བོད་ཀྱི་བུད་མེད་ལྷན་ཚོགས་ཀྱི་དྲུང་ཆེ་སྐལ་བཟང་སྒྲོལ་མ་ལགས་ཀྱིས་བརྗོད་ན་བོད་ཀྱི་ན་གཞོན་ཚོ་ནི་མ་འོངས་པའི་སྤྱི་ཚོགས་ཀྱི་སྣེ་ཁྲིད་མཁན་ཡིན་པས་ཁོ་ཚོར་ཤུགས་རྐྱེན་ཡག་པོ་ཞིག་འཇོག་རྒྱུ་དང་། ཡང་གཞིས་བཞུགས་བོད་མིའི་མངོན་འདོད་སྒྲུབ་རྒྱུ་སོགས་ཀྱི་ཆེད་དུ་ཟང་ཟིང་ལ་མགོ་བོ་མ་འཁོར་བར་མི་རབས་འདི་ནན་ཏན་བྱེད་དགོས་པའི་དུས་ཚོད་ཅིག་ལ་སླེབས་ཡོད་པས་ཁོང་ཉིད་ཀྱང་གཞོན་སྐྱེས་ཤིག་གི་ངོས་ནས་ཕྱག་ལས་ཧུར་ཐག་གནང་བཞིན་པ་རེད་འདུག
བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་བསྟན་འཛིན་སྒྲོལ་མ་ལགས་དང་ཚོགས་གཞོན་ཚེ་རིང་སྒྲོལ་མ། དྲུང་ཆེ་སྐལ་བཟང་སྒྲོལ་མ་བཅས་ཨ་རིར་ཆེད་ཕེབས་ཀྱིས་ཨ་རིའི་ནེའུ་ཡོག་དང་ནེའུ་ཇར་སི་ས་གནས་བོད་ཀྱི་བུད་མེད་ཚོགས་པར་ལོ་བཞི་ལ་འཕྲད་པའི་དཀའ་རྙོག་མཇུག་སྒྲིལ་ཏེ་ས་གནས་རྒྱུན་ལས་གསར་བ་འདེམས་ཐོན་བྱུང་བ་ཚོའི་དམ་འབུལ་མཛད་སྒོ་འཚོགས་འདུག
སྤྱི་ལོ་༡༩༥༩་ལོའི་སྤྱི་ཟླ་༣་ཚེས་༡༢་ཉིན་ལ་རྒྱལ་ཞེན་ལ་རྒྱ་ལྡན་པའི་བོད་ཀྱི་བུད་མེད་ཁག་ཅིག་གིས་སྣེ་ཁྲིད་དེ་ཆོལ་གསུམ་བོད་ཀྱི་བུད་མེད་ཚོ་གཅིག་ཏུ་སྒྲིལ་ནས་རྒྱ་ནག་དམར་ཤོག་ཚོགས་པས་བོད་ལ་དྲག་པོའི་བཙན་འཛུལ་བྱེད་པར་གཞི་རྒྱ་ཆེ་བའི་ངོ་རྒོལ་ཁྲོམ་སྐོར་གནང་ཡོད་ཅིང་། སྐབས་དེར་བོད་ཀྱི་བུད་མེད་མང་པོའི་ཚེ་སྲོག་ཤོར་བ་དང་བཙོན་དུ་ཚུད་པ་སོགས་བྱུང་ཡོད་པ་རེད། བོད་རྒྱལ་ཁབ་ལ་ཆག་འཇིག་གི་གནས་བབ་ཁྲོད་དུ་རྒྱལ་སྐྱོབས་ལས་དོན་ལ་མཉམ་ཞུགས་གནང་མཁན་བོད་ཀྱི་བུད་མེད་ཚོའི་སྙིང་སྟོབས་དང་ཕྱག་ལས་རྒྱུན་སྲིངས་ཡོང་ཆེད་༧གོང་ས་སྐྱབས་མགོན་རྒྱལ་བ་རིན་པོ་ཆེ་མཆོག་གིས་བོད་ཀྱི་བུད་མེད་ཚོགས་པ་བསྐྱར་གསོ་དགོས་གལ་ཆེ་བའི་བཀའ་གནང་ལམ་སྟོན་ལྟར། སྤྱི་ལོ་༡༩༨༤་ལོར་བོད་ཀྱི་བུད་མེད་ལྷན་ཚོགས་དེ་བཞུགས་སྒར་རྡ་རམ་ས་ལར་བསྐྱར་གསོ་གནང་ཡོད་པ་རེད།
བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་བོད་ཀྱི་བུད་མེད་ལྷན་ཚོགས་ཀྱི་ལས་འགན་གཙོ་བོ་གང་ཡིན་པའི་ཐད་ལ་འགྲེལ་བརྗོད་གནང་སྐབས། སྤྱི་ལོ་༡༩༥༩་ལོའི་སྤྱི་ཟླ་༣་ཚེས་༡༢་ཉིན་ལ། ཆོལ་གསུམ་བུད་མེད་སྟོང་ཕྲག་མང་པོས་མ་སྐུལ་དང་བླངས་དང་མ་གྲོས་བསམ་པ་གཅིག་མཐུན། སྐབས་དེ་དུས་དེང་དུས་ཀྱི་འཕྲུལ་ཆས་སོགས་གང་ཡང་མེད་ཀྱང་། རང་གི་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་བློས་བཏང་བ་རེད། དེ་གཞི་བཟུང་གིས་ད་ལྟ་བཙན་བྱོལ་དུ་སླར་གསོ་བྱེད་རུང་བོད་ནང་གི་བོད་མི་ཚོ་གཙོ་བོ་འཛིན་པའི་ཐོག་ནས། དེ་ག་ནང་བཞིན་༥༩་ལོའི་གསུམ་པའི་༡༢་ཉིན་མོར་བོད་ཀྱི་བུད་མེད་ཚོའི་དམིགས་ཡུལ་གང་ཡིན་པ་དེ་ང་ཚོས་ལས་འགན་ཁུར་དགོས་པ་གཙོ་བོ་འཛིན་པའི་ཐོག་ང་ཚོ་བསྐྱོད་དགོས་དུས། ད་ལྟ་ཡང་དེ་ལྟར་ཡིན། གང་ཡིན་ཞེ་ན་རང་གི་རྒྱལ་ཁབ་དང་མི་རིགས་ཀྱི་ཆེད་དུ་ག་རེ་བྱེད་ཐུབ་ཀི་རེད་ཅེས་པ་འདི་གཙོ་བོ་ཆགས་བསྡད་ཡོད་ཅེས་གསུང་བ་དང་། ཡང་བོད་ནང་གི་བུད་མེད་ཚོར་ཉིན་འཁྱོལ་ཡང་མཚན་མ་འཁྱོལ་བ་དེ་འདྲ་ཡོད་དུས། ཁོང་ཚོར་རང་བཞིན་ལྷན་སྐྱེས་ཀྱི་འགྲོ་བ་མི་ཐོབ་ཐང་སོགས་ལོངས་སུ་སྤྱོད་རྒྱུ་མེད་སྐབས། ཁོང་ཚོའི་འབོད་སྒྲ་དེ་ང་ཚོ་ཆགས་བསྡད་ཡོད་རེད་བཱ། ང་ཚོ་རང་དབང་ལུང་བར་ཡོད་པའི་ཆ་ནས། དེ་འདྲ་ཡིན་དུས་ང་ཚོའི་འགན་གཙོ་བོ་དེ་ག་རང་ཆགས་ཡོད་ཅེས་གསུང་བྱུང་།
ད་ལྟའི་བོད་ཀྱི་བོད་ཀྱི་ལྷན་ཚོགས་ཀྱི་གནས་སྟངས་དང་ལངས་ཕྱོགས་ཀྱི་སྐོར་ལ་ཚོགས་གཞོན་ཚེ་རིང་སྒྲོལ་མ་ལགས་ཀྱིས། ད་ལྟ་བོད་ཀྱི་བུད་མེད་ལྷན་ཚོགས་ལ་ཡན་ལག་ཚོགས་པ་༥༨་དང་ཚོགས་མི་ཁྲི་གཉིས་ལྷག་ཡོད་པ་མ་ཟད། བུད་མེད་ལྷན་ཚོགས་ཀྱིས་བོད་ཀྱི་འཐབ་རྩོད་གཙུགས་སུ་འཛིན་པའི་དམིགས་ཡུལ་ལ་འགྱུར་བ་ཐེབས་མེད་ཅིང་། ཐོག་མ་བཙན་བྱོལ་གྱི་གཞུང་མང་ཚང་མ་རང་བཙན་རིན་ན་ཡང་། སྤྱི་ལོ་༡༩༩༦་ལོ་སྟེ་སྐབས་ལྔ་བའི་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐོག་ཏུ་བོད་མིའི་སྒྲིག་འཛུགས་ཀྱིས་སྤྱི་མོས་གཏན་ལ་ཕབ་པའི་དབུ་མའི་ལམ་ལ་ཤར་བསྐྱོད་ཀྱི་ལངས་ཕྱོགས་གཏན་འབེབས་བྱས་མྱོང་བ་དེར་ད་ལྟ་ཡང་འགྱུར་བ་གང་ཡང་ཐེབས་མེད་པ་མ་ཟད། བུད་མེད་ལྷན་ཚོགས་ཀྱི་སྒྲིག་གཞི་ལས་ཨང་དང་བོ་དེ་ནི་༧གོང་ས་མཆོག་གི་བཀའ་དགོངས་འོག་ཤར་བསྐྱོད་བྱེད་རྒྱུ་དེ་ཡིན་པ་འགྲེལ་བརྗོད་གནང་བྱུང་།
ཨ་རིའི་རླུང་འཕྲིན་ཁང་གི་ཀུན་གླེང་ལས་རིམ་དུ་བཞུགས་སྒར་རྡ་རམ་ས་ལ་ནས་ཕེབས་པའི་བུད་མེད་ཚོགས་གཙོ་དང་ཚོགས་གཞོན། དྲུང་ཆེ་བཅས་ཀྱིས་བཅར་འདྲི་དང་ལེན་སྐབས་སུ་གསུང་དོན་ལྟར་ན། བོད་ཀྱི་བུད་མེད་ལྷན་ཚོགས་ལ་དབུས་དང་ཡན་ལག་ལས་ཁུངས་བར་དུ་ལས་ཀ་བྱེད་ཕྱོགས་ལ་ཡིག་ངོར་ཕབ་པའི་སྒྲིག་སྲོལ་ཡོད་པ་ལྟར། སྐབས་སོ་སོའི་རྒྱུན་ལས་དུས་ཡུན་ལ་འགན་འཛིན་ལྷན་ཚོགས་དང་ཚོགས་ཆེན་རེ་ཚོགས་སྲོལ་ཡོད་པ་ལས། འགན་འཛིན་ལྷན་ཚོགས་སྐབས་ས་གནས་ཡོངས་རྫོགས་ཀྱི་ཚོགས་གཙོ་དང་རྒྱུན་ལས་ཚུར་འཛོམས་ཏེ་གྲོས་གཞི་དང་གྲོས་ཆོད་གཏན་འབེབས་ཀྱིས་ཡིག་ངོར་ཕབ་ཏེ་དབུས་དང་ཡན་ལག་ཡོངས་ནས་དེར་བརྩི་བཀུར་དང་དོན་འཁྱོངས་ཡོང་བ་བྱེད་དགོས་པ་དང་། དེ་མཚུངས་ཚོགས་ཆེན་སྐབས་སུ་ཡང་སྐབས་དང་དུས་ལ་དཔག་པའི་ལས་དོན་གནང་ཕྱོགས་ཡིག་ཐོག་ཏུ་ཡོད་པ་ངོ་སྤྲོད་གནང་སོང་། དེ་བཞིན་རྒྱ་ནག་གཞུང་གིས་སྲིད་ཇུས་ཀྱི་འོག་ཏུ་བོད་ནང་གི་བུད་མེད་ཚོར་འཕྲད་བཞིན་པའི་འཆར་ལསྡན་བུ་སྐྱེས་ཀྱི་སྲིད་ཇུས་སྤེལ་སྐབས་སྐྱེས་སྒོ་བཀག་པ་ལས་བྱུང་བའི་འཕྲོད་བསྟེན་དཀའ་ངལ་དང་བུད་མེད་རྩོམ་པ་པོ་ཚོའི་སྨྲ་བརྗོད་རང་དབང་་བཀག་པ། ཡང་བོད་རྒྱ་གཉེན་སྡེབས་ཀྱི་སྲིད་ཇུས་ལས་གཉེན་སྒྲིག་རང་དབང་ལ་འགོག་རྐྱེན་ཡོང་གི་ཡོད་པ་བཅས་ཀྱི་ཐད་ལ་བུད་མེད་ལྷན་ཚོགས་ཀྱིས་སྙན་ཐོ་དང་ཞིབ་འཇུག་སོགས་ཀྱི་དཔེ་དེབ་བཏོན་མྱོང་བ་མ་ཟད། བཞུགས་སྒར་རྡ་རམ་ས་ལར་གཟིགས་སྐོར་ལ་ཡོང་མཁན་ཕྱིའི་རྒྱལ་ཁབ་ཁག་གི་གཞུང་དང་གཞུང་འབྲེལ་མིན་པའི་ཚོགས་པ་ཚོའི་སྐུ་ཚབ་མི་སྣ་ཚོར་བོད་དོན་གོ་རྟོགས་སྤེལ་བཞིན་པ་དང་བཙན་བྱོལ་བོད་མིའི་སྤྱི་ཚོགས་སུ་ཡང་བུད་མེད་ཀྱི་ནུས་སྟོབས་གོང་འཕེལ་ཏེ། བཙུན་དགོན་ཁག་ཏུ་བསྐྱོད་དེ་བཙུན་མའི་ནུས་སྟོབས་གོང་འཕེལ་དང་བཙུན་མའི་འགན་ཁུར་སྣེ་ཁྲིད། བཙུན་མའི་འཕྲོད་བསྟེན་བཅས་ཀྱི་ཐོག་ལ་ལོ་རྟག་པར་ཟབ་སྦྱོང་སྤྲོད་བཞིན་པ་གཙོས་སྤྱི་ཚོགས་སྤྱིའི་བསམ་བློ་གཏོང་ཕྱོགས་ཡར་རྒྱས་ཡོང་བར་ཕྱག་ལས་གནང་བཞིན་ཡོད་འདུག
ཡང་སྤྱི་ལོ་༡༩༩༥་ལོར་རྒྱ་ནག་གི་རྒྱལ་ས་པེ་ཅིན་དུ་མཉམ་འབྲེལ་རྒྱལ་ཚོགས་ཀྱི་བུད་མེད་ཚོགས་ཆེན་ཐེངས་བཞི་བ་འཚོགས་སྐབས་གླིང་ཕྲན་གསུམ་ནས་བོད་ཀྱི་བུད་མེད་ལྷན་ཚོགས་ཀྱི་སྐུ་ཚབ་རྣམས་ཚོགས་ཆེན་དེར་མཉམ་ཞུགས་བྱེད་རྒྱུའི་ཆེད་དུ་རྒྱ་ནག་གི་རྒྱལ་ས་པེ་ཅིན་དུ་བཅར་སྐབས་དེ་དུས་རྒྱ་ནག་གིས་བཀག་འགོག་འོག་ཚོགས་ཐོག་ལ་བཅར་དུ་བཅུག་མེད་ཀྱང་། སྐབས་དེ་དུས་བོད་ཀྱི་བུད་མེད་ཚོས་རྒྱ་ནག་གི་རྒྱལ་ས་པེ་ཅིན་དུ་ཞི་བའི་ངོ་རྒོལ་གནང་བ་དེར་རྒྱལ་སྤྱིའི་ནང་ལ་ཁྱབ་ཆེན་པོ་བྱུང་ཏེ་དོ་སྣང་ཆེན་པོ་བྱུང་བ་དང་། ལྷག་པར་དུ་བོད་ཀྱི་བུད་མེད་ཀྱི་སྨྲ་སྒོ་བཀག་སོང་ཞེས་མཉམ་འབྲེལ་རྒྱལ་ཚོགས་དང་རྒྱ་ནག་གཉིས་ལ་སྐྱོན་བརྗོད་བྱེད་མཁན་ཤུགས་ཆེན་བྱུང་བ་འདི་ནི་བཙན་བྱོལ་དུ་བུད་མེད་ལྷན་ཚོགས་བསྐྱར་གསོ་བྱེད་པའི་ལོ་རྒྱུས་སུ་རྒྱལ་སྤྱིའི་སྡིང་ཆའི་སྒང་ལ་གྲུབ་འབྲས་ཆེན་པོ་ཐོན་པ་ཞིག་ལ་ངོས་འཛིན་ཞུ་བཞིན་འདུག
བུད་མེད་ལྷན་ཚོགས་ཀྱི་ད་ལྟའི་དྲུང་ཆེ་སྐལ་བཟང་སྒྲོལ་མ་ལགས་ནི་ན་གཞོན་ཞིག་ཡིན་པ་ལས། ཁོང་གིས་ཁོང་དང་འདྲ་བའི་ན་མཉམ་ཚོས་བུད་མེད་ལྷན་ཚོགས་ལ་ལྟ་སྟངས་ལ་གང་འདྲ་ཡོད་པའི་ཐད་ལ་གསུང་རྒྱུར། སྔོན་མ་འདྲ་བོ་ཡིན་ན་བུད་མེད་ལྷན་ཚོགས་ལབ་དུས་ཨ་མ་ལགས་ཚོས་ཕྱུ་བ་ལྗང་ཁུ་གྱོན། འོག་འཇུག་དཀར་པོ་གྱོན། ག་དུས་ཡིན་ཡང་དགོན་པ་སོགས་སུ་བསྐྱོད་དུས་གསོལ་ཇ་འགྱོག་མཁན་དང་གཙང་བཟོ་གནང་བ་འདྲ་བའི་བསམ་བློ་ཁུར་སྟངས་འདུག དེ་ནས་སོ་སོ་སློབ་གྲྭ་ནས་ཐོན། གཞུང་འབྲེལ་མིན་པའི་ཚོགས་པ་མང་པོ་ཞིག་གི་སོ་སོའི་དམིགས་ཡུལ་དང་ངོ་བོ། ཕྱག་ལས་གནང་སྟངས་སོགས་ལ་ལྟས་ཡོང་དུས་ང་རང་ཚོགས་པ་འདིའི་ནང་དུ་འཛུལ་བ་འགྲིག་ཤག་བསམ་པའི་སྤོབས་པ་འདུག་ཅེས་གསུང་བ་དང་། ཡང་ཁོང་རང་ཞོགས་པ་ཡར་ལངས་པ་དང་ལས་ཀར་མ་སོང་བའི་སྔོན་དུ་ཉིན་དེའི་ལས་ཀ་ལམ་ལྷོང་ཡོང་རྒྱུར་སྨོན་ལམ་རྒྱག་གི་ཡོད་པ་མ་ཟད། བཙན་བྱོལ་དུ་ཡོད་པའི་གཞུང་འབྲེལ་མིན་པའི་ཚོགས་པ་དང་ན་གཞོན་ཚོ་ཟང་ཟིང་ལ་མགོ་མ་འཁོར་བར་གཞིས་བཞུགས་བོད་མིའི་མངོན་འདོད་སྒྲུབ་རྒྱུར་འབད་བརྩོན་གནང་བ་ཡིན་ན་མངོན་འདོད་འགྲུབ་ངེས་པར་ཡིད་ཆེས་བྱེད་བཞིན་ཡོད་པའི་སྐོར་དང་། ལྷག་པར་དུ་བུད་མེད་ལྷན་ཚོགས་ཀྱི་ཕྱག་ལས་ཀྱི་གྲུབ་འབྲས་མང་པོས་གཞོན་སྐྱེས་ཚོས་བུད་མེད་ལྷན་ཚོགས་ལ་ལྟ་སྟངས་ཇེ་ལེགས་སུ་འགྲོ་བཞིན་པ། ད་ལྟ་བུད་མེད་ན་གཞོན་ཚོའི་ཤེས་ཡོན་ཡར་རྒྱས་དང་ཕྱོགས་ཡོངས་ཀྱི་གནས་ཚད་ཡར་རྒྱས་ལྡན་པ་ཡོང་བཞིན་ཡོད་པས་ཁོང་རང་ཉིད་ཡིན་ཡང་མུ་མཐུད་དུ་གདེང་སྤོབས་ཆེན་པོས་ཕྱག་ལས་གནང་རྒྱུ་དང་མ་འོངས་པ་ཞབས་ཞུ་ཞུ་རྒྱུའི་སེམས་ཤུགས་ཡོད་པ་གསུང་སོང་།
