༄༅།། ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་སྟེ། སྲིད་འཛིན་གཞོན་པ་ལེ་ཆིང་ཏེས་སྲིད་འཛིན་གཞོན་པའི་འོས་མིར་ཨ་མི་རི་ཀར་བཅའ་སྡོད་ཐེ་ཝན་གྱི་གཞུང་ཚབ་པ་ཟུར་པ་ཞའོ་མེ་ཆིང་བདམས། ཕྱི་ཟླ་༡༡་པའི་ཚེས་༢༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་མི་མང་ལ་བསམ་ཚུལ་དྲིས་པའི་ཞིབ་འཇུག་ཁག་ཏུ་སྲིད་འཛིན་གཞོན་པ་ལེ་ཆིང་ཏེ་ལ་འོས་ཤོག་འཕེན་མཁན་མང་བ་ཡོད་ཅིང་། ད་ལྟ་ལོ་ན་༥༢་ལ་སོན་པའི་ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་གཞོན་པའི་འོས་མི་ཞའོ་མེ་ཆིང་གིས་༢༠༢༠་ནས་ཨ་རིའི་རྒྱལ་ས་ཝ་ཤིང་ཊོན་དུ་བཅའ་སྡོད་ཐེ་ཝན་གྱི་གཞུང་ཚབ་པའི་ལས་འགན་ཁུར། ཁོང་གིས་སྲིད་འཛིན་གཞོན་པ་ལེ་ཆིང་ཏེ་ལ་ཐེ་ཝན་གྱི་རང་དབང་དང་དམངས་གཙོའི་ལམ་ལུགས་སྲུང་སྐྱོབ་བྱ་རྒྱུའི་གྲོས་མོལ་བྱས་པ་ཡིན། ང་ཚོར་ཐུན་མོང་གི་ལྟ་བ་མཐུན་ས་མང་པོ་འདུག ངེད་གཉིས་ཀར་ཐེ་ཝན་འཛིན་སྐྱོང་གི་འགན་འཁྲི་ལེན་འདོད་ཡོད་ཅེས་རྒྱལ་ས་ཐེ་པེ་གྲོང་ཁྱེར་དུ་སྲིད་འཛིན་གཞོན་པ་ལེ་ཆིང་ཏེ་དང་མཉམ་དུ་འོས་བསྡུའི་དྲིལ་བསྒྲགས་ལས་འགུལ་མགོ་བརྩམས།།
ཁ་སང་གཟའ་ཉི་མའི་ཉིན་ཞའོ་མེ་ཆིང་གིས་ཨ་རིར་བཅའ་སྡོད་ཐེ་ཝན་གྱི་གཞུང་ཚབ་པའི་ལས་གནས་ནས་དགོངས་པ་ཞུས། ཁོང་གི་དགོངས་ཞུའི་སྙན་ཞུ་དེར་ཐེ་ཝན་གྱི་ཕྱི་སྲིད་ལྷན་ཁང་གིས་ཆོག་མཆན་བཀོད། ཐེ་ཝན་དུ་བཅའ་སྡོད་ཨ་རིའི་ཚོང་དོན་ལྷན་ཁང་གི་གཙོ་འཛིན་རུ་པར་ཊ་ཧེ་མོན་ཌ་ཆེམ་བྷར་སི་དང་ཞའོ་མེ་ཆིང་གཉིས་ལོ་རབས་༩༠་པ་ནས་ངོ་ཤེས་སུ་གྱུར། ཁོ་པས་ཞའོ་མེ་ཆིང་ནི་འཇོན་ཐང་ལྡན་པ་དང་འགན་ཟླ་བྲལ་བའི་སྲིད་དོན་པ་ཞིག་རེད། སྲིད་འཛིན་གཞོན་པ་ལེ་ཆིང་ཏེས་སྲིད་འཛིན་གཞོན་པའི་མི་དེར་ཞའོ་མེ་ཆིང་བདམས་པ་གཏན་ནས་འཆུགས་མེད། ཐེ་ཝན་ལ་ཕྱི་འབྲེལ་དང་བདེ་འཇགས་སྲུང་སྐྱོབ་ཀྱི་དཀའ་ངལ་འཕྲད་ཀྱི་ཡོད་པ་མང་པོ་ཞིག་ཞའོ་མེ་ཆིང་གིས་སེལ་ཐབས་ཀྱི་ནུས་པ་འདོན་ཐུབ། གལ་སྲིད་ལེ་ཆིང་ཏེ་སྲིད་འཛིན་ལ་འདེམས་ཐོན་བྱུང་ཚེ། ཞའོ་མེ་ཆིང་གིས་ཨ་མི་རི་ཀར་འབྲེལ་བ་གང་ལེགས་བཙུགས་ཡོད་པ་རྣམས་སྲིད་གཞུང་གསར་པར་ཕན་ཐོགས་ཡོད་པ་ཞིག་ཏུ་འགྱུར་ཤས་ཆེ་ཞེས་བསྟན།།
རྒྱ་ནག་ཕྱི་སྲིད་ལྷན་ཁང་གིས་ཞའོ་མེ་ཆིང་ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་གཞོན་པའི་འོས་མིར་བདམས་པའི་ཐད་གླེང་སློང་གང་ཡང་བྱས་མེད་མོད། འོན་ཀྱང་རྒྱ་ནག་གཞུང་གིས་ཐེ་ཝན་གྱི་སྲིད་འཛིན་གཞོན་པ་ལེ་ཆིང་ཏེ་དང་ཞའོ་མེ་ཆིང་གཉིས་ནི་རང་བཙན་གྱི་ཤི་ལམ་དུ་སྐྱོད་མཁན་རེད་ཅེས་སྐྱོན་བཙུགས། བདུན་ཕྲག་སྔོན་མའི་གཟའ་ལྷག་པའི་ཉིན་རྒྱ་ནག་གི་ཐེ་ཝན་ལས་དོན་ལྷན་ཁང་གིས་ཐེ་ཝན་མི་དམངས་ཀྱིས་ལེ་དང་ཞའོ་གཉིས་ཀྱི་ངན་ཇུས་རྣམས་ཤེས་ཀྱི་ཡོད་པ་རེད། ཁོ་ཚོ་མཉམ་འབྲེལ་བྱས་ན་མཚོ་འགག་ཕྱོགས་གཉིས་ཀྱི་འབྲེལ་བ་དེ་གང་འདྲ་ཞིག་ཏུ་འགྱུར་རྒྱུ་ཡིན་མིན་ཤེས་ཀྱི་ཡོད་པའི་རེ་བ་ཡོད་ཅེས་གསར་འགོད་པའི་དྲི་བ་ཁག་ལ་ལན་བཏབ། ཉེ་ཆར་ཕྱི་ཟླ་༨་པའི་ནང་ལེ་ཆིང་ཏེ་ཨ་མི་རི་ཀར་འཚམས་འདྲིར་ཕེབས་པའི་རྗེས་སུ་རྒྱ་ནག་གིས་ཐེ་ཝན་གྱི་མཐའ་འཁོར་དུ་དམག་སྦྱོང་བྱས་ནས་སྡིགས་ར་བསྐུལ། རྒྱ་ནག་གིས་དམག་སྦྱོང་དེ་ཐེ་ཝན་རང་བཙན་དོན་གཉེར་བ་ཁ་བྲལ་རིང་ལུགས་པ་ཚོས་ཕྱིའི་སྟོབས་ཤུགས་ལ་ངན་འབྲེལ་བྱས་ན་མཇུག་འབྲས་ཅི་ཞིག་སྨིན་རྒྱུ་ཡིན་མིན་གོ་བརྡ་སྤྲད་པ་ཡིན་ཞེས་བསྒྲགས།།
