ཊམ་གྱིས་ཐེ་ཝན་ལ་འཛིན་པའི་སྲིད་ཇུས་བསྒྱུར་ནས་རྒྱ་ནག་དངངས་སྐྲག་ལངས།

༄༅།། ཌོ་ནལ་ཊམ་གྱིས་སྲིད་དབང་བཟུང་བའི་རྗེས་སུ་ཨ་རིའི་ཕྱི་སྲིད་ལྷན་ཁང་གི་དྲྭ་རྒྱའི་ངོས་སུ་ང་ཚོས་ཐེ་ཝན་རང་བཙན་ལ་རྒྱབ་སྐྱོར་བྱེད་ཀྱི་མེད་ཅེས་འཁོད་པའི་ཚིག་འབྲུ་རྣམས་བསུབས། ད་ལྟའི་བར་དུ་ཨ་མི་རི་ཀས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་(PRC)་ཅེས་འབོད་ཀྱི་ཡོད་པའང་རྒྱ་ནག་གཅིག་པུར་བསྒྱུར། ཕྱི་ཟླ་༢་པའི་ཚེས་༢༠་ཉིན་ཨེ་ཤི་ཡའི་དུས་བབ་ཚགས་པར་ལ་གསར་འགྱུར་ཐོན་པ་ལྟར་ན། ཨ་རིའི་གཞུང་ནས་ཐེ་རྒྱ་གཉིས་ཀྱིས་ཞི་བ་དང་བཙན་དྲག་མེད་པར་གནད་དོན་ཐག་གཅོད་བྱ་དགོས། ད་ལྟའི་གནས་བབ་ལ་སུས་ཕྱོགས་གཅིག་རྐྱང་པས་འགྱུར་བ་བཏང་ན་ཨ་མི་རི་ཀས་ངོ་རྒོལ་བྱ་རྒྱུ་ཡིན་ཞེས་ཡིག་འབྲུ་འགའ་ཞིག་བསྣན། ཨ་མི་རི་ཀས་ཐེ་ཝན་ལ་འཛིན་པའི་སྲིད་ཇུས་དེར་འགྱུར་བ་ཕྲན་བུ་བཏང་ཡང་རྒྱ་ནག་ལ་མཚོན་དོན་ཆེན་པོ་ཞིག་ཏུ་གྱུར། རྒྱ་ནག་གཞུང་གིས་ཨ་རིའི་ཕྱི་སྲིད་ལྷན་ཁང་གིས་ཐེ་ཝན་ལ་འཛིན་པའི་སྲིད་ཇུས་ཀྱི་རྗོད་ཚིག་ལ་འགྱུར་བ་ཅུང་ཙམ་བཏང་བ་ནི་ཌོ་ནལ་ཊམ་གྱིས་མཚོ་གླིང་དེར་རྒྱབ་སྐྱོར་བྱ་རྒྱུ་ཤུགས་ཆེ་རུ་གཏང་རྒྱུའི་རྟགས་སུ་བརྩིས།།

རྒྱ་ནག་གཞུང་གིས་ཐེ་ཝན་ནི་སྐམ་ས་ཆེན་མོར་ངོ་ལོག་པའི་ཞིང་ཆེན་ཞིག་ཡིན། མཚོ་འགག་ཕྱོགས་གཉིས་གཅིག་གྱུར་བྱ་དགོས། གལ་སྲིད་དགོས་མཁོ་བྱུང་ན་རྒྱ་ནག་གིས་དམག་བརྒྱབ་ནས་ཐེ་ཝན་དང་སྐམ་ས་ཆེན་མོ་གཉིས་གཅིག་བྱ་རྒྱུ་ཡིན་ཞེས་སྡིགས་ར་བསྐུལ། ཐེ་ཝན་པ་མང་ཆེ་བས་མཚོ་གླིང་དེ་རང་བཙན་རྒྱལ་ཁབ་ཏུ་ཅིག་ཡིན་པའི་འདུ་ཤེས་འཛིན། ཟླ་བ་འདིའི་ཕྱི་ཚེས་༡༣་ཉིན་ཨ་རིའི་ཕྱི་སྲིད་