༄༅།། ཉེ་ཆར་ཕྱི་ཟླ་༦་པའི་ཚེས་༢༤་ཉིན་ཨུ་རུ་སུའི་ཝེ་གྷ་ནར་གླས་དམག་ཚོགས་པའི་འཐབ་མོ་བ་ཚོས་ཕུ་ཊིན་ལ་གྱེན་ལོག་བྱས་པའི་རྗེས་སུ་དམག་དཔུང་སྤྱི་ཁྱབ་བཀོད་འདོམས་པ་དམག་སྤྱི་ཝེ་ལ་རི་ཇཱི་ར་སི་མོབ་མཐོང་ཐོས་མེད་པར་གྱུར། ཕྱི་ཟླ་༧་པའི་ཚེས་༡༠་ཉིན་རོ་ཡེ་ཊར་སི་གསར་འགྱུར་ལས་ཁུངས་ཀྱིས་གནས་ཚུལ་སྤེལ་བ་ལྟར་ན། དེ་རིང་གཟའ་ཟླ་བའི་ཉིན་དམག་སྤྱི་ཇཱི་ར་སི་མོབ་ཨུ་རུ་སུའི་བརྙན་འཕྲིན་ནང་དུ་བསྟན། དེ་ནི་ཨུ་རུ་སུའི་དམག་དཔུང་སྤྱི་ཁྱབ་བཀོད་འདོམས་པ་དེ་གྱེན་ལོག་རྗེས་སུ་བརྙན་འཕྲིན་ནང་དུ་མཐོང་བ་ཐེངས་དང་པོ་ཡིན་ཞིང་། ཨུ་རུ་སུའི་བརྙན་འཕྲིན་དེར་བལྟས་ན་སྲིད་འཛིན་ཕུ་ཊིན་གྱིས་རྒྱལ་སྲུང་བློན་ཆེན་སར་གྷེ་ཤོ་གུ་དང་དམག་དཔུང་སྤྱི་ཁྱབ་བཀོད་འདོམས་པ་དམག་སྤྱི་ཇཱི་ར་སི་མོབ་གཉིས་གནས་དབྱུང་བཏང་མེད་པར་སྣང་། ཨུ་རུ་སུའི་གླས་དམག་གི་འགོ་ཁྲིད་ཡེབ་གྷེ་ཎི་པ་རི་གྷོ་ཞིན་གྱིས་རྒྱལ་སྲུང་བློན་ཆེན་ཤོ་གུ་དང་དམག་དཔུང་སྤྱི་ཁྱབ་བཀོད་འདོམས་པ་ཇཱི་ར་སི་མོབ་གཉིས་ལ་འཇོན་ཐང་མི་འདུག་ཅེས་གྱེན་ལོག་བྱས་ཀྱང་ལམ་ལྷོངས་མ་བྱུང་།།
ལོ་ན་༦༧་ལ་སོན་པའི་ཨུ་རུ་སུའི་དམག་དཔུང་སྤྱི་ཁྱབ་བཀོད་འདོམས་པ་ཇཱི་ར་སི་མོབ་ཀོ་བའི་རྐུབ་བཀྱག་དཀར་པོ་ཞིག་གི་སྟེང་དུ་བསྡད་ནས་མཐོ་རིམ་དམག་སྤྱིའི་ཚོའི་ཚོགས་འདུ་ཞིག་ལ་ཞུགས། དེ་ནས་དམག་དཔུང་བཀོད་འདོམས་པ་གཞོན་པ་ཝིཀ་ཊོར་ཨབ་ཛ་ལོབ་ཀྱི་སྙན་ཞུ་ཁག་ལ་ཉན་གྱི་ཡོད་པའི་བརྙན་འཕྲིན་ཞིག་ཐོན། ཨུ་རུ་སུའི་རྒྱལ་སྲུང་ལྷན་ཁང་གིས་དམག་སྤྱི་ཇཱི་ར་སི་མོབ་གཟའ་ཉི་མའི་ཉིན་ཚོགས་འདུ་ཞིག་ལ་ཞུགས་པ་རེད། ཁོང་ནི་ཡུཀ་རེན་གྱི་དམག་ས་ཁག་ཏུ་བཀྲམ་ཡོད་པའི་ཨུ་རུ་སུའི་དམག་དཔུང་སྤྱི་ཁྱབ་བཀོད་འདོམས་པ་རེད་ཅེས་བཀྲལ། གོ་གནས་དེ་ཝེ་གྷ་ནར་གླས་དམག་ཚོགས་པས་གྱེན་ལོག་མ་བྱུང་སྔོན་ནས་དམག་སྤྱི་ཇཱི་ར་སི་མོབ་ཀྱིས་བཟུང་ཡོད་པས་འཕོ་འགྱུར་མ་ཕྱིན་པ་འདྲ། ཁོ་པས་ཡུཀ་རེན་གྱི་དམག་གིས་ཨུ་རུ་སུའི་མཐའ་མཚམས་ཀྱི་རུ་སི་ཊོབ་དང་ཀ་ལུ་གྷ། ཁེ་རེ་མཱི་ཡ་གླིང་ཟུར་བཅས་ལ་འཕུར་མདེལ་གྱིས་གཏོར་རྒོལ་བྱས་པ་རྣམས་བར་སྣང་དུ་གཏོར་ཐུབ་ཡོད། ཨུ་རུ་སུའི་དམག་གིས་འཕུར་མདེལ་དེ་རྣམས་དམིགས་འབེན་ཁག་ལ་ཕོག་ཏུ་བཅུག་མེད་ཅེས་བཤད།།
རོ་ཡེ་ཊར་སི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཨུ་རུ་སུའི་སྲིད་འཛིན་ཕུ་ཊིན་གྱིས་ཝེ་གྷ་ནར་གླས་དམག་ཚོགས་པའི་འགོ་ཁྲིད་ཡེབ་གྷེ་ཎི་པ་རི་གྷོ་ཞིན་ལ་ཕྱི་ཟླ་༦་པའི་ཚེས་༢༩་ཉིན་ཐུག་འཕྲད་གྲོས་མོལ་བྱུང་འདུག ཧྥ་རན་སིའི་རང་དབང་གསར་ཤོག་གིས་པ་རི་གྷོ་ཞིན་དང་སྲིད་འཛིན་ཕུ་ཊིན། ཨུ་རུ་སུའི་ཡུལ་སྲུང་དམག་གི་འགོ་ཁྲིད་ཝིཀ་ཊོར་ཛོ་ལོ་ཏོབ། ཨུ་རུ་སུའི་ཕྱི་སོ་ལྷན་ཁང་གི་འགོ་ཁྲིད་ན་རི་ཤི་ཀིན་རྣམས་ཐུག་འཕྲད་བྱུང་བ་རེད་ཅེས་གནས་ཚུལས་སྤེལ། གཟའ་ཟླ་བའི་ཉིན་ཕུ་ཊིན་གྱི་མགྲིན་ཚབ་པ་ཕེ་སི་ཀོབ་ནས་སྲིད་འཛིན་ཕུ་ཊིན་གྱིས་མི་༣༥་ཚོགས་འདུ་ཞིག་ལ་སྐད་བཏང་བ་དེ་དག་གི་གྲས་སུ་པ་རི་གྷོ་ཞིན་ཡང་ཡོད། ཚོགས་འདུ་དེ་དུས་ཡུན་ཆུ་ཚོད་གསུམ་ལ་ཚོགས་པ་དང་སྲིད་འཛིན་ཕུ་ཊིན་གྱིས་དམིགས་བསལ་དམག་དོན་ལས་འགུལ་གྱི་གྲུབ་འབྲས། དེ་བཞིན་ཝེ་གྷ་ནར་གླས་དམག་ཚོགས་པའི་གྲུབ་འབྲས་བཅས