ཐེ་ཝན་གྱི་སྲིད་འཛིན་གཞོན་པ་ལེ་ཆིང་ཏེས་རྒྱ་ནག་གི་སྐད་ཆ་དེ་ཚོར་ཁུངས་ལུང་མི་འདུག སྐད་ཆ་དེ་དག་གིས་རྒྱ་ནག་གཞུང་ནས་ཐེ་ཝན་གྱི་འོས་བསྡུར་ཐེ་ཇུས་བྱེད་ཀྱི་ཡོད་པ་ར་འཕྲོད། ང་ཚོས་ཐེ་ཝན་མི་དམངས་ཀྱི་བདེ་སྡུག་གཙིགས་སུ་འཛིན་གྱི་ཡོད་ཅེས་ལན་གླན། ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པས་མཚོ་འགག་ཕྱོགས་གཉིས་གཅིག་གྱུར་བྱ་རྒྱུའི་འདོད་པ་མེད། ཐེ་ཝན་གྱི་མདུན་ལམ་ནི་མཚོ་གླིང་དེའི་མི་དམངས་ས་ཡ་༢༣་གྱིས་ཐག་གཅོད་བྱ་དགོས། ང་ཚོར་མཚོ་འགག་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་རྒྱུའི་འདོད་པ་ཡོད། ཐེ་ཝན་དང་རྒྱ་ནག་གཉིས་ཀྱིས་གྲོས་མོལ་བྱ་དགོས་ཞེས་གྲོས་གཞི་ལན་མང་བཏོན། ༢༠༡༦་ལོར་ཚེ་དབྱིན་ཝེན་བསྐྱར་དུ་ཐེ་ཝན་གྱི་སྲིད་འཛིན་འདེམས་ཐོན་བྱུང་ནས་བཟུང་། རྒྱ་ནག་གཞུང་གིས་ཐེ་ཝན་ལ་འབྲེལ་བ་བཅད་པར་མ་ཟད། རྒྱལ་སྤྱིའི་ཐོག་ཏུ་ཐེ་ཝན་ལ་ཕྱི་འབྲེལ་བ་བཙུགས་ཡོད་པའི་རྒྱལ་ཁབ་ཁག་ལ་དངོས་ཤུགས་བརྒྱུད་གསུམ་ནས་གནོན་ཤུགས་སྤྲད་དེ་འབྲེལ་བ་གཅོད་དུ་བཅུག འཛམ་གླིང་ཡོངས་སུ་ཐེ་ཝན་ཞེས་པའི་མིང་ཡང་གོ་ཐོས་མེད་པར་གཏོང་རྒྱུའི་ཐབས་སུ་འབད།།
ཕྱི་ཟླ་༡༡་པའི་ཚེས་༡༧་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་གྱི་ཕྱོགས་འགལ་ཚོགས་པ་གོ་མིན་ཏང་དང་ཐེ་ཝན་མི་དམངས་ཚོགས་པ་གཉིས་ཐུན་མོང་གི་སྲིད་འཛིན་འོས་མི་ཞིག་གདམ་རྒྱུའི་གྲོས་མཐུན་བྱུང་། སྲིད་དོན་ཚོགས་པ་དེ་དག་གི་སྟོབས་ཤུགས་གཅིག་ཏུ་བསྒྲིལ་ནས་གཞུང་འཛིན་དམངས་གཙོ་ཡར་ཐོན་ཚོགས་པར་ཁ་གཏད་གཅོག་རྒྱུའི་ཐག་བཅད། ཡིན་ནའང་ཐེ་ཝན་གྱི་ཕྱོགས་འགལ་ཚོགས་པའི་སྲིད་འཛིན་འོས་མིར་གོ་མིན་ཏང་གི་སྲིད་འཛིན་འོས་མི་ཧུག་ཡུག་དབྱི་བསྐོ་དགོས་སམ། ཡང་ན་ཐེ་ཝན་མི་དམངས་ཚོགས་པའི་སྲིད་འཛིན་འོས་མི་ཁེ་ཝེན་ཀྲི་བསྐོ་དགོས་མིན་ཐག་མ་ཆོད་པར་ལུས། གཟའ་སྤེན་པའི་ཉིན་གོ་མིན་ཏང་དང་ཐེ་ཝན་མི་དམངས་ཚོགས་པ་གཉིས་མཉམ་འབྲེལ་ཐོག་ཏུ་ཕྱོགས་འགལ་ཚོགས་པའི་སྲིད་འཛིན་འོས་མི་གཏན་ཁེལ་བྱ་དགོས་ཀྱང་མ་བྱུང་། ཁོ་ཚོས་སྲིད་དོན་ཚོགས་པ་གཉིས་ཀྱི་འགལ་ཟླ་དེ་ཚོར་མུ་མཐུད་དུ་གྲོས་མོལ་བྱ་དགོས་ཀྱི་འདུག་ཅེས་བཀྲལ།།
