རྒྱ་གར་གར་ལྷོ་ཕྱོགས་མེང་ལོར་གྲོང་ཁྱེར་ནང་རྟེན་གཞི་བྱས་པའི་རྒྱ་གར་གྱི་གཙུག་ལག་སློབ་གཉེར་ཁང་ཡེ་ནེ་ཕོ་ཡ་ Yenepoya University གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་མཛད་སྒོ་དེ་ཕྱི་ཟླ་བཅུ་གཅིག་པའི་ཚེས་༤ ཉིན་མཐོ་སློབ་དེར་གཉེར་ཡོད་པ་དང་མཛད་སྒོ་དེར་ལ་དྭགས་བསོད་ནམས་གླིང་བོད་མིའི་གཞིས་ཆགས་ནས་ཡིན་པ་བོད་པའི་བོུ་ཚེ་རིང་ཆོས་སྐྱིད་ལགས་སུ་སྨན་ཞབས་ཀྱི་ཉེ་བའི་ཚན་རིག་གཙུག་ལག་རབས་འབྱམས་པའི་སློབ་ཕྲུག་སྦྱངས་འབྲས་རྩེ་ཕུད་ཀྱི་གཟེངས་བསྟོད་དང་གསེར་གྱི་རྟགས་མ་ཐོབ་ཡོད་པ་རེད།ཁོང་གིས་ཐེངས་འདིར་སྦྱངས་འབྲས་རྩེར་གསོན་གཟེངས་རྟགས་ཐོབ་པ་དེ་ནི་རང་ཉིད་ནས་སློབ་སྦྱོངས་ལ་སྦྱངས་བརྩོན་བྱས་པར་གྲུབ་འབྲས་ཐོབ་སོང་སྙམ་པའི་དགའ་ཚོར་བྱུང་བ་གསུང་གི་འདུག
ཚེ་རིང་ཆོས་སྐྱིད་ལགས་ནི་ལ་དྭགས་བསོད་ནམས་གླིང་བོད་མིའི་གཞིས་ཆགས་ནང་སྐྱེས་པ་དང་ཕ་མིང་ལ་བཀྲིས་དཔལ་འབྱོར་དང་མ་མིང་ལ་ཡེ་ཤེས་ཆོསས་འཛོམས་ཟེར་གྱི་ཡོད་པ་རེད་ཁོང་ལ་དྭགས་བོད་ཁྱིམ་ནས་གཞི་རིམ་འཛིན་རིམ་བཅུ་བར་སློབ་སྦྱོང་གནང་བ་དང་འཛིན་རིམ་བཅུ་གཅིག་དང་བཅུ་གཉིས་གྷོ་བ་པུར་བོད་ཁྱིམ་ནས་བྱུང་རིག་སྡེ་ཚན་ཐོག་སློབ་སྦྱོང་གནང་རྗེས་སྦེང་ལོར་ནན་ཏིན་མཐོ་སློབ་ནས་ལོ་གསུམ་རིང་གི་སྤྱི་ཡོངས་སྨན་ཞབས་སློབ་སྦྱོང་གནང་འདུག་ཕྱི་ལོ་༢༠༢༡ ནས་༢༠༢༣ བར་ལོ་གཉིས་རིང་མེང་ལོར་ཡེ་ནེ་ཕོ་ཡ་གཙུག་ལག་སློབ་གཉེར་ཁང་དུ་ལོ་་གཉིས་དུས་ཡུན་གྱི་སྨན་ཞབས་ཀྱི་ཉེ་བའི་ཚན་རིག་གཙུག་ལག་རབས་འབྱམས་པའི་སློབ་སྦྱོང་གནང་ཡོད་པ་རེད། ད་ལྟའི་ཆར་གནས་སྐབས་རིང་མཐོ་སློབ་དེ་གའི་ནང་སྨན་ཞབས་ཀྱི་ཕྱག་ལས་གནང་བཞིན་ཡོད་པ་དེ་ནས་མུ་མཐུད་འབུམ་རམས་པའི་སློབ་སྦྱོང་གནང་འཆར་ཡོད་པ་གསུངས་བྱུང་།
