ཕྱི་དྲིལ་བོད་ཀྱི་འགྲེམས་སྟོན་ཁང་གིས་གོ་སྒྲིག་འོག་རྒྱ་གར་བ་གཙོས་པའི་རྒྱལ་སྤྱིའི་ཡུལ་གྲུ་གང་ས་ནས་བཞུགས་སྒར་ཁུལ་དུ་ཡུལ་སྐོར་དང་གནས་མཇལ་སོགས་སུ་ཕེབས་མཁན་རྣམས་ལ་དམིགས་ཏེ་ཐེག་ཆེན་ཆོས་གླིང་གཙུག་ལག་ཁང་དུ་དེ་རིང་ཕྱི་ཟླ་ ༡༡ ཚེས་ ༢༠ ནས་སྐོར་བསྐྱོད་འགྲེམས་སྟོན་གྱི་ལམ་ནས་བོད་དོན་ཞུ་གཏུག་གི་ལས་འགུལ་ཞིག་དབུ་འཛུགས་གནང་ཡོད་ཅིང་། སྐོར་བསྐྱོད་འགྲེམས་སྟོན་བརྒྱུད་དེ་བོད་དོན་ཞུ་གཏུག་གི་ལས་འགུལ་སྤེལ་དགོས་པའི་གནད་འགག་སྐོར་ལ་ཕྱི་དྲིལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་སུ་བཅར་འདྲི་ཞུས་པར། ཁོང་གིས་བཞུགས་སྒར་རྡ་རམ་ས་ལའི་ཁུལ་འདི་བཞིན་ཡུལ་སྐོར་སྤྲོ་འཆམ་པ་དང་དད་ལྡན་ཆོས་ཞུ་བ་སོགས་མང་པོ་འདུ་སའི་ས་ཚིགས་གལ་གནད་ཅན་ཞིག་ཆགས་ཡོད་སྟབས་བོད་མིའི་སྒྲིག་འཛུགས་ཀྱི་ངོས་ནས་གོ་སྐབས་འདི་བཟུང་སྟེ་ཕྱི་རྒྱལ་ནང་གི་ཡུལ་སྐོར་སྤྲོ་འཆམ་པ་དང་དད་ལྡན་ཀུན་ལ་བོད་དོན་ངོ་སྤྲོད་དང་ཞུ་གཏུག་བྱེད་དགོས་པ་གལ་ཆེར་འཛིན་གྱི་ཡོད་པ་དང་། དེ་བཞིན་འཕགས་བོད་གཉིས་ཀྱི་ལོ་རྒྱུས་ཀྱི་འབྲེལ་ལམ་གསལ་འདོན་གྱིས་རྒྱལ་ཁབ་གཉིས་བར་ལ་གཅིག་ཕན་གཅིག་རོགས་དང་འཛམ་གླིང་ཞི་བདེར་འགོད་པར་ཐུན་མོང་ལེགས་སྐྱེས་འབུལ་ཕྱོགས་དང་འབྲེལ་བའི་སྐོར་ལ་གོ་རྟོགས་ཀྱི་ལས་འགུལ་སྤེལ་དགོས་པ་གལ་ཆེ་ཡིན་པ་གསུངས་གནང་སོང་ལ། གཞན་ཡང་ད་རེས་ཀྱི་སྐོར་བསྐྱོད་འགྲེམས་སྟོན་བརྒྱུད་ནས་གཙོ་བོ་འཕགས་བོད་གཉིས་བར་གྱི་ཆོས་དང་རིག་གཞུང་གི་འབྲེལ་ལམ་གསལ་འདོན་གྱིས་རྒྱ་གར་དང་བོད་དབར་གཅིག་ཕན་གཅིག་རོགས་ཡོང་ཐབས། བོད་མི་རིགས་ཀྱི་འཐབ་རྩོད་ཀྱི་ལོ་རྒྱུས། ༧གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་སོགས་ཀྱི་སྐོར་ལ་གོ་རྟོགས་ལས་འགུལ་སྤེལ་གནང་རྒྱུ་ཡིན་འདུག
