༄༅།། ཡུཀ་རེན་གྱི་ཁ་ལོ་བ་མེད་པའི་འཕུར་གྲུས་ཨུ་རུ་སུའི་ས་གནས་ཁག་༦་ལ་གཏོར་རྒོལ་བྱས་ནས་དམག་གི་གནམ་གྲུ་ཁག་ཅིག་རྩ་གཏོར་བཏང་བའི་གནས་ཚུལ་ཐོན་འདུག ཕྱི་ཟླ་༨་པའི་ཚེས་༣༡་ཉིན་རང་བཙན་གསར་ཁང་གིས་གནས་ཚུལ་སྤེལ་བ་ལྟར་ན། ད་ཐེངས་ཀྱི་གཏོར་རྒོལ་དེ་ཨུ་རུ་སུ་དང་ཡུཀ་རེན་གྱི་དམག་འཁྲུག་ལངས་ནས་བཟུང་སྟེ་ཨུ་རུ་སུའི་ས་ཐོག་ཏུ་གཏོར་རྒོལ་བྱུང་བ་ཚབས་ཆེ་ཤོས་ཡིན་ཞིང་། ཨུ་རུ་སུའི་ཊ་སི་གཞུང་གཉེར་གསར་འགྱུར་ལས་ཁང་གིས་པ་སི་ཀོབ་ས་གནས་ཀྱི་དམག་གི་གནམ་ཐང་དེ་ཡུཀ་རེན་ནས་སྤྱི་ལེ་༦༠༠་ལྷག་གི་མཚམས་སུ་འདུག ཡུཀ་རེན་གྱི་འཕུར་གྲུས་གཏོར་རྒོལ་བྱས་ནས་ཉུང་མཐའ་ཡང་ཨུ་རུ་སུའི་Il-76་རྟགས་ཅན་དམག་གི་སྐྱེལ་འདྲེན་གནམ་གྲུ་ཆེན་མོ་༤་ལ་གཏོར་སྐྱོན་ཕོག་སྟེ་གནམ་གྲུ་༢་མེར་འཚིགས་ནས་ཐལ་བའི་རྡུལ་དུ་གྱུར་འདུག་ཅེས་གསར་འགྱུར་སྤེལ།
A plume of smoke is illuminated by a flash of light amid a drone attack in Pskov
པ་སི་ཀོབ་མངའ་ཁུལ་གྱི་སྤྱི་ཁྱབ་མཱི་ཧེལ་ཝེ་ཌེར་ནི་ཀོབ་ཀྱིས་མེ་ཕུང་ཆེན་པོ་འབར་བཞིན་པ་དང་ཆུ་གཏོར་རླངས་འཁོར་རྣམས་རྒྱུག་གི་ཡོད་པའི་བརྙན་ཐུང་ཞིག་དར་འཕྲིན་དྲྭ་ལམ་དུ་བཀྲམ།།
ཡུཀ་རེན་གྱི་དམག་དོན་གསང་བའི་ལས་ཁུངས་ཀྱི་མགྲིན་ཚབ་པ་ཨན་ཌི་རི་ཡུ་སོབ་ཀྱིས་པ་སི་ཀོབ་གནམ་ཐང་དུ་གཏོར་རྒོལ་བྱུང་སྟེ་ཨུ་རུ་སུའི་IL-76་རྟགས་ཅན་དམག་གི་སྐྱེལ་འདྲེན་གནམ་གྲུ་༤་ལ་གཏོར་སྐྱོན་ཕོག་ནས་བཟོ་བཅོས་རྒྱག་མི་ཐུབ་པ་ཞིག་ཏུ་གྱུར་འདུག