དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གོ་སྒྲིག་འོག་རྒྱ་གར་ནང་གནས་སྡོད་བོད་རིགས་གཞོན་སྐྱེས་ཁག་ཅིག་ལ་གནས་ཡུལ་ས་གནས་སུ ་བོད་དོན་ཞུ་གཏུགས་ལས་འགུལ་སྤེལ་ཕྱོགས་ཐབས་བྱུས་ཀྱི་ཚོགས་འདུ་དང་ཟབ་སྦྱོང་ཞིག་དེ་རིང་ཕྱི་ཟླ་ ༡༡ ཚེས་ ༡༣ ཉིན་རྒྱབ་ནས་རྡ་ས་དབུས་སྣེ་ལེན་ཁང་འཛིན་སྐྱོང་སྦྱོར་བརྡར་ཚོགས་ཁང་དུ་དབུ་འཛུགས་གནང་སོང་།
ཚོགས་འདུའི་དབུ་འབྱེད་ཐོག་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ ཀི་ཤཱན་ཀ་པུར་ རྣམ་གཉིས་སྐུ་མགྲོན་གཙོ་བོར་གདན་ཞུས་ཀྱིས། སྐབས་དེར་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་ནས་བོད་པའི་འཐབ་རྩོད་དེ་བཞིན་ཡང་དག་པ་དང་ཡང་མ་དག་པ། བདེན་པོ་དང་རྫུན་མའི་བར་གྱི་འགལ་ཟླ་ཞིག་ཡིན་སྟབས། དེའི་ཐོག་ལ་༧གོང་ས་༧སྐྱབས་མགོན་ཆེན་པོ་མཆོག་ནས་བོད་རྒྱ་གཉིས་འགྲིག་འཇགས་ཡོང་ཐབས་སུ་བདེན་པ་དང་འཚེ་བ་མེད་པ་གཉིས་དེ་གཞི་རྟེན་དུ་བསྟན་གནང་ཡོད་པས། བདེན་པ་དང་འཚེ་བ་མེད་པ་གཉིས་ལས་ལྷག་པའི་ཐབས་བྱུས་གཞན་ཞིག་མེད་པ་གསུངས་གནང་སོང་། དེ་བཞིན་བོད་དོན་ཞུ་གཏུགས་གནང་ཕྱོགས་སྐོར་དང་འབྲེལ་ནས་ སྐུ་ཞབས་ ཀི་ཤཱན་ཀ་པུར་ ལགས་ཀྱིས་གསུངས་དོན།
བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་གིས་བོད་ཀྱི་གནད་དོན་འདི་རྒྱལ་སྤྱིའི་སྟེང་བསླེབ་ཐབས་ཆེད་དུ་གཞོན་སྐྱེས་ཀྱི་དང་བླང་ལས་འགུལ་རུ་ཁག་ཞིག་གསར་འཛུགས་གནང་བར་བསྔགས་བརྗོད་ཡོད་པ་དང་། འཛམ་གླིང་གི་ལོ་རྒྱུས་ནང་གཞོན་སྐྱེས་ཀྱིས་འཐབ་རྩོད་བྱས་པ་ལས་རང་དབང་ཐོབ་པ་མང་པོ་བྱུང་ཡོད་པ་བཞིན། བོད་ཀྱི་གནད་དོན་འདི་ཡང་དེ་མཚུངས་དེ་ཡིན་པ་དང་། དེ་བཞིན་རྒྱ་གར་དང་བོད་གཉིས་ཀྱི་བར་ལ་ལོ་རྒྱུས་རང་བཞིན་པའི་ལྡན་པའི་འབྲེལ་བ་ཡོད་པ། རྒྱ་གར་སྲིད་བློན་ཎ་རེན་དྷར་མོ་དྷི་མཆོག་ནས་རྒྱ་ནག་གི་ནོར་འཁྲུལ་ཅན་གྱི་སྲིད་བྱུས་ཐེར་འདོན་བྱས་ན་འོས་བབ་ཡིན་པ་ཡང་གསུངས་གནང་སོང་།