དེ་དང་འབྲེལ་ནས་འགྲེམས་སྟོན་ལ་ཐུགས་སྣང་གནང་མཁན་གྱི་ཡུལ་སྐོར་བ་ཁག་ཅིག་ལ་སྐོར་བསྐྱོད་འགྲེམས་སྟོན་དང་འབྲེལ་བའི་སྐོར་ལ་བཅར་འདྲི་ཞུས་པར། རྒྱ་གར་ལྷོ་ཕྱོགས་མུམ་བྷེ་ནས་ཡིན་པ་ཨ་ཀ་ཤཱི་ལགས་ཀྱིས་བརྗོད་དོན། རྩ་བའི་བོད་པའི་འཐབ་རྩོད་དང་ལས་འགུལ་ཐད་ལ་དེ་སྔ་ནས་རྒྱུས་མངའ་ཕྲན་བུ་ཡོད་ཀྱང་། དམིགས་བསལ་ད་རེས་ཀྱི་འགྲེམས་སྟོན་ཐོག་ནས་གནས་ཚུལ་མང་པོ་ཞིག་རྒྱུས་ལོན་བྱུང་ཡོད་པ་དང་། འགྲེམས་སྟོན་འདིའི་ཐོག་ནས་བོད་རྒྱའི་གནས་བབ། འཕགས་བོད་ཀྱི་ལོ་རྒྱུས་སོགས་ལ་ཡང་རྒྱུས་མངའ་གང་འཚམ་བྱུང་བ་མ་ཟད་བོད་བརྒྱུད་ནང་བསྟན་ལའང་རྒྱུས་མངའ་མང་ཙམ་བྱེད་རྒྱུའི་འདུན་པ་དེ་བས་ཇེ་ཆེར་ཕྱིན་ཡོད་པ་ཡང་གསུངས་གནང་སོང་།
གཞན་ལྡི་ལི་ནས་ཡིན་པའི་བུ་མོ་ཤཱིལ་པཱ་ ཀ་པཱ་ཡི་ལགས་ཀྱིས། རྩ་བའི་ཁོ་མོ་རང་ཉིད་ནང་པའི་ཆོས་ལ་རྒྱུས་མངའ་ཡག་པོ་ཡོད་མཁན་ཞིག་ཡིན་པས། ད་རེས་ཀྱི་འགྲེམས་སྟོན་ལ་བསྔགས་བརྗོད་དང་། རྒྱ་གར་ནས་བྱུང་བའི་ནང་བསྟན་བོད་དུ་དར་བའི་ལོ་རྒྱུས་འགྲེམས་སྟོན་འདིས་ཁོ་མོར་བབ་ཆགས་ཟབ་མོ་བཞག་པ། དེ་བཞིན་༧གོང་ས་ཏཱ་ལའི་བླ་མ་མཆོག་རྒྱ་གར་ལ་བཀའ་དྲིན་ཆེན་པོ་ཡིན་པ་སོགས་དང་། གཞན་ཡང་སེ་ལོ་ཝི་ཀི་ཡ་ནས་ཡིན་པ་སྐུ་ཞབས་མི་ལཱན་ལགས་ཀྱིས་ད་རེས་ཀྱི་འགྲེམས་སྟོན་འདི་ནི་ཁོང་ལ་དམིགས་བསལ་ཞིག་བྱུང་བ་དང་། བྱེ་བྲག་ཏུ་བོད་བརྒྱུད་ནང་བསྟན་རྒྱ་གར་ནས་དར་བས་འཕགས་བོད་གཉིས་ཀྱི་འབྲེལ་བ་དམིགས་བསལ་བ་ཡིན་པ། དེ་བཞིན་༧གོང་ས་ཏཱ་ལའི་བླ་མ་མཆོག་མཆོག་གི་བཀའ་དྲིན་ལས་ད་ལྟའི་ཆར་ནང་པའི་ཆོས་ཡུ་རོབ་ཁུལ་དུའང་དར་བཞིན་པ་བྱུང་ཡོད་པས་མགོན་པོ་མཆོག་བཀའ་དྲིན་ཆེན་པོ་ཡིན་པ་སོགས་བརྗོད་གནང་སོང་།
གཞི་རྩའི་ད་རེས་ཀྱི་སྐོར་བསྐྱོད་འགྲེམས་སྟོན་བརྒྱུད་བོད་དོན་ཞུ་གཏུག་གི་ལས་འགུལ་འདི་བཞིན་དེ་རིང་ནས་འགོ་འཛུགས་ཀྱིས་བདུན་ཕྲག་གཅིག་རིང་སྤེལ་གནང་རྒྱུ་ཡིན་འདུག
དེ་དང་སྦྲགས་དེ་སྔ་བོད་ཀྱི་འགྲེམས་སྟོན་ཁང་འདི་བཞིན་ཐེག་ཆེན་ཆོས་གླིང་གཙུག་ཁག་ཁང་གི་ཉེ་འགྲམ་དུ་ཆགས་ཡོད་པའི་སྐབས་ལོ་ལྟར་འགྲེམས་སྟོན་ཁང་དུ་ཕེབས་ནས་ཐུགས་སྣང་གནང་མཁན་གྱི་མི་གྲངས་ཁྲི་བརྒྱད་ལྷག་ཡོང་ཐུབ་པ་བྱུང་ཡོད་ཀྱང་། ད་ལྟའི་ཆར་ཕྱི་དྲིལ་བོད་ཀྱི་འགྲེམས་སྟོན་ཁང་གངས་སྐྱིད་དུ་གནས་སྤོ་བྱས་པ་ནས་འགྲེམས་སྟོན་ཁང་དུ་ཕེབས་མཁན་གྱི་ལོ་རེའི་མི་འབོར་ནི་སུམ་ཁྲི་ལྷག་ཙམ་ཡིན་པ་རེད་འདུག