ལྷན་ཁང་གིས་ཐེ་ཝན་ལ་འཛིན་པའི་སྲིད་ཇུས་ཀྱི་རྗོད་ཚིག་ལ་འགྱུར་བ་ཆུང་ཚགས་ཤིག་བཏང་བར་རྒྱ་ནག་དོགས་འདྲོག་ཆེན་པོ་ལངས། རྒྱ་ནག་གིས་ཐེ་ཝན་ལ་དམག་བརྒྱབ་ནས་བཙན་འཛུལ་བྱས་ན་ཨ་མི་རི་ཀས་ལྟད་མོར་བལྟས་ནས་ཟུར་དུ་འདུག་རྒྱུ་མིན་པའི་རྣམ་འགྱུར་ཐོན། སྔ་ལོ་སྲིད་འཛིན་འོས་བསྡུའི་དྲིལ་བསྒྲགས་ལས་འགུལ་སྐབས་སུ་ཌོ་ནལ་ཊམ་གྱིས་ཨ་མི་རི་ཀས་ཐེ་ཝན་ལ་སྲུང་སྐྱོབ་བྱ་དགོས་ན་སྲུང་སྐྱོབ་ཀྱི་གླ་ཡོན་སྤྲོད་དགོས་ཞེས་བསྒྲགས་པར་རྒྱ་ནག་ཧ་ཅང་དགའ་མོས་བྱུང་འདུག

སྲིད་དོན་ཉམས་ཞིབ་པ་ཚོས་ཌོ་ནལ་ཊམ་གྱིས་ཆབ་སྲིད་ལ་འཛིན་པའི་ལྟ་བ་ནི་དངུལ་སྒོར་དང་ཚོང་ལས་ཀྱི་ལྟ་བ་ཞིག་རེད། ཨ་མི་རི་ཀས་ཐེ་ཝན་ལ་འཛིན་པའི་སྲིད་ཇུས་ཀྱི་རིམ་པ་མཐོ་རུ་བཏང་སྟེ་རྒྱ་ནག་ལ་གནོན་ཤུགས་སྤྲོད་རྒྱུ་དང་ཨ་རིའི་ཁེ་ཕན་སྒྲུབ་ཐབས་ཤིག་རེད། ཌོ་ནལ་ཊམ་གྱི་བློན་ཆེན་ལྷན་ཁང་གི་མཐོ་རིམ་ལས་སྣེའི་གྲས་ཀྱི་ཕྱི་སྲིད་དྲུང་ཆེ་མ་ཀོ་རུ་བྷི་ཡོ་དང་རྒྱལ་སྲུང་སློབ་སྟོན་པ་མེཀ་ཝོལ་ཛི་སོགས་ཀྱིས་ཨ་མི་རི་ཀའི་བདེ་འཇགས་ལ་རྒྱ་ནག་ཉེན་ཁ་ཞིག་རེད། རྒྱ་ནག་གིས་ཨ་མི་རི་ཀའི་ཤུགས་རྐྱེན་བཀག་ནས་ཨེ་ཤི་ཡའི་རྒྱལ་ཁབ་ཁག་ལ་རྒྱ་ནག་གི་ཤུགས་རྐྱེན་ཁྱབ་ཐབས་བྱེད་ཀྱི་འདུག་ཅེས་གླེང་། ཨ་མི་རི་ཀས་རྒྱ་ནག་གཅིག་གི་རྩ་དོན་རྒྱུན་འཁྱོངས་དང་མཚོ་འགག་ཕྱོགས་གཉིས་རྒྱ་ནག་གཅིག་གི་ཁོངས་སུ་འདུ་དགོས་པའི་ལངས་ཕྱོགས་ལ་འགྱུར་བ་མེད་ཀྱང་ཨ་རིའི་ཕྱི་སྲིད་ལྷན་ཁང་གི་དྲྭ་ངོས་ནས་ཐེ་ཝན་རང་བཙན་ལ་རྒྱབ་སྐྱོར་མེད་ཅེས་འཁོད་པའི་ཡིག་འབྲུ་རྣམས་བསུབས་པ་ནི་རྒྱ་ནག་ལ་མཚོན་ན་དོགས་ཟོན་བྱ་དགོས་པའི་གནད་དོན་ཞིག་ཡིན་འདུག