་ལ་བསྐྱར་ཞིབ་བྱས་ཤིང་། ཨུ་རུ་སུའི་དམག་དཔུང་བཀོད་འདོམས་པ་ཚོས་ཕྱི་ཟླ་༦་པའི་ཚེས་༢༤་ཉིན་བྱུང་བའི་གྱེན་ལོག་དེར་རང་རང་གི་ལྟ་ཚུལ་ལྟར་འགྲེལ་བཤད་རེ་བརྒྱབ་སོང་ཞེས་གསར་འགོད་པ་ཚོར་གླེང་མོལ་བྱས་འདུག
རྒྱལ་སྲུང་བློན་ཆེན་གཞོན་པ་ཡུ་ནུ་སི་བྷེག་ཡེབ་ཀུ་རོབ་དང་ཨུ་རུ་སུའི་དམག་སྤྱི་སར་གྷེ་སུ་རོ་ཝི་ཀིན་
ཕྱི་ཟླ་༧་པའི་ཚེས་༩་ཉིན་ཨེ་ཤི་ཡའི་དུས་བབ་ཚགས་པར་གྱིས་ཨུ་རུ་སུའི་དྲྭ་ལམ་གསར་འགྱུར་ལས་ཁུངས་ཁག་དང་དབྱིན་ཇིའི་གསར་ཁང་ཞིག་གིས་གནས་ཚུལ་སྤེལ་བ་རྣམས་ལུང་འདྲེན་བྱས་ནས་གསར་འགྱུར་སྤེལ་བ་ལྟར་ན། ཨུ་རུ་སུའི་དམག་དཔུང་སྤྱི་ཁྱབ་བཀོད་འདོམས་པ་དམག་སྤྱི་ཝེ་ལ་རི་ཇཱི་ར་སི་མོབ་དང་རྒྱལ་སྲུང་བློན་ཆེན་གཞོན་པ་ཡུ་ནུ་སི་བྷེག་ཡེབ་ཀུ་རོབ་གཉིས་དབྱུང་བཏང་སྟེ་དམག་སྤྱི་ཇཱི་ར་སི་མོབ་ཀྱི་ཚབ་ཏུ་དམག་སྤྱི་མཱི་ཁེལ་ཊེབ་ལིན་སི་ཀི་བསྐོས་འདུག ཡེ་གྷེ་ཎི་པ་རི་གྷོ་ཞིན་གྱི་གླས་དམག་གིས་གྱེན་ལོག་བྱུང་བའི་རྗེས་སུ་ཨུ་རུ་སུའི་དམག་སྤྱི་སར་གྷེ་སུ་རོ་ཝི་ཀིན་མཐོང་ཐོས་མེད་པར་གྱུས་ཡོད་པས་གནས་དབྱུང་བཏང་ཟིན་པའི་ཚོད་དཔག་བྱ་རྒྱུ་མགོ་བརྩམས། ཉམས་ཞིབ་པ་མང་པོས་དམག་སྤྱི་སུ་རོ་ཝི་ཀིན་གྱེན་ལོག་དེར་འབྲེལ་བ་ཡོད་པ་དང་ཁོ་པ་པ་རི་གྷོ་ཞིན་གྱི་བློས་ཐུབ་གྲོགས་པོ་ཞིག་རེད། ཁོ་པས་ཝེ་གྷ་ནར་གླས་དམག་ཚོགས་པས་གྱེན་ལོག་བྱ་རྒྱུ་ཡིན་པ་སྔོན་ནས་ཤེས་འདུག གཅིག་བྱས་ནས་པ་རི་གྷོ་ཞིན་གྱི་གྱེན་ལོག་དེར་དམག་སྤྱི་སུ་རོ་ཝི་ཀིན་གྱིས་རྒྱབ་སྐྱོར་བྱས་ཡོད་པ་ཡིན་སྲིད་ཅེས་གླེང་།།
