སྙན་བརྒྱུད་གདམས་པའི་བཀའ་བབ་༧སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་ཧོ་ཐོག་ཐུ་ནོ་མོན་ཧན་སྐུ་ཕྲེང་དང་པོ། མཁས་གྲུབ་རྗེའི་གཅུང་པོ། དགའ་ལྡན་ཁྲི་ཆེན་བ་སོ་ཆོས་ཀྱི་རྒྱལ་མཚན་ (༡༤༠༢-༡༤༧༣) མཆོག་སྐུ་མྱ་ངན་ལས་འདས་ནས་ལོ་ངོ་༥༥༠ ཧྲིལ་པོ་འཁོར་བ་དང་། དམ་པ་ཁོང་གི་མཛད་རྗེས་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་སྤྱི་ཟླ་ ༡༢ ཚེས་ ༢༩ ཉིན་གནས་མཆོག་རྡོ་རྗེ་གདན་དུ་རྟེན་གཞི་བྱས་པའི་མཧ་བྷུདྡི་རིག་གཞུང་བལྟི་གནས་སུ་སྐོང་འཚོགས་གནང་སོང་ལ། སྐབས་དེར་དམ་པ་ཁོང་གི་གསུང་རྩོམ་ཕྱོགས་བསྡུས་ཀྱི་དཔེ་དེབ་ཅིག་ཀྱང་དབུ་འབྱེད་གནང་སོང་།
སྐབས་དེར་སྐུ་མགྲོན་གཙོ་བོ་ས་སྐྱ་༧གོང་མ་རིན་པོ་ཆེ་མཆོག་གིས་བཀའ་དྲིན་རྗེས་དྲན་ཞེས་པ་ནི་བླ་མ་གོང་མའི་རྣམ་ཐར་སོགས་ལ་སློབ་སྦྱོང་བྱས་ཏེ། ཉམས་ལེན་བྱ་རྒྱུ་གལ་ཆེན་པོ་ཡིན་པ་གསུངས་གནང་བ་དང་སྦྲགས། ཀུན་བདེ་གླེང་རྟ་ཚག་རིན་པོ་ཆེའི་སྐུ་གོང་མ་དང་ཐུགས་འདྲིས་པོ་ཡོད་པ་བཀའ་སློབ་སྩལ་གནང་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བ་སོ་ཆོས་ཀྱི་རྒྱལ་མཚན་གྱི་དགོངས་རྫོགས་རྗེས་དྲན་དང་འབྲེལ་ནས། ཀུན་བདེ་གླིང་རྟ་ཚག་རྗེ་དྲུང་སྐུ་ཕྲེང་རིམ་བྱོན་དེ་བཞིན་༸རྒྱལ་བ་སྐུ་ཕྲེང་ན་རིམ་དང་འབྲེལ་བ་དམིགས་བསལ་ཡོད་ཐོག་རྒྱལ་ཚབ་ཀྱི་ཐུགས་འགན་ཡང་བཞེས་ཏེ། བོད་བསྟན་སྲིད་ཀྱི་དོན་དུ་མཛད་པ་རྒྱ་ཆེར་མཛད་ཡོད་པ་དང་། ད་ལྟའི་སྐུ་ཕྲེང་འདི་ཡང་མཁྱེན་རྒྱ་ཡངས་པར་བོད་བསྟན་སྲིད་མི་རིགས་ཀྱི་དོན་དུ་གཉན་འཕྲང་ཅན་གྱི་དུས་སྐབས་དེར་༸གོང་ས་མཆོག་གི་ལམ་སྟོན་བཞིན་སྐུ་ཐོག་གོང་མ་རྣམ་པའི་མཛད་རྗེས་འཕྲོ་སྐྱོང་ཡོང་བའི་སྨོན་འདུན་ཡང་ཞུས་གནང་ཡོད་པ་རེད།