ཐེ་ཝན་གྱི་ཕྱོགས་འགལ་ཚོགས་པ་ཁག་སྲིད་འཛིན་འོས་མི་གཅིག་གི་ཐོག་ཏུ་གྲོས་མཐུན་ཡོང་གི་མེད་པ་ནི་སྲིད་འཛིན་གཞོན་པ་ལེ་ཆིང་ཏེ་ལ་གཏམ་བཟང་ཞིག་ཏུ་གྱུར། ཁོ་པ་སྲིད་འཛིན་ཚེ་དབྱིན་ཝེན་གྱི་རྗེས་འཛིན་པར་འགྱུར་ཐུབ་རྒྱུའི་རེ་བ་ཆེ་རུ་སོང་། ཐེ་ཝན་གྱི་རྩ་ཁྲིམས་སུ་སྲིད་འཛིན་གཅིག་གིས་ལས་དུས་གཉིས་ལས་སྲིད་དབང་འཛིན་ཆོག་མི་ཆོག་ཅེས་འཁོད། བདུན་ཕྲག་རྗེས་མའི་གཟའ་པ་སངས་བར་དུ་གོ་མིན་ཏང་དང་ཐེ་ཝན་མི་དམངས་ཚོགས་པ་གཉིས་ཀྱིས་སྲིད་འཛིན་འོས་མི་གཅིག་གདམ་ཐུབ་མིན་ཐག་གཅོད་དགོས། ཐེ་ཝན་གྱི་མི་དམངས་ཚོགས་པའི་འགོ་ཁྲིད་ཀོ་ཝེན་ཀྲིས་ངས་ནི་སྔར་བཞིན་ཕྱོགས་འགལ་ཚོགས་པ་ཁག་སྟོབས་ཤུགས་གཅིག་ཏུ་བསྒྲིལ་དགོས་པའི་ལྟ་བ་འཛིན་བཟུང་ཡོད། ང་ཚོས་སྲིད་འཛིན་གཙོ་གཞོན་གཉིས་ཀྱི་འོས་མི་ཡག་པོ་ཞིག་གདམ་དགོས། དེ་ནི་ང་ཚོའི་མཐར་ཐུག་གི་དམིགས་ཡུལ་ཡིན་ཟེར། ཐེ་ཝན་གྱི་སྲིད་འཛིན་འོས་མི་གཞན་པ་ཞིག་ནི་ཧྥོག་སི་ཀོམ་འཕྲུལ་རིག་བཟོ་ཚོང་ཁང་གི་ཕྱུག་བདག་གོ་ཐེ་མིང་ཡིན་ཞིང་། ཁོ་པར་སྲིད་འཛིན་འོས་བསྡུའི་རྒྱལ་ཁ་འཐོབ་རྒྱུའི་གོ་སྐབས་ཆེན་པོ་མེད་ཀྱང་ཐེ་ཝན་གྱི་འོས་བསྡུར་ཤུགས་རྐྱེན་ཐེབས་ཐུབ་པའི་གནས་ཚུལ་ཐོན་འདུག
དེང་སྐབས་ཐེ་ཝན་གྱི་གསར་འགྱུར་ལས་ཁུངས་ཁག་དང་ཞིབ་འཇུག་ལས་ཁུངས་ཁག་གིས་མི་མང་ལ་བསམ་ཚུལ་དྲིས་པའི་གྲུབ་འབྲས་ལྟར་ན། གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་ལ་མི་མང་འོས་ཤོག་འཕེན་མཁན་བརྒྱ་ཆ་༣༣་དང་ཐེ་ཝན་མི་དམངས་ཚོགས་པའི་སྲིད་འཛིན་འོས་མི་ཁེ་ཝེན་ཀྲི་ལ་མི་མང་འོས་ཤོག་འཕེན་མཁན་བརྒྱ་ཆ་༢༤་ཐོབ། གོ་མིན་ཏང་གི་སྲིད་འཛིན་འོས་མི་ཧུག་ཡུག་དབྱི་ལ་མི་མང་འོས་ཤོག་འཕེན་མཁན་བརྒྱ་ཆ་༢༢་དང་ཧྥོག་སི་ཀོམ་འཕྲུག་རིག་བཟོ་ཚོང་ཁང་གི་ཕྱུག་བདག་གོ་ཐེ་མིང་ལ་མི་མང་འོས་ཤོག་འཕེན་མཁན་བརྒྱ་ཆ་༨་ཡོད་པའི་གནས་ཚུལ་ཐོན་འདུག