ཨུ་རུ་སུའི་གནམ་གྲུ་གཞན་པ་ཁག་ཅིག་ལ་གཏོར་སྐྱོན་ཕོག་ཡོད་པའི་རྟགས་མཚན་འདུག་ཀྱང་ང་ཚོས་དེ་ལ་བརྟག་དཔྱད་བྱེད་ཀྱི་ཡོད་ཅེས་བསྒྲགས། ཡུཀ་རེན་གྱིས་ཨུ་རུ་སུའི་ས་ཐོག་ཏུ་གཏོར་རྒོལ་བྱས་ཀྱང་གཏོར་རྒོལ་བྱས་པ་ཁས་མི་ལེན། ཁོ་ཚོས་ང་ཚོར་ཨུ་རུ་སུའི་དམག་སྒར་ཁག་དམིགས་འབེན་དུ་བཟུང་ནས་གཏོར་རྒོལ་བྱེད་ཆོག་པའི་ཐོབ་ཐང་ཡོད་ཅེས་བཀྲལ། ཉེ་དུས་ཤིག་ནས་ཡུཀ་རེན་གྱི་སྐམ་དམག་གིས་ཕར་རྒོལ་བྱས་ནས་ཨུ་རུ་སུའི་མཚོན་ཆའི་གོ་མཛོད་ཁག་དང་སྐྱེལ་འདྲེན་གྱི་མཐུན་རྐྱེན་ཁག་ལ་གཏོར་རྒོལ། ཁ་ལོ་བ་མེད་པའི་འཕུར་གྲུ་ཁག་གིས་ས་མཚམས་བརྒལ་ཏེ་ཨུ་རུ་སུའི་རྒྱལ་ས་མོ་སི་ཀོ་སོགས་ལ་གཏོར་རྒོལ་བྱ་རྒྱུ་མགོ་བརྩམས། ད་དུང་མཚོ་ནག་མངའ་ཁུལ་དུ་ཡུཀ་རེན་གྱི་ཁ་ལོ་བ་མེད་པའི་དམག་གྲུ་ཆུང་ཁག་གིས་ཨུ་རུ་སུའི་དམག་གྲུ་ཁག་ལ་གཏོར་རྒོལ་བྱས་ནས་ནུས་པ་ཆེན་པོ་ཐོན་ཡོད་པའི་གནས་ཚུལ་ཐོན་འདུག
ཁེ་རིམ་ལིན་སྲིད་འཛིན་ལས་ཁུངས་ཀྱི་མགྲིན་ཚབ་པ་ཕེ་སི་ཀོབ་
ཨུ་རུ་སུའི་རྒྱལ་སྲུང་ལྷན་ཁང་གིས་ཡུཀ་རེན་ལ་རྒོལ་ལན་སློག་རྒྱུ་ཡིན་ཞེས་སྡིགས་ར་བསྐུལ། ཁེ་རིམ་ལིན་སྲིད་འཛིན་ལས་ཁུངས་ཀྱི་མགྲིན་ཚབ་པ་ཕེ་སི་ཀོབ་ཀྱིས་ང་ཚོས་ཡུཀ་རེན་གྱི་འཕུར་གྲུ་དེ་རྣམས་གང་ནས་བཏང་བ་ཡིན་མིན་རྩད་གཅོད་བྱེད་ཀྱི་ཡོད། མ་འོངས་པར་གཏོར་རྒོལ་དེའི་རིགས་མི་འབྱུང་བའི་སྔོན་འགོག་བྱ་རྒྱུ་གནད་འགག་ཆེ། སྲིད་འཛིན་ཕུ་ཊིན་ལ་པ་སི་ཀོབ་གནམ་ཐང་དུ་གཏོར་རྒོལ་ཚབས་ཆེན་ཞིག་བྱུང་སོང་ཞེས་འཕྲལ་དུ་སྙན་སེང་ཞུས་ལུགས་ཀྱི་གསར་འགོད་གསལ་བསྒྲགས་སྤེལ། ཨུ་རུ་སུས་འཕུར་མདེལ་༢༨་འཕངས་པ་དང་འཕུར་གྲུ་༡༦་བཏང་ནས་ཡུཀ་རེན་ལ་རྒོལ་ལན་བསློགས། ཡུཀ་རེན་གྱིས་ཨུ་རུ་སུའི་འཕུར་མདེལ་ཚང་མ་དང་འཕུར་གྲུ་༡༥་བར་སྣང་དུ་གཏོར། འཕུར་གྲུ་༡་འགོག་ཐུབ་མ་སོང་ཞེས་གནས་ཚུལ་སྤེལ། ད་ལྟའི་བར་དུ་ཨུ་རུ་སུའི་མི་དམངས་ལ་ཡུཀ་རེན་གྱི་དམག་འཁྲུག་ནི་རྒྱང་ཐག་རིང་པོ་དང་སོ་སོའི་ཉིན་རེའི་འཚོ་བར་འབྲེལ་བ་མེད་པའི་སྣང་བ་ཞིག་ཤར། བདུན་ཕྲག་འགའ་ཞིག་གི་སྔོན་ནས་ཡུཀ་རེན་གྱིས་མོ་སི་ཀོ་དང་ཨུ་རུ་སུའི་ས་ཐོག་ཏུ་གཏོར་རྒོལ་བྱེད་ཀྱི་ཡོད་པས་དམག་འཁྲུག་གི་ཚོར་བ་དངོས་སུ་མྱོང་།།
ཕྱི་ཟླ་༨་པའི་ཚེས་༣༠་ཉིན་ཧྥོར་བྷ་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཁ་སྔོན་ཕྱི་ཟླ་༦་པའི་ཚེས་༤་ནས་ཡུཀ་རེན་གི་དམག་གིས་ཕར་རྒོལ་བྱ་རྒྱུ་འགོ་ཚུགས། ན་ནིང་དགུན་ཁ་དང་ལོ་འདིའི་དཔྱིད་ཀར་ཨུ་རུ་སུའི་དམག་གིས་ས་ཁྱོན་སྤྱི་ལེ་གྲུ་བཞི་མ་སྟོང་ཕྲག་མང་པོར་ས་མེ་སྦས། དེའི་རྒྱབ་ཏུ་ས་དོང་བྲུས་ཏེ་འགོག་རྡོ་བསླངས། ནང་མ་དེར་མེ་སྒྱོགས་དང་ལྕགས་འཁོར་ལོ་བསྒྲིགས་ནས་འགོག་ར་རིམ་པ་གསུམ་བརྒྱབ་ཡོད་ཅིང་། དེར་བརྟེན་ལོ་འདིའི་སྟོན་ཁར་ཡུཀ་རེན་གྱི་དམག་གིས་ཕར་རྒོལ་བྱས་ཀྱང་སྔ་ལོ་ལྟར་གྲུབ་འབྲས་མ་ཐོན། ཁ་སང་གཟའ་ལྷག་པའི་ཉིན་ཡུཀ་རེན་གྱི་མཁའ་འབབ་ཕར་རྒོལ་དམག་ཤོག་༨༢་པས་ཨུ་རུ་སུའི་འགོག་ར་དང་པོ་བརྒལ། ཨུ་རུ་སུའི་དམག་ཤོག་བརྒྱ་པའི་མྱུལ་ཞིབ་རུ་ཁག་གིས་ཡུཀ་རེན་གྱི་དམག་ལ་མེ་སྒྱོགས་རྒྱོབས་ཞེས་བརྡ་གཏོང་གི་ཡོད་པའི་བརྙན་ཐུང་ཞིག་ཡུཀ་རེན་གྱི་འཕུར་གྲུས་བླངས་ཏེ་དྲྭ་ལམ་དུ་ཁྱབ། ཨུ་རུ་སུའི་འགོག་ར་དང་པོ་གཏོར་བའི་རྗེས་སུ་ཡུཀ་རེན་གྱི་དམག་དཔུང་གིས་ཕ་རྒོལ་བྱས་ནས་ལྷོ་ཕྱོགས་དང་ཤར་ཕྱོགས་ཀྱི་ས་གནས་ཁག་ཕྱིར་ལེན་བྱ་རྒྱུ་སྟབས་བདེ་རུ་ཕྱིན་ཡོད་པའི་གནས་ཚུལ་ཐོན་འདུག