གཞན་ཡང་ཡེ་ནེ་ཕོ་ཡ་གཙུག་ལག་སློབ་གཉེར་ཁང་གི་འདི་ལོའི་སྨན་ཞབས་ཉེ་བའི་གཙུག་ལག་རབས་འབྱམས་པའི་ཡིག་ཚད་སྐབས་ལོ་རིམ་ཚང་མའི་ནང་ཨང་དང་པོ་ལེན་མཁན་ཚང་མ་བོད་པའི་སློབ་ཕྲུག་ཤ་སྟག་ཡིན་པ་དང་དེ་ཡང་རྡེ་ར་རྡུན་དོན་གྲུབ་གླིང་གཞིས་ཆགས་ནས་ཡིན་པ་བོུ་ཆོས་དབྱངས་ལགས་ཀྱི་གཙུག་ལག་རབས་འབྱམས་པ་ལོ་རིམ་གསུམ་པའི་ནང་སྦྱངས་འབྲས་རྩེ་ཕུད་བླངས་པ་དང་། འབྲུག་བོད་མིའི་གཞིས་ཆགས་ནས་ཡིན་པ་བོུ་བསྟན་འཛིན་ནོར་འཛོམས་ལགས་ནས་གཙུག་ལག་རབས་འབྱམས་པའི་ལོ་རིམ་གཉིས་པའི་རྒྱུགས་སྤྲོད་ནང་གི་སྦྱངས་འབྲས་རྩེ་ཕུད་བླངས་ཡོད་པ་རེད། ལ་དྭགས་བསོད་ནམས་གླིང་བོད་མིའི་གཞིས་ཆགས་ནས་ཡིན་པ་བོུ་ཚོགས་སྐྱིད་ལགས་ནས་གཙུག་ལག་རབས་འབྱམས་པའི་ལོ་རིམ་དང་པོའི་ནང་སྦྱངས་འབྲས་རྩེ་ཕུད་བླངས་ཡོད་པ་རེད།
བོུ་ཉིི་མ་དབྱངས་ཅན་ལགས་ནི་མེང་ལོར་ཡེ་ནེ་ཕོ་ཡ་གཙུག་ལག་སློབ་གཉེར་ཁང་ནས་སློབ་མཐར་ཕྱིན་པ་ཞིག་ཡིན་པ་དང་ཕྱི་ལོ་༢༠༡༨ ལོ་ནས་ཁོང་གིས་མ་སྐུལ་དྭང་བླངས་ཀྱི་སྒོ་་ནས་བོད་ཕྲུག་ཚོ་མེང་ལོར་མཐོ་སློབ་ཁག་ནང་ཞུགས་རྒྱུར་ལམ་སྟོན་རོགས་རམ་དང་བོད་ཕྲུག་ཚོར་སློབ་ཡོན་བརྒྱ་ཆ་བཅུ་ཆགས་ཡངས་ཐོག་ནས་སློབ་འཇུག་བྱེད་ཐུབ་པ་བྱུང་ཏེ་ད་བར་ལོ་ངོ་ལྔ་ཙམ་འགྲོ་བཞིན་ཡོད་པ་རེད།ཁོང་གིས་མེང་ལོར་མཐོ་སློབ་ཁག་ནང་བོད་ཕྲུག་ཚོར་རོགས་རམ་གནང་སྟངས་དང་ཁོ་ཚོའི་གནས་སྟངས་སྐོར་འདི་ག་གསར་ཁང་ལ་འགྲེལ་བརྗོད་གནང་གསལ།
སྤྱིར་མེང་ལོར་གྲོང་ཁྱེར་ནང་རྟེེན་གཞི་བྱས་པའི་མཐོ་སློབ་དེའི་སྨན་ཞབས་མཐོ་སློབ་སྡེ་ཚན་ནང་རྒྱལ་ཁབ་མི་འདྲ་བ་བརྒྱད་ནས་སློབ་ཕྲུག་༨༠༠ ལྷག་ཡོད་པ་དང་བོད་རིགས་བརྒྱ་ལྷག་ཡོད་པ་རེད་འདུག་ལ་ཉི་མ་དབྱངས་ཅན་ལགས་ནས་མེང་ལོར་མཐོ་སློབ་ཁག་ནང་བོད་ཕྲུག་ཚོར་སློབ་འཇུག་རོགས་རམ་བྱེད་སྒོ་སྤེལ་ཏེ་ལོ་ངོ་ལྔ་ཧྲིལ་པོ་འཁོར་བའི་རྗེེས་དྲན་མཛད་སྒོ་ཞིག་ཀྱང་ཟླ་བ་འདིའི་ཕྱི་ཚེས་༡༨ ཉིན་མེང་ལོར་གྲོང་ཁྱེར་དུ་སྤེལ་རྒྱུ་རེད་འདུག
རྒྱ་གར་ལྷོ་ཕྱོགས་ནས་ཨ་རིའི་རླུང་འཕྲིན་ཁང་གི་གསར་འགོད་པ་རྒྱལ་མཚན་ཆོས་གྲགས་ཡིན།