གོ་མིན་ཏང་དང་ཐེ་ཝན་མི་དམངས་ཚོགས་པ་མཉམ་འབྲེལ་ཐུབ་ན་ཕྱོགས་འགལ་ཚོགས་པར་མི་མང་འོས་ཤོག་འཕེན་མཁན་བརྒྱ་ཆ་༤༦་འཐོབ་རྒྱུའི་རྟགས་མཚན་མངོན། ཧྥོག་སི་ཀོམ་འཕྲུལ་རིག་བཟོ་ཚོང་ཁང་གི་ཕྱུག་བདག་ཏོ་ཐེ་མིང་གིས་སྲིད་དོན་ཚོགས་པ་གང་ལ་རྒྱབ་སྐྱོར་བྱས་ན་སྲིད་དོན་ཚོགས་པ་དེར་འོས་བསྡུའི་རྒྱལ་ཁ་ཐོབ་ཐུབ་རྒྱུའི་རེ་བ་ཆེ་རུ་འགྲོ་སྲིད་པའི་གནས་ཚུལ་ཐོན་འདུག
ཕྱི་ཟླ་༡༡་པའི་ཚེས་༡༥་ཉིན་ཨ་རིའི་ཧིལ་གསར་ཁང་གིས་གནས་ཚུལ་སྤེལ་བ་ལྟར་ན། བདུན་ཕྲག་སྔོན་མའི་གཟའ་ལྷག་པའི་ཉིན་སྲིད་འཛིན་བྷ་ཌན་གྱིས་རྒྱ་ནག་གི་འགོ་ཁྲིད་ཞིས་ཅིན་ཕིང་ལ་ཐུག་འཕྲད་གྲོས་མོལ་བྱས་པའི་སྐབས་སུ་ཐེ་ཝན་གྱི་འོས་བསྡུའི་སྐོར་གླེང་སློང་བྱས་ཤིང་། སྲིད་འཛིན་བྷ་ཌན་ནས་རྒྱ་ནག་གིས་ཐེ་ཝན་གྱི་སྲིད་འཛིན་དང་གྲོས་ཚོགས་འཐུས་མིའི་འོས་བསྡུར་ཐེ་ཇུས་མ་བྱས་ན་ལེགས། ངས་ཞིས་ཅིན་ཕིང་ལ་ཨ་མི་རི་ཀས་རྒྱ་ནག་གིས་ཐེ་ཝན་གྱི་དམངས་གཙོའི་འོས་བསྡུར་ཐེ་ཇུས་བྱ་རྒྱུ་རེད་བསམས་མེད་ཅེས་གོ་བརྡ་གསལ་པོ་འཕྲོད་ཡོད་ཅེས་ཞིས་ཅིན་ཕིང་ལ་དུས་ཡུན་ཆུ་ཚོད་༤་ལྷག་གི་རིང་གྲོས་མོལ་བྱས་པའི་རྗེས་སུ་གསར་འགོད་ལྷན་ཚོགས་ཐོག་ཏུ་དེ་ལྟར་བཤད། ༢༠༢༤་ལོའི་ཕྱི་ཟླ་དང་པོའི་ཚེས་༡༣་ཉིན་ཐེ་ཝན་ལ་སྲིད་འཛིན་དང་རྒྱལ་ཡོངས་གྲོས་ཚོགས་ཀྱི་འཐུས་མི་རྣམས་འོས་བསྡུ་བྱེད་ཀྱི་ཡོད་པས་རྒྱ་ནག་གིས་མཚོ་འགག་ཕྱོགས་གཉིས་གཅིག་གྱུར་གྱི་ལངས་ཕྱོགས་འཛིན་པའི་སྲིད་དོན་ཚོགས་པ་གོ་མིན་ཏང་དང་དེའི་ཕྱོགས་གཏོགས་ལ་རྒྱལ་ཁ་ཐོབ་ན་དགའ་མོས་བྱེད་ཀྱི་ཡོད་པའི་གནས་ཚུལ་ཐོན་འདུག