ཐོག་མར་དམག་སྤྱི་སུ་རོ་ཝི་ཀིན་གྱིས་ཆེ་ཆི་ཎི་ཡའི་གྱེན་ལོག་ལ་དྲག་གནོན་བྱས་པ་དང་དེའི་རྗེས་སུ་དཀྱིལ་ཤར་ས་ཁུལ་གྱི་རྒྱལ་ཁབ་སི་རི་ཡའི་སྲིད་འཛིན་ཨ་ས་ཐེའི་གཞུང་ལ་སྲུང་སྐྱོབ། སི་རི་ཡའི་གྱེན་ལོག་ཤོག་ཁག་ལ་དྲག་གནོན་བྱས་ནས་དགྲ་ཕྱོགས་ལ་གདུག་རྩུབ་ཆེ་བ་དང་ཨུ་རུ་སུའི་དམག་གིས་གོང་བཀུར་བྱ་ཡུལ་ཞིག་ཏུ་གྱུར་ཏེ་སྐད་གྲགས་བྱུང་། ༢༠༢༢་ལོར་ཡུཀ་རེན་གྱིས་ཕར་རྒོལ་བྱས་ནས་ཨུ་རུ་སུའི་དམག་གི་དབང་བསྒྱུར་འོག་ཏུ་ཚུད་པའི་ཁར་ཀིབ་དང་ཁར་སན་གྲོང་ཁྱེར་སོགས་ཕྱིར་ལེན་བྱས་པས་ཕུ་ཊིན་གྱིས་དམག་སྤྱི་སུ་རོ་ཝི་ཀིན་དམག་འཁྲུག་གི་བཀོད་འདོམས་པར་བསྐོས། དམག་སྤྱི་སུ་རོ་ཝི་ཀིན་གྱིས་ཨུ་རུ་སུའི་དམག་དཔུང་ཌི་ནིབ་རོ་གཙང་པོའི་ཚུར་ཕྱོགས་སུ་འཐེན་ནས་ཨུ་རུ་སུའི་དམག་དཔུང་ལ་ཕམ་ཉེས་ཆེན་པོ་འབྱུང་སྲིད་པར་གཡོལ་ཐབས་ཤིག་རྙེད། དེང་སྐབས་ཨུ་རུ་སུའི་དམག་གིས་འགོག་རྒོལ་བྱས་ནས་༢༠༢༣་ལོའི་ཡུཀ་རེན་གྱི་ཕར་རྒོལ་ལ་ནུས་པ་ཆེན་པོ་ཞིག་ཐོན་ཐུབ་ཀྱི་མེད་པ་དམག་སྤྱི་སུ་རོ་ཝི་ཀིན་གྱི་འཐབ་ཇུས་ལ་ཐུག་ཡོད་པའི་ངོས་འཛིན་ཐོབ།།
ཕུ་ཊིན་གྱིས་ཝེ་གྷ་ནར་གླས་དམག་གི་གྱེན་ལོག་དེ་རྒྱབ་གཏོད་ཡིན་པ་དང་དེ་ནི་༡༩༡༧་ལོར་ཨུ་རུ་སུར་དམར་ཤོག་གི་གསར་བརྗེ་ལངས་པ་དང་འདྲ་པོ་ཞིག་རེད། ཨུ་རུ་སུའི་དམག་གིས་ནང་འཁྲུག་སྔོན་འགོག་བྱས་ཐུབ་ཡོད་པ་ནི་གཟི་བརྗོད་རེད་ཅེས་བསྔགས་བརྗོད་ཀྱི་མེ་ཏོག་གཏེར། འདས་པའི་ཟླ་བ་མང་པོར་པ་རི་གྷོ་ཞིན་གྱིས་ཨུ་རུ་སུའི་རྒྱལ་སྲུང་བློན་ཆེན་དང་དམག་དཔུང་སྤྱི་ཁྱབ་བཀོད་འདོམས་པ་གཉིས་ལ་སྐྱོན་བརྗོད་བྱས་པར་མ་ཟད། ཤོ་གུ་དང་ཇཱི་ར་སི་མོབ་གཉིས་ཀྱིས་སྲིད་འཛིན་ཕུ་ཊིན་ལ་མགོ་སྐོར་བཏང་ནས་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་དམག་ལ་ཕམ་ཉེས་ཆེན་པོ་འབྱུང་གི་ཡོད་པ་གསང་གི་འདུག