བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་མོ་མཆོག་གིས་ཕྱི་ཟླ་ ༡༡ ཚེས་ ༦ ཉིན་བལ་ཡུལ་གྱི་སྲིད་བློན་ པུ་ཤུ་པཱལ་ ཀཱ་མལ་ མཆོག་གི་མཚན་ཐོག་ཏུ་ཉེ་ལམ་ཟླ་བ་འདིའི་ཚེས་ ༣ ཉིན་བལ་ཡུལ་གྱི་རྫོང་ཁག་གཉིས་ཀྱི་ནང་ས་ཡོམ་བརྒྱབ་ནས་མི་མང་པོ་ཞིག་འདས་གྲོངས་སུ་ཕྱིན་པ་དང་རྨས་པ། སྡོད་ཁང་ལ་གནོད་སྐྱོན་ཕོག་པ་རྣམས་ལ་མགོན་པོ་མཆོག་གིས་ཐུགས་གསོའི་གསུང་འཕྲིན་ཞིག་སྩལ་གནང་མཛད་ཡོད་པ་དང་། དེའི་ནང་དོན་དང་འབྲེལ་བའི་སྐོར་ལ་འདི་ག་གསར་འགོད་པས་དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་འཆི་མེད་རིག་འཛིན་ལགས་སུ་བཅར་འདྲི་ཞུས་སྐབས་ཁོང་གིས་སྤྱིར་གནོད་འཚེ་ཕོག་མཁན་གྱི་ཡུལ་མི་ཚོར་བལ་ཡུལ་གཞུང་ནས་རོགས་སྐྱོར་གནང་མུས་ཡིན་ན་ཡང་༧གོང་ས་མཆོག་གིས་བོད་རྒྱལ་ཁབ་དང་མི་མང་རྣམས་ཀྱི་གདུང་སེམས་མཉམ་བསྐྱེད་མཚོན་བྱེད་ཏཱ་ལའི་བླ་མའི་ཐེབས་རྩ་ནས་བལ་ཡུལ་གཞུང་དང་ཡང་ན་ཚོགས་པ་ཁག་གང་རུང་བརྒྱུད་རོགས་དངུལ་གནང་ཐབས་གནང་རྒྱུ་ཡིན་པ་འགྲེལ་བརྗོད་གནང་བྱུང་།
