༄༅།། འབྲུག་ཡུལ་གྱི་ཉེན་རྟོག་པ་ཚོས་མཚན་མོར་དགེ་ལེགས་ཕུག་གི་སྲང་ལམ་ཁག་ལ་སྐོར་གཡེང་བྱས་ནས་འཕྱོན་མ་ཇེ་མང་དུ་འགྲོ་བཞིན་པར་དམ་དྲག་བྱེད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་༩་པའི་ཚེས་༢༣་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། དགེ་ལེགས་ཕུག་གི་ཡུལ་མི་ཚོས་རང་གི་ས་གནས་དེར་འཕྱོན་མ་ཇེ་མང་དུ་འགྲོ་བཞིན་འདུག་ཅེས་ཉེན་རྟོག་པར་སྙན་སེང་ཞུས། སྒྲིག་ཆས་སྔོན་པོ་དང་དཀྱུས་ཆས་གྱོན་པའི་ཉེན་རྟོག་པ་ཁག་ཅིག་གིས་མགྲོན་ཁང་དང་སྤྲོ་སྐྱིད་ཁང་སོགས་ལ་བརྟག་དཔྱད་བྱ་རྒྱུ་འགོ་ཚུགས། ཕྱི་ཟླ་༩་པའི་ཚེས་༢༠་ཐམ་པའི་དགོང་མོར་འབྲུག་ཡུལ་གྱི་ཉེན་རྟོག་པས་སྨད་འཚོང་གི་ལས་སུ་ཞུགས་པའི་བུད་མེད་གཉིས་འཛིན་བཟུང་བྱས་ཡོད་པ་སྟེ། ལོ་ན་༤༠་ཐམ་པར་སོན་པའི་བུད་མེད་ཅིག་གིས་མགྲོན་ཁང་ཞིག་བཟུང་སྟེ་གཞང་ཁང་གཉེར། ལོ་ན་༣༠་ཐམ་པར་སོན་པའི་བུད་མེད་ཅིག་གིས་གཞང་བཙོངས་ནས་ཁྲིམས་འགལ་བྱེད་ཀྱི་ཡོད་པའི་གནས་ཚུལ་ཐོན་འདུག
ད་ལྟ་བུད་མེད་དེ་དག་ཉེན་རྟོག་པའི་བཀག་ཉར་འོག་ཏུ་ཡོད་པ་དང་རིམ་བཞིན་སྨད་འཚོང་གི་ནག་ཉེས་འཛུགས་སྲིད་པའི་རྣམ་པ་ཐོན། ཁུངས་ལྡན་གྱི་གནས་ཚུལ་འབྱུང་ཁུངས་ཁག་གིས་ཀུན་གསལ་གསར་ཁང་གི་གསར་འགོད་པར་བཤད་པ་ལྟར་ན། བདག་མོ་དེས་གཞང་ཁང་གཉེར་ཏེ་འཕྱོན་མ་དེར་མཉམ་འབྲེལ་བྱས་ནས་ཚོང་ལས་ཀྱི་ཡོང་འབབ་རྣམས་བགོ་བཤའ་བརྒྱབ། འདས་པའི་ཟླ་བ་མང་པོར་ཁོ་མོས་སྨད་འཚོང་མ་ཚོར་ཁང་མིག་བཀོད་སྒྲིག་བྱས་ནས་ཚོང་འབྲེལ་བཙུགས། ཁོ་མོའི་ལག་ཐོགས་ཁ་པར་ནང་དུ་འཕྱོན་མ་ཚོའི་འདྲ་པར་ཡོད་པ་དང་ཝ་ཛི་ཨབ་དྲྭ་ལམ་བརྒྱུད་ནས་འདྲ་པར་དེ་རྣམས་ཉེ་འཁྲིས་ཀྱི་གྲོང་རྡལ་ཁག་གི་རྒྱ་གར་བ་ཚོར་བསྟན་ནས་འཕྱོན་མ་དེ་རྣམས་མཚམས་སྦྱོར་བྱས་ཡོད་ཅིང་། གསར་འགྱུར་འབྱུང་ཁུངས་གཞན་ཞིག་གིས་ཀུན་གསལ་གསར་ཁང་ལ་འཕྱོན་མ་དེ་རྣམས་ཉིན་ཞག་གཉིས་ཀའི་དུས་ནམ་ཞིག་མཁོ་ཡང་རག་གི་འདུག་ཅེས་བསྟན།།
བདག་མོ་དེར་མགྲོན་ཁང་གི་ཡོང་འབབ་ཚུད་པའི་ཟླ་བ་རེར་འབྲུག་པའི་དངུལ་ཊམ་འབུམ་༣་རེ་ཡོད་པ་དང་དགེ་ལེགས་ཕུག་ཏུ་མགྲོན་ཁང་༤་ཡོད་པ་དེ་དག་གི་གྲས་ཀྱི་གཅིག་ཡིན་འདུག འབྲུག་ཡུལ་གྱི་ཉེན་རྟོག་པས་མགྲོན་ཁང་དེར་རྟོག་ཞིབ་བྱས་ནས་དུས་ཡུན་གང་འཚམ་ཞིག་ཕྱིན་ཀྱང་དཔང་རྟགས་ཁུངས་འཕེར་ཞིག་མ་རྙེད་པར་མགྲོན་ཁང་གི་བདག་མོ་དང་འཕྱོན་མ་དེ་དག་འཛིན་བཟུང་བྱས་མ་ཐུབ་པར་ལུས། ལོ་ན་༣༠་སོ་གྲངས་སུ་སོན་པའི་བུད་མེད་གཟུགས་རིང་ཆུ་རས་དམར་པོ་གྱོན་པ་ཞིག་གིས་ཁ་པར་ནང་དུ་སྐུ་ཞབས་ཁྱོད་གང་དུ་ཡོད། ཁྱོད་དེ་ག་རང་དུ་སྡོད། ང་མགྱོགས་པོར་ཡོང་ཆོག ང་ཚོ་མར་བསྡད་ནས་ཚོང་གཏམ་ཆོག་ཅེས་དུས་ཡུན་སྐར་མ་༤་ལ་སྐད་ཆ་བཤད། ཁོ་མོས་སྐྱེས་པ་དེ་གང་དུ་ཡོད་མེད་ནན་ཏན་གྱིས་དྲིས་པས་མི་ཚོས་བུད་མེད་དེ་འཕྱོན་མ་ཞིག་ཡིན་པའི་དོགས་པ་བྱུང་བ་རེད་ཅེས་གནས་ཚུལ་ཐོན་འདུག
མི་ཚོས་འཕྱོན་མ་དེས་མགྲོན་ཁང་དུ་ཆང་བཏུང་སྟེ་རིན་པ་རྩིས་བརྒྱབ། ད་དུང་ཁོ་མོས་གྲོགས་མོ་ཞིག་དང་སྐྱེས་པ་གཉིས་ཀྱི་ཆང་རིན་ཡང་སྤྲད། གྲོགས་མོ་དེ་དང་སྐྱེས་པ་དེ་དག་འཕྱོན་མ་དེའི་ཚོང་གྲོགས་ཡིན་པ་ཚོང་གྲོགས་ཚོས་འཕྱོན་མ་དེར་མི་ཁྲིད་ནས་ཡོང་གི་འདུག ཁོ་མོ་གཅིག་པུ་མིན་པ་དང་མགྲོན་ཁང་གི་ལས་བྱེད་པ་ཞིག་ཚུད་པའི་བུད་མེད་༤་འདུག