དེ་དང་ཕྱོགས་མཚུངས་ད་རེས་ཀྱི་བོད་དོན་ཞུ་གཏུགས་ལས་འགུལ་སྤེལ་ཕྱོགས་ཐབས་བྱུས་ཚོགས་འདུ་དང་ཟབ་སྦྱོང་འདི་བཞིན་དེ་རིང་ནས་ཉིན་གྲངས་གཉིས་དང་ཕྱེད་ཀའི་རིང་འཚོགས་གནང་རྒྱུ་ཡིན་པ་དང་། ཉིན་གྲངས་དེ་དག་རིང་ཚོགས་བཅར་བ་རྣམ་པར་ངོ་སྤྲོད་བྱེད་སྒོ་གཙོ་བོ་གང་དང་གང་གནང་རྒྱུ་ཡིན་པའི་སྐོར་ལ། བོད་དོན་དང་བླངས་ཞུ་གཏུགས་ལས་འགུལ་འགན་འཛིན་འབྲུག་བསྟན་སྐྱིད་ལགས་ཀྱིས་ལས་འགུལ་སྐབས་བོད་མིའི་སྒྲིག་འཛུགས་ལམ་སྟོན་ལྟར་འཚེ་བ་མེད་པའི་ཐོག་ནས་བསྒྲུབ་དགོས་པ་དང་། ས་གནས་ཡུལ་ཁྲིམས་དང་བསྟུན་དགོས་པ། དང་བླངས་ལས་འགུལ་ལ་དམིགས་བསལ་གྱི་རྒྱས་བཅད་མེད་ལ། ཡུལ་དུས་གནས་སྟངས་ལ་གཞིགས་པའི་ཞུ་གཏུགས་ཁག་ས་གནས་ས་ཐོག་གིས་མིས་གནང་དགོས་པའི་བྱེད་སྒོ་ལམ་སྟོན་སོགས་གནང་རྒྱུ་ཡིན་པ་ངོ་སྤྲོད་གནང་སོང་།
གཞན་ཡང་ད་རེས་ཀྱི་ཟབ་སྦྱོང་འདིའི་ཐོག་རྒྱ་གར་གྱི་ས་གནས་ཁག་བཅུ་ནས་ཁྱོན་ཚོགས་བཅར་བ་གྲངས་སུམ་ཅུ་སོ་ལྔ་མཉམ་བཞུགས་གནང་ཡོད་པའི་ཁོངས་ནས་ཚོགས་བཅར་བ་རེ་ཟུང་ལ་བོད་དོན་ཞུ་གཏུགས་ལས་འགུལ་ཐབས་བྱུས་ཀྱི་ཚོགས་འདུ་དང་ཟབ་སྦྱོང་འདིའི་ཐོག་མཉམ་བཞུགས་གནང་དགོས་དོན་སྐོར་ལ་ལྡི་ལི་ནས་བསྟན་འཛིན་ཉི་སྒྲོན་ལགས་ཀྱིས་བོད་པ་ཡིན་ཕྱིན་ཆད་བོད་དོན་ལས་འགུལ་ལ་མཉམ་བཞུགས་བྱེད་དགོས་པས། ཟབ་སྦྱོང་འདིའི་ཐོག་ནས་བྱེད་ཐབས་གསར་པ་ཤེས་ཐུབ་པའི་རེ་བ་དང་། དེ་བཞིན་སྦེང་ལོར་ནས་བསྟན་འཛིན་སྒྲོལ་དཀར་ལགས་ཀྱིས་དེ་སྔ་ཁོང་ལ་བོད་དོན་ལ་རྒྱུས་ལོན་ཡོང་བར་གཅིག་ནས་དུས་ཚོད་མེད་པ་དང་། གཉིས་ནས་བོད་པའི་ཁོར་ཡུག་ནང་མཉམ་བཞུགས་མ་བྱུང་སྟབས། ད་ཁོར་མོར་གོ་སྐབས་དེ་དག་ཡོད་རྐྱེན་བོད་དོན་ལས་འགུལ་ལ་དོ་སྣང་བསླེབས་ཡོད་པ་གསུངས་གནང་སོང་།
གཞི་རྩའི་དང་བླངས་བོད་དོན་ཞུ་གཏུགས་ལས་འགུལ་དེ་བཞིན་བོད་མིའི་རང་དབང་སླར་གསོའི་ལས་འགུལ་ཆེད་བཀའ་ཤག་སྐབས་བཅུ་དྲུག་པས་བོད་མི་གནས་སྡོད་རྒྱལ་ཁབ་གང་སར་གནས་ཡུལ་ས་གནས་སུ་དང་བླངས་ཀྱིས་ཐོག་ནས་བོད་དོན་ཞུ་གཏུགས་ཆེད་དུ་གསར་འཛུགས་གནང་བའི་ལས་འགུལ་བའི་ཚོགས་པ་ཁག་ཡིན་ཅིང་། དེ་ཡང་ལས་འགུལ་དེའི་ཐོག་ནས་བོད་ནང་གི་གནས་སྟངས་ཇེ་ཞན་ཇེ་སྡུག་དུ་འགྲོ་བཞིན་པ་གོ་རྟོགས་ཀྱིས་རྒྱལ་སྤྱིའི་སྤྱི་ཚོགས་ཁག་ནས་བོད་དོན་རྒྱབ་སྐྱོར་འཚོལ་ཐབས་བྱེད་རྒྱུ་དེ་ནི་ལས་འགན་གཙོ་བོ་དེ་ཡིན་པ་དང་། དེ་ཡང་དམིགས་ས་གཙོ་བོ་གཞུང་འཛིན་མི་སྣ་དང་གྲོས་ཚོགས་འཐུས་མི། གསར་འགྱུར་བརྒྱུད་ལམ། བསམ་མཛོད་བསྟི་གནས་ཁང་། ཐུགས་སྣང་ཅན་གྱི་སྡེ་ཁག རྒྱ་ཆེའི་མང་ཚོགས་བཅས་ལ་དམིགས་དགོས་པ་ཡིན་པ་རེད་འདུག
