༄༅།། འབྲུག་གཞུང་གིས་རྒྱལ་ཡོངས་བདེ་སྐྱིད་ཅེས་གཙིགས་སུ་བཟུང་ཡང་རྒྱལ་ཁབ་དེའི་ན་གཞོན་ཚོ་རང་ཡུལ་དུ་མ་བསྡད་པར་ཕྱི་རྒྱལ་དུ་བསྐྱོད། ཕྱི་ཟླ་༡༡་པའི་ཚེས་༡༧་ཉིན་སི་བི་ཨེ་སི་(CBS)་གསར་ཁང་གིས་གནས་ཚུལ་སྤེལ་བ་ལྟར་ན། འདས་པའི་ལོ་སུམ་ཅུའི་རིང་འབྲུག་གཞུང་གིས་ཆབ་འབངས་ལ་སྨན་བཅོས་དང་འཕྲོད་བསྟེན་ལྟ་སྐྱོང་། ཕྲུ་གུའི་ཤེས་ཡོན་སློབ་སྦྱོང་བཅས་པ་རིན་མེད་དུ་མཁོ་སྦྱོར་བྱས་ཏེ་མིའི་ཚེ་ཚད་རིང་དུ་སོང་ཡང་འབྲུག་པའི་ཤེས་ཡོན་ཅན་རྣམས་ཕྱི་རྒྱལ་དུ་གནས་སྤོར་བྱ་རྒྱུ་ལོ་རེ་བཞིན་ཇེ་མང་དུ་འགྲོ་བཞིན་པའི་གནས་ཚུལ་ཐོན་འདུག སྲིད་བློན་ཚེ་རིང་སྟོབས་རྒྱལ་(Tshering Tobgay)་གྱིས་འབྲུག་ཡུལ་ནི་རྒྱལ་ཡོངས་བདེ་སྐྱིད་ལྡན་པ་ཞིག་ཡིན་རུང་ན་གཞོན་ཚོ་ཕྱི་རྒྱལ་ཡུལ་གྲུ་ཁག་ཏུ་སྐྱོད་ཀྱི་ཡོད་པ་དེ་ཁྱད་མཚར་ཞིག་རེད། འདི་ནི་ཆགས་འཇིག་གི་དཀའ་ངལ་ཞིག་རེད་ཅེས་བཀྲལ།།
སྲིད་བློན་ཚེ་རིང་སྟོབས་རྒྱལ་
འབྲུག་ཡུལ་ནི་ཨ་རིའི་མེ་རི་ལན་ཌི་མངའ་སྡེའི་ཆེ་ཆུང་ལས་མེད་པ་དང་༡༩༧༠་བར་དུ་ཕྱི་རྒྱལ་གྱི་འགྲུལ་པ་ཡོང་མི་ཆོག་པའི་བཀག་སྡོམ་བྱས། ༡༩༩༩་བར་དུ་འབྲུག་ཡུལ་ལ་བརྙན་འཕྲིན་ཡང་མ་དར། ད་དུང་ཡང་འབྲུག་ཡུལ་གྱི་རྒྱལ་ས་ཐིམ་ཕུག་ཏུ་འགྲིམ་འགྲུལ་གློག་སྒྲོན་མེད་པར་མིས་བཀོད་འདོམས་བྱེད་ཀྱི་ཡོད་ཅིང་། འབྲུག་ཡུལ་གྱི་ཆ་འཕྲིན་བློན་ཆེན་དྲག་ཤོས་འཕྲིན་ལས་རྡོ་རྗེས་(Kinley Dorji)་གསར་འགོད་པར་གླེང་མོལ་བྱས་པ་ལྟར་ན། འབྲུག་ཡུལ་ལ་དམག་དང་དཔལ་འབྱོར་གྱི་སྟོབས་ཤུགས་མེད་པ་དང་རྒྱ་དཀར་ནག་གཉིས་ཀྱི་བར་དུ་ཚུད་ཡོད་པས་མི་དམངས་ལ་བློ་འཚབ་ཡོང་གི་འདུག འབྲུག་ཡུལ་གྱི་སྟོབས་ཤུགས་ནི་རང་གི་ངོ་བོ་དེ་ཡིན། ང་ཚོ་ནི་ཉེ་འཁྲིས་ཀྱི་ཡུལ་ལུང་གང་ལའང་འདྲ་པོ་མེད། ང་ཚོར་ཅི་ཞིག་ཡོད་པ་ནི་རིག་གཞུང་རྙིང་པ་རྩ་ཆེན་ཞིག་ཡིན་པ་ངོས་ཟིན་ཡོད་ཅེས་ལན་བཏབ།།
འབྲུག་པའི་ཆས་གོས་དང་སྲོལ་རྒྱུན་གྱི་ཁང་པའི་བཟོ་བཀོད་ལ་ཐུན་མོང་མ་ཡིན་པའི་ཁྱད་ཆོས་ཤིག་ལྡན། འབྲུག་པའི་རིག་གཞུང་དེ་མ་ཉམས་རྒྱུན་གནས་ཡིན་པ་དང་མི་མང་ཕལ་ཆེ་བ་ཞིང་པའི་གྲས་སུ་གཏོགས། འབྲུག་ཡུལ་གྱི་ཞིང་ལས་སྤྱི་ཚོགས་ཀྱི་རྣམ་པ་དེར་ལོ་བརྒྱ་ཕྲག་མང་པོར་འགྱུར་བ་མ་ཐེབས། ༡༩༠༧་ལོར་འབྲུག་ཡུལ་གྱི་རྒྱལ་པོ་དང་པོ་ཨོ་རྒྱན་དབང་ཕྱུག་གིས་རྒྱལ་ཁབ་གཅིག་ཏུ་བསྒྲིལ། དེ་ནས་བཟུང་སྟེ་ཁོང་གི་བུ་རབས་ཚ་རྒྱུད་ཀྱིས་ཆབ་སྲིད་བསྐྱངས། ལོ་རབས་༧༠་ནང་དུ་རྒྱལ་ཐོག་བཞི་པ་འཇིགས་མེད་སེངྒེ་དབང་ཕྱུག་ཁྲི་ལ་ཕེབས་ནས་ཕྱི་ལ་སྒོ་མོ་ཕྱེ། ཁོང་གིས་འབྲུག་ཡུལ་དེང་རབས་ཅན་དུ་སྒྱུར་འགོ་ཚུགས། དྲག་ཤོས་འཕྲིན་ལས་རྡོ་རྗེས་རྒྱལ་པོ་མཆོག་ནས་རྒྱལ་ཡོངས་བདེ་སྐྱིད་ནི་རྒྱལ་ཡོངས་ཐོན་སྐྱེད་ཀྱི་རྩ་འབོར་ལས་ཀྱང་རྩ་ཆེ་བར་བརྩིས་པ་རེད་ཅེས་བསྟན། འབྲུག་ཡུལ་གྱི་རྒྱལ་ཡོངས་བདེ་སྐྱིད་ཀྱི་ལྟ་གྲུབ་ལ་རྒྱལ་སྤྱིའི་ཐོག་ཏུ་དོ་སྣང་བྱུང་།།
འབྲུག་ཡུལ་གྱི་རྩ་ཁྲིམས་སུ་ཉུང་མཐར་ཡང་རྒྱལ་ཁབ་ཀྱི་ས་ཁྱོན་བརྒྱ་ཆ་༦༠་ནགས་ཚལ་དུ་འཇོག་དགོས་ཞེས་འཁོད། འབྲུག་ཡུལ་གྱི་གློག་གི་ཐོན་སྐྱེད་རྣམས་ཆུ་ཤུགས་གློག་ཁག་ནས་ཐོན། འབྲུག་ཡུལ་ནི་འཛམ་གླིང་འདིར་ནག་རྫས་དུད་རླངས་མེད་པའི་རྒྱལ་ཁབ་ཉུང་ཤས་ཤིག་ཡོད་པ་དེ་དག་གི་གྲས་སུ་ཚུད། འབྲུག་ཡུལ་གྱི་དཔལ་འབྱོར་ཡོང་འབབ་མང་ཆེ་བ་རྒྱ་གར་ལ་གློག་ཕྱིར་ཚོང་དང་ཡུལ་སྐོར་སྤྲོ་འཆམ་གྱི་ཡོང་འབབ་ལ་བརྟེན། འབྲུག་ཡུལ་དུ་རྒྱལ་པོ་ཡོད་ཀྱང་༢༠༠༧་ནས་སྲིད་བློན་འོས་འདེམས་ཀྱིས་དམངས་གཙོའི་རྩ་བ་ཚུགས། སྲིད་བློན་ཚེ་རིང་སྟོབས་རྒྱལ་གྱིས་དམངས་གཙོ་ནི་རྒྱལ་པོ་མཆོག་ནས་མར་གནང་བ་ཞིག་ཡིན་པ་དང་འབྲུག་པ་ཚོར་དམངས་གཙོ་དགོས་ཀྱི་ཡོད་པ་མ་རེད་ཅེས་བཤད་འདུག
༢༠༡༩་ལོར་རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཡོངས་ལ་པྲོག་དབྱིབས་ནད་དུག་ཁྱབ།
