༄༅།། ལ་དྭགས་ཀྱི་སྤྱི་ཁྱབ་གཞོན་པས་དབུས་ཐད་སྐྱོང་མངའ་ཁུལ་དེར་བཟོ་ལས་དང་ཚོང་ལས་ཀྱི་ས་ཁུལ་ཟུར་འཇོག་བྱ་དགོས་པའི་གྲོས་གཞི་བཏོན། ཕྱི་ཟླ་༡༡་པའི་ཚེས་༧་ཉིན་རྒྱ་གར་གྱི་ཧིན་རྡུ་ཉིན་རེའི་ཚོགས་པ་ལ་གནས་ཚུལ་ཐོན་པ་ལྟར་ན། ལ་དྭགས་ཀྱི་སྤྱི་ཁྱབ་གཞོན་པ་ནི་རྒྱ་གར་དབུས་གཞུང་གིས་བསྐོ་བཞག་བྱས་པའི་འགོ་ཁྲིད་ཅིག་ཡིན་པ་ལས་ལ་དྭགས་མི་དམངས་ཀྱིས་འོས་འདེམས་བྱས་པའི་འགོ་ཁྲིད་མིན་ཞིང་། ལ་དྭགས་ཀྱི་མང་ཚོགས་དང་ཚོགས་པ་ཁག་འགའ་ཞིག་གིས་སྤྱི་ཁྱབ་གཞོན་པའི་གྲོས་གཞི་དེར་མོས་མཐུན་མེད་པའི་རྣམ་འགྱུར་གསལ་པོར་བསྟན། ད་སྔ་ལ་དྭགས་ཀྱི་བཟོ་ལས་དང་ཚོང་ལས་ལ་མ་རྩ་འཛུགས་མཁན་རྣམས་ས་གནས་མི་དམངས་ཡིན་པའི་གནས་ཚུལ་ཐོན་འདུག
རྒྱ་གར་གཞུང་གི་སྲིད་ཇུས་ཡིག་ཆའི་ནང་དུ་མ་འོངས་པར་རྒྱ་གར་གྱི་མངའ་སྡེ་གཞན་གྱི་འབྱོར་ལྡན་པ་ཚོས་ལ་དྭགས་ཀྱི་བཟོ་ལས་དང་ཚོང་ལས་ཁག་ལ་མ་རྩ་བཙུགས་ཏེ་ས་གནས་མང་ཚོགས་ཀྱི་དགོས་མཁོ་ལྟར་ཚོང་ལས་གཉེར་ཆོག་ཅེས་བཀོད། བཟོ་ལས་དང་ཚོང་ལས་ཀྱི་ཆེད་དུ་ཟུར་འཇོག་བྱས་པའི་ས་ཆ་བརྒྱ་༧༠་ཐམ་པ་ཚོང་ལས་ཆུང་ཁག་དང་ཁེ་ལས་ཆུང་ཁག ས་ཆ་བརྒྱ་ཆ་༣༠་ཐམ་པ་མ་རྩ་འཛུགས་མཁན་འབྲིང་གྲས་ལ་ཟུར་འཇོག་བྱ་རྒྱུའི་གྲོས་གཞི་བཏོན། གལ་སྲིད་ལ་དྭགས་པ་ཚོས་རང་གི་ས་གནས་མི་དམངས་ལ་ཁེ་ཕན་མེད་པའི་བཟོ་ལས་དང་ཚོང་དོན་ས་ཁུལ་ཟུར་འཇོག་བྱ་རྒྱུའི་འཆར་གཞི་དེ་འགོག་མ་ཐུབ་ཚེ། ཕྱིས་སུ་ལ་དྭགས་ཀྱི་བཟོ་ལས་དང་ཚོང་ལས་ཀྱི་ཁེ་ཕན་ཚང་མ་ཕྱི་ལོགས་ནས་ཡོང་བའི་མ་རྩ་འཛུགས་མཁན་ཚོར་ཐོབ་སྟེ་ས་གནས་མི་དམངས་ལ་ཁེ་ཕན་མེད་པར་འགྱུར་རྒྱུའི་གནས་ཚུལ་ཐོན་འདུག
༢༠༡༩་ལོའི་ཕྱི་ཟླ་༨་པའི་ཚེས་༥་ཉིན་རྒྱ་གར་གཞུང་གིས་ཇམ་མུ་ཀསྨིར་མངའ་སྡེའི་རང་སྐྱོང་གི་ཐོབ་ཐང་ཕྱིར་བསྡུས་ནས་ཇམ་མུ་ཀསྨིར་དང་ལ་དྭགས་བཅས་དབུས་ཐད་སྐྱོང་མངའ་ཁུལ་གཉིས་སུ་བསྒྱུར། དེའི་ཡར་སྔོན་དུ་ཀསྨིར་གྱི་བཟོ་ལས་སྲིད་ཇུས་ལྟར་ལ་དྭགས་སུ་མ་རྩ་བཙུགས་ནས་ཚོང་ལས་གཉེར་དགོས། ལ་དྭགས་ཀྱི་སྤྱི་ཁྱབ་གཞོན་པའི་གྲོས་གཞི་དེར་ལ་དྭགས་སུ་བཟོ་ལས་དང་ཚོང་དོན་ས་ཁུལ་ཟུར་འཇོག་བྱས་པའི་དགོས་པ་ནི་ས་གནས་ཀྱི་བཟོ་ལས་དང་ཚོང་ལས་ཡར་རྒྱས་གཏང་རྒྱུའི་ཆེད་དུ་ཡིན་མོད། ཀསྨིར་མངའ་སྡེ་དེ་དབུས་ཐད་སྐྱོང་མངའ་ཁུལ་གཉིས་ལ་བསྒྱུར་བའི་རྗེས་སུ་ལ་དྭགས་ཁུལ་དུ་བཟོ་ལས་དང་ཚོང་དོན་གྱི་ས་ཁུལ་ཞིག་ཟུར་འཇོག་བྱ་རྒྱུར་རྒྱ་གར་གྱི་བཟོ་ལས་དངུལ་ཁང་དང་མ་རྩ་ནང་འགུགས་ལས་ཁུངས་གཉིས་ཀྱི་རྒྱབ་སྐྱོར་ཐོབ་ཡོད། ལ་དྭགས་ཀྱི་དཔལ་འབྱོར་རྒྱལ་ཡོངས་ཀྱི་དཔལ་འབྱོར་ལ་འདྲེས་ཐབས་དང་ལ་དྭགས་ཀྱི་ཐོན་སྐྱེད་རྒྱལ་ཡོངས་སུ་འགྲེམ་སྤེལ་ཐུབ་པའི་ཆེད་དུ་ཡིན་ཞེས་འཁོད།།
ལ་དྭགས་པ་ཚོས་རྐྱང་ཆུ་ཐང་བྱང་ཐང་དུ་ཉི་ཤུགས་གློག་ཁང་འཛུགས་འཛུགས་སྐྲུན་བྱ་འཆར་ཡོད་པ་ནི་ཁོར་ཡུག་ལ་གནོད་སྐྱོན་ཆེན་པོ་ཞིག་རེད། ལ་དྭགས་མི་དམངས་ཀྱིས་རང་གི་ས་ཆར་བདག་སྐྱོང་ཐུབ་པར་མངའ་སྡེའི་ཐོབ་ཐང་རྩོད་རྒྱུ་ཡིན་ཞེས་གསལ་བསྒྲགས་སྤེལ། གླེའི་ཆོས་སྲིད་མཐུན་ཚོགས་ཀྱིས་ང་ཚོར་གཙོ་འཛིན་ཐུབ་བསྟན་ཚེ་དབང་གི་འགོ་ཁྲིད་འོག ལ་དྭགས་ལ་མངའ་སྡེའི་ཆ་རྐྱེན་ཡོངས་སུ་ཚང་ཡོད། རྒྱ་གར་གཞུང་གིས་རྩ་ཁྲིམས་དོན་ཚན་༦་པའི་དགོངས་དོན་ལྟར་ལ་དྭགས་ལ་མངའ་སྡེའི་ཐོབ་ཐང་སྤྲོད་དགོས། མངའ་སྡེའི་འཛིན་སྐྱོང་འོག་ཏུ་ལ་དྭགས་ཀྱི་ཁོར་ཡུག་དང་རིག་གཞུང་། ལས་ཀའི་གོ་སྐབས་རྣམས་སྲུང་སྐྱོབ་བྱེད་ཐུབ། ལ་དྭགས་ལ་ངེས་པར་དུ་རང་གི་མངའ་སྡེ་གྲོས་ཚོགས་འོས་འདེམས་བྱེད་དུ་འཇུག་དགོས་ཞེས་ནན་བརྗོད་བྱས་འདུག
ས་ཇཱ་ད་མཁར་དཀྱིལ་བ་ནི་རྒྱལ་ས་གླེའི་ཆབ་སྲིད་ཀྱི་དབུ་ཁྲིད་ཅིག་ཡིན་ཞིང་། ཁོང་གིས་དབུས་གཞུང་གིས་བཟོ་ལས་དང་ཚོང་དོན་ས་ཁུལ་ཟུར་འཇོག་བྱས་ནས་ཁོར་ཡུག་དང་ས་གནས་ཀྱི་རིག་གཞུང་གཏོར་བཤིག ས་གནས་དེའི་ཐུན་མོང་མ་ཡིན་པའི་ཁྱད་ཆོས་རྣམས་ཉམས་ཉེས་སུ་གཏོང་རྒྱུའི་ཉེན་ཁ་ཆེན་པོ་འདུག ལ་དྭགས་མི་དམངས་ལ་འཐད་པ་མེད་པར་བཟོ་ལས་དང་ཚོང་དོན་ས་ཁུལ་ཟུར་འཇོག་བྱ་རྒྱུའི་གྲོས་གཞི་བཏོན་པ་ནི་དམངས་གཙོའི་ལམ་ལུགས་ལ་རྒྱབ་འགལ་ཡིན་པར་མ་ཟད། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་བསམ་འཆར་ལའང་རྡོག་བརྫིས་བཏང་བ་ཞིག་རེད། རྒྱ་གར་གཞུང་གིས་མུ་མཐུད་དུ་ལ་དྭགས་མི་དམངས་ཀྱི་དབང་ཚད་མེད་པར་གཏོང་གི་འདུག་ཅེས་སྐྱོན་འཛུགས་བྱས་འདུག
