༄༅།། ཨ་རིའི་དབུས་ཞིབ་གཅོད་ལས་ཁུངས་ཏེ། ནང་སོ་ལས་ཁུངས་ཀྱིས་སྲིད་འཛིན་ཟུར་པ་ཌོ་ནལ་ཊམ་ལ་མེ་མདའ་རྒྱག་མཁན་དེ་ལོ་ན་༢༠་ལ་སོན་པའི་པེན་སིལ་ཝེ་ཎི་ཡ་མངའ་སྡེའི་ཡུལ་མི་ཐོ་མ་སི་མེ་ཐེའུ་ཀུ་རུག་སི་(Thomas Matther Crooks)་རེད་ཅེས་ངོ་ཐག་བཅད་ཡོད་ཅིང་། དབུས་ཞིབ་གཅོད་ལས་ཁུངས་ཀྱི་ལས་སྣེ་ཚོས་ཕོ་གསར་དེས་ཌོ་ནལ་ཊམ་ལ་མེ་མདའ་བརྒྱབ་པ་ལྐོག་གསོད་བྱ་ཐབས་ཡིན་པ་ཚོད་དཔག་ཐུབ་ཀྱང་མི་དེའི་ཀུན་སློང་ཅི་ཡིན་ཤེས་ཀྱི་མི་འདུག་ཅེས་གསལ་བསྒྲགས་སྤེལ་འདུག
ཨ་རིའི་གསར་འགྱུར་ལས་ཁུངས་ཁག་གིས་མིག་མཐོང་བདེན་དཔང་པ་ཚོར་སྐད་ཆ་དྲིས་ནས་གནས་ཚུལ་སྤེལ་བ་ལྟར་ན། ཐོ་མ་སི་མེ་ཐེའུ་ཀུ་རུག་གིས་སྲིད་འཛིན་ཟུར་པ་ཌོ་ནལ་ཊམ་ལ་མེ་མདའ་མ་བརྒྱབ་གོང་དུ་ཁང་པ་གཅིག་གི་ཐོག་ནས་ཁང་པ་གཞན་ཞིག་གི་ཐོག་ཏུ་ཕར་ཚུར་འགྲོ་སྐྱོད་བྱས་སོང་། ཁོ་པས་ཕལ་ཆེར་སྲིད་འཛིན་ཟུར་པ་ཌོ་ནལ་ཊམ་མེ་མདའི་དམིགས་འབེན་དུ་ཚུད་ས་ཞིག་འཚོལ་གྱི་ཡོད་པ་འདྲ་ཞེས་བཤད་པའི་གནས་ཚུལ་ཐོན་འདུག ཨ་རིའི་གསང་བའི་སྐུ་སྲུང་འགོ་གཙོ་ཨན་ཐོ་ཎི་གྷུག་ལི་ཡེ་མཱིས་(Anthony Guglielmi)་མེ་མདའ་རྒྱག་མཁན་དེར་འཕྲལ་དུ་གསང་བའི་སྐུ་སྲུང་བ་ཞིག་གིས་མེ་མདའ་བརྒྱབ་ནས་བསད་པ་རེད། སྲིད་འཛིན་ཟུར་པ་ཌོ་ནལ་ཊམ་གྱི་འོས་བསྡུའི་དྲིལ་བསྒྲགས་ལས་འགུལ་ལ་ཞུགས་པའི་མི་༡་ལ་མདེའུ་ཕོག་ནས་ཚེ་སྲོག་ཤོར་བ་དང་མི་གཞན་པ་༢་ལ་རྨས་སྐྱོན་ཕོག་འདུག མེ་མདའ་རྒྱག་མཁན་དེ་ཧྥི་ཁྲུ་༢༠༠་ནས་༣༠༠་ཡས་མས་ཤིག་གི་ཕ་རོལ་ཏུ་སྐུང་སྟེ་དམག་མིའི་མེ་མདའ་རིང་པོ་ཞིག་བརྒྱབ་ནས་མདེའུ་༨་འཕངས་འདུག་ཅེས་བསྒྲགས་སྤེལ་འདུག
མེ་མདའ་རྒྱག་མཁན་དེར་འཕྲལ་དུ་གསང་བའི་སྐུ་སྲུང་བ་ཞིག་གིས་མེ་མདའ་བརྒྱབ་ནས་བསད་པ་རེད།
ཨ་རིའི་གྲོས་ཚོགས་འོག་མའི་ཚོགས་གཙོ་མེཀ་ཇཱོན་སན་གྱིས་ཨ་མི་རི་ཀའི་མི་དམངས་ལ་གསལ་བཤད་བྱ་དགོས་ཀྱི་རེད། དབུས་ཞིབ་འཇུག་ལས་ཁུངས་དང་རྒྱལ་ནང་སྲུང་སྐྱོབ་ལྷན་ཁང་། གསང་བའི་སྐུ་སྲུང་ལས་ཁུངས་ཀྱི་འབྲེལ་ཡོད་ལས་སྣེ་ཚོ་གྲོས་ཚོགས་སུ་བསྐོངས་ནས་གཟའ་ཟླ་བའི་ཉིན