ཧོང་ཀོང་གི་དམངས་གཙོ་ཚོགས་པ་སྒོ་རྒྱག་རྒྱུའི་འཆར་གཞི།

ཧོང་ཀོང་ནང་ནས་སྲིད་དོན་ཚོགས་པ་ཆེ་ཤོས་དང་རྙིང་ཤོས་དམངས་གཙོ་སྲིད་དོན་ཚོགས་པས་ཚོགས་པ་དེ་སྒོ་རྒྱག་རྒྱུའི་གྲ་སྒྲིག་གི་ལས་དོན་ཁག་བྱེད་བཞིན་ཡོད་པའི་སྐོར་གསལ་བསྒྲགས་སྤེལ་བའི་རྗེས་སུ་དབྱེ་ཞིབ་པ་ཚོས་དམངས་གཙོ་ཚོགས་པས་དེ་ལྟར་བྱེད་དགོས་དོན་ནི་རྒྱ་ནག་གཞུང་གི་བཀའ་བཀོད་འོག་ཡོད་པའི་ཧོང་ཀོང་གཞུང་ནས་རྒྱ་ནག་གི་རྣམ་པ་དང་མཐུན་པའི་ཚོགས་པ་ཞིག་བྱེད་དགོས་རྒྱུའི་གནོན་ཤུགས་སྤྲད་ཀྱི་ཡོད་པ་ལ་བརྟེན་ནས་ཡིན་པ་དང་། དེས་ཧོང་ཀོང་ནང་མང་གཙོའི་ཐོབ་ཐང་སྲུང་སྐྱོབ་དང་དོན་གཉེར་བྱེད་པའི་དུས་རབས་ཤིག་མཇུག་བསྡུས་པ་མཚོན་གྱི་ཡོད་ཅེས་དཔྱད་ཞིབ་སྤེལ་གྱི་ཡོད་པ་རེད།

གཟའ་འཁོར་སྔོན་མའི་གཟའ་ཕུར་བུའི་ཉིན་མོ་ཧོང་ཀོང་གི་དམངས་གཙོ་ཚོགས་པའི་ཚོགས་གཙོ་ལཱོ་ཅན་ཧའེ་ཡིས་གསར་འགོད་ལྷན་ཚོགས་ཐོག་ལ་༡༩༩༤ ལོར་བཙུགས་པའི་ཧོང་ཀོང་གི་དམངས་གཙོ་ཚོགས་པས་ཚོགས་པ་སྒོ་རྒྱག་རྒྱུའི་ཆེད་དུ་མི་གསུམ་ཡོད་པའི་ཞིབ་འཇུག་ཚོགས་ཆུང་ཞིག་འཛུགས་རྒྱུ་ཡིན་ཞེས་གསལ་བསྒྲགས་བྱས་པ་དང་ང་ཚོས་ད་ལྟའི་ཧོང་ཀོང་གི་ཆབ་སྲིད་ཁོར་ཡུག་སྤྱི་དང་མ་འོངས་པའི་གནས་སྟངས་ཡོངས་ལ་བསམ་བློ་བཏང་ནས་ཐག་གཅོད་དེ་བྱས་པ་ཡིན། ཞེས་གསུངས་ཡོད། ཡང་ཁོང་ནས་ཚོགས་པ་སྒོ་རྒྱག་རྒྱུའི་མཐའ་མའི་ཐག་གཅོད་དེ་ཚོགས་མི་ཚོའི་འོས་བསྡུའི་ལམ་ནས་གཏན་འཁེལ་བྱེད་རྒྱུ་ཡིན་པ་གསུངས་ཡོད་ཀྱང་འོས་བསྡུའི་དུས་ཚོད་སོགས་གསལ་བཤད་གནང་མེད་པ་རེད།

