༄༅།། ཨུ་རུ་སུའི་ན་གཞོན་ཤེས་ཡོན་ཅན་ཚོས་དམག་འཁྲུག་ལ་ངོ་རྒོལ་བྱེད་པའམ། ཡང་ན་དམག་ཁྲལ་ལ་གཡོལ་བར་ཕྱི་རྒྱལ་དུ་བྲོས་ནས་རྒྱལ་ཁབ་ཀྱི་དཔལ་འབྱོར་ཉམས་རྒུད་དང་དམག་མི་གསར་པ་བསྡུ་རྒྱུ་མེད་པའི་དཀའ་ངལ་ཚབས་ཆེན་ཞིག་འཕྲད་བཞིན་པའི་གནས་ཚུལ་ཐོན་འདུག ཕྱི་ཟླ་༩་པའི་ཚེས་༣་ཉིན་ཚོང་ལས་ནང་ཚགས་གསར་ཁང་གིས་གནས་ཚུལ་སྤེལ་བ་ལྟར་ན། ད་ནས་ཡུན་རིང་མི་འགོར་བར་ཨུ་རུ་སུའི་དཔལ་འབྱོར་ནི་ཨུན་རྡུ་ནེ་ཤི་ཡའི་དཔལ་འབྱོར་ལས་ཀྱང་ཉམས་ཞན་དུ་འགྲོ་རྒྱུའི་རྣམ་པ་མངོན། ཨུ་རུ་སུ་བ་ཕྱི་རྒྱལ་དུ་བྲོས་པ་བརྒྱ་ཆ་༨༠་ཐམ་པ་སློབ་ཆེན་ཐོན། ཁོ་ཚོའི་གྲས་ཀྱི་མི་གྲངས་བརྒྱ་༨༦་ལྷག་ལོ་༤༥་མན་ཆད་རེད། ད་ལྟའི་ཨུ་རུ་སུའི་སྤྱི་ཡོངས་དཔལ་འབྱོར་ཐོན་སྐྱེད་དེ་མི་དམངས་ཀྱིས་ཉོ་ཆ་བརྒྱབ་སྟེ་འགྲོ་གྲོན་གཏོང་ཐུབ་པའི་སྟོབས་ཤུགས་ལ་གཞལ་ནས་ཚོད་དཔག་བྱས་ན་༢༠༢༦་ལོར་ཨུ་རུ་སུའི་དཔལ་འབྱོར་སྟོབས་ཤུགས་ལྷོ་ཤར་ཨེ་ཤི་ཡའི་རྒྱལ་ཁབ་ཨིན་རྡུ་ནེ་ཤི་ཡའི་དཔལ་འབྱོར་སྟོབས་ཤུགས་ལས་སྐྱོ་རུ་འགྲོ་རྒྱུ་ཉག་གཅིག་རེད་ཅེས་གནས་ཚུལ་སྤེལ་འདུག
༢༠༢༢་ལོའི་ཕྱི་ཟླ་༢་པའི་ཚེས་༢༤་ཉིན་ཕུ་ཊིན་གྱིས་ཡུཀ་རེན་ལ་བཙན་འཛུལ་དམག་འཁྲུག་བླངས། ཉམས་ཞིབ་པ་ཚོས་ཨུ་རུ་སུའི་ན་གཞོན་ས་ཡ་༡་ཡས་མས་ཤིག་དམག་འཁྲུག་ལ་གཡོལ་བར་ཕྱི་རྒྱལ་དུ་བྲོས་ཡོད་པའི་ཚོད་དཔོག་བྱས་མོད། ཨུ་རུ་སུའི་གཞུང་གིས་མི་གྲངས་༨༡༧༠༠༠་ནས་༩༢༢༠༠༠་ཡས་མས་ཤིག་ཕྱི་རྒྱལ་དུ་བྲོས་འདུག་ཅེས་བསྟན། དེར་བརྟེན་ཨུ་རུ་སུར་ན་གཞོན་ལས་རྩོལ་བ་འདང་ངེས་མེད