༢༠༡༦ ལོ་ནས་བཟུང་རྒྱ་ནག་གཞུང་གིས་དབུལ་སྐྱོར་འཛུགས་སྐྲུན་གྱི་མིང་ཐོག་ནས་ཁམས་གོ་འཇོ་དང་སྨར་ཁམས་ཁུལ་སོགས་ནས་བོད་མི་སྟོང་ཕྲག་མང་པོ་བཙན་དབང་གིས་གནས་སྤོ་བྱེད་འཇུག་ནས་ལྷ་ས་གྲོང་ཁྱེར་དང་ཉེ་འཁོར་ས་ཁུལ་དུ་སྤོ་བཞུད་བྱེད་བཅུག་ཡོད། འཕན་པོ་ལྷུན་གྲུབ་རྗོང་ཁོངས་སུ་གནས་སྤོས་བྱས་པའི་མི་མང་ཚོར་འཚོ་བའི་རྟེན་གཞི་ས་ཞིང་དང་ལས་ཀ་མེད་པར་བརྟེན་དཀའ་ངལ་ཆེན་པོའི་ནང་ལྷུང་འདུག་པ་དང་། སློབ་གྲྭར་འགྲོ་བཞིན་པའི་ཕྲུ་གུ་མང་པོར་གྱོན་གོས་དང་ལྷམ་མེད་པ་མ་ཟད། སློབ་སྦྱོང་གི་གྲུབ་འབྲས་ཀྱང་སྐྱོ་པོ་ཡོད་པ། གནས་སྤོས་བྱས་པའི་མི་མང་ཆེ་བས་རང་གི་ཕ་ཡུལ་དུ་ལོག་འདོད་ཡོད་ནའང་། ཁོ་ཚོའི་ས་ཞིང་རྣམས་གཞུང་བཞེས་བྱས་ཟིན་པར་བརྟེན་ཕྱིར་ལོག་བྱེད་ས་མེད་པའི་གནས་སུ་གྱུར་ཡོད་པ་རེད་ཅེས་རང་མིང་དངོས་སུ་བརྗོད་འདོད་མེད་པའི་ས་གནས་ཡུལ་མི་ཞིག་གིས་འདི་ག་གསར་འགོད་པར་གནས་ཚུལ་འགྲེལ་བརྗོད་གནང་གི་འདུག
གནས་ཚུལ་ངོ་སྤྲོད་པས་མུ་མཐུད་དུ་བརྗོད་དོན། དཔེར་ན་བོད་ཀྱི་རྒྱལ་ས་ལྷ་སའི་འཕན་པོ་ལྷུན་གྲུབ་རྫོང་དང་མཁར་རྩེ་གྲོང་ཚོའི་དབར་གྱི་ས་སྟོང་དུ་ཁང་ཆུང་མང་པོ་གསར་རྒྱག་བྱས་ཏེ་༢༠༡༨ཕྱི་ཟླ་ ༡༠ ཚེས་ ༣༠ ཉིན་་ཁམས་གོ་འཇོ་ས་ངན་ཡུལ་ཚོའི་ཁྱིམ་ཚང་གྲངས་ ༥༧ དང་མི་གྲངས་ ༤༠༠ ལྷག་ཙམ་རྒན་སྐྱོར་བྱིས་ཁྲིད་བྱས་ཏེ་ཐེངས་གཉིས་པ་འབྱོར་འདུག་ཅིང་། སྐབས་དེར་མཁར་རྩེ་གྲོང་གི་མང་ཚོགས་རྣམས་ལ་ཕེབས་བསུ་ཞུ་བཅུག་པ་དང་བརྟེན་འབྲེལ་གྱི་མཛད་སྒོ་ཟབ་རྒྱས་ཚོགས་ཡོད་འདུག
