༄༅།། ད་ལོ་ཏོག་དབྱིབས་ནད་དུག་གི་སྟབས་ཀྱིས་༧གོང་ས་མཆོག་གི་སྐུའི་འཁྲུངས་སྐར་མཛད་སྒོ་སྔར་རྒྱུན་ལྟར་ཐེག་ཆེན་ཆོས་གླིང་གཙུག་ལག་ཁང་དུ་ཚོགས་ཐུབ་མེད་ཅིང་། གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམས་དང་ལྷན་ཁང་ཁག་གི་དྲུང་ཆེ་རྣམས་ཚང་འཛོམས་ཀྱིས་སྲིད་སྐྱོང་བློ་བཟང་སེངྒེས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་པར་མ་ཟད། ཨ་རིའི་སྲིད་འཛིན་ཟུར་པ་འཇོར་ཇཱི་ཌབ་ལུ་བྷུ་ཤཱི་དང་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་ཕེ་ལོ་སི་གཉིས་གཙོས་རྒྱལ་ཁབ་ཁག་གི་གནད་ཡོད་མི་སྣ་ཚོས་༧གོང་ས་མཆོག་གི་སྐུའི་འཁྲུངས་སྐར་ལ་འཚམས་འདྲི་ཞུས་པའི་བརྙན་འཕྲིན་བསྐུར་པ་རྣམས་བོད་ཀྱི་བརྙན་འཕྲིན་དྲྭ་ལམ་དུ་ཐད་གཏོང་གནང་སོང་།
ད་ནངས་ཞོགས་པར་༧གོང་ས་མཆོག་གིས་ཀྱང་གང་ཉིད་ཀྱི་སྐུའི་འཁྲུངས་སྐར་ལ་འཛམ་གླིང་ཡུལ་གྲུ་གང་ས་ནས་འཚམས་འདྲི་ཞུས་པའི་བརྙན་འཕྲིན་འབྱོར་བ་རྣམས་ལ་གཟིགས་བཞིན་པའི་བརྙན་ཐུང་ཞིག་དགའ་ལྡན་ཕོ་བྲང་གི་ཡིག་ཚང་གིས་འགྲེམ་སྤེལ་གནང་སྟེ་དབུས་བོད་མིའི་སྒྲིག་འཛུགས་ཀྱི་གཞུང་འབྲེལ་མཛད་སྒོའི་ཐོག་ཏུ་གཟིགས་འབུལ་ཞུས་སོང་།