ཡང་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་ཁོང་རྣམ་པ་ཨ་མེ་རི་ཀར་ཕེབས་དོན་ཐད་ལ། ནེའུ་ཡོག་དང་ནེའུ་ཇར་སི་ས་གནས་བོད་ཀྱི་བུད་མེད་ལྷན་ཚོགས་ལ་ལོ་བཞི་ཙམ་ལ་རྙོག་གླེང་འདྲ་བོ་ཞིག་བྱུང་རེད། ད་ཡིན་ན་ཡང་བཤད་ཚུལ་ཞིག་ཡོད་རེད་བཱ། ཉི་མ་ནུབ་ཀྱང་སང་ཉིན་ཡང་བསྐྱར་ཉི་མ་ཤར་ཡོང་གི་ཡོད་དུས་དེ་རིང་བཀྲ་ཤིས་པའི་ཉིན་མོ་ཞིག་དང་། དེ་ག་ནང་བཞིན་སྤོབས་པ་མཐོ་བོའི་ཐོག་ནས་ས་གནས་ནེའུ་ཡོག་དང་ནེའི་ཇར་སི་བུད་མེད་ལྷན་ཚོགས་གཅིག་ཡིན་ཞུ་རྒྱུ་ཡིན། གཅིག་ཆགས་པ་གཞིར་བཟུང་གིས་མི་མང་ལ་ཡང་གསལ་བསྒྲགས་ཤིག་དགོས་པ་རེད། རྒྱབ་སྐྱོར་ཞིག་ཀྱང་དགོས་པ་རེད། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་འདི་ཡང་གནས་དགོས་པ་རེད། རྒྱ་གར་དུ་བསྡད་དུས་ང་ཚོས་ནེའུ་ཡོག་དང་ནེའི་ཇར་སི་གཙོས་པའི་ཕྱི་རྒྱལ་ཡུལ་གྲུ་ཁག་གི་བུད་མེད་ལྷན་ཚོགས་རྣམས་རྩ་ཆེན་པོར་བརྩི་བཞིན་ཡོད། གང་ཡིན་ཟེར་ན་མཉམ་འབྲེལ་རྒྱལ་ཚོགས་ཁ་ཡི་འགྲམ་དུ་ཡོད་པ་རེད། ང་ཚོས་ཐག་རིང་བོ་ནས་སྐད་མང་པོ་ཞིག་རྒྱག་གི་ཡོད་རེད་དེ། སྐད་བརྒྱབ་པ་དེ་མི་རེ་ཟུང་གི་སྐད་ཆ་མ་ཡིན་པར་ང་ཚོའི་ས་ཆ་དེ་ལ་ཡི་རྒྱབ་ལོགས་སུ་རྒྱ་མིས་བཟུང་ཡོད་དུས་ང་ཚོས་ཁོ་ཚོར་བསམ་བློ་བཏང་ནས་ལས་ཀ་བྱེད་དགོས་དུས། འཕྲག་ཕུགས་རྒྱང་གསུམ་ལ་བསམ་བློ་མང་པོ་ཞིག་བཏང། སྤྱི་ཡོངས་ཀྱི་བསམ་བློ་བཏང་ནས་ནེའུ་ཡོག་དང་ནེའི་ཇར་སི་ས་གནས་དེ་གལ་ཆེན་དོན་ཆེན་སོང་ཙང་། མི་མང་གིས་རྒྱབ་སྐྱོར་ཞིག་རག་གི་ཡོད་པ་རེད། དེ་ག་ནང་བཞིན་དམ་འབུལ་ཞིག་གནང་དགོས་པ་རེད། མཛད་སྒོ་ཞིག་ཀྱང་གནང་དགོས་པ་རེད། གང་ཡིན་ཟེར་ན་ཡག་པོ་ཞིག་བྱུང་དུས་ཚང་མས་འཕྱར་གྲུ་མཉམ་འདེགས་དང་དེ་ག་ནང་བཞིན་དབུས་ཀྱིས་རྒྱབ་སྐྱོར་བྱེད་དགོས་པ་དེ་གལ་ཆེན་དོན་ཆེན་ཆགས་ཡོད་དུས་ང་ཚོ་འདིར་བཅར་ནས་ཁོ་ཚོར་མཛད་སྒོ་སྟབས་བདེ་ཞིག་དང་དམ་འབུལ་ཞིག དེ་ག་ནང་བཞིན་བཀྲ་ཤིས་ལོ་ལེགས་ཡིན། མ་འོངས་པ་འདི་རིགས་མི་ཡོང་བར། གང་ཡིན་ཟེར་ན་མི་ཡིན་པའི་ཆ་ནས་ནོར་འཁྲུལ་ཚང་མར་ཡོང་གི་ཡོད། མིའི་སྤྱི་ཚོག་སུ་བསྡད་ཡོད་དུས། དེ་ལ་བརྟེན་ནས་མང་པོ་ཞིག་གིས་ལེགས་ཆ་ལེན་དགོས་པ་དེ་ཡང་གལ་ཆེན་པོ་ཆགས་ཡོད་དུས་མ་འོངས་པ་དེ་རིགས་མི་ཡོང་བའི་འབོད་སྐུལ་ཞུ་བཞིན་ཡོད། ཅེས་འགྲེལ་བརྗོད་གནང་སོང་།
