༢༠༢༤།༡༢།༡༦
ཨ་རིའི་རླུང་འཕྲིན་ཁང་།
༄༅།། རྒྱ་གར་རྒྱལ་ཡོངས་སུ་ཚུགས་པའི་བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཕྲུག་འཛུལ་ཞུགས་བྱེད་མཁན་ཇེ་ཉུང་དུ་ཕྱིན་ཏེ་དཀའ་ངལ་འཕྲད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་༡༢་པའི་ཚེས་༡༦་ཉིན་རྒྱ་གར་གྱི་ཊི་རི་བྷུན་ཚགས་པར་ལ་གནས་ཚུལ་ཐོན་པ་ལྟར་ན། བཙན་བྱོལ་བོད་གཞུང་གིས་རྒྱ་ནག་གཞུང་ནས་བོད་ཀྱི་དགོན་སྡེ་ཁག་ཏུ་གྲྭ་བཙུན་རྣམས་ཆོས་ཞུགས་བྱེད་མི་ཆོག་པའི་དམ་དྲག་བྱས་ཏེ་བོད་ཀྱི་ཆོས་དང་རིག་གཞུང་། མི་རིགས་ཀྱི་ངོ་བོ་རྣམས་རྩ་མེད་གཏོང་གི་འདུག་ཅེས་སྐྱོན་འཛུགས་བྱེད་ཀྱི་ཡོད་ཅིང་། རྒྱ་གར་གྱི་ས་ཐོག་ཏུ་ཆགས་པའི་བཙན་བྱོལ་བོད་མིའི་སློབ་གྲྭ་ཁག་ཏུའང་བོད་ཕྲུག་འཛུལ་ཞུགས་བྱེད་མཁན་ཉུང་དུ་སོང་། དེ་བཞིན་བོད་ཕྲུག་རྣམས་རབ་ཏུ་བྱུང་སྟེ་བྱེས་ཀྱི་དགོན་སྡེ་ཁག་ཏུ་ཆོས་ཞུགས་བྱེད་མཁན་ཡང་དཀོན་དུ་འགྲོ་བཞིན་པའི་གསར་འགྱུར་སྤེལ་འདུག
༡༩༥༩་ལོར་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་བོད་པ་བཙན་བྱོལ་བ་ཚོ་རྒྱ་གར་དུ་བསླེབས་ནས་བཟུང་། སློབ་གྲྭ་དང་དགོན་སྡེ་ཁག བོད་པ་བཙན་བྱོལ་བ་ཚོར་གཞིས་ཆགས་ལོགས་སུ་བཙུགས་ནས་བོད་དོན་འཐབ་རྩོད་ཀྱི་ལས་འགུལ་རྒྱུན་འཁྱོངས། བོད་ཀྱི་ཆོས་དང་རིག་གཞུང་། མི་རིགས་ཀྱི་ངོ་བོ་བཅས་པ་མི་ཉམས་རྒྱུན་འཛིན་དང་འཛམ་གླིང་ཡོངས་སུ་བོད་ཀྱི་ཆོས་རིག་ཁྱབ་སྤེལ་བཏང་སྟེ་བོད་པ་ཚོ་བཙན་བྱོལ་བ་འདྲ་འདྲའི་ནང་ནས་མ་འདྲ་བ་ཞིག་ཏུ་གྱུར། ཉེ་ཆར་དབུས་བོད་མིའི་སྒྲིག་འཛུགས་ཀྱི་ཤེས་ཡོན་ཚོགས་འདུའི་ཐོག་ཏུ་བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཕྲུག་འཛུལ་ཞུགས་བྱེད་མཁན་ཉུང་དུ་འགྲོ་བཞིན་པའི་དཀའ་ངལ་རྣམས་གསལ་སྟོན་བྱུང་ཞིང་། བོད་ནས་རྒྱ་གར་ལ་གྲྭ་རྒྱུན་དང་སློབ་ཕྲུག་ཡོང་ཐུབ་ཀྱི་མེད་པས་བཙན་བྱོལ་བོད་མིའི་སྤྱི་ཚོགས་དེ་ལྟག་ཆུ་ཆད་པའི་རྫིང་བུ་ལྟར་གྱུར་འདུག་ཅེས་གསར་འགྱུར་ཐོན་འདུག