་པ་སྟེ། ད་ལོའི་ཕྱི་ཟླ་༤་པའི་ནང་ཨུ་རུ་སུར་ལས་རྩོལ་བ་བརྒྱ་ཆ་༣༥་འདང་གི་མེད་ཀྱང་ཕྱི་ཟླ་༧་པའི་ནང་ལས་རྩོལ་བ་འདང་ངེས་མེད་པའི་གྲངས་འབོར་དེ་བརྒྱ་ཆ་༤༢་ལ་འཕར། ནུབ་ཕྱོགས་རྒྱལ་ཁབ་ཁག་གིས་ཨུ་རུ་སུར་དཔལ་འབྱོར་དང་ཚོང་ལས་བཀག་སྡོམ་གྱི་ཉེས་ཆད་བཅད། ཨུ་རུ་སུའི་རྒྱལ་ནང་དུ་དཔལ་འབྱོར་དང་ཚོང་ལས་ཉམས། ཆེད་ལས་པ་ཚོར་རང་ཡུལ་དུ་མདུན་ལམ་མེད་པར་གྱུར། ཕྱི་རྒྱལ་ལ་བྲོས་པ་རྣམས་ལོ་ན་གཞོན་པ་ཁོ་ན་མིན་པར་ཨུ་རུ་སུའི་ཤེས་ཡོན་ཅན་དང་རྣམ་དཔྱོད་ཅན། དམག་ཁྲལ་ལ་གཡོལ་ཐབས་དང་དཔལ་འབྱོར་གྱི་གོ་སྐབས་དམ་འཛིན་བྱེད་མཁན་རྣམས་ཡིན་པའི་གནས་ཚུལ་ཐོན་འདུག
དེང་སྐབས་ཨུ་རུ་སུར་ལོ་ན་༣༥་མན་ཆད་ཀྱི་ལས་རྩོལ་བ་བརྒྱ་ཆ་༣༠་ལོང་གི་མེད་པ་དང་དེ་ནི་ལོ་༢༠་ལྷག་ལ་བྱུང་མྱོང་མེད་པ་ཞིག་ཡིན་འདུག ཧྥ་རན་སིའི་རྒྱལ་སྤྱིའི་འབྲེལ་ལམ་ཞིབ་འཇུག་ཁང་གིས་ཨུ་རུ་སུའི་གཞུང་གི་ཡིག་ཆ་ཁག་ལ་ཁུངས་གཏུགས་ནས་༢༠༢༢་ལོར་ཉུང་མཐའ་ཡང་ཨུ་རུ་སུ་ནས་འཕྲུལ་རིག་ལག་རྩལ་བ་འབུམ་༡་ཙམ་ཕྱི་རྒྱལ་དུ་བྲོས་འདུག་ཅེས་སྙན་ཐོ་བཏོན། ཨུ་རུ་སུ་བ་ས་ཡ་༡་ཡས་མས་ཤིག་ཕྱི་ལ་བྲོས་པ་དེའི་མི་གྲངས་བརྒྱ་ཆ་༡༡.༥་འབྱོར་ལྡན་པ་ཡིན་ཞིང་། ཁོ་ཚོས་ཨུ་རུ་སུའི་དངུལ་ཁང་ཁག་ཏུ་བཅོལ་ཡོད་པའི་དངུལ་སྒོར་རྣམས་༢༠༢༡་གི་ལོ་མཇུག་ཏུ་བླངས་ཏེ་ཕྱི་རྒྱལ་དུ་བཅོལ། ཨུ་རུ་སུའི་འབྱོར་ལྡན་པ་དེ་དག་གིས་ཁྱོན་བསྡོམས་ཨ་སྒོར་དུང་ཕྱུར་༤༡༥་ཙམ་ཕྱི་རྒྱལ་དུ་ཁྱེར། ཨུ་རུ་སུར་ཤེས་ཡོན་ཅན་དང་ཆེད་ལས་པ་ཅི་ཙམ་ཉུང་དུ་ཕྱིན་ན་རྒྱལ་ཁབ་ཀྱི་དཔལ་འབྱོར་ཉམས་རྒུད་འགྲོ་རྒྱུ་ཟློག་ཐབས་བྲལ། ཨུ་རུ་སུའི་ཆེད་ལས་པ་རྣམས་ཕྱི་ལ་ཤོར་བའི་མཉམ་དུ་དེ་དག་གི་དཔལ་འབྱོར་འཕེལ་རྒྱས་གཏོང་བའི་རྣམ་དཔྱོད་ཀྱི་རྩལ་ཡང་ཕྱི་ལ་ཤོར། དེ་ནས་མི་དམངས་ཀྱི་འཚོ་བའི་གནས་སྟངས་ཨུ་རུ་སུ་དམར་ཤོག་དུས་ཀྱི་གནས་སྟངས་དེར་ལྷུང་གི་ཡོད་པའི་གནས་ཚུལ་ཐོན།།
ཕྱི་ཟླ་༩་པའི་ཚེས་༣་ཉིན་མཱེ་དྷུ་ཛ་(Meduza)་གསར་ཁང་གིས་དབྱིན་ཇིའི་རྒྱལ་སྲུང་ལྷན་ཁང་གི་གནས་ཚུལ་འབྱུང་ཁུངས་ཁག་ལུང་འདྲེན་བྱས་ནས་གསར་འགྱུར་སྤེལ་བ་ལྟར་ན། ཨུ་རུ་སུའི་གཞུང་གིས་ཨུ་ཛི་བྷེ་ཀི་སི་ཐན་དང་ཁ་ཛག་སི་ཐན། ཨར་མཱི་ཎི་ཡ་སོགས་དབུས་ཨེ་ཤི་ཡའི་རྒྱལ་ཁབ་ཁག་གི་ན་གཞོན་ཚོ་དམག་ཁོངས་སུ་བསྡུས། དབྱིན་ཇིའི་རྒྱལ་སྲུང་གསང་བའི་ལས་ཁུངས་ཀྱིས་ཨར་མཱི་ཎི་ཡ་དང་ཁ་ཛག་སི་ཐན་གྱི་དྲྭ་ལམ་ཁག་ཏུ་ཕོ་གསར་ཚོ་ཨུ་རུ་སུའི་དམག་ཁོངས་སུ་ཞུགས་ན་སྔོན་ལ་ཨ་སྒོར་༥༡༤༠་སྤྲོད་ཆོག ཟླ་བ་རེར་གླ་ཕོགས་ཨ་སྒོར་༡༩༧༣་རེ་ཡོད་ཅེས་དྲིལ་བསྒྲགས་བྱེད་ཀྱི་ཡོད་ཅིང་། ཨུ་རུ་སུའི་དྲིལ་བསྒྲགས་དེའི་དམིགས་འབེན་གཙོ་བོ་ནི་ཨར་མཱི་ཎི་ཡ་དང་ཁ་ཛག་གི་སི་ཐན་དུ་གནས་འཁོད་ཨུ་རུ་སུའི་མི་རིགས་ཀྱི་ཚོགས་སྡེ་ཁག་ལ་གཟས་འདུག ཨུ་རུ་སུའི་གཞུང་གིས་༢༠༢༣་ལོའི་ཕྱི་ཟླ་༥་པ་ནས་དབུས་ཨེ་ཤི་ཡའི་རྒྱལ་ཁབ་ཁག་གི་སྤྱི་དམངས་རྣམས་ཨུ་རུ་སུའི་དམག་ཁོངས་སུ་བསྡུས་ཏེ་གླ་ཕོགས་ཨ་སྒོར་༤༡༦༠་རེ་སྤྲོད་རྒྱུ་ཡིན། ཁོ་ཚོ་མྱུར་དུ་ཨུ་རུ་སུའི་སྤྱི་དམངས་སུ་འགྱུར་ཆོག་པའི་ཐོབ་ཐང་སྤྲོད་རྒྱུ་ཡིན་ཞེས་ཁས་བླངས།།