སྤྱིར་བོད་ཀྱི་བུད་མེད་ལྷན་ཚོགས་ལ་དབུས་དང་ཡན་ལག་བར་དུ་ལས་དོན་གནང་ཕྱོགས་ལ་སྒྲིག་སྲོལ་ཞིག་ཡོད་དུས། ས་གནས་སུ་དཀའ་རྙོག་བྱུང་ན་དབུས་བུད་མེད་ལྷན་ཚོགས་ཀྱིས་ཚོགས་པའི་སྒྲིག་སྲོལ་ལྟར་ས་གནས་ཀྱི་དཀའ་ངལ་སེལ་ཐུབ་ངེས་ཀྱང་། ནེའུ་ཡོག་དང་ནེའུ་ཇར་སི་ས་གནས་བུད་མེད་ཀྱི་དཀའ་ངལ་དེ་ལོ་བཞིར་ལྷག་པ་དེ་རྒྱུ་མཚན་གང་ཡིན་བཀའ་འདྲི་ཞུ་སྐབས། བསྟན་འཛིན་སྒྲོལ་མ་ལགས་ཀྱིས། ལོ་བཞི་ལབ་དུས་དུས་ཚོད་དཔེ་མང་པོ་འཕྲོ་བརླག་ལ་ཕྱིན་ཡོད། ཕྱིའི་་རྒྱལ་ཁབ་ལ་མཚོན་ན་སེམས་ཁམས་འཕྲོད་བསྟེན་དེ་གལ་ཆེན་པོ་ཆགས་ཡོད་རེད་དེ། མི་སྒེར་གྱི་སེམས་ཁམས་འཕྲོད་བསྟེན་ལ་ཡང་གྱོང་གུད་རག་ཡོད། ངས་ག་དུས་ཡིན་ཡང་ཞུ་བསྡད་ཡོད། ང་ཚོ་ལ་འཛམ་པོ་གླིང་སྤྱི་ཡོངས་སུ་འདྲ་འདྲའི་ནང་ནས་མ་འདྲ་བའི་དབུ་ཁྲིད་ཅིག་ཡོད། ང་ཚོར་ནོར་བུ་ཞིག་ཡོད་པ་རེད། ༧སྐྱབས་མགོན་རིན་པོ་ཆེ་ཡིས་ག་དུས་ཡིན་ཡང་བཟང་སྤྱོད་ཀྱི་བཀའ་སློབ་གནང་བཞིན་པ་རེད། ཡིན་ཡང་མང་པོ་ཞིག་གི་བཟང་སྤྱོད་ཏོག་ཙམ་ཉམས་ཡོད་པ་འདྲ་བོ་ཚོར་བསྡད་ཀི་འདུག ་སྤྱིར་བཏང་དབུས་ལ་སྒྲིག་གཞི་ཡོད་པ་རེད། སྒྲིག་གཞི་གཞིར་བཟུང་ལག་བསྟར་འགྲོ་དགོས་པ་རེད། སྒང་ནས་སྒྲིག་གཞི་གང་ཡིན་པ་མར་ཞུ་དགོས་པ་རེད། ཞུ་བ་གཞིར་བཟུང་འོག་ནས་དང་ལེན་གནང་དགོས་པ་རེད། ད་བཟང་སྤྱོད་ཏོག་ཙམ་ཉམས་པའི་ཐོག་ནས་འདི་འདྲ་ཞིག་ཆགས་བསྡད་འདུག དེ་འདྲ་ཡིན་དུས་ད་སྐབས་བཅོ་བརྒྱད་པ་ཡག་པོ་ཆགས་སོང་། བཀྲ་ཤིས་ལོ་ལེགས་ཡོད། དེ་ཚོ་ལ་རྒྱབ་སྐྱོར་གནང་རོགས་ཞུ་རྒྱུ་དེ་གལ་ཆེན་པོ་རེད། ཅེས་འབོད་སྐུལ་གནང་བྱུང་།