དབུས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ཐར་ལམ་སྒྲོལ་མས་༢༠༡༢་ལོར་བཙན་བྱོལ་བོད་མིའི་སློབ་གྲྭ་ཁག་ཏུ་སློབ་ཕྲུག་༢༣༦༨༤་ཡོད། ༢༠༢༤་ལོར་སློབ་ཕྲུག་༡༣༠༣༥་ལས་མེད་པ་དང་སློབ་ཕྲུག་ཁྲི་ཚོ་༡་ལྷག་ཉུང་དུ་ཕྱིན་འདུག བོད་པའི་སློབ་ཕྲུག་ཉུང་དུ་འགྲོ་དགོས་པའི་རྒྱུ་རྐྱེན་གཙོ་བོ་ཞིག་༢༠༠༨་ལོར་བོད་ས་ཡོངས་སུ་ས་བྱིའི་ཞི་རྒོལ་ཆེན་མོ་ལངས་པའི་རྗེས་སུ་རྒྱ་ནག་གཞུང་གིས་བོད་པ་ཚོ་ཕྱི་ལ་མ་བཏང་བར་བཀག ད་དུང་རྒྱ་བལ་འབྲུག་གསུམ་དུ་གནས་འཁོད་བོད་པ་བཙན་བྱོལ་བ་ཚོ་ནུབ་ཕྱོགས་ཡུལ་གྲུ་ཁག་ཏུ་གཏན་སྡོད་གཞིས་ཆགས་སུ་སྤོས་པ་སོགས་ལ་ཐུག་འདུག་ཅེས་བསྟན། དེ་བཞིན་སྲིད་སྐྱོང་སྤེན་པ་ཚེ་རིང་གིས་གླིང་ཚང་གཞིས་ཆགས་སུ་བོད་པ་བཙན་བྱོལ་བའི་གྲས་སུ་རབ་ཏུ་བྱུང་སྟེ་དགོན་སྡེ་ཁག་ཏུ་ཆོས་ཞུགས་བྱེད་མཁན་ཧ་ཅང་ཉུང་ཉུང་རེད། བྱེས་ཀྱི་བོད་པའི་དགོན་སྡེ་ཁག་གི་གྲྭ་བཙུན་མང་ཆེ་བ་ཧི་མ་ལ་ཡའི་ལྗོངས་ཀྱི་མི་རིགས་ཁག་རེད་ཅེས་གཏམ་བཤད་བྱས་འདུག
དེང་སྐབས་བཙན་བྱོལ་བོད་གཞུང་གིས་རྒྱ་གར་དང་བལ་ཡུལ་གཉིས་སུ་སློབ་གྲྭ་༦༢་འཛིན་སྐྱོང་བྱེད་བཞིན་པ་དེ་རྣམས་ཚན་པ་བཞི་རུ་འདུས། དེ་དག་ནི་བོད་ཕྲུག་ཁྱིམ་སྡེ་ཁག་དང་དབུས་གཏན་སློབ་ཁག སམ་བྷོ་ཊ་དང་གངས་སེང་ཐེབས་རྩའི་སློབ་གྲྭ་ཁག་བཅས་ཡིན་ཞིང་། བཙན་བྱོལ་བོད་མིའི་སློབ་གྲྭ་དེ་དག་ནང་དུ་བོད་ཀྱི་སྐད་ཡིག་དང་རིག་གཞུང་གཅེས་འཛིན་གྱི་ཐབས་སུ་འབད། སྔོན་ཆད་བོད་ནས་བསླེབས་པའི་སློབ་ཕྲུག་དང་རྒྱ་གར་བྱང་ཤར་ཁུལ་གྱི་བུ་ཕྲུག་རྣམས་བོད་པ་བཙན་བྱོལ་བའི་སློབ་གྲྭ་ཁག་ཏུ་ཞུགས་ཏེ་ཕྱི་རྒྱལ་གྱི་རོགས་ཚོགས་ཁག་གིས་དཔལ་འབྱོར་རོགས་རམ་སྤྲད། བོད་པ་བཙན་བྱོལ་བའི་སློབ་གྲྭ་ཁག་གིས་ཤེས་ཡོན་སློབ་སྦྱོང་སྤྲད་ནས་གཟེངས་སུ་ཐོན་པའི་གྲུབ་འབྲས་སྨིན། ཉེ་དུས་ཤིག་ནས་རྒྱ་གར་དུ་ཡོད་པའི་བོད་པ་བཙན་བྱོལ་བའི་སློབ་གྲྭ་ཁག་ཉམས་རྒུད་འགྲོ་བཞིན་འདུག་ཅེས་གསར་འགྱུར་སྤེལ་འདུག