ཁོ་ཚོ་ཚང་མ་ལོ་ན་༤༠་ཡས་མས་སུ་སོན་འདུག་ཅེས་ཉེན་རྟོག་པར་བཤད། རྒན་མོ་གཉིས་ཀྱིས་ཆང་འཐུང་ཞོར་དུ་ཁ་རྩོད་ཤོར་ནས་ཕན་ཚུན་འཕྱོན་མ་ཞེས་གཤེས། མགྲོན་ཁང་གི་བདག་པོས་འཕྲལ་དུ་རྒན་མོ་དེ་དག་གི་ཁ་བཀག་ནས་བར་བཤོལ། རྒན་མོ་གཅིག་གི་ལག་ཏུ་འགྱིག་གི་མིང་བྱང་ཁག་ཅིག་བཟུང་ཡོད་པ་དེ་དག་གི་སྟེང་དུ་ཁ་པར་ཨང་གྲངས་བཀོད། ཁོ་མོས་སྐྱེས་པ་ཚོར་མིང་བྱང་དེ་སྤྲད་ནས་ཁ་པར་ཐོངས་ཞེས་འཕྱོན་མ་རྣམས་མཚམས་སྦྱོར་བྱེད་ཀྱི་ཡོད་པས་དགེ་ལུགས་ཕུག་ཏུ་ཁྲིམས་འགལ་གྱི་སྨན་འཚོང་དར། ཕོ་གསར་ཚོ་དང་སློབ་ཕྲུག་ཚོ་མཚན་མོར་སྤྲོ་ཚོགས་ཁག་ཏུ་ཞུགས་ཏེ་འཕྱོན་མ་བསྟེན་གྱི་ཡོད་པར་ཕ་མ་རྣམས་བློ་འཚབ་བྱ་དགོས་པའི་གནས་སུ་གྱུར་ཡོད་པའི་གནས་ཚུལ་ཐོན་འདུག
འབྲུག་ཡུལ་གྱི་ཉེན་རྟོག་པ་ཚོས་དོགས་གཞི་ཅན་གྱི་མི་༢༥་ཐོ་འགོད་བྱས་ནས་ལྟ་རྟོག་དང་བརྟག་དཔྱད་བྱེད་ཀྱི་ཡོད་པར་མ་ཟད། འཕྱོན་མ་བསྟེན་དུ་ཡོང་མཁན་ཕལ་མོ་ཆེ་ས་མཚམས་ཀྱི་གྲོང་རྡལ་ཁག་གི་རྒྱ་གར་བ་ཚོ་ཡིན་ཞིང་། རྒྱ་གར་བ་ཚོ་མཚན་མོར་ས་མཚམས་བརྒལ་ནས་འབྲུག་ཡུལ་གྱི་དགེ་ལེགས་ཕུག་ཏུ་ཡོང་གི་ཡོད་པའི་དགོས་དོན་གཙོ་བོ་ནི་འཕྱོན་མ་བསྟེན་རྒྱུའི་ཆེད་དུ་ཡིན་འདུག དགེ་ལེགས་ཕུག་གི་ཡུལ་མི་རྒྱུས་ཡོད་ཅིག་གིས་སློབ་ཕྲུག་ཚུད་པའི་བུད་མེད་མང་པོ་སྨད་འཚོང་གི་ལས་སུ་ཞུགས་ནས་ཉེ་འཁོར་གྱི་གྲོང་རྡལ་ཁག་གི་སྐྱེས་པ་ཚོར་འབྲེལ་བ་འཛིན་གྱི་འདུག འགྲུལ་པ་དེ་ཚོས་དངུལ་སྒོར་ཕོན་ཆེན་དང་ཁ་པར་གོང་ཆེན་རྣམས་སྤྲོད་ཀྱི་འདུག ན་གཞོན་མ་ཁག་ཅིག་ལ་ཧིན་སྒོར་ཁྲི་ཚོ་༥་རེ་རག་གི་འདུག ས་གནས་ཀྱི་རླངས་འཁོར་ཁ་ལོ་བ་དང་གླ་འཁོར་འབྲེལ་མཐུད་ཁང་ཁག་ཀྱང་སྨད་འཚོང་གི་ལས་ཀར་འབྲེལ་བ་འདུག་ཅེས་ཀུན་གསལ་གསར་ཁང་གི་གསར་འགོད་པར་ནང་མོལ་བྱས་འདུག