ཕྱི་ཟླ་༨་པའི་ཚེས་༣༠་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་ལ་ཨ་རི་སོགས་ནུབ་ཕྱོགས་རྒྱལ་ཁབ་ཁག་གིས་དཔལ་འབྱོར་དང་མཚོན་ཆ། གསང་བའི་གནས་ཚུལ་སོགས་མཁོ་སྤྲོད་བྱས་ནས་དམག་འཁྲུག་གི་འགྲོ་གྲོན་དཀའ་ངལ་མེད་ཀྱང་ཨུ་རུ་སུའི་དཔལ་འབྱོར་ཉམས་རྒུད་དང་ཚོང་ལས་བཀག་སྟེ་དམག་འཁྲུག་ལ་འགྲོ་གྲོན་ནར་གཏོང་ཐུབ་རྒྱུ་དཀའ་བར་སྣང་། ཨུ་རུ་སུའི་དངུལ་ལོར་རུ་བྷུལ་གྱི་འཛའ་ཐང་དང་རྡོ་སྣུམ་གྱི་རིན་གོང་ཆག ཨུ་རུ་སུའི་དཔལ་འབྱོར་ནི་མི་ལ་སྐྲན་ནད་ཕོག་པ་ལྟར་རིམ་གྱིས་ཟུངས་ཤུགས་ཟད། དེང་སྐབས་ཨུ་རུ་སུ་རྒྱལ་ཡོངས་སུ་ཡུལ་ཐང་འཕར་ཏེ་མི་དམངས་ཀྱི་འཚོ་བར་དོ་ཕོག་བྱུང་། སྲིད་འཛིན་ཕུ་ཊིན་གྱིས་དམག་གི་འགྲོ་གྲོན་མུ་མཐུད་དུ་གཏོང་ཐུབ་པ་དང་ཡུལ་ཐང་མི་འཕར་བའི་ཐབས་ཇུས་ཤིག་མ་རྙེད། ཨུ་རུ་སུའི་རྒྱལ་ནང་དུ་དམག་འཁྲུག་ལ་སྐྱོན་བརྗོད་བྱེད་མཁན་ཚོ་བཙོན་དུ་ཚུད། ཨུ་རུ་སུའི་རང་བཙན་གྱི་གསར་འགྱུར་ལས་ཁང་ཁག་སྒོ་བརྒྱབ། དམག་འཁྲུག་ལ་ངོ་རྒོལ་བྱེད་མཁན་རྣམས་འཛིན་བཟུང་བྱས་ཏེ་མཐོང་ཐོས་མེད་པར་གྱུར།།
ཨུ་རུ་སུའི་མི་དམངས་རྣམས་ཕྱི་རྒྱལ་གྱི་གསར་འགོད་པར་སྐད་ཆ་བཤད་རྒྱུར་སྐྲག་གི་ཡོད་ཀྱང་མི་འགའ་ཤས་ཀྱིས་རང་གི་མིང་ཆ་ཚང་མ་བཤད་པར་གསར་འགོད་པར་གླེང་མོལ་བྱེད་ཀྱི་ཡོད་པ་སྟེ། ལོ་ན་༦༨་ལ་སོན་པའི་རྒད་པོ་ཝ་ལ་ཌི་མིར་ཆེ་རི་མེ་སི་ཡེབ་ཞེས་པ་ཞིག་གིས་ང་ནི་རྒས་ཡོལ་ལ་ཕྱིན་པ་ཞིག་ཡིན་རུང་རྒས་ཕགས་འབབ་རྒྱུ་ཆེན་པོ་ཞིག་མི་འདུག ད་སྔ་ང་ལ་དཀའ་ངལ་ཆེན་པོ་འཕྲད་མེད་ཀྱང་མཚམས་རེར་སེམས་ཁྲལ་བྱུང་ནས་ཁྲག་ཤེད་འཕར་གྱི་འདུག་ཅེས་བསྟན། མི་ཁག་ཅིག་གིས་དངོས་ཟོག་གི་རིན་གོང་རྟག་ཏུ་འཕར་ནས་དཀའ་ངལ་ཆེན་པོ་འདུག་ཟེར། ལོ་ན་༣༨་ལ་སོན་པའི་ཁེ་ལས་པ་ཡུ་ལི་ཡ་ན་ཞེས་པ་ཞིག་གིས་ང་ཚོའི་གནས་སྟངས་ནི་ཇེ་ཞན་ཇེ་སྡུག་ཏུ་ཕྱིན་སོང་། འདི་ནི་སོང་ཉིན་གནངས་ཉིན་སེལ་ཐབས་ཡོད་པའི་དཀའ་ངལ་ཞིག་ག་ལ་ཡིན། ད་ནི་གང་ཅིའི་ཐད་དུ་ཡག་པོ་ཞིག་གཏན་ནས་ཡོང་ས་མ་རེད། ངས་བལྟས་ནས་མི་རབས་གཅིག་ལྷག་གིས་མཇུག་འབྲས་ངན་པ་འདི་མྱོང་དགོས་ཐུག་རྒྱུ་རེད་ཅེས་བཤད། དེ་བཞིན་ཨུ་རུ་སུའི་ན་གཞོན་ཤེས་ཡོན་ཅན་དང་ཆེད་ལས་པ་ས་ཡ་མང་པོ་དམག་ཁྲལ་ལ་གཡོལ་ནས་ཕྱི་རྒྱལ་ཡུལ་གྲུ་ཁག་ཏུ་བྲོས། ཡུཀ་རེན་གྱི་དམག་འཁྲུག་རྗེས་སུ་ཨུ་རུ་སུ་ནི་སྐབས་ཤིག་གི་རིང་ཤེས་ཡོན་ཅན་དང་ཆེད་ལས་པ་མེད་པའི་གླེན་ལྐུགས་ཀྱི་སྤྱི་ཚོགས་ཤིག་ཏུ་འགྱུར་སྲིད་པའི་ཉེན་ཁ་ཤིན་ཏུ་ཆེ་ཞེས་གནས་ཚུལ་སྤེལ་འདུག
ཨུ་རུ་སུའི་འབྱོར་ལྡན་པ་རྣམས་ཕྱི་རྒྱལ་དུ་ཁྱིམ་གཞིས་སྤོས་པ་དང་མི་དམངས་དཀྱུས་མ་རྣམས་རང་ཡུལ་དུ་ལུས། ཨུ་རུ་སུའི་དངུལ་ལོར་གྱི་འཛའ་ཐང་ཆག རྒྱལ་ཁབ་དེའི་འགྲུལ་སྐྱེལ་གནམ་གྲུ་ཁག་ལ་རྒྱལ་ཁབ་གཞན་གྱིས་མཁའ་ལམ་བཀག ཨུ་རུ་སུའི་སྤྱི་དམངས་ལ་ནུབ་ཕྱོགས་རྒྱལ་ཁབ་ཁག་གིས་ཐོངས་མཆན་སྤྲོད་ཀྱི་མེད་པས་ཕྱི་རྒྱལ་ཡུལ་གྲུ་ཁག་ཏུ་གུང་སེང་ལ་བསྐྱོད་མ་ཐུབ། ཨུ་རུ་སུའི་ཐོན་སྐྱེད་གཙོ་བོ་ནི་རྡོ་སྣུམ་དང་རང་བྱུང་སོལ་རླངས་ཡིན་མོད། འོན་ཀྱང་ཕུ་ཊིན་གྱིས་ཡུ་རོབ་རྒྱལ་ཁབ་ཁག་ལ་སོལ་རླངས་བཀག་སྟེ་ཡུཀ་རེན་ལ་རྒྱབ་སྐྱོར་བྱེད་ཀྱི་ཡོད་པ་མཚམས་འཇོག་བྱ་དགོས་ཞེས་ཆ་རྐྱེན་བཏོན། ནུབ་ཕྱོགས་རྒྱལ་ཁབ་ཁག་གིས་རྒྱལ་ཁབ་གཞན་ནས་སོལ་རླངས་ནང་འདྲེན་བྱས་ཏེ་ཨུ་རུ་སུར་ཚོང་འབྲེལ་བཅད། ཨ་རི་དང་ནུབ་ཕྱོགས་རྒྱལ་ཁབ་ཁག་གིས་ཨུ་རུ་སུའི་རྡོ་སྣུམ་གྱི་རིན་གོང་ཚོད་འཛིན་བྱས་པ་དང་ཨུ་རུ་སུས་ནུབ་ཕྱོགས་རྒྱལ་ཁབ་ཁག་ལ་རྡོ་སྣུམ་འཚོང་རྒྱུ་མིན་ཞེས་བཀག སྔ་ལོ་ནས་ཨུ་རུ་སུར་རྡོ་སྣུམ་བཙོང་ས་རྒྱ་དཀར་ནག་གཉིས་ལས་མེད་པ་དང་རྒྱ་དཀར་ནག་གཉིས་ལ་རྡོ་སྣུམ་རིན་གོང་བརྒྱ་ཆ་༤༠་བཅག་ནས་འཚོང་དགོས་ཐུག་ཡོད་པའི་གནས་ཚུལ་ཐོན།།
ཡུཀ་རེན་གྱི་དམག་འཁྲུག་མ་ལངས་གོང་དེར་ཨ་མི་རི་ཀའི་འཕྲོ་ནས་ཨུ་རུ་སུ་འཛམ་གླིང་གི་དམག་གི་སྟོབས་ཤུགས་ཨང་གཉིས་པར་བརྩིས། ཨུ་རུ་སུས་འཛམ་གླིང་རྒྱལ་ཁབ་ཁག་ལ་མཚོན་ཆ་བཙོངས། ཕྱི་ཟླ་༨་པའི་ཚེས་༣༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་དམག་འཁྲུག་གིས་ཨུ་རུ་སུའི་མཚོན་ཆའི་གོ་མཛོད་རྣམས་སྟོང་པར་གྱུར་ཏེ་ཨི་རན་དང་བྱང་ཀོ་རི་ཡ་ནས་མཚོན་ཆ་ནང་འདྲེན་བྱེད་ཀྱི་ཡོད་པར་མ་ཟད། ཉེ་ཆར་ཀོ་རི་ཡའི་དམག་འཁྲུག་མཚམས་བཞག་ནས་ལོ་༧༠་པའི་དུས་དྲན་སྐབས་སུ་ཨུ་རུ་སུའི་རྒྱལ་སྲུང་བློན་ཆེན་སར་གྷེ་ཤོ་གུ་བྱང་ཀོ་རི་ཡར་འཚམས་འདྲིར་བསྐྱོད། བྱང་ཀོ་རི་ཡས་ཨུ་རུ་སུར་སྒྱོགས་མདེལ་བཙོང་དགོས་པའི་གྲོས་མོལ་བྱུང་། བྱང་ཀོ་རི་ཡའི་འགོ་ཁྲིད་ཀིམ་འཇོང་ཨུན་དང་ཨུ་རུ་སུའི་སྲིད་འཛིན་ཕུ་ཊིན་གྱིས་ཕྱོགས་གཉིས་མཉམ་འབྲེལ་བྱ་རྒྱུ་ཤུགས་ཆེ་རུ་གཏོང་དགོས་ཞེས་ཕན་ཚུན་འཕྲིན་ཡིག་བསྐུར། སྔ་ལོ་བྱང་ཀོ་རི་ཡས་ཨུ་རུ་སུར་འཕུར་མདེལ་དང་སྒྱོགས་མདེལ་བཙོངས་པ་དང་ད་ལོ་ཡང་བྱང་ཀོ་རི་ཡ་ནས་འཕུར་མདེལ་དང་སྒྱོགས་མདེལ་སོགས་ཉོ་ཐབས་བྱེད་ཀྱི་ཡོད་པར་ཨ་མི་རི་ཀས་བླ་འཚབ་བྱེད་ཀྱི་ཡོད་པའི་གནས་ཚུལ་ཐོན་འདུག