དབྱིན་ཇིའི་རྒྱལ་སྲུང་གསང་བའི་ལས་ཁུངས་ནས་མུ་མཐུད་དུ་གནས་ཚུལ་སྤེལ་བ་ལྟར་ན། ཨུ་ཛི་བྷེ་ཀི་སི་ཐན་གྱི་ངལ་རྩོལ་བ་ཁག་ཅིག་སྔ་ལོ་ཨུ་རུ་སུའི་དམག་གིས་ཕྲོགས་པའི་ཡུཀ་རེན་གྱི་མཱ་རི་ཨུ་པུལ་ས་གནས་སུ་ཨར་ལས་རྒྱུག་ཏུ་བསླེབས། ཨུ་རུ་སུའི་གཞུང་གིས་ཨུ་ཛི་བྷེ་ཀི་སི་ཐན་གྱི་ཨར་ལས་པ་ཚོའི་ཕྱིར་སྐྱོད་ལག་འཁྱེར་ཕྲོགས། ཁོ་ཚོ་བཙན་གྱིས་ཨུ་རུ་སུའི་དམག་ཁོངས་སུ་བཅུག་སྟེ་འཐབ་སར་བརྫངས། ཨུ་རུ་སུའི་གཞུང་གིས་ལས་རྩོལ་བ་དང་དམག་མི་གསར་པ་མེད་པའི་དཀའ་ངལ་སེལ་ཐབས་སུ་རང་གི་ས་ཐོག་ཏུ་དབུས་ཨེ་ཤི་ཡའི་རྒྱལ་ཁབ་ཁག་གི་ཕྱི་མི་ལས་རྩོལ་བ་ས་ཡ་༦་ཙམ་ཡོད་པ་དེ་རྣམས་དམག་ཁོངས་སུ་བསྡུ་སྲིད་པའི་ཚོད་དཔག་བྱས་འདུག ༢༠༢༤་ལོར་ཨུ་རུ་སུར་སྲིད་འཛིན་འོས་བསྡུ་བྱ་དགོས་པ་དང་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་དམག་མི་འབུམ་༢་དང་ཁྲི་ཚོ་༥་ལྷག་བསད་རྨས་བྱུང་། ཨུ་རུ་སུའི་རྒྱལ་ནང་དུ་དམག་མི་གསར་བསྡུ་བྱ་རྒྱུ་དེར་མང་ཚོགས་ཀྱི་རྒྱབ་སྐྱོར་བྱེད་ཀྱི་མེད་པས་ཕུ་ཊིན་གྱིས་ཕྱི་རྒྱལ་བ་དམག་ཁོངས་སུ་མ་བསྡུས་པར་ཐབས་ལམ་གཞན་པ་མ་རྙེད། ད་ལྟ་ལོ་གཅིག་དང་ཕྱེད་ཀ་ལྷག་འགྲོ་བཞིན་པའི་ཡུཀ་རེན་གྱི་དམག་འཁྲུག་གིས་ཕྱོགས་གཉིས་ཀའི་དམག་དཔུང་ལ་བསད་རྨས་ཆེན་པོ་བྱུང་ཡོད་པའི་གནས་ཚུལ་ཐོན་འདུག