ད་ལྟ་ལོ་རེ་བཞིན་བཙན་བྱོལ་བོད་མིའི་སློབ་གྲྭ་ཁག་ཏུ་སློབ་ཕྲུག་ཇེ་ཉུང་དུ་ཕྱིན་པའི་སྟབས་ཀྱིས་དབུས་བོད་མིའི་སྒྲིག་འཛུགས་དང་བཙན་བྱོལ་བོད་མིའི་སློབ་གྲྭ་ཁག་གིས་རང་ཁོངས་ཀྱི་སློབ་གྲྭ་ཁག་ཁུ་བསྡུས་སམ། ཡང་ན་སློབ་གྲྭ་ཟླ་སྒྲིལ་བཏང་སྟེ་འཛིན་གྲྭ་ཇེ་ཆུང་དང་སློབ་ཕྲུག་ལ་སྤུས་ཚད་མཐོ་བའི་ཤེས་ཡོན་སློབ་སྦྱོང་སྤྲོད་རྒྱུ་གཙིགས་སུ་བཟུང་། ཡིན་ནའང་བོད་ཕྲུག་སློབ་གྲྭར་འཇུག་མཁན་ཉུང་དུ་ཕྱིན་པའི་སྟབས་ཀྱིས་བཙན་བྱོལ་བོད་མིའི་སློབ་གྲྭ་ཁག་ཅིག་སྒོ་རྒྱག་དགོས་གྱུར་འདུག དཔེར་ན་རྡ་སའི་བོད་ཕྲུག་ཁྱིམ་སྡེའི་ཁྱབ་ཁོངས་ཀྱི་སློབ་གྲྭ་ཁག་ཅིག་ཁུ་བསྡུས་དང་ཟླ་སྒྲིལ། སློབ་གྲྭ་ཁག་ཅིག་སྒོ་བརྒྱབ། རྡ་རམ་ས་ལའི་བོད་ཕྲུག་ཁྱིམ་སྡེ་ནི་བཙན་བྱོལ་བོད་མིའི་སློབ་གྲྭ་ཆེ་ཤོས་དང་སྔ་ཤོས། སློབ་ཕྲུག་མང་ཤོས། བཙན་བྱོལ་སྤྱི་ཚོགས་ཀྱི་ན་གཞོན་ཤེས་ཡོན་ཅན་སྐྱེད་སྲིང་བྱ་ཡུལ་གཙོ་གྲས་སུ་ཚུད།།
གཟའ་འཁོར་གཉིས་ཙམ་གོང་དུ་ནོར་ཝེ་བོད་ཀྱི་རང་དབང་རླུང་འཕྲིན་ཁང་གིས་རྡ་རམ་ས་ལའི་བོད་ཁྱིམ་ཡིག་ཚང་གི་སྤྱི་ཁྱབ་འགན་འཛིན་བསོད་ནམས་སྲིད་གཅོད་ལ་བཅར་འདྲི་ཞུས་པ་ལྟར་ན། ༢༠༢༣་ནས་རྡ་ཤོད་བོད་ཁྱིམ་སློབ་གྲྭ་སྒོ་རྒྱག་རྒྱུའི་ཐག་གཅོད་བྱུང་མོད། འོན་ཀྱང་ཤེས་ཡོན་ཚོས་ཆེན་ཐོག་ཏུ་རྡོ་ཤོད་བོད་ཁྱིམ་སློབ་གྲྭ་གནས་སྐབས་རིང་སྒོ་མ་བརྒྱབ་པར་འཇོག་དགོས་པར་མ་ཟད། འཛིན་རིམ་གསུམ་པ་ནས་ལྔ་པའི་བར་དུ་ཡོད་པ་རྣམས་སོར་འཇོག་བྱ་དགོས། དེའི་སྟེང་དུ་ནུབ་ཕྱོགས་ཡུལ་གྲུ་ཁག་ཏུ་གནས་འཁོད་ཕ་མ་ཚོས་རང་གི་བུ་ཕྲུག་རྣམས་རྒྱ་གར་དུ་བཏང་སྟེ་བོད་ཡིག་དང་བོད་སྐད། བོད་པའི་རིག་གཞུང་དང་མི་རིགས་ཀྱི་གོམས་གཤིས་བཟང་པོ་རྣམས་སློབ་སྦྱོང་ཐོབ་ཏུ་འཇུག་འདོད་ཡོད་ཚེ། བུ་ཕྲུག་དེ་རྣམས་རྡོ་ཤོད་བོད་ཁྱིམ་སློབ་གྲྭར་གཏང་ཆོག་པའི་མཐུན་རྐྱེན་བསྐྲུན། ཡིན་ནའང་ཕྱི་རྒྱལ་ཡུལ་གྲུ་ཁག་ནས་ཕྲུ་གུ་༦་ལས་རྡ་ཤོད་སློབ་གྲྭ་འཛུལ་ཞུགས་མ་བྱུང་། དེར་བརྟེམ་ད་ལོའི་དགུན་ཁའི་གུང་སེང་རྗེས་ནས་རྡོ་ཤོད་བོད་ཁྱིམ་སློབ་གྲྭ་སྒོ་རྒྱག་རྒྱུའི་ཐག་གཅོད་བྱས་འདུག
གླེང་སྟེགས།