ཧོང་ཀོང་ས་གནས་སྲིད་གཞུང་ནས་དམངས་གཙོ་ཚོགས་པ་སྒོ་རྒྱག་རྒྱུའི་སྐོར་གྱི་གནས་ཚུལ་དེའི་ཐད་ལ་འགྲེལ་བརྗོད་གང་ཡང་སྤེལ་མེད་པ་དང་ཨ་རིའི་རླུང་འཕྲིན་ཁང་ནས་དེའི་སྐོར་འདྲི་རྩད་བྱེད་སྐབས་ལན་འདེབས་བྱས་མེད་པ་རེད། འོན་ཀྱང་རྒྱ་ནག་དམར་ཤོག་གཞུང་གི་སྟངས་འཛིན་འོག་ཡོད་པའི་ཝེན་ཝེ་文汇ཚགས་ཤོག་གིས་ཧོང་ཀོང་གི་དམངས་གཙོ་ཚོགས་པ་སྒོ་རྒྱག་རྒྱུའི་འཆར་གཞི་དེ་ནི་རྒྱལ་ཁབ་བདེ་འཇགས་ལ་གཏོར་བཤིག་གཏོང་བའི་ནག་ཉེས་འོག་བཙོན་འཇུག་བྱས་པའི་གསར་ཤོག་དང་བརྡ་འཕྲིན་གྱི་བདག་པོ་་ཇཱེ་མེ་ལའེ་དང་འབྲེལ་བ་ཡོད་པ་དང་། ༢༠༡༩ལོའི་མང་གཙོ་དོན་གཉེར་བའི་ངོ་རྒོལ་སྐབས་སུ་དྲག་སྤྱོད་ལ་རྒྱབ་སྐྱོར་བྱས་པའི་འཇུག་འབྲས་ཤིག་ཡིན་པ་སོགས་གནས་ཚུལ་སྤེལ་ཡོད་པ་རེད།

ཧོང་ཀོང་དེ་དབྱིན་ཇིའི་མི་སེར་སྤེལ་ཡུལ་ནས་རྒྱ་ནག་ལ་རྩིས་སྤྲོད་མ་བྱས་གོང་གི་ལོ་འགའ་ཤས་ཀྱི་སྔོན་དུ་བཙུགས་པའི་དམངས་གཙོ་ཚོགས་པ་དེས་ཧོང་ཀོང་དེ་བཞིན་རྒྱ་ནག་གི་དབང་བསྒྱུར་འོག་ཚུད་པའི་རྗེས་སུ་དམངས་གཙོའི་ལམ་ལུགས་དང་ཐོབ་ཐང་སྲུང་སྐྱོབ་ཐད་ལ་གལ་ཆེའི་ལས་འགུལ་མང་དག་ཞིག་སྤེལ་ཡོད་པ་དང་ཚོགས་པ་དེའི་ཐོག་མའི་འགོ་ཁྲིད་ནང་ཇཱེ་མེ་ལའེ་དང་ཧཱེ་ཅུན་རེན་ལྟ་བུའི་མི་སྣ་གྲགས་ཅན་མང་པོ་ཞིག་བྱུང་ཡོད་ཅིང་ཁོང་ཚོས་རྒྱ་ནག་གཞུང་ནས་ཁས་ལེན་བྱས་པའི་རྒྱལ་ཁབ་གཅིག་ལ་ལམ་ལུགས་གཉིས་ཞེས་པའི་སྲིད་ཇུས་འོག་ཧོང་ཀོང་ལ་ཚད་མཐོའི་རང་སྐྱོང་གི་ཐོབ་ཐང་ཁག་གནས་ཐུབ་རྒྱུར་འབད་བརྩོན་ཤུགས་ཆེ་བྱས་ཡོད་པ་རེད།