ཕྱི་ཟླ་༨་པའི་ཚེས་༣༠་ཉིན་ཧ་ཧྥུ་ཡིག་ཟམ་ཚགས་པར་གྱིས་དབྱིན་ཇིའི་གསང་བའི་ལས་ཁུངས་ཀྱི་གནས་ཚུལ་འབྱུང་ཁུངས་ཁག་ལུང་འདྲེན་བྱས་ནས་གསར་འགྱུར་སྤེལ་བ་ལྟར་ན། ཨུ་རུ་སུའི་དམག་མི་སྟོང་ཕྲག་མང་པོ་དཔའ་ཞུམ་སྟེ་གཉའ་ཆག ཁོ་ཚོ་ཡུཀ་རེན་གྱི་དམག་ས་ཁག་ཏུ་བསྐྱོད་ཀྱི་མེད་པ་དང་བདུན་ཕྲག་སྔོན་མར་དམག་མི་གཉིས་ལ་འཐབ་འཁྲུག་རྒྱག་དགོས་པའི་བཀའ་ལ་བརྩིས་མེད་བཏང་བའི་ནག་ཉེས་ཐོག་ཏུ་ལོ་གཉིས་ཀྱི་བཙོན་འཇུག་གི་ཁྲིམས་ཐག་བཅད། ཟླ་བ་སྔོན་མར་བདུན་ཕྲག་གཅིག་གི་ནང་དུ་ཨུ་རུ་སུའི་དམག་མི་བརྒྱ་སྐོར་ཞིག་ལ་དམག་འཁྲུག་རྒྱག་ཏུ་མ་ཕྱིན་པའི་ནག་ཉེས་ཐོག་ཏུ་ཁྲིམས་གཅོད་བྱས་འདུག གལ་སྲིད་ཨུ་རུ་སུའི་དམག་གིས་འཐབ་འཁྲུག་རྒྱག་དགོས་པའི་བཀའ་ལ་གྱེན་ལྡོག་བྱེད་ཀྱི་ཡོད་པ་མཚམས་མ་བཞག་ཚེ། ལོ་གཅིག་ལ་ཨུ་རུ་སུའི་དམག་མི་༥༢༠༠་ཡས་མས་ཤིག་ལ་ཁྲིམས་གཅོད་བྱ་དགོས་ཐུག་ས་རེད། ཨུ་རུ་སུའི་དམག་ལ་སྦྱོང་བརྡར་མེད་པ་དང་ཡི་ཐང་ཆད། དམག་འཁྲུག་གི་ངལ་དུབ་བཅས་ཀྱི་དཀའ་ངལ་ཆེན་པོ་འཕྲད་ཀྱི་འདུག་ཅེས་གནས་ཚུལ་སྤེལ་འདུག
ཕྱི་ཟླ་༩་པའི་ཚེས་༣་ཉིན་གཟའ་འཁོར་གསར་འགྱུར་དུས་དེབ་ལ་གནས་ཚུལ་ཐོན་པ་ལྟར་ན། ༢༠༢༢་ལོའི་ཕྱི་ཟླ་༩་པའི་ནང་ཨུ་རུ་སུའི་གཞུང་གིས་དམག་མི་གསར་པ་འབུམ་༣་བསྡུས་ནས་ཡུཀ་རེན་གྱི་དམག་ས་ཁག་ཏུ་བཏང་བའི་ཕྱེད་ཀ་ཙམ་བསད་པ་དང་རྨས། ཨུ་རུ་སུའི་གཞུང་གིས་དམག་སྐུལ་གསར་པ་ཞིག་མ་བྱས་པར་དམག་མི་འདང་ངེས་མེད་པའི་དཀའ་ངལ་སེལ་དཀའ། ཕུ་ཊིན་གྱིས་དམག་མིའི་གླ་ཕོགས་ཅི་ཙམ་སྤར་ཀྱང་དམག་ཁོངས་སུ་ཞུགས་མཁན་ཉུང་དུ་སོང་། ཡུཀ་རེན་གྱི་དམག་ས་ཁག་ཏུ་བསད་རྨས་འབྱུང་གི་ཡོད་པ་མང་ཆེ་བ་ནི་ཨུ་རུ་སུའི་མི་རིགས་དཀར་པོ་མིན་པར་ཌ་གྷེ་སི་ཐན་སོགས་ཀྱི་ཁ་ཆེ་གྲངས་ཉུང་མི་