༄༅། ཨ་རིའི་འདེམས་ཐོན་སྲིད་འཛིན་ཌོ་ནལ་ཁྲམ་གྱིས་ རིང་མིན་ཁོང་གི་སྲིད་གཞུང་གི་ཕྱི་སྲིད་དྲུང་ཆེར་གྲོས་ཚོགས་གོང་མའི་འཐུས་མི་མར་ཁོ། རུ་བྷི་ཡོ་དང་ རྒྱལ་དོན་སྲུང་སྐྱོབ་སློབ་སྟོན་པར་གྲོས་ཚོགས་འོག་མའི་འཐུས་མི་མ་ཡེཀ། ཝལ་ཛེ་བསྐོ་གཞག་གནང་རྒྱུ་ཡིན་པའི་གསར་འགྱུར་ཐོན་ཡོད་པ་ལྟར་ དཔོན་རིགས་དེ་གཉིས་ནི་རྒྱ་ནག་ཐོག་ཧ་ཅང་གྱོན་མཁྲེགས་རང་བཞིན་གྱི་སྲིད་ཇུས་འཛིན་མཁན་གཉིས་ཆགས་ཡོད་སྟབས་རྒྱ་ནག་ཁོང་ཁྲོ་ཟ་སྲིད་པ་ཞིག་ཆགས་ཡོད་པ་རེད། ཡང་དཔོན་རིགས་ཁོང་གཉིས་ལ་ཁྲམ་སྲིད་གཞུང་གསར་པའི་གནད་ཡོད་དཔོན་རིགས་སུ་བསྐོ་གཞག་གནང་སྲིད་པ་དེ་ཡིས་ཨ་རིའི་མཐུན་གྲོགས་ཉི་ཧོང་བློ་འཚབ་ཇེ་ཆུང་དུ་འགྲོ་རྒྱུ་ཡིན་པ་མ་ཟད་ ཨ་རིའི་ཡུ་རོབ་ཀྱི་མཐུན་གྲོགས་ཚོ་ཡང་གང་ཙམ་བློ་བདེ་བར་འགྱུར་སྲིད་པ་ཡིན་འདུག
རྩ་བའི་གོང་ཞུས་དཔོན་རིགས་གཉིས་པོ་དེར་གོ་གནས་དེ་གཉིས་སོ་སོའི་ཐོག་བསྐོ་གཞག་གནང་སྲིད་པའི་སྐོར་གཟའ་ཟླ་བའི་ཉིན་ཨ་རིའི་གསར་ཤོག་ནིའུ་ཡོག་ཀྲཡེམསེ་ཡིས་མིང་འདོན་མ་བྱས་པའི་འབྲེལ་ཡོད་གསུམ་ལུང་འདྲེན་གྱིས་གསལ་སྟོན་བྱས་ཡོད་ཀྱང་སྲིད་འཛིན་འདེམས་ཐོན་པ་ཁྲམ་གྱིས་དངོས་སུ་ཁོང་རྣམ་པ་གཉིས་ལ་བསྐོ་གཞག་གནང་མིོན་ད་ལྟ་མཐའ་གཅིག་ཏུ་བརྗོད་དཀའ་བ་ཡིན་པ་རེད། འོན་ཀྱང་ཁོང་རྣམ་པ་གཉིས་ཐོག་འབིད་ཙམ་ཞུས་པ་ཡིན་ན་ སྐུ་ཞབས་མར་ཁོ།རུ་བྷི་ཡོ་ནི་ཧ་ཅང་དབང་ཤུགས་ཆེ་བའི་ཨ་རིའི་གྲོས་ཚོགས་གོང་མའི་ཕྱི་འབྲེལ་ཚོགས་ཆུང་དང་གསང་བའི་ལས་དོན་ཚོགས་ཆུང་གི་མཐོ་རིམ་ཚོགས་མི་ཞིག་ཡིན་པ་དང་ ཁོང་གིས་རྒྱུན་རིང་ཞིག་ནས་ཨ་རིས་རྒྱ་ནག་ཐོག་སྲིད་ཇུས་མཁྲེགས་པོ་ཞིག་འཛིན་དགོས་པའི་དགོངས་ཚུལ་རབ་དང་རིམ་པ་ཞིག་སྟོན་གནང་ཡོད་པ་དང་ ལྷག་པར་དུ་ཁོང་གི་ལས་ཁུངས་ཀྱིས་ད་ལོའི་ཕྱི་ཟླ་དགུ་པའི་ནང་འདོན་སྤེལ་གནང་པའི་སྙན་ཐོ་ཞིག་གི་ནང་ རྒྱ་ནག་ནི་ང་ཚོའི་དྲན་ཚོད་ནང་ཨ་རིའི་དགྲ་ཁ་གཏད་དབང་ཤུགས་ཆེ་ཤོས་དེ་ཡིན་ཞེས་གསལ་སྟོན་གནང་ཡོད་པ་དང་ ཕྱོགས་མཚུངས་ཁོང་གིས་ཨ་རི་དང་ཉི་ཧོང་གཉིས་ཀྱི་མནའ་འབྲེལ་མཐུན་ཚོགས་དེ་གལ་གནད་ཆེན་པོ་ཡིན་པ་ནན་བརྗོད་གནང་ཡོད་པ་དེ་ཡིས་ཨ་རིའི་མཐུན་གྲོགས་ཉི་ཧོང་བློ་བདེ་བར་འགྱུར་རྒྱུ་ཡིན་འདུག
གང་ཡིན་ཞེ་ན་ ཉི་ཧོང་གིས་ལྷོ་རྒྱ་ནག་རྒྱ་མཚོའི་ཐོག་རྒྱ་ནག་གིས་བཙན་པ་དབང་བཤེད་ཆེ་བའི་བྱ་སྤྱོད་ཐེར་འདོན་དང་སྦྲགས་ གལ་ཏེ་ཐེ་ཝན་ལ་ཨ་རི་གཙོ་བོར་གྱུར་པའི་མཐུན་གྲོགས་ཚོས་སྲུང་སྐྱོབ་ཚུལ་བཞིན་བྱེད་མ་ཐུབ་པ་ཡིན་ཚེ་ ལྷོ་ཤར་དང་ཤར་ཨེ་ཤེ་ཡའི་ཞི་བདེ་དང་རྟན་ལྷིང་ལ་དོ་འཕོག་འགྲོ་ཉེན་ཡོད་ཅེས་ཉེན་བརྡ་བཏང་དང་གཏོང་མུས་ཡིན་པ་རེད། དེ་དང་ཕྱོགས་མཚུངས་སྐུ་ཞབས་རུ་བྷི་ཡོ་ཡིས་ད་བར་སྲིད་འཛིན་ཟུར་པ་ཁྲམ་གྱིས་ཨུ་རུ་སུའི་སྲིད་འཛིན་པུ་ཀྲིན་ལ་ཉེ་ཕྱོགས་འཛིན་པ་དང་ཨ་རིའི་ནུབ་ཕྱོགས་མཐུན་གྲོགས་དང་འབྲེལ་ཐག་རིང་དུ་གཏོང་ཉེན་གྱི་གཏམ་བཤད་ཁག་ལའང་དེ་ཙམ་གནད་འགག་རྩིས་ཀྱི་མེད་པ་ལྟར་ ཨ་རིས་ནུབ་ཕྱོགས་ཀྱི་མཐུན་གྲོགས་ནེ་ཀྲོ་སྒྲིག་འཛུགས་ལྟ་བུ་དང་འབྲེལ་ལམ་བཟང་པོ་མུ་མཐུད་འཇོག་སྲིད་པའི་བཟོ་ལྟ་ཐོན་ཡོད་པ་རེད།དེ་དང་ཕྱོགས་མཚུངས་རིང་མིན་ཁྲམ་གྱི་ལས་དུས་གཉིས་པའི་གཞུང་གི་ནང་ཧ་ཅང་གལ་གནད་ཆེ་བའི་རྒྱལ་དོན་སྲུང་སྐྱོབ་སློབ་སྟོན་པའི་གོ་གནས་སུ་བསྐོ་གཞག་གནང་སྲིད་པ་མཡེཀ། ཝལ་ཛེ་ཡང་རྒྱ་ནག་ཐོག་ཧ་ཅང་མཁྲེགས་བཟུང་གི་ལྟ་བ་ལངས་ཕྱོགས་འཛིན་མཁན་ཞིག་ཡིན་པ་རེད། ཁོང་ནི་གྲོས་ཚོགས་འོག་མའི་ནང་སྤྱི་མཐུན་ཚོགས་པའི་རྒྱ་ནག་གི་ལས་དོན་ཚོགས་ཆུང་གི་ཚོགས་མི་ཞིག་དང་རྒྱ་གར་གྱི་ལས་དོན་ཚོགས་ཆུང་གི་ཚོགས་མི་ཞིག་ཀྱང་ཡིན་པ་རེད།
ཁོང་གོ་གནས་དེའི་ཐོག་ཞུགས་པ་ཡིན་ན་ ཁོང་ནི་སྲིད་འཛིན་ལ་རྒྱལ་དོན་སྲུང་བསྐྱོབ་དང་འབྲེལ་བའི་གནད་དོན་ཡོངས་རྗོངས་ཐོག་སློབ་སྟོན་ཞུ་མཁན་དེ་ཆགས་ཀྱི་ཡོད་པ་རེད། ཁོང་གིས་གྲོས་ཚོགས་འོག་མའི་ནང་རྒྱ་ནག་ནས་གཏེར་དངོས་ནང་འདྲེན་བྱེད་ཤུགས་ཆུང་དུ་གཏོང་ཕྱོགས་ཀྱི་གྲོས་འགོ་སྟོན་གནང་ཡོད་པ་དང་ དེ་བཞིན་ཨ་རིའི་གཙུག་ལག་སློབ་གཉེར་ཁང་ཁག་གི་ནང་རྒྱ་ནག་གི་སོ་ཉུལ་གྱི་ངན་སྤྱོད་སྔོན་འགོག་ཐོག་གྲོས་འགོ་སྟོན་མྱོང་ཡོད་པ་རེད། སྐུ་ཞབས་རུ་བྷིཡོ་དང་སྐུ་ཞབས་ཝོལ་ཛེ་གཉིས་ཀས་རྒྱ་གར་རྒྱ་མཚོ་དང་ཞི་བདེ་རྒྱ་མཚོའི་ཁུལ་དུ་ནག་གི་རྒྱ་བསྐྱེད་གི་སྡིག་སྐུལ་ཉེན་འཚབ་ལ་གདོང་ལེན་བྱེད་ཆེད་དུ་ཨ་རིའི་མཐུན་གྲོགས་རྒྱལ་ཁབ་ཁག་དང་མཉམ་དུ་ཨ་རིའི་གྲུ་གཟིངས་འཛུགས་སྐྲུན་གྱི་ནུས་པ་གོང་འཕེལ་གཏོང་དགོས་པའི་ཐོག་དགོངས་ཚུལ་ཤུགས་ཆེ་སྟོན་གནང་གི་ཡོད་པ་རེད། བྱས་ཙང་ཁོང་རྣམ་གཉིས་ཨ་རིའི་གཞུང་གསར་པའི་གནད་ཡོད་དཔོན་རིགས་ཀྱི་གོ་གནས་ཐོག་ཕེབས་པ་ཡིན་ཚེ་ རྒྱ་ནག་ཁོང་ཁྲོ་ཟ་སྲིད་པ་ཡིན་འདུག
གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།
གླེང་སྟེགས།