རྒྱལ་སྲུང་བློན་ཆེན་དང་དམག་སྤྱི་ཁྱབ་བཀོད་འདོམས་པ་གཉིས་ཀྱིས་ཝེ་གྷ་ནར་གླས་དམག་ཚོགས་པར་མཚོན་ཆ་དང་མདེའུ། རྒྱགས་ཆས་དང་སྨན་སོགས་སྤྲོད་ཀྱི་མི་འདུག ཁོ་ཚོས་མཚམས་རེར་ཨུ་རུ་སུའི་དམག་ལ་འཕུར་མདེལ་འཕེན་དུ་བཅུག་སྟེ་ཝེ་གྷ་ནར་གླས་དམག་ཚོགས་པར་གཏོར་རྒོལ་བྱེད་ཀྱི་འདུག ངས་སྲིད་འཛིན་ཕུ་ཊིན་གྱི་སྲིད་དབང་ལ་གྱེན་ལོག་བྱེད་ཀྱི་མེད། རྒྱལ་སྲུང་བློན་ཆེན་དང་དམག་དཔུང་སྤྱི་ཁྱབ་བཀོད་འདོམས་པ་གཉིས་ལ་སྙིང་ནད་རྩོད་ཀྱི་ཡོད་ཅེས་བསྒྲགས།།
ཕྱི་ཟླ་༧་པའི་ཚེས་༨་ཉིན་ཚོང་ལས་ནང་ཚགས་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུའི་དྲག་ཆས་ཉེན་རྟོག་པས་ཝེ་གྷ་ནར་གླས་དམག་ཚོགས་པའི་འགོ་ཁྲིད་ཡེབ་གྷེ་ཎི་པ་རི་གྷོ་ཞིན་གྱི་ཁྱིམ་དུ་སྔོག་བཤེར་བྱས་ནས་ཨུ་རུ་སུའི་དངུལ་སྒོར་དང་ཨ་སྒོར། གསེར་གྱི་སོ་ཕག་སོགས་སྒམ་འགའ་ཞིག་དང་མེ་མདའ་རིང་ཐུང་བཅུ་གྲངས་ཤིག པ་རི་གྷོ་ཞིན་གྱིས་སྐྲ་རྫུན་གྱོན་ནས་ཁ་སྤུ་རྫུན་མ་བཙུགས། མིག་ཤེལ་གྱོན་ནས་ཕྱིར་སྐྱོད་ལག་འཁྱེར་སྔ་དྲུག་ཅིག་བླངས་ཡོད་རྣམས་ཨུ་རུ་སུའི་དྲག་ཆས་ཉེན་རྟོག་པས་གཞུང་བཞེས་བཏང་བ་བརྙན་འཕྲིན་དུ་ཕབ། པ་རི་གྷོ་ཞིན་གྱི་ཁང་པའི་ནང་གི་མཐུན་རྐྱེན་ནི་སྐུ་དྲག་གི་གཟིམ་ཤག་ལྟར་རྒྱས་སྤྲོས་ཆེ་ཞིང་། ཨུ་རུ་སུའི་ཡུ་ཨར་ཨེ་གསར་ཁང་གིས་ཨ་ཧྥི་རི་ཀའི་རྒྱལ་ཁབ་སུ་ཏན་དུ་པ་རི་གྷོ་ཞིན་གྱིས་ཨུ་རུ་སུའི་རྒྱལ་སྲུང་ལྷན་ཁང་གི་ལས་སྣེ་ཞིག་ཡིན་ཟེར་ནས་རྣམ་པ་རྫུན་མ་བསྟན། ཨ་བྷུ་དྷ་བྷེར་ཕྱི་འབྲེལ་མི་སྣ་ཞིག་ཡིན་ཟེར་བ་དང་ལི་བྷི་ཡའི་ས་ཐོག་ཏུ་བྷན་གྷ་ཛིའི་དམག་གི་མདའ་དཔོན་ཞིག་ཡིན་ཟེར། སི་རི་ཡའི་ས་ཐོག་ཏུ་ཚོང་པ་དང་འཐབ་སའི་བཀོད་འདོམས་པ་མུ་ཧ་མེ་དཱ་ཡིན་ཟེར་བ་དེ་ཡིན་ཟེར་ནས་མིང་དང་མཚན་གནས་སྣ་ཚོགས་ཤིག་བཏགས་འདུག་ཅེས་གནས་ཚུལ་སྤེལ།།
ཕྱི་ཟླ་༧་པའི་ཚེས་༡༠་ཉིན་ཕྱི་ལོགས་སུ་དཔར་འགྲེམ་བྱེད་ཀྱི་ཡོད་པའི་མོ་སི་ཀོ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཝེ་གྷ་ནར་གླས་དམག་ཚོགས་པའི་འཐབ་མོ་བ་ཟུར་པ་ཚོས་པ་རི་གྷོ་ཞིན་གྱིས་གྱེན་ལོག་དེ་ཕྱེད་ཀ་རྒྱལ་གཅེས་དང་ཕྱེད་ཀ་རྒྱབ་གཏོད་རེད་ཟེར། ད་ལྟ་གླས་དམག་ཟུར་པ་ཚོའི་མདུན་ལམ་ལ་ངེས་གཏན་མེད་པ་དང་སྐྲག་དགོས་པ་ཞིག་ཡིན་པའི་ལྟ་ཚུལ་ཞིག་ཐོན། ལོ་ན་༢༩་ལ་སན་པའི་ཝེ་གྷ་ནར་གླས་དམག་ཚོགས་པའི་འཐབ་མོ་བ་ཟུར་པ་དང་ཉེ་ཆར་ཨུ་རུ་སུའི་དམག་ཁོངས་སུ་ཞུགས་པ་ཞིག་གིས་ཝ་ལེ་ཌ་ཞེས་པའི་མིང་ཐོག་ཏུ་པ་རི་གྷོ་ཞིན་གྱི་རྩོད་དོན་དེ་སྒེར་གྱི་སྙིང་ནད་རེད། ཁོ་པས་ཨུ་རུ་སུའི་དམག་མི་ཚོར་ཕན་ཚུན་གསོད་རེས་བྱེད་དུ་འཇུག་ཐབས་བྱས་སོང་། ངས་ནམ་ཡང་རང་མིའི་ཐོག་ཏུ་མེ་མདའ་འཕེན་རྒྱུ་མིན། ང་ཚོས་རང་གི་རྒྱལ་ཁབ་ལ་གཏན་ནས་ངོ་ལོག་བྱེད་མི་ཐུབ། ང་ནི་རང་གི་རྒྱལ་ཁབ་ལ་སྲུང་སྐྱོབ་བྱེད་པའི་ཆེད་དུ་ཝེ་གྷ་ནར་གླས་དམག་ཁོངས་སུ་ཞུགས་པ་ཡིན། ངས་པ་རི་གྷོ་ཞིན་ལ་སྙིང་རྗེ་སྒོམ་ཐུབ་ཀྱི་མི་འདུག་ཅེས་གསར་འགོད་པའི་དྲི་བར་ལན་འདེབས་བྱས་པའི་གནས་ཚུལ་ཐོན་འདུག