ཉེ་ཆར་ཕྱི་ཟླ་༥་པའི་ཚེས་༡༨་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། ཐིམ་ཕུག་རྫོང་ཁྲིམས་ཁང་གིས་བུད་མེད་༣་ལ་ལོ་༣་ནས་ལོ་༥་ཡི་བཙོན་འཇུག་གི་ཁྲིམས་ཐག་བཅད། བུད་མེད་དེ་དག་གིས་འབྲུག་མོ་ན་གཞོན་མ་༦་དཀྱིལ་ཤར་ས་ཁུལ་དུ་ལྐོག་ཁྲིད། ཁོ་ཚོས་ཕམ་མྱོང་བ་དེ་ཚོར་གུན་གསབ་དངུལ་སྒོར་སྤྲོད་དགོས་པའི་བཅད་ཁྲ་བསྒྲགས། ཀུན་དགའ་དབང་མོ་ཞེས་པ་ནི་ཐིམ་ཕུག་གི་ཡུལ་མི་ཞིག་ཡིན་པ་དང་ཁོ་མོར་ལོ་༣་གྱི་བཙོན་འཇུག་གི་ཉེས་ཆད་ཕོག ཁོ་མོས་འབྲུག་མོ་ལོ་ཆུང་ཞིག་ལ་ཨི་རག་ཏུ་ལས་ཀ་ཡག་པོ་ཞིག་འདུག ཉི་མ་རེར་དུས་ཡུན་ཆུ་ཚོད་༢་ལ་མ་གཏོགས་ལས་ཀ་ལས་མི་དགོས་ཞེས་མགོ་སྐོར་བཏང་ཞིང་། ཀུན་དགའ་དབང་མོར་ཨ་སྒོར་༣༠༠་ཐོབ་པ་དང་འབྲུག་མོ་ལོ་ཆུང་དེ་ལྡི་ལི་ནས་དྷུ་བྷེ་བརྒྱུད་དེ་ཨི་རག་ལ་ཁྲིད། ཨི་རག་ལ་བསླེབས་པ་དང་ལག་འཁྱེར་དང་ཐོངས་མཆན་རྣམས་ལས་བདག་གིས་ཕྲོགས། འབྲུག་མོ་དེ་རང་ཡུལ་དུ་ཕྱིར་ལོག་བྱ་རྒྱུ་ཡིན་ཟེར་ན་ཨི་རག་གི་ལས་བདག་དེས་ཨ་སྒོར་༤༠༠༠་ཕྱིར་སློག་བྱོས་ཞེས་དགོས་འདུན་བཏོན།།
ལེགས་སྐྱིད་དབང་མོ་ཞེས་པ་ཞིག་གིས་འབྲུག་མོ་༤་ཨི་རག་ལ་བཏང་བའི་ནག་ཉེས་ཐོག་ཏུ་ལོ་ལྔའི་བཙོན་འཇུག་དང་ཕམ་མྱོང་བ་འབྲུག་མོ་༢་ལ་དངུལ་ཊམ་ཁྲི་ཚོ་༢་རེ་གུན་གསབ་སྤྲོད་དགོས་པའི་ཉེས་ཆད་བཅད། ༢༠༡༧་ལོར་ལེགས་སྐྱིད་དབང་མོས་ངོ་དེབ་བརྒྱུད་ནས་འབྲུག་མ་ན་གཞོན་མ་དེ་རྣམས་བསྡུ་འགུགས་བྱས་པར་གླ་ཡོན་ཨ་སྒོར་༤༠༠་ཐོབ། དེ་བཞིན་འཕྲིན་ལས་བཟང་མོ་ཞེས་པ་ཞིག་ལའང་ལོ་༣་གྱི་བཙོན་འཇུག་གི་ཉེས་ཆད་ཕོག