གནས་སྤོས་བྱས་པའི་ཁམས་འགོ་འཇོའི་མི་མང་དེ་དག་ལ་ས་ཞིང་སོགས་འཚོ་བའི་བརྟེན་ས་གང་ཡང་མེད་པ་དང་། ལས་ཀ་ཡང་མེད་སྟབས་དེང་སྐབས་ཁོ་ཚོ་ལ་ལྟོ་གོས་མ་གདང་བའི་དཀའ་ངལ་ནང་ལྷུང་ཡོད་པ་མ་ཟད། སློབ་གྲྭར་འགྲོ་མཁན་ཕྲུ་གུ་ཚོར་ལྷམ་དང་ལུས་ལ་གྱོན་གོས་ཀྱང་མ་གདང་བའི་དཀའ་ངལ་འཕྲད་འདུག ཁོང་གིས་མུ་མཐུད་བརྗོད་དོན་ལ་ ཕ་མ་རྣམས་བྱ་ཐབས་མེད་པར་ཉིན་ལྟར་ངུ་བཞིན་ཡོད་པ་དང་གནས་སྟངས་དེར་འགྱུར་ལྡོག་ཞིག་མ་བྱུང་ན་ལོ་གཉིས་གསུམ་རྗེས་འཕན་པོའི་ནང་སྤྲང་པོས་ཁེངས་རྒྱུ་གཏན་ཁེལ་རེད་འདུག་ཅེས་འགྲེལ་བརྗོད་གནང་གི་འདུག
གནས་ཚུལ་ངོ་སྤྲོད་པས་མུ་མཐུད་དུ་བརྗོད་པའི་ནང་གནས་སྤོས་བྱས་པའི་ཁམས་ཁུལ་གྱི་ཡུལ་མི་དེ་དག་ལ་དེང་སྐབས་རྒྱ་ནག་སྲིད་གཞུང་ནས་འཚོ་བའི་རོགས་སྐྱོར་མེད་སྟབས་ས་གནས་འཕན་པོའི་མང་ཚོགས་ནས་སྙིང་རྗེ་བྱས་ཏེ་ད་བར་འཚོ་བའི་རོགས་རམ་བྱས་ཡོད་པ་རེད། ཡིན་ན་ཡང་དེ་ལྟར་མུ་མཐུད་བྱེད་ཐུབ་ཐབས་མེད་པ་རེད་ཅེས་དང་ཁོ་ཚོ་ད་ལྟའི་ཆར་སོ་སོའི་ཕ་ཡུལ་དུ་ལོག་ཆོག་པའི་གོང་རིམ་ཞུ་འབོད་ཡང་ཡང་བྱས་འདུག་ཀྱང་། ཁོ་ཚོ་ཕ་ཡུལ་ནས་གནས་སྤོས་རྗེས་ཁོ་ཚོའི་འབྲོག་ས་དང་་ས་ཆ་རྣམས་རྒྱ་ནག་གཞུང་གིས་གཞུང་བཞེས་བྱས་ཏེ་གློག་ཁང་བརྒྱབས་པ་དང་འཛུགས་སྐྲུན་གྱི་བརྟེན་གཞི་བཙུག་པ་སོགས་བྱས་ཏེ་ལོག་ས་མེད་པ་རེད། བོད་རང་སྐྱོང་ཁུལ་གྱི་ས་ཁུལ་ཁག་གཞན་ལ་གནས་སྤོས་བྱས་པའི་མང་ཚོགས་ཚོར་ཡང་འཚོ་བའི་དཀའ་ངལ་གྱི་གནས་སྟངས་དེ་གཅིག་མཚུངས་རེད་འདུག་ཅེས་འགྲེལ་བརྗོད་གནང་གི་འདུག
གནས་ཚུལ་ངོ་སྤྲོད་པས་མུ་མཐུད་དུ་བརྗོད་དོན་་ནང་ཕྱི་ལོ་༢༠༡༦ ནས་༢༠༡༨ བར་་རྒྱ་ནག་གཞུང་གིས་འཕན་པོ་ལྷུན་གྲུབ་རྫོང་ཁྱབ་ཁོངས་སུ་ཡུལ་གཞན་ནས་ཁྱིམ་ཚང་ ༣༠༠ ནས་མི་ ༢༥༡༡ ཙམ་གནས་སྤོ་བྱས་འདུག དེའི་ནང་ནས་འཕན་པོ་ཐང་མགོ་ཤང་ཐང་མགོ་གྲོང་ཚོར་ཁྱིམ་ཚང་ ༡༠༠ ཡི་མི་ ༤༧༠ གནས་སྤོས་བྱས་ཡོད་པ་དང་མཁར་རྩེ་ཤང་དཔེ་སྣང་གྲོང་ཚོར་ཁྱིམ་ཚང་ ༡༠༠ དང་མི་གྲངས་ ༤༢༤ ལྕང་ར་ཤང་ལྕང་ར་ཤར་གྲོང་ཚོར་ཁྱིམ་ཚང་ ༡༠༠ དང་མི་ ༣༦༡ བཅས་གནས་སྤོས་བཏང་ཡོད་པ་རེད་འདུག. དེ་རྗེས་ཕྱི་ལོ་༢༠༡༩ ནས་ནག་ཆུ་ཉི་མ་རྫོང་དང་། མངའ་རིས། སོག་རྫོང་། འབྲ་ཆེན་རྫོང་། ལྷ་རི་རྫོང་། འབྲི་རུ་རྫོང་བཅས་ནས་ཀྱང་ཁྱོན་བསྡོམས་ཐེམས་གྲངས་ ༢༠༠༠ དང་མི་གྲངས་ ༥༠༠༠ ཙམ་བཅས་སྔ་རྗེས་ཁྱོན་མི་གྲངས་༧༥༡༡ ཙམ་གནས་སྤོ་བྱས་ཡོད་པ་མ་ཟད། སྐབས་དེར་འཕན་པོའི་མང་ཚོགས་ཚོར་དགའ་བསུ་ཞུ་བཅུག་པ་དང་བརྟེན་འབྲེལ་མཛད་སྒོ་ཡང་ཚོགས་ཡོད་པ་རེད་ཅེས་འགྲེལ་བརྗོད་གནང་སོང་།
ཡང་གནས་ཡུལ་མི་གཞན་ཞིག་གིས་འགྲེལ་བརྗོད་གནང་དོན་བྱས་ན་འཕན་པོ་ལྷུན་གྲུབ་རྫོང་དུ་གནས་སྤོ་སྔ་རྗེས་བྱས་པའི་ཁམས་གོ་འཇོ་ཡུལ་མིའི་ཕྲུ་གུ་རྣམས་ཀྱི་ཆེད་རྒྱ་ནག་གཞུང་གིས་སློབ་གྲྭ་ཞིག་གསར་འཛུགས་བྱས་འདུག་ཀྱང་། སློབ་ཕྲུག་དེ་རྣམས་སློབ་སྦྱོང་ལ་དོ་སྣང་མེད་པ་མ་ཟད། འཛིན་རིམ་དྲུག་པར་སླེབས་ནའང་ད་དུང་ཀ་མད་སུམ་ཅུ་རྣམས་མ་ཤེས་པའི་ཐོག་དུས་ཚོད་ཡོད་ཚེ་ཆང་རག་ལ་གཡེང་ནས་སྡོད་ཀྱི་ཡོད་ཀྱང་གཞུང་ཕྱོགས་འབྲེལ་ཡོད་ནས་དོ་སྣང་གང་ཡང་བྱེད་ཀྱི་མི་འདུག་ཅེས་འགྲེལ་བརྗོད་གནང་སོང་།
ཡང་ཤེས་རྟོག་བྱུང་བ་ལྟར་ན་རྒྱ་གཞུང་གིས་ཁམས་འགོ་འཇོ་རྫོང་ཁེར་རི་ཤང་དང་། གླང་སྨད་ཤང་། གསེར་གདོང་ཤང་། མིག་མདོ་ཤང་། བྱང་གསུམ་ཤང་། འབུམ་སྐྱེས་ཤང་བཅས་ཀྱི་ཡུལ་མི་བརྒྱ་ཕྲག་ཁ་ཤས་དང་ཡང་སྨར་ཁམས་རྫོང་རྒོད་པོ་ཤང་གི་གྲོང་ཚོ་ ༤༥ དང་་དུད་ཚང་ ༢༧༤༡ དང་མི་ཁྲི་ ༡༌༦༦ ལྷག་ཙམ་ལྷ་ས་དང་ཆབ་མདོ། གཞིས་རྩེ། ལྷོ་ཁ། ཉིང་ཁྲི་བཅས་གྲོང་ཁྱེར་བཞི་ནང་གི་རྫོང་སོ་སོར་ཆ་བགོས་ཀྱིས་གནས་སྤོར་བྱས་འདུག
གླེང་སྟེགས།