད་འཛིན་ལ་རྒྱལ་སྲུང་སློབ་སྟོན་པ་བསྐོ་ཆོག་པའི་དབང་ཚད་ཡོད་པ་ལྟར་ཕྱི་སྲིད་དྲུང་ཆེ་ཡང་གྲོས་ཚོགས་གོང་མ་བརྒྱུད་མི་དགོས་པར་ཐད་ཀར་བསྐོ་ཆོག་པའི་དབང་ཚད་དགོས་ཀྱི་འདུག་ཅེས་དགོས་འདུན་བཏོན། གྲོས་ཚོགས་གོང་མའི་འཐུས་མི་ཚོར་རྩ་ཁྲིམས་ཀྱི་འགན་དབང་ཡོད་པས་ཕྱི་སྲིད་དྲུང་ཆེ་སོགས་ངེས་པར་དུ་ཆོག་མཆན་འགོད་དགོས་པའི་གནས་ཚུལ་ཐོན་འདུག