ཉེ་ཆར་ཕྱི་ཟླ་བཅུ་གཅིག་གི་ཚེས་གཅིག་ཉིན་ནས་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ནང་(འཆལ་སེལ་ལོག་རྡུང་)ཞེས་པ་འཆལ་གཏམ་དང་ནང་དོན་ལོག་པའི་རིགས་ལ་རྡུང་རྡེག་གཏོང་བ་དང་མི་སྣ་རྩིས་སྤྲོད་བྱེད་མཁན་ལ་བྱ་དགའ་སྤྲོད་པའི་ལས་འགུལ་ཞིག་སྤེལ་བཞིན་ཡོད་པ་རེད།
རྒྱ་གཞུང་གཞུང་འབྲེལ་གྱི་དྲ་བ་ཁག་ནང་རྡུང་རྡེག་གཏོང་བ་དང་བྱ་དགའ་སྤྲོད་པའི་དོན་ཚན་༡༦ གསལ་བཏོན་བྱས་ཡོད་པ་དེའི་ནང་ ༡ བོད་ཁུལ་ཆེན་མོ་དང་ཚད་མཐོའི་རང་སྐྱོང་། དབུ་མའི་ལམ་སོགས་འུད་སྒྲོག་བྱས་ནས་རྒྱལ་ཁབ་གཅིག་གྱུར་དང་བདག་དབང་། མངའ་ཁོངས་ཆ་ཚང་བཅས་ལ་གནོད་འཚེ་གཏོང་བའི་བྱ་སྤྱོད། ༢ རྒྱལ་ཁབ་ཀྱི་གསང་བ་ཕྱིར་གྱར་བ་དང་། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བ་དང་ཡང་ན་རྒྱལ་ཁབ་ཀྱི་གཟི་བརྗིད་དང་ཁེ་ཕན་ལ་གནོད་འཚེ་གཏོང་བའི་བྱ་སྤྱོད།
༣ ཁྲིམས་འགལ་ངང་བོད་རང་བཙན་ཟེར་བའི་ངོ་རྒོལ་འུད་སྒྲོག་དངོས་པོ་རྒྱལ་ནང་དུ་ཁུར་ཡོང་བ་དང་བསྐུར་བ་སོགས་རང་དགར་ཕྱི་རྒྱལ་གྱི་དཔེ་སྐྲུན་དངོས་པོ་པར་འདེབས་དང་ཡང་ན་འདྲ་བཟོ་དང་འགྲེམས་སྤེལ་བྱེད་པ་དང་ནང་འདྲེན་བྱེད་པ།ཕྱི་རྒྱལ་གྱི་དཔེ་སྐྲུན་དངོས་པོ་ཁྲིམས་འགལ་ངང་ཁུར་ཡོང་་བའི་བྱ་སྤྱོད།
༤ ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་དང་མི་རིགས་ས་ཁོངས་རང་སྐྱོང་ལམ་ལུགས་ལ་སྐུར་འདེབས་བྱེད་པ་སོགས་རྩ་ཁྲིམས་ནང་གཏན་ཁེལ་བྱས་ཟིན་པའི་གཞི་རྩའི་རྩ་དོན་ལ་ངོ་རྒོལ་བྱེད་པའི་བྱ་སྤྱོད།.