༢༠༡༩་ལོར་རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཡོངས་ལ་པྲོག་དབྱིབས་ནད་དུག་ཁྱབ། འབྲུག་ཡུལ་གྱི་དཔལ་འབྱོར་ཉམས་ཆག་བྱུང་སྟེ་སླར་གསོའི་མྱུར་ཚད་ཤིན་ཏུ་དལ། དབྱིན་ཡིག་ཤེས་པའི་འབྲུག་པའི་ན་གཞོན་ཚོ་ཨོ་གླིང་སོགས་སུ་བསྐྱོད་ནས་ངལ་རྩོལ་རྒྱུག་དགོས་ཀྱང་གླ་ཕོགས་མཐོའི་ལས་རིགས་ཁག་ཏུ་ཞུགས། སྤྱི་ཚོགས་དྲྭ་ལམ་ཁག་ཏུ་ཕྱི་རྒྱལ་གྱི་འཚོ་བའི་གནས་སྟངས་བཟང་བ་དང་གླ་ཕོགས་མཐོ་བ། གང་ཅིའི་ཐད་དུ་གོ་སྐབས་བཟང་པོ་ཡོད་པའི་སྐད་ཆ་བདེན་རྫུན་གཉིས་ཀ་བཀྲམ། དེར་བརྟེན་ཨེ་ཤི་ཡའི་ཡུལ་གྲུ་ཁག་གི་ན་གཞོན་གཞན་ལྟར་འབྲུག་པའི་ན་གཞོན་རྣམས་ཀྱང་ཧེབ་ལངས་ནས་ཕྱི་རྒྱལ་དུ་བསྐྱོད། ད་ལྟ་འབྲུག་ཡུལ་གྱི་མི་འབོར་བརྒྱ་ཆ་༩་ཕྱི་རྒྱལ་དུ་ཕྱིན་ཡོད་པ་དེ་དག་གི་མང་ཆེ་བ་ན་གཞོན་ཡིན་ཞིང་། སྲིད་བློན་ཚེ་རིང་སྟོབས་རྒྱལ་གྱིས་ན་གཞོན་ཚོ་རང་ཡུལ་དུ་སྡོད་ཀྱི་མེད་པ་དེ་དཀའ་ངལ་ཞིག་རེད་ཅེས་ནན་གྱིས་བརྗོད།།
འབྲུག་གཞུང་གིས་ཁོར་ཡུག་ལ་གནོད་སྐྱོན་མེད་པའི་དཔལ་འབྱོར་དམིགས་བསལ་གྲོང་ཁྱེར་ཞིག་འཛུགས་སྐྲུན་བྱས་ནས་ན་གཞོན་ཚོ་རང་ཡུལ་དུ་འཛིན་ཐབས་བྱེད་ཀྱི་ཡོད་པར་མ་ཟད། ཕྱི་རྒྱལ་དུ་སྤོས་ཟིན་པ་རྣམས་ཀྱང་ཕྱིར་འགུགས་ཆེད་དུ་ཚོང་ལས་ཀྱི་གོ་སྐབས་བསྐྲུན། ཡུལ་སྐོར་སྤྲོ་འཆམ་པ་མང་དུ་བཏང་སྟེ་དབྱིན་ལེ་༢༥༠་ཐམ་པའི་རྐང་ལམ་ནང་དུ་ལྗོངས་རྒྱུ་དང་གནའ་བོའི་ལྕགས་ཟམ་ཁག་ལ་ལྟ་སྐོར་བ་འགུགས་ཐབས། འབྲུག་ཡུལ་གྱི་ལྷོ་ཕྱོགས་སུ་འཛུགས་སྐྲུན་བྱེད་བཞིན་པའི་དགེ་ལེགས་ཕུག་དཔལ་འབྱོར་དམིགས་བསལ་གྲོང་ཁྱེར་དེར་རྒྱལ་ཡོངས་ཀྱི་ཁྲིམས་དང་སྒྲིག་སྲོལ་ཁག་ལག་ལེན་བསྟར་མི་དགོས་ཀྱང་འབྲུག་པའི་རིག་གཞུང་གཅེས་འཛིན། མི་ལ་སྒོམ་སྒྲུབ་དང་གནའ་བོའི་རིག་གནས་སློབ་གཉེར་གྱི་ཁོར་ཡུག་ཡོད་པ། འབྲུག་པའི་ལག་ཤེས་ཐོན་སྐྱེད་རྣམས་འགྲེམ་སྟོན་དང་མི་མང་ལ་ལས་ཀ་བཀོད་སྒྲིག་ཐུབ་པའི་དམིགས་ཡུལ་བཅངས་འདུག