ཞི་ཅན་ཕིང་གིས་རྒྱུད་གཅིག་ལམ་གཅིག་གི་འབྲེལ་བ་བཙུགས་ནས་འཛམ་གླིང་ཧྲིལ་པོ་རྒྱ་ནག་གི་ཕྱོགས་སུ་འགུགས་ཐུབ་པའི་རེ་ལྟོས་བཅངས། པྲོག་དབྱིབས་ནད་ཡམས་དུས་སུ་རྒྱ་ནག་གི་དཔལ་འབྱོར་ཉམས། ད་དུང་ཡང་རྒྱ་ནག་གི་དཔལ་འབྱོར་སླར་གསོ་བྱེད་ཐུབ་ཀྱི་མེད་པ་དང་རྒྱ་ནག་གཞུང་གིས་དཔལ་འབྱོར་སླར་གསོའི་སྲིད་ཇུས་ཁག་ཅིག་ལག་ལེན་བསྟར་པར་གྲུབ་འབྲས་མ་ཐོན། ༡༩༤༩་ནས་རྒྱ་ནག་དམར་ཤོག་གི་འགོ་ཁྲིད་ཚོས་ཐེ་ཝན་དང་སྐམ་ས་ཆེན་མོ་གཅིག་གྱུར་བྱ་རྒྱུ་ཡིན་ཞེས་དམ་བཅའ་བཞག ཞི་ཅིན་ཕིང་གིས་ཐེ་ཝན་དང་རྒྱ་ནག་གཉིས་གཅིག་གྱུར་བྱེད་ཐུབ་ན་མའོ་ཙེ་ཏུང་ལྟར་དམར་ཤོག་གི་རླབས་ཆེན་འགོ་ཁྲིད་ཅིག་ཏུ་འགྱུར་རྒྱུར་གདོན་མི་ཟ། རྒྱ་ནག་གིས་མཚོ་འགག་ཕྱོགས་གཉིས་གཅིག་གྱུར་བྱ་རྒྱུར་དམག་དོན་འགྲོ་གྲོན་ཕངས་མེད་གཏོང་མི་ཐུབ་པའི་དཀའ་ངལ་འཕྲད་ཚེ། ཞི་ཅིན་ཕིང་གི་མཚོ་འགག་ཕྱོགས་གཉིས་གཅིག་གྱུར་བྱ་རྒྱུའི་ཕུགས་བསམ་དེ་འགྲུབ་དཀའ།།

ཌོ་ནལ་ཊམ་གྱི་ལས་དུས་དང་པོར་རྒྱ་ནག་གི་དངོས་ཟོག་ལ་སྒོ་ཁྲལ་མ་སྤར་གོང་དུ་ལོ་ཤས་རིང་ཚོང་ལས་ཆ་མཉམ་མེད་པ་དེར་གྲོས་མོལ་བྱས་ཀྱང་དོན་འབྲས་མ་ཟོན། ཟླ་བ་སྔོན་མར་ཌོ་ནལ་ཊམ་གྱིས་ལས་དུས་གཉིས་པར་སྲིད་དབང་བཟུང་བའི་རྗེས་སུ་རྒྱ་ནག་གི་དངོས་ཟོག་ལ་སྒོ་ཁྲལ་བརྒྱ་ཆ་༡༠་སྤར་རྒྱུའི་ཐག་བཅད། ཨ་མི་རི་ཀས་ཐེ་ཝན་ལ་འཛིན་པའི་སྲིད་ཇུས་དེ་ཨ་རིའི་ཚོང་དམག་ལངས་པ་འགྲིག་འཇགས་ཡོང་ཐབས་སུ་ཌོ་ནལ་ཊམ་གྱིས་རིན་གོང་གཏམ་སྤྱད་ལྟ་བུ་ཞིག་ཏུ་བཀོལ་སྤྱོད་བྱེད་ཀྱི་ཡོད་པ་ཡིན་སྲིད། ཌོ་ནལ་ཊམ་གྱིས་རྒྱ་ནག་གིས་དངོས་ཟོག་ལ་སྒོ་ཁྲལ་བརྒྱ་ཆ་༦༠་སྤར་སྲིད་ཅེས་ཉེན་བརྡ་བཏང་ཡོད་པས་རྒྱ་ནག་གི་དཀའ་ངལ་ཆེ་རུ་འགྲོ་ཤས་ཆེ། རྒྱ་ནག་གི་དཔལ་འབྱོར་ནི་ཕྱིར་ཚོང་ལ་ཤུགས་ཆེན་པོ་ཞིག་བརྟེན་ཡོད་པས་སྒོ་ཁྲལ་ཅི་ཙམ་འཕར་ན་རྒྱ་ནག་གི་དངོས་ཟོག་ཕྱི་རྒྱལ་ལ་བཙོང་ས་མེད་པར་ལུས། དེ་ནས་བཟོ་གྲྭ་རྣམས་སྒོ་བརྒྱབ་སྟེ་བཟོ་པ་ཁྲི་ཚོ་མང་པོའི་ལས་ཀ་ཤོར།།

ཕྱི་ཟླ་༢་པའི་ཚེས་༡༩་ཉིན་གཟའ་འཁོར་གསར་འགྱུར་དུས་དེབ་ལ་གནས་ཚུལ་ཐོན་པ་ལྟར་ན། ཐེ་ཝན་གཞུང་གིས་སྲིད་འཛིན་ཌོ་ནལ་ཊམ་ལ་འབྲེལ་བ་ཡག་ཏུ་གཏོང་བར་ཨ་མི་རི་ཀ་ནས་ཨ་སྒོར་དུང་ཕྱུར་བརྒྱ་ཐམ་པའི་མཚོན་ཆ་ཉོ་རྒྱུའི་བསམ་ཞིབ་བྱེད་ཀྱི་འདུག རྒྱ་ནག་གིས་ཐེ་ཝན་ལ་དམག་གིས་སྡིགས་ར་བསྐུལ་རྒྱུ་ཤུགས་ཆེ་རུ་སོང་། ཉེ་བའི་ལོ་ཤས་ཤིག་ནས་ཐེ་ཝན་གཞུང་གིས་རྒྱལ་ཡོངས་ཐོན་སྐྱེད་ཀྱི་རྩ་འབོར་བརྒྱ་ཆ་༢.༥་དམག་དོན་ལ་འགྲོ་གྲོན་བཏང་སྟེ་རྒྱལ་སྲུང་གི་སྟོབས་ཤུགས་རྒྱ་བསྐྱེད། ཨ་མི་རི་ཀས་ཐེ་ཝན་ལ་ཕྱི་འབྲེལ་བཙུགས་མེད་ཀྱང་མཚོ་གླིང་དེའི་བདེ་འཇགས་སྲུང་སྐྱོབ་ལ་མཁོ་བའི་མཚོན་ཆ་མང་ཆེ་བ་འཚོང་གི་ཡོད་པས་ཨ་རི་དང་ཐེ་ཝན་གྱི་བར་དུ་ཚོང་ལས་དམ་ཟབ་ཚུགས། རོ་ཡེ་ཊར་སི་གསར་ཁང་གིས་ཐེ་ཝན་གྱི་ཨ་རི་ནས་ཨ་སྒོར་དུང་ཕྱུར་༧༠་ནས་ཨ་སྒོར་དུང་ཕྱུར་༡༠༠་ཐམ་པས་ཡས་མས་ཤིག་གི་དེང་རབས་ཅན་གྱི་མཚོན་ཆ་ཉོ་རྒྱུའི་གྲོས་སྡུར་བྱེད་ཀྱི་འདུག་ཅེས་གནས་ཚུལ་སྤེལ།།

མིང་འདོན་མ་བྱས་པའི་གཞུང་འབྲེལ་མི་སྣ་ཞིག་གིས་ཐེ་ཝན་གྱིས་ཨ་རི་ནས་མཚོན་ཆ་ཉོ་རྒྱུའི་གྲོས་གཞི་བཏོན་པ་ནི་རྒྱལ་སྲུང་འགྲོ་གྲོན་གཏོང་གི་ཡོད་པ་དང་མཚོ་གླིང་དེའི་བདེ་འཇགས་སྲུང་སྐྱོབ་ལ་འགན་འཁྲི་ལེན་ཡོད་པ་སྟོན་ཐབས་རེད། ཐེ་ཝན་གྱིས་མ་མཐར་ཡང་ཨ་རི་ནས་ཨ་སྒོར་དུང་ཕྱུར་༧༠་ནས་དུང་ཕྱུར་༨༠་ཙམ་གྱི་མཚོན་ཆ་ཉོ་རྒྱུ་ཉག་གཅིག་རེད། ཐེ་ཝན་ལ་ཨ་མི་རི་ཀས་ཡུཀ་རེན་ལ་སྤྲད་པའི་ཧ་མེ་མར་སི་(HIMARS)་མེ་སྒྱོགས་དང་མེ་ཤུགས་འཕུར་མདའ། མཚོ་སྲུང་འཕུར་མདེལ་དགོས་ཀྱི་འདུག་ཅེས་གསར་འགོད་པར་ནང་ཁུལ་གྱི་གནས་ཚུལ་སྤྲད། ཐེ་ཝན་གྱི་རྒྱལ་སྲུང་ལྷན་ཁང་གིས་ཨ་མི་རི་ཀ་ནས་མཚོན་ཆ་རིགས་གང་འདྲ་ཞིག་དང་རིན་འབབ་ཅི་ཙམ་སྤྲད་ནས་ཉོ་འཆར་ཡོད་མེད་ཕྱིར་བསྒྲགས་མ་བྱུང་། ཡིན་ནའང་ཐེ་ཝན་ལ་མཁོ་བའི་མཚོན་ཆ་དང་དམག་དོན་ཡོ་བྱད་ཁག་ཅིག་གི་ཐོ་གཞུང་དུ་བཀོད་ནས་ཨ་མི་རི་ཀར་སྤྲད་ཡོད། ཨ་རི་གཞུང་གིས་མཚོན་ཆ་དེ་རྣམས་ཐེ་ཝན་ལ་བཙོང་དགོས་པའི་གྲོས་སྡུར་བྱེད་ཀྱི་ཡོད་ཅེས་བསྟན།།

དུས་ནམ་ཞིག་ཨ་མི་རི་ཀས་ཐེ་ཝན་ལ་མཚོན་ཆ་བཙོངས་ན་རྒྱ་ནག་གིས་ངོ་རྒོལ་བྱ་རྒྱུ་ཆོས་ཉིད་ཡིན་ཞིང་། ཨ་རིའི་གཞུང་གིས་༢༠༢༠་ལོར་ཐེ་ཝན་ལ་མེ་སྒྱོགས་བཙོང་རྒྱུའི་ཐག་གཅོད་བྱས་པའི་རིམ་པ་དང་པོ་དེ་ན་ནིང་ཕྱི་ཟླ་༡༡་པའི་ནང་དུ་འཕྲོད། ༢༠༡༩་ལོར་ཨ་རིས་ཐེ་ཝན་ལ་ཨེབ་རེམ་རྟགས་ཅན་གྱི་ལྕགས་ཁྲབ་འཁོར་ལོ་༡༠༨་བཙོང་རྒྱུའི་ཐག་གཅོད་བྱས་པ་དེའི་ཁོངས་ནས་ལྕགས་ཁྲབ་འཁོར་ལོ་༣༨་ན་ནིང་ལོ་མཇུག་ཏུ་འཕྲོད། འཇར་མན་གྱི་མར་ཤཱལ་ཐེབས་རྩ་ཁང་གི་ཨིན་རྡོ་ཞི་བདེ་རྒྱ་མཚོའི་འགན་འཛིན་བྷོ་ཎི་གྷེ་ལ་སར་གྱིས་བཤད་པ་ལྟར་ན། ཌོ་ནལ་ཊམ་གྱིས་ཐེ་ཝན་མཚོ་འགག་ཏུ་དམག་འཁྲུག་ལང་སྲིད་པ་འགོག་ཐབས་དང་ཨ་ཐེ་གཉིས་ཀྱི་ཚོང་ལས་ཆ་མཉམ་མེད་པ་སྙོམས་ཐབས། ཐེ་ཝན་གྱི་ཕྱེད་ཁྲིད་དངོས་རྫས་བཟོ་ཚོང་ལས་ཁུངས་ཁག་གིས་ཨ་མི་རི་ཀར་མ་རྩ་བཙུགས་ནས་དེང་རབས་ཀྱི་མཚོན་ཆ་དང་གློག་ཆས་སོགས་ལ་དགོས་མཁོ་ཤིན་ཏུ་ཆེ་བའི་ཕྲེད་ཁྲིད་དངོས་རྫས་རྣམས་བཟོ་རྒྱུའི་ཀུན་སློང་བཅངས་ཡོད་པ་རེད་ཅེས་བཀྲལ།།