༥ ཀྲུང་དབྱང་གི་བོད་སྐྱོང་ཐབས་ཇུས་དང་ཏང་གི་མི་རིགས་ཆོས་ལུགས་སྲིད་ཇུས་ལ་སྐུར་འདེབས་བྱེད་པ་
༦ ཆོག་མཆན་མེད་པར་རང་དགར་དཔེ་སྐྲུན་ཚན་པ་བཙུགས་པ་དང་པར་སྐྲུན་དང་པར་འདེབས་འདྲ་བཟོ་འགྲེམས་སྤེལ་བྱེད་པ་བཅས་དོན་ཚན་བཅུ་དྲུག་དམིགས་བཏོན་བྱས་ཏེ་ལས་དོན་དེ་དག་སྤེལ་མཁན་མི་སྣ་རྩིས་སྤྲོད་བྱེད་མཁན་ལ་བྱ་དགའ་རྒྱ་སྒོར་༡༠༠༠ ཆིག་སྟོང་ནས་འབུམ་དྲུག་བར་སྤྲོད་རྒྱུའི་ཁྱབ་བསྒྲགས་བྱས་ཡོད་པ་རེད།
བོད་ནང་གི་གནས་ཚུལ་མཁོ་སྤྲོས་པས་རྒྱ་ནག་གཞུང་གིས་ལས་འགུལ་དེ་ནི་འུ་ཐུག་ཐབས་ཟད་པའི་བྱ་ཐབས་ཤིག་ཡི་པ་སོགས་ཀྱི་དགོངས་ཚུལ་ཡང་གསུངས་བྱུང་། དེའི་སྐོར་བོད་ཀྱི་སྲིད་ཇུས་ཉམས་ཞིབ་ཁང་གི་འབྲེལ་ཡོད་ལས་བྱེད་བསྟན་འཛིན་དགྲ་ལྷ་ལགས་སུ་བཀའ་དྲི་ཞུ་སྐབས་ཁོང་གིས་བོད་རང་སྐྱོང་ལྗོངས་ཟེར་བའི་ནང་དེ་འདྲའི་ལས་འགུལ་དེ་ལོ་ལྟར་སྤེལ་བཞིན་ཡོད་ན་ཡང་ད་ལོ་སྔོན་དང་མི་འདྲ་བར་བྱ་དགའི་དངུལ་གྱི་ཁ་གྲངས་འབུམ་དྲུག་བར་སྤར་བ་དེས་ཁོ་ཚོའི་དེ་སྔོན་གྱི་ལས་འགུལ་དེ་གྲུབ་འབྲས་ཐོན་གྱི་མེད་པའི་རྟགས་ཚན་གསལ་པོ་བཏོན་པ་མ་ཟད་ལས་འགུལ་དེ་ནི་བོད་ནང་བོད་མི་ནང་ཁུལ་ཡིད་ཆེས་མེད་པ་བཟོ་ཐབས་ཀྱི་སྲིད་ཇུས་ཤིག་ཡིན་པ་དང་ཡང་དབུ་མའི་ལམ་དང་ཚད་མཐོའི་རང་སྐྱོང་དང་བོད་རང་བཙན་སྐོར་འབུར་དུ་བཏོན་ནས་བཀོད་པ་དེ་དག་ནི་གསར་པ་ཞིག་ཆགས་ཡོད་པ་གསུངས་སོང་།
ཡང་གོང་གསལ་མི་རྩིས་སྤྲོད་དང་ཐེར་འདོན་བྱེད་མཁན་ལ་ཐབས་ལམ་ཁ་ཤས་བཏོན་ཡོད་པའི་ནང་་ཡིག་ཐོག་ནས་ཐེར་འདོན་རྩིས་སྤྲོད་བྱེད་པ་དང་། མི་ངོ་མ་དངོས་སུ་བཅར་བ། ཁ་པར་གཏོང་བ་། གློག་འཕྲིན་གཏོང་བ།་དྲ་རྒྱ་བཅས་བརྒྱུད་ནས་ཐེར་འདོན་རྩིས་སྤྲོད་བྱེད་ཆོག་ཚུལ་བཀོད་འདུག ཡིན་ན་ཡང་བྱ་དགའ་དེ་གནས་ཚུལ་ར་སྤྲོད་གསལ་པོ་བྱུང་བ་མ་ཟད་རྩིས་སྤྲོད་བྱས་པའི་མི་དེ་ཁྲིམས་བཞིན་ཐག་གཅོད་བྱས་པའའི་རྗེས་སུ་གཏན་འབེབས་ལྟར་ཐེར་འདོན་གྱི་་བྱས་རྗེས་འཇོག་མཁན་ལ་བྱ་དགའ་སྤྲོད་རྒྱུ་ཡིན་པ་བཀོད་འདུག