རིགས་དང་བྷུ་རི་ཡ་ཐེ། ཐུ་བ་དང་ཀལ་མུག་སོགས་ཀྱི་ནང་པའི་སྤྱི་མཐུན་ས་གནས་ཁག་གི་གྲངས་ཉུང་མི་རིགས་རྣམས་རེད། ཨུ་རུ་སུའི་དམག་མི་རྣམས་བསད་རྨས་འབྱུང་གི་ཡོད་པའི་རྒྱུ་རྐྱེན་གཙོ་བོ་ཞིག་མཚོན་ཆ་ཡག་པོ་མེད་པ་དང་དམག་སྦྱོང་མ་ཐོབ་པ། དམག་རྒྱག་གི་མཐུན་རྐྱེན་མེད་པ་བཅས་ལ་ཐུག་ཡོད་པའི་གནས་ཚུལ་སྤེལ་འདུག
ཕྱི་ཟླ་༩་པའི་ཚེས་༡་ཉིན་བྷུ་ལུམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་དམག་འཁྲུག་དང་ནུབ་ཕྱོགས་རྒྱལ་ཁབ་ཁག་གིས་ཚོང་ལས་བཀག་སྡོམ་བྱས་ནས་ཨུ་རུ་སུའི་དངུལ་ལོར་རུ་བྷུལ་གྱི་འཛའ་ཐང་ཆག སྲིད་འཛིན་ཕུ་ཊིན་གྱིས་ཨུ་རུ་སུའི་དབུས་དངུལ་ཁང་དང་གཞུང་གི་འབྲེལ་ཡོད་ལས་སྣེ་ཚོར་རུ་བྷུལ་འཛའ་ཐང་ཆག་ཏུ་འཇུག་མི་ཉན་ཞེས་བཀའ་ཕབ། རུ་བྷུལ་གྱི་འཛའ་ཐང་ཆག་ན་ཨུ་རུ་སུའི་རྒྱལ་ནང་དུ་སྔར་ལས་ལྷག་པའི་ཡུལ་ཐང་འཕར་ཏེ་༢༠༢༤་ལོའི་སྲིད་འཛིན་འོས་བསྡུའི་སྐབས་སུ་ཕུ་ཊིན་ལ་ཕམ་ཉེས་འབྱུང་སྲིད་པའི་སྐྲག་སྣང་བྱེད་ཀྱི་ཡོད་པའི་གནས་ཚུལ་ཐོན། དབྱིན་ཇིའི་དངུལ་རྩའི་ཚགས་པར་གྱིས་རྒྱ་ནག་དངུལ་ཁང་ཚུད་པའི་རྒྱ་ནག་གི་གི་དངུལ་ཁང་ཁག་གིས་ཨུ་རུ་སུའི་དངུལ་ཁང་ཁག་ལ་ཨ་སྒོར་དུང་ཕྱུར་མང་པོ་བསྐྱིས། ཨུ་རུ་སུ་དང་རྒྱ་ནག་གཉིས་ཀྱིས་ཨ་སྒོར་སྤྲོད་ལེན་བྱེད་མི་དགོས་པར་རྒྱ་སྒོར་དང་རུ་བྷུལ་སྤྲོད་ལེན་བྱས་ནས་ཚོང་ལས་གཉེར་རྒྱུའི་ཐག་བཅད། དེས་ན་ཕུ་ཊིན་གྱིས་གནས་སྐབས་རིང་དམག་འཁྲུག་ལ་འགྲོ་གྲོན་བཏང་ནས་ཁུངས་འཁྱོལ་ཐུབ་པ་ཞིག་འབྱུང་ས་རེད་ཅེས་གནས་ཚུལ་སྤེལ་འདུག