༡༩༩༧ལོར་ཧོང་ཀོང་གི་བདག་དབང་རྒྱ་ནག་ལ་རྩིས་སྤྲོད་བྱས་པའི་རྗེས་ནས་བཟུང་། དམངས་གཙོ་ཚོགས་པ་ནི་ཧོང་ཀོང་གི་ཁྲིམས་བཟོ་ལྷན་ཁང་གི་ནང་དུ་ཤུགས་རྐྱེན་ཆེ་ཤོས་དང་།རྒྱ་ནག་གཞུང་གི་བྱ་སྤྲོད་ལ་ཁ་གཏད་བཅག་པ་གཙོ་བོ་ཞིག་དང་།མང་ཚོགས་ཀྱི་རྔམ་སྟོན་ཁྲོམ་སྐོར་ཁག་གི་སྣེ་ཁྲིད་པ་དང་།ཧོང་ཀོང་གི་རྩ་ཁྲིམས་ནང་བཀོད་པའི་སྤྱི་མོས་ཀྱི་ཐོབ་ཐང་དང་།ས་གནས་གཞུང་གི་འགོ་ཁྲིད་དང་གྲོས་ཚོགས་ཀྱི་འཐུས་མི་ཚོ་ཐད་ཀའི་འོས་བསྡུའི་ལམ་ནས་འདེམས་དགོས་རྒྱུ་སོགས་ལ་འབད་བརྩོན་བྱེད་མཁན་ཞིག་ཡིན་པས་ཧོང་ཀོང་མི་མང་གི་རྒྱབ་སྐྱོར་ཤུགས་ཆེ་ཐོབ་ཡོད་པ་རེད།

འོན་ཀྱང་༢༠༡༩ལོར་ཧོང་ཀོང་ནང་ཟླ་ཤས་རིང་མི་མང་ནས་རྒྱ་ནག་གཞུང་གིས་ཧོང་ཀོང་ཐོག་ལ་འཛིན་པའི་སྲིད་ཇུས་ཁག་ཅིག་ལ་མི་འདོད་པའི་ངོ་རྒོལ་གྱི་ཁྲོམ་སྐོར་རིམ་པ་ཞིག་བྱས་པའི་རྗེས་སུ་རྒྱ་ནག་གཞུང་ནས་ཧོང་ཀོང་ཐོག་ལ་དོ་དམ་ཤུགས་ཆེ་བྱས་པ་མ་ཟད་༢༠༢༠ ལོའི་ཕྱི་ཟླ་༧པར་རྩོད་རྙོག་ཅན་གྱི་རྒྱལ་ཁབ་བདེ་འཇགས་རྩ་ཁྲིམས་ཟེར་བ་གཏན་འབེབས་ཀྱིས་འོས་བསྡུའི་ལམ་གྱི་རྨང་གཞིའི་རྩ་ཁྲིམས་ཁག་ལ་བསྐྱར་བཅོས་བྱས་ནས་དམངས་གཙོ་དོན་གཉེར་ཅན་ཚོ་འོས་བསྡུའི་ནང་འགྲན་རྩོད་བྱེད་དུ་མི་འཇུག་པ་དང་།དམངས་གཙོའི་མི་སྣ་མང་པོ་ཞིག་ལ་རྒྱལ་ཁབ་བདེ་འཇགས་ཁྲིམས་ལུགས་ལ་འགལ་འཛོལ་བྱས་པའི་ཉེས་འཛིན་འོག་སྐུ་ཞབས་ཇཱེ་མེ་ལའེ་ལྟ་བུ་དམངས་གཙོའི་དབུ་ཁྲིད་མང་པོ་ཞིག་བཙོན་ཁང་དུ་བཅུག་ཡོད་པ་རེད།

སྲིད་དོན་དབྱེ་ཞིབ་པ་ཚོས་ཉེ་ཆར་ཧོང་ཀོང་གི་དམངས་གཙོ་ཚོགས་པས་ཚོགས་པ་སྒོ་རྒྱག་རྒྱུའི་ཐག་གཅོད་བྱེད་ཀྱི་ཡོད་པ་དེ་ནི་ཧོང་ཀོང་གི་གཞུང་འཛིན་པས་དམངས་གཙོའི་ཚོགས་པ་ཁག་ལ་དྲག་གནོན་དང་དམ་བསྒྲགས་ཤུགས་ཆེ་བྱེད་ཀྱི་ཡོད་པ་དེ་མཚོན་གྱི་ཡོད་པ་དང་། དཔེར་ན་དེའི་གོང་ལ་མི་དམངས་ཚོགས་པ་ལ་སོགས་པའི་ཚོགས་པ་མང་པོ་ཞིག་གིས་ཆབ་སྲིད་ཀྱི་གནོན་ཤུགས་དང་ལས་དོན་སྒྲུབ་རྒྱུར་དམ་བསྒྲགས་ཇེ་ཆེར་འགྲོ་བཞིན་པའི་རྐྱེན་གྱིས་སྒོ་རྒྱག་རྒྱུའི་ཐག་གཅོད་བྱེད་དགོས་བྱུང་ཡོད་རེད་ཅེས་གསུངས་པ་དང་།དེ་ཡང་ཨ་རིའི་ཕཱེན་སི་ཝེ་ནི་ཡ་སློབ་ཆེན་གྱི་ཆབ་སྲིད་རིག་པའི་དགེ་རྒན་ཆེན་མོ་མེག་གྷི་ཤུམ་གྱིས་ཧོང་ཀོང་གི་དམངས་གཙོ་ཚོགས་པས་སྒོ་རྒྱག་རྒྱུའི་གྲ་སྒྲིག་གསལ་བསྒྲགས་བྱས་པ་དེས་ཧོང་ཀོང་གི་དམངས་གཙོའི་དུས་རབས་བཟང་པོ་ཞིག་དངོས་སུ་མཇུག་སྒྲིལ་གྱི་ཡོད་པ་མཚོན་གྱི་ཡོད། ཧོང་ཀོང་ནང་དམངས་གཙོ་ཚོགས་པ་སོགས་ཕྱོགས་འགལ་ཚོགས་པ་ཁག་གིས་ད་བར་དུ་ཁྲིམས་བཟོ་ལྷན་ཚོགས་ནང་དམངས་གཙོའི་ལམ་ལུགས་གནས་ཐུབ་རྒྱུ་དང་།ཧོང་ཀོང་གི་མི་མང་ལ་ཞབས་ཞུ།སྲིད་བྱུས་ཐད་སྲིད་གཞུང་དང་གྲོས་བསྡུར་བྱེད་ཐུབ་པ་བཅས་བྱུང་ཡོད་པ་རྣམས་མེད་པ་ཆགས་པ་རེད་ཅེས་དང་།རྒྱ་ནག་གཞུང་གི་དམ་བསྒྲགས་ཁག་ཧོང་ཀོང་ནང་གི་རང་དབང་ཅན་གྱི་དཔེ་མཛོད་ཁང་དང་།གསར་འགྱུར་བརྒྱུད་ལམ།གཞུང་འབྲེལ་མ་ཡིན་པའི་རང་དབང་ཅན་གྱི་ཚོགས་པ་སོགས་ལའང་ཤུགས་རྐྱེན་ཆེན་པོ་ཐེབས་ནས་དམངས་གཙོའི་སྒྲིག་འཛུགས་ཁག་རེ་རེ་བཞིན་མེད་པར་གྱུར་ཡོད་ཅེས་ཨ་རིའི་རླུང་འཕྲིན་ཁང་ལ་ཞལ་པར་བརྒྱུད་གསུངས་པ་དང་། གནས་སྟངས་འདིས་ཧོང་ཀོང་གི་སྤྱི་ཚོགས་ཡོངས་ལ་འཇིགས་སྣང་གི་ཤུགས་རྐྱེན་ཞིག་བསྐྲུན་གྱི་ཡོད་པའང་འགྲེལ་བརྗོད་གནང་འདུག