ཨ་རིའི་གྲོས་ཚོགས་ཀྱི་འཐུས་མི་དང་བོད་དོན་ལས་འགུལ་བ་བཅས་ཀྱི་ངོ་རྒོལ་དང་སྐྱོན་བརྗོད་ཤུགས་ཆེ་བྱུང་བའི་རྗེས་ཨ་རིའི་ཚན་རིག་བཟོ་ཚོང་ཁེ་ལས་ཁང་ཐར་མོ་ཧྥི་ཤར་གྱིས་ད་ཆ་བོད་ནང་རིགས་རྫས་བསྡུ་ལེན་ཡོ་ཆས་ཚོང་གཉེར་བྱ་རྒྱུ་མཚམས་འཇོག་བྱས་པའི་གསལ་བསྒྲགས་སྤེལ་ཡོད་པ་རེད།
རྒྱ་ནག་གཞུང་གིས་བོད་གཙོས་རྒྱའི་བཙན་འོག་ཏུ་ཡོད་པའི་གྲངས་ཉུང་མི་རིགས་ཁག་ལ་སྟངས་འཛིན་དོ་དམ་བྱེད་བདེར་གཏོང་ཆེད་མིའི་རིགས་རྫས་བསྡུ་ལེན་གྱི་ལས་གཞིར་མཁོ་བའི་ དབྱིན་སྐད་དུ་ DNA Collection Kits ཚོང་གཉེར་བྱེད་མཁན་ཨ་རིའི་ཚན་རྩལ་བཟོ་ཚོང་ཁེ་ལས་ ཐར་མོ་ཧྥི་ཤར་ལ་ རྒྱལ་སྤྱིའི་བོད་དོན་ལས་འགུལ་ཁང་དང་། རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པ། བོད་གནས་ལྟ་ཞིབ་ཁང་གིས་གཙོས་ཨ་རིའི་གྲོས་ཚོགས་སོགས་ནས་ངོ་རྒོལ་དང་སྐྱོན་བརྗོད་བྱས་ཡོད་པ་མ་ཟད། ཁེ་ལས་ཁང་དེས་རྒྱ་ནག་ལ་རིགས་རྫས་བསྡུ་ལེན་ལ་མཁོ་བའི་ཡོ་ཆས་མཁོ་སྤྲོད་མཚམས་འཇོག་དགོས་པའི་འབོད་སྐུལ་རིམ་པར་ཞུས་ཡོད་པར་ཉེ་ལམ་ནས་ཁེ་གཉེར་ཁང་དེས་བོད་ནང་རིགས་རྫས་བསྡུ་ལེན་ཡོ་ཆས་ཚོང་གཉེར་མཚམས་འཇོག་བྱས་ཡོད་པ་ཡོངས་བསྒྲགས་གནང་ཡོད་ཅིང་། ཚན་རྩལ་བཟོ་ཚོང་ཁེ་ལས་ཁང་དེས་རིགས་རྫས་བསྡུ་ལེན་ཡོ་བྱས་ཚོང་གཉེར་མཚམས་འཇོག་གནང་བ་དེའི་ཐོག་ནས་བོད་ནང་གི་བོད་མི་ཚོའི་གནས་སྟངས་ལ་འགྱུར་བ་ཇི་ལྟར་འགྲོ་སྲིད་པའི་སྐོར་ལ་འདི་ག་ཨ་རིའི་རླུང་འཕྲིན་ཁང་ནས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་དགྲ་ལྷ་ལགས་སུ་བཅར་འདྲི་ཞུས་པར་ཁོང་གིས། བཙན་བྱོལ་ནང་ཡོད་པའི་བོད་མི་དེ་དག་ནི་གཞིས་ལུས་བོད་མིའི་ཚབ་མཚོན་ཡིན་པ་བཞིན། བཙན་བྱོལ་ནང་གིས་ལས་འགུལ་འདི་ལྟ་བུས་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་གནས་སྟངས་ལ་འགྱུར་བ་ངེས་ཅན་འགྲོ་བཞིན་པ་འདི་ལྟ་བུའི་གྲུབ་འབྲས་ཀྱིས་གཞིས་ལུས་བོད་མི་ཚོར་བརྡ་ལན་ངེས་ཅན་ཞིག་འགྲོ་རྒྱུ་ཡིན་པ་དང་། དེ་དང་ཕྱོགས་མཚུངས་ད་བར་རྒྱ་ནག་གཞུང་གིས་བོད་ནང་བོད་མི་རྒན་དར་གཞོན་གསུམ་གྱི་ལུས་ཐོག་ནས་རིགས་རྫས་བསྡུ་ལེན་གྱི་སྲིད་བྱུས་ལག་བསྟར་བྱས་པ་དེས་བོད་མིའི་རང་དབང་ལ་དོ་ཕོག་དང་། དམིགས་བསལ་དོ་དག་སོ་སོའི་འགྲོ་སྡོད་སྤྱོད་གསུམ་ལ་དོ་དམ་དང་དམ་དྲག་ཇེ་ཆེར་ཕྱིན་ཡོད་པ་གཞིས་ནས་ཕེབས་པའི་བོད་མི་ཚོས་ཡོངས་གྲགས་གསུང་གི་ཡོད་པ་སོགས་སྟན་འཛིན་དགྲ་ལྷ་ལགས་ཀྱིས་མུ་མཐུད་འགྲེལ་བརྗོད་གནང་བྱུང་།
གཞི་རྩའི་ཕྱི་ལོ་ ༢༠༢༢ ཙམ་ནས་རྒྱ་ནག་གཞུང་གིས་པོ་ལི་སིས་བོད་ནང་བོད་མིའི་ལུས་ཐོག་ནས་གཞི་རྒྱ་ཆེ་བའི་རིགས་རྫས་བསྡུ་རུབ་བྱས་པའི་སྙན་ཐོ་ཕྱིར་གྱར་བྱུང་བ་ནས་རིགས་རྫས་བསྡུ་ལེན་གྱི་ཡོ་ཆས་དེ་དག་ཨ་རིའི་ཚན་རྩལ་བཟོ་ཚོང་ཁེ་ལས་ཁང་ཐར་མོ་ཧྥི་ཤར་གྱིས་ཚོང་གཉེར་བྱེད་ཀྱི་ཡོད་པ་ཤེས་རྟོགས་བྱུང་ཡོད་ཅིང་། དེ་ནས་བཟུང་ཚན་རྩལ་བཟོ་ཚོང་ཁེ་ལས་ཁང་དེས་བོད་ནང་རིགས་རྫས་བསྡུ་ལེན་ལ་མཁོ་བའི་ཡོ་ཆས་ཚོང་གཉེར་མཚམས་འཇོག་དགོས་པའི་འབོད་སྐུལ་དང་གནོན་ཤུགས་རིམ་པར་བསླེབས། དེ་ཡང་ལོ་དེའི་ལོ་མཇུག་ཏུ་ཨ་རིའི་གྲོས་ཚོགས་རྒྱ་ནག་ལས་དོན་ཚོགས་ཆུང་གི་ངོས་ནས་ཐར་མོ་ཧྥི་ཤར་གྱི་སྤྱི་ཁྱབ་ མརཀེ་ ཁ་སེ་པར་ ལགས་ཀྱིས་མཚན་ཐོག་ཏུ་ཁེ་གཉེར་ཁང་དེས་བོད་ནང་མིའི་ངོ་ཐག་ཆོད་པའི་རིགས་རྫས་བསྡུ་ལེན་ལ་མཁོ་བའི་ཡོ་ཆས་ཚོང་གཉེར་བྱེད་བཞིན་པར་ཐུགས་འཚབ་ཡོད་པ་དང་། དེ་ཡང་རྒྱ་ནག་གཞུང་གིས་བོད་ནང་ཡོ་ཆས་དེ་དག་བཀོལ་སྤྱོད་བྱེད་སྟངས་ལ་ཁེ་གཉེར་ཁང་དེས་ཞིབ་འཇུགགནང་དགོས་པ་འཁོད་ཡོད་པ་རེད། དེ་བཞིན་རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། བོད་གནས་ལྟ་ཞིབ་ཁང་སོགས་ཀྱིས་ཀྱང་རྣམ་པ་འདྲ་མིན་གྱི་ཐོག་ནས་ཁེ་གཉེར་ཁང་དེས་ཡོ་ཆས་ཚོང་གཉེར་མཚམས་འཇོག་དགོས་པའི་ངོ་རྒོལ་གྱི་ལས་འགུལ་རྣམ་པ་འདྲ་མིན་གྱིས་ཐོག་ནས་རིམ་པར་སྤེལ་ཡོད་པ་རེད།
གླེང་སྟེགས།