བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མགུལ་ཆམ་བཞེས་པར་བརྟེན། དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་གིས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་གཙོ་བོར་གྱུར་བའི་དད་ལྡན་པ་རྣམས་ལ་བཞུགས་སྒར་ཐེག་ཆེན་གཙུག་ལག་ཁང་དུ་འདི་ཚེས་༢ ཉིན་ལམ་རིམ་བསྡུས་དོན་མའི་བཀའ་ཆོས་དབུ་འཛུགས་གནང་སྟེ། ཚེས་ ༣ ཉིན་བཀའ་ཆོས་འཕྲོས་སྐྱོང་གནང་བ་དང་སྦྲགས། བློ་སྦྱོང་དོན་བདུན་མའི་བཀའ་ཆོས་ཀྱང་སྩལ་གནང་མཛད་སོང་ལ་སྐབས་དེར་དགའ་ལྡན་ཁྲི་རིན་པོ་ཆེ་མཆོག་གིས་བློ་སྦྱོང་དོན་བདུན་མ་སློབ་གཉེར་དང་ཉམས་ལེན་གནང་དགོས་པ་མ་ཟད། ༧གོང་ས་མཆོག་གིས་བཀའ་དགོངས་གཞིར་བཟུང་གཞུང་ཆེན་ཁག་ལ་སློབ་གཉེར་གནང་རྒྱུ་གལ་འགངས་ཆེན་པོ་ཡིན་པ་བཀའ་སློབ་སྩལ་གནང་བ་དང་སྦྲགས། རང་གིས་གང་ཟག་གཞན་ལ་ཕན་ཐོག་བྱེད་ཀྱང་གང་ཟག་འདིས་རང་ཉིད་ལ་གནོན་པར་བྱས་པ་ནི། ཚེ་སྔོན་གྱི་འབྲས་བུ་ཡིན་པས་གང་ཟག་དེར་གནོན་པ་བྱ་མི་དགོས་པའི་སྐོར་ལ་ཆོས་འགྲེལ་གནང་སོང་།
བློ་སྦྱོང་དོན་བདུན་མའི་མཛད་པ་པོ་དེ་བཞིན་འཆད་ཁ་བ་ཡེ་ཤེས་རྡོ་རྗེ་མཆོག་ཡིན་པ་དང་། ཁོང་ནི་ཕྱི་ལོ་ ༡༡༠༡ ལོར་ཡུལ་ལུ་ར་ལ་འཁྲུངས་པ་དང་། སྐུ་ན་གཞོན་དུས་རབ་ཏུ་བྱུང་སྟེ། མཚན་ལ་ཡེ་ཤེས་རྡོ་རྗེ་གསོལ། ཤ་ར་བ་ཡོན་ཏན་གྲགས་ལས་བློ་སྦྱོང་གི་ཁྲིད་ཚར་གཅིག་ལ་ལོ་ངོ་གཅུ་གསུམ་གྱི་རིང་ལ་གསན་པས་ཇི་ལྟ་བ་བཞིན་དུ་ཐུགས་རྒྱུད་ལ་འཁྲུངས། དགེ་བཤེས་བཙན་སོགས་བླ་མ་མང་པོའི་ཞབས་ལ་གཏུགས། མལ་གྲོར་བྱོན་ནས་འཆད་ཁ་དགོན་པ་ཕྱག་བཏབ། རང་རྣམ་ཚིགས་བཅད་མ་བརྩམས། ཕྱི་ལོ་ ༡༡༧༥ ལོར་སྐུ་གཤེགས། སློབ་མའི་གཙོ་བོ་སེ་སྤྱིལ་བུ་ཆོས་ཀྱི་རྒྱལ་མཚན་ཡིན་པ་རེད་འདུག