་ཉན་ཞིབ་འཚོགས་དགོས། གྲོས་ཚོགས་ཀྱི་ལྟ་རྟོག་ཚོགས་ཆུང་གིས་དབུས་ཞིབ་གཅོད་ལས་ཁུངས་སོགས་བདེ་འཇགས་ཚན་པ་ཁག་གིས་སྲིད་འཛིན་ཟུར་པ་ཌོ་ནལ་ཊམ་ལ་སྲུང་སྐྱོབ་བྱ་རྒྱུ་འཐུས་ཤོར་ཕྱིན་ཡོད་མེད་ཞིབ་འཇུག་བྱ་འཆར་ཡོད་ཅེས་གསལ་བསྒྲགས་སྤེལ། མདའ་དགོང་ཡང་གྲོས་ཚོགས་འོག་མའི་ཚོགས་གཙོ་ཇཱོན་སན་གྱིས་ཨ་རིའི་དམངས་གཙོའི་སྤྱི་ཚོགས་སུ་དྲག་སྤྱོད་འགྲོ་ས་མེད་ཅེས་དྲྭ་ལམ་དུ་འཕྲིན་ཐུང་ཞིག་སྤེལ་ནས་སྲིད་འཛིན་ཟུར་པ་གསོད་གྲབས་བྱུང་བར་ཁ་རྡུང་དྲག་པོ་བཏང་འདུག
ཨ་རིའི་གྲོས་ཚོགས་འོག་མའི་ཚོགས་གཙོ་མེཀ་ཇཱོན་སན་
སྲིད་འཛིན་ཟུར་པ་ཌོ་ནལ་ཊམ་ལ་མེ་མདའ་ཕོག་པའི་གསར་འགྱུར་ཐོན་མ་ཐག་ཏུ་ཨ་རིའི་སྲིད་འཛིན་ཟུར་པ་ཁེ་ལིན་ཊོན་དང་འཇོར་ཇཱི་བྷུ་ཤི། ཨོ་བྷ་མ་སྟངས་དཔྱལ་རྣམས་ཀྱིས་གསར་འགོད་གསལ་བསྒྲགས་སྤེལ་ནས་སྲིད་འཛིན་ཟུར་པ་ཌོ་ནལ་ཊམ་ལ་སྲོག་སྐྱོན་མ་བྱུང་བར་དགའ་ཚོར་བྱུང་། ཨ་རིའི་དམངས་གཙོའི་ལམ་ལུགས་ནང་དུ་ཞི་བའི་སྒོ་ནས་ཆབ་སྲིད་ཀྱི་ལས་དོན་ཁག་ལ་མཉམ་ཞུགས་བྱ་དགོས། དྲག་སྤྱོད་ལ་ནམ་ཡང་བཟོད་སྒོམ་བྱ་ཐབས་མེད་ཅེས་ཁ་རྡུང་དྲག་པོ་བཏང་འདུག ཨ་རིའི་ཁྲིམས་འཛིན་སྤྱི་ཁྱབ་པ་གྷར་ལན་ཌིས་དྲག་སྤྱོད་འདིར་ཁ་རྡུང་དྲག་པོ་གཏོང་གི་ཡོད། དབུས་ཁྲིམས་འཛིན་ལྷན་ཁང་གིས་ཉེས་དོན་དེར་རྩད་གཅོད་མཐིལ་ཕྱིན་པ་ཞིག་བྱ་རྒྱུ་ཡིན། འོས་བསྡུའི་དྲིལ་བསྒྲགས་ལས་འགུལ་སྐབས་སུ་དྲག་སྤྱོད་འབྱུང་རྒྱུར་བློ་འཚབ་ཆེན་པོ་ཡོད་ཅེས་གསར་འགོད་གསལ་བསྒྲགས་སྤེལ་འདུག
གཟའ་ཉི་མའི་དགོང་མོར་སྲིད་འཛིན་ཟུར་པ་ཌོ་ནལ་ཊམ་གྱི་འོས་བསྡུའི་དྲིལ་བསྒྲགས་ལས་འགུལ་ཁང་དང་སྤྱི་མཐུན་ཚོགས་པ་གཉིས་ཀས་གཟའ་ཟླ་བ་ནས་སྤྱི་མཐུན་ཚོགས་པའི་རྒྱས་འཛོམ་ཚོགས་ཆེན་འཚོགས་ཏེ་ཌོ་ནལ་ཊམ་སྤྱི་མཐུན་ཚོགས་པའི་སྲིད་འཛིན་འོས་མིར་དངོས་སུ་བདམས། ཌོ་ནལ་ཊམ་གྱིས་སྤྱི་མཐུན་ཚོགས་པའི་རྒྱས་འཛོམ་ཚོགས་ཆེན་ཐོག་ཏུ་སྲིད་འཛིན་གཞོན་པའི་འོས་མི་གསལ་བསྒྲགས་བྱ་རྒྱུའི་མཛད་རིམ་ཁག་ལ་འགྱུར་བ་མེད་ཅེས་ཐུན་མོང་གི་གསར་འགོད་གསལ་བསྒྲགས་ཤིག་སྤེལ་འདུག