འདས་པའི་ལོ་མང་རིང་ལ་དྭགས་པ་ཚོས་ཇམ་མུ་ཀསྨིར་མངའ་སྡེའི་འཛིན་སྐྱོང་འོག་ནས་ལོགས་སུ་ཐོན་རྒྱུ་ཡིན། ལ་དྭགས་ལ་རྒྱ་གར་དབུས་གཞུང་གི་ཐད་སྐྱོང་མངའ་སྡེའི་ཐོབ་ཐང་སྤྲོད་དགོས་ཞེས་འཐབ་རྩོད་བྱས་ནས་ལས་འགུལ་སྤེལ། ལོ་ཤས་གོང་དུ་སྲིད་བློན་མོ་དྷིའི་གཞུང་ནས་ལ་དྭགས་ལ་དབུས་གཞུང་གིས་ཐད་ཀར་འཛིན་སྐྱོང་བྱ་རྒྱུའི་ས་གནས་ཀྱི་ཐོབ་ཐང་སྤྲད་ནས་བཟུང་། རྒྱ་གར་གྱི་ས་གནས་གཞན་ནས་ལ་དྭགས་སུ་གཏན་སྡོད་གཞིས་ཆགས་སུ་ཡོང་བའི་མི་ཚོས་ས་ཆ་ཉོས་ནས་ཁང་པ་འཛུགས་སྐྲུན། ཁོ་ཚོས་ལ་དྭགས་ཀྱི་དཔལ་འབྱོར་དང་ཚོང་ལས་ཁག་ལ་མ་རྩ་འཛུགས་རྒྱུ་འགོག་མི་ཐུབ་པར་གྱུར། ལ་དྭགས་ཀྱི་ན་གཞོན་ཚོར་རང་གི་ས་གནས་སུ་ལས་ཀའི་གོ་སྐབས་ཇེ་ཉུང་དུ་ཕྱིན་ཏེ་འཚོ་བའི་དཀའ་ངལ་འཕྲད། མདོར་ན་ལ་དྭགས་པ་ཚོ་རང་ཡུལ་དུ་གྲངས་ཉུང་མི་རིགས་ཤིག་ཏུ་འགྱུར་གྱི་ཡོད་པའི་གནས་ཚུལ་ཐོན་འདུག
ལ་དྭགས་རྒྱ་གར་གྱི་དབུས་ཐད་སྐྱོང་མངའ་ཁུལ་ཞིག་ཏུ་གྱུར་པའི་རྗེས་སུ་ས་གནས་གཞན་ནས་ལ་དྭགས་སུ་གནས་སྤོར་བ་ཡོང་རྒྱུ་ཇེ་མང་དུ་སོང་། ལ་དྭགས་ཀྱི་ས་གནས་གང་སར་མགྲོན་ཁང་དང་ཚོང་ཁང་འཛུགས་སྐྲུན། རླངས་འཁོར་དང་འགྲིམ་འགྲུལ་གྱི་འཚང་ཁ་ཆེ་རུ་ཕྱིན་ཏེ་འཐུང་ཆུ་ཇེ་དཀོན་དུ་གྱུར། ལྷག་པར་དུ་འཛམ་གླིང་གི་སའི་གོ་ལའི་གནས་གཤིས་འགྱུར་ལྡོག་ཐེབས་ནས་ལ་དྭགས་ཀྱི་འཁྱག་རོམ་དང་སྲིད་པའི་གངས་རྒན་རྣམས་ཞུ། མཁའ་དབུགས་སྲབ་པའི་མཐོ་སྒང་གི་སྐྱེ་ཁམས་ལ་བརྡབ་གསིག་ཕོག ས་མཐོ་རླུང་གཙང་གི་ཡུལ་ཁམས་དེར་འགྱིག་ཤོག་དང་གད་སྙིགས་ཀྱིས་གཏམས། ལ་དྭགས་ས་གནས་སུ་ཕྱི་མི་གཞིས་ཆགས་པ་ཅི་ཙམ་མང་དུ་ཕྱིན་ན་དེ་ཙམ་གྱིས་ཟ་འབྲུ་སོགས་འཚོ་བའི་ཉེར་མཁོ་ཁག་གི་དགོས་མཁོ་ཆེ་རུ་ཕྱིན་ཏེ་ཡུལ་ཐང་འཕར། ལ་དྭགས་ཀྱི་དཔལ་འབྱོར་ཡོང་འབབ་ཡུལ་སྐོར་སྤྲོ་འཆམ་འབའ་ཞིག་ལ་བརྟེན་དགོས་པར་གྱུར་ཡོད་པའི་གནས་ཚུལ་ཐོན་འདུག