རྣམ་རྒྱལ་ཛམ་ཞེས་པ་ནི་འབྲུག་ཡུལ་གྱི་དགོང་མའི་བརྙན་འཕྲིན་རྒྱང་སྲིང་བ་ཞིག་ཡིན་རུང་ཁྱོ་ག་དང་བཟའ་མི་རྣམས་ཨོ་གླིང་དུ་གཞིས་ཆགས་སུ་བསྐྱོད་རྒྱུའི་ཐག་བཅད། འོན་ཀྱང་འབྲུག་རྒྱལ་པོ་མཆོག་ནས་དགེ་ལེགས་ཕུག་གི་དཔལ་འབྱོར་དམིགས་བསལ་གྲོང་ཁྱེར་འཛུགས་སྐྲུན་བྱེད་པར་མི་དམངས་ཀྱིས་རོགས་རམ་བྱ་དགོས་ཞེས་འབོད་སྐུལ་ཞུས། རྣམ་རྒྱལ་ཛམ་ཨོ་གླིང་དུ་མ་སྤོས་པར་རང་ཡུལ་དུ་འདུག་རྒྱུའི་གན་རྒྱ་བཞག ཟླ་བ་སྔོན་མར་འབྲུག་རྒྱལ་པོ་མཆོག་ཨོ་གླིང་དུ་ཕེབས་ནས་རྒྱལ་ཁབ་དེར་གནས་འཁོད་འབྲུག་པ་ཁྲི་ཚོ་༢་ལྷག་ལ་ཉི་མ་གཅིག་ཁྱེད་ཚོ་རང་ཡུལ་དུ་ཕྱིར་ལོག་ཡོང་བའི་རེ་བ་ཡོད་ཅེས་བཀའ་སློབ་སྩལ། འབྲུག་པ་ཚོ་ཕྱི་རྒྱལ་དུ་བསྐྱོད་དགོས་དོན་ནི་རང་ཡུལ་དུ་ལས་ཀའི་གོ་སྐབས་ཉུང་བ་དང་གླ་ཕོགས་དམའ་བ། ཕྱི་རྒྱལ་དུ་ཕྱིན་པ་ཚོས་དངུལ་སྒོར་བསྐུར་ནས་ཕ་མ་སྤུན་མཆེད་དང་བཟའ་ཟླ་བུ་ཕྲུག་གི་འཚོ་བའི་གནས་སྟངས་ཡར་རྒྱས་བྱུང་།།
ཉེ་ཆར་ཕྱི་ཟླ་༡༠་པའི་ཚེས་༣༠་ཉིན་དབྱིན་ཇིའི་གྷར་ཌི་ཡན་ཚགས་པར་ལ་གནས་ཚུལ་ཐོན་པ་ལྟར་ན། ༢༠༡༩་ལོར་འབྲུག་ཡུལ་གྱི་བུད་མེད་བརྒྱ་ཆ་༦༡.༡་གིས་ལས་ཀ་ལས་ཀྱི་ཡོད་ཀྱང་པྲོག་དབྱིབས་ནད་ཡམས་རྗེས་སུ་བུད་མེད་ལས་རྩོལ་བ་བརྒྱ་༣༠་ཡས་མས་ལས་མེད་པར་གྱུར། ༢༠༢༢་ལོར་འབྲུག་ཡུལ་གྱི་ན་གཞོན་ལས་མེད་ཀྱི་གྲངས་འབོར་བརྒྱ་ཆ་༢༨.༦་ཟིན། འབྲུག་པ་བརྒྱད་ཀྱི་ནང་ནས་གཅིག་དབུལ་ཕོངས་ཀྱི་གནས་སུ་ལྷུང་འདུག་ཅེས་སྙན་ཐོ་ཐོན། འཆི་མེད་རྡོ་རྗེ་ནི་ཨོ་གླིང་གི་ཕར་ཐེ་ས་ཁུལ་གྱི་འབྲུག་པའི་མཐུན་ཚོགས་ཀྱི་ཚོགས་གཙོ་ཡིན་ཞིང་། ཁོ་པས་འབྲུག་པ་ཚོ་ཨོ་གླིང་དུ་ཡོང་གི་ཡོད་པའི་གྲངས་འབོར་དེ་ཧང་སང་དགོས་པ་ཞིག་རེད། འདི་ནི་འཛམ་གླིང་ཡུལ་ཕྱོགས་ཀུན་ཏུ་གནས་སྤོས་ཀྱི་རྦ་རླངས་ཤིག་འཕྱུན། དེང་རབས་ཀྱི་འཚོ་བ་ལམ་སྲོལ་ཞིག་དར་ཡོད་པ་འབྲུག་ཡུལ་དུའང་ཁྱབ་པར་སྣང་། ངའི་ཆུང་མས་གཙུག་ལག་རབ་འབྱམས་པའི་སློབ་སྦྱོང་བྱེད་ཀྱི་ཡོད། ང་ཚོ་སློབ་སྦྱོང་ཐོན་པའི་རྗེས་སུ་འབྲུག་ཡུལ་དུ་ཕྱིར་ལོག་བྱ་འཆར་ཡོད་ཅེས་གསར་འགོད་པར་གླེང་མོལ་བྱས་འདུག