ཡང་མཛད་སྒོའི་ཐོག་སྐུ་མགྲོན་གཙོ་བོ་ས་སྐྱ་༧གོང་མ་མཆོག་གིས་གཙོས་པའི་དགོན་སྡེ་གྲྭ་ཚང་ཁག་གི་བླ་ཆེན་ཁག་ཅིག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག། དེ་བཞིན་བོད་མི་མང་སྤྱི་འཐུས་ཚོགས་གཙོ་ཚོགས་གཞོན་གཙོས་པའི་སྤྱི་འཐུས་གཞན་ཁག་ཅིག་བཅས་ལྷན་འཛོམས་ཐོག་ཀུན་བདེ་གླེང་རྟ་ཚག་རྗེ་དྲུང་རིན་པོ་ཆེ་མཆོག་གིས་ད་རེས་གནས་མཆོག་རྡོ་རྗེ་གདན་དུ་མཛད་སྒོ་འདི་འདྲ་ཞིག་གོ་སྒྲིག་ཞུས་དགོས་དོན་གྱི་སྐོར་ལ་ངོ་སྤྲོད་གནང་སོང་།
དེ་བཞིན་དགའ་ལྡན་ཁྲི་ཆེན་དམ་པ་བ་སོ་ཆོས་ཀྱི་རྒྱན་མཚན་མཆོག་ནི། དགའ་ལྡན་ཁྲི་ཐོག་དྲུག་པ་དང་། ཀུན་བདེ་གླེང་རྟ་ཚག་རྗེ་དྲུང་རིན་པོ་ཆེའི་སྐུ་ཕྲེང་དང་པོ་ཡིན་པ་རེད། ཀུན་བདེ་གླེང་རྟ་ཚག་རྗེ་དྲུང་རིན་པོ་ཆེ་སྐུ་ཕྲེང་རིམ་བྱོན་གྱིས་བསྟན་པའི་བྱ་བ་རྒྱ་ཆེར་མཛད་ཡོད་པ་དང་། ལྷག་པར་སྐུ་ཕྲེང་བརྒྱད་པ་དང་བཅུ་པ་གཉིས་ཀྱིས་རྒྱལ་ཚབ་ཀྱི་ཐུགས་འགན་ཡང་བཞེས་ཡོད་པ་སོགས། མདོར་ན་བོད་བསྟན་སྲིད་ཀྱི་དོན་དུ་མཛད་རྗེས་རླབས་པོ་ཆེ་བསྐྱངས་གནང་མཛད་ཡོད་པ་རེད།
གཞན་ཡང་མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་དང་། བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག། དེ་བཞིན་སྤྱི་འཐུས་ཚོགས་གཙོ་གཙོས་པའི་རྒྱ་གར་གཞུང་གི་སྐུ་མགྲོན་བཅས་ཀྱིས་ཀྱང་དགའ་ལྡན་ཁྲི་ཆེན་དམ་པ་བ་སོ་ཆོས་ཀྱི་རྒྱན་མཚན་མཆོག་གི་མཛད་རྗེས་ལ་བསྔགས་བརྗོད་ཀྱི་གཏམབཤད་གནང་བ་མ་ཟད། ཀུན་བདེ་གླེང་རྟ་ཚག་རྗེ་དྲུང་རིན་པོ་ཆེ་སྐུ་ཕྲེང་བཅུ་གསུམ་པ་བསྟན་འཛིན་ཆོས་ཀྱི་རྒྱལ་མཚན་དཔལ་བཟང་པོ་མཆོག་གིས་ཀྱང་སྐུ་གོང་མ་ལྟར་ཧི་མ་ལ་ཡའི་རིིགས་རྒྱུད་གཙོས་པའི་ཕྱི་རྒྱལ་ཡུལ་གྲུ་ཁག་ནང་འགྲོ་དོན་སྐྱོང་བཞིན་པར་བསྔགས་བརྗོད་ཀྱང་གནང་སོང་།