ཁོ་མོས་འབྲུག་མོ་༢་མགོ་སྐོར་བཏང་སྟེ་ཐེ་ལན་ཌིའི་རྒྱལ་ས་བྷན་ཁོག་བརྒྱུད་ནས་ཏུར་ཀི་ལ་ཁྲིད། འཕྲིན་ལས་དབང་མོ་སྐབས་དེར་ཨི་རག་ཏུ་ཡོད་པ་དང་ཁོ་མོ་རང་ཡུལ་དུ་ཕྱིར་ལོག་བྱ་རྒྱུ་ཡིན་ཞེས་བཤད། དེར་བརྟེན་ཨི་རག་གི་ལས་བདག་དེས་ཨ་སྒོར་༤༠༠༠་ཕྱིར་སློག་བྱེད་པའམ། ཡང་ནང་འབྲུག་མོ་གསར་པ་༢་མགོ་སྐོར་བཏང་ནས་ཨི་རག་ལ་ཁྲིད་ཤོག་ཅེས་ཆ་རྐྱེན་བཏོན། གལ་སྲིད་ཁོ་མོས་འབྲུག་མོ་གསར་པ་༢་བསྡུ་སྐོང་ཐུབ་ན་ཨ་སྒོར་༡༠༠༠་རེ་ལེགས་སྐྱེས་སྤྲོད་ཆོག་ཅེས་ཁས་བླངས་པས་འཕྲིན་ལས་དབང་མོས་དེ་ལ་མོས་མཐུན་བྱ་དགོས་བྱུང་ཡོད་པའི་གནས་ཚུལ་ཐོན་འདུག
འབྲུག་མོ་ན་གཞོན་མ་མང་པོ་ཨི་རག་ལ་ཕྱིན་ན་ཁྱིམ་ལས་ཡང་པོ་དང་ཟླ་བ་རེར་གླ་ཕོགས་ཨ་སྒོར་༣༠༠་རེའི་འཐོབ་ཀྱི་འདུག་ཅེས་མགོ་སྐོར་ཐེབས། ཁོ་ཚོ་ཨི་རག་ཏུ་བསླེབས་པའི་རྗེས་སུ་ཉིན་རེར་ཆུ་ཚོད་༡༥་ནས་༢༠་ཡས་མས་རེར་གཡོག་ལས་རྒྱུག་དགོས་པ་དང་ཐོག་མར་ཁ་ཆད་བྱས་པའི་གླ་ཕོགས་ཀྱང་མ་ཐོབ། ཁོ་ཚོས་ལོ་༢་གྱི་གན་རྒྱ་བཞག་པ་མ་ཚང་བར་དུ་རང་ཡུལ་ལ་ཕྱིར་ལོག་མ་ཐུབ། ཨེ་ཤི་ཡའི་རྒྱལ་ཁབ་ཁག་གི་བུད་མེད་རྣམས་དཀྱིལ་ཤར་ས་ཁུལ་གྱི་རྒྱལ་ཁབ་ཁག་ལ་ཁྱིམ་ལས་བྱེད་དུ་ཁྲིད་པའི་རྗེས་སུ་བྲན་གཡོག་ལྟར་ངལ་རྩོལ་རྒྱུག་དགོས་པ་དང་ལས་བདག་གི་བཙན་གཡེམ་མྱོང་དགོས་པ། ཁོ་ཚོ་རང་ཡུལ་དུ་ཕྱིར་ལོག་མ་ཐུབ་པ་དང་རྒྱལ་ཁབ་དེར་བཅའ་སྡོད་རང་གི་གཞུང་ཚབ་ཁང་ལ་འབྲེལ་བ་བྱེད་མ་ཐུབ། སྐབས་འགར་འགྲོ་བ་མིའི་ཐོབ་ཐང་ཚོགས་པ་ཁག་དང་གསར་འགོད་པ་ཚོས་གནས་ཚུལ་དེ་ཚོ་ཤེས་རྟོགས་བྱུང་ན་ཉེན་རྟོག་པ་དང་འབྲེལ་ཡོད་ཀྱི་གཞུང་ཚབ་ཁག་ལ་འབྲེལ་བ་བྱས་ནས་བུད་མེད་དེ་རྣམས་སྐྱོབ་ཐབས་བྱེད་ཀྱི་ཡོད་པའི་གནས་ཚུལ་ཐོན་དང་འཐོན་བཞིན་ཡོད་པ་རེད།།
