༄༅།། ཕྱི་ཟླ་༣་པའི་ཚེས་༢༢་ཉིན་བོད་པ་ཚེ་རིང་ཡེ་ཤེས་དང་འཆི་མེད་རྟ་མགྲིན་རྣམ་གཉིས་ཀྱིས་བཞུགས་སྒར་རྡ་རམ་ས་ལ་ནས་འགོ་འཛུགས་ཀྱིས་རྒྱ་གར་རྒྱལ་ཡོངས་སུ་བོད་དོན་དྲིལ་བསྒྲགས་ཀྱི་འཕྲུལ་རྟའི་སྐོར་སྐྱོད་ལས་འགུལ་ཞིག་མགོ་བརྩམས་ཡོད་ཅིང་། དེ་རིང་ཁོ་ཚོས་རྒྱ་གར་བྱང་ཕྱོགས་ཀྱི་ཅན་དྷི་གྷར་གྲོང་ཁྱེར་དུ་གསར་འགོད་ལྷན་ཚོགས་ཤིག་བསྐོངས་ཏེ་ལས་འགུལ་དེའི་དགོས་འདུན་གཙོ་བོ་སྟེ། ༧གོང་ས་ཏཱ་ལའི་བླ་མ་མཆོག་ལ་རྒྱ་གར་གཞུང་གིས་བྷ་ར་ཏ་རཏྣ་ཞེས་པའི་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་དེ་འབུལ་དགོས་ཞེས་མི་དམངས་ཀྱི་མིང་རྟགས་བསྡུ་རུབ་བྱས་ནས་སྲིད་བློན་མོ་དྷིར་འབུལ་རྒྱུའི་དགོས་འདུན་དེ་ཕྱིར་བསྡུ་བྱས་པ་ཡིན་ཞེས་གསལ་བསྒྲགས་སྤེལ་འདུག
གསར་འགོད་པས་གནད་དོན་འདིར་དགའ་ལྡན་ཕོ་བྲང་གི་དྲུང་ཡིག་ཆེན་མོ་འཆི་མེད་རིག་འཛིན་ལ་དེའི་སྐོར་བཀའ་འདྲི་ཞུས། ཁོང་གིས་བོད་པའི་གཞོན་སྐྱེས་གཉིས་ཀྱིས་བོད་དོན་འཐབ་རྩོད་ཆེད་དུ་དགོངས་པ་བཞེས་ཕྱོགས་དང་སེམས་ཤུགས་འཁྱེར་སྟངས་ལ་བསྔགས་བརྗོད་གནང་ཡོད་ཅིང་། ཁོང་ལ་རྒྱ་གར་གྱི་གནད་ཡོད་མི་སྣ་ཁག་དང་ཤེས་ཡོན་ཅན། དེ་བཞིན་མང་ཚོགས་བཅས་ལ་བྷ་ར་ཏ་རཏྣ་གཟེངས་རྟགས་༧གོང་ས་ཏཱ་ལའི་བླ་མ་མཆོག་ལ་འབུལ་དགོས་པའི་འབོད་སྐུལ་ཞུས་ཡོད་མེད་དྲིས་པར་གཟེངས་རྟགས་སུ་ལ་འབུལ་དགོས་མིན་ནི་རྒྱ་གར་གཞུང་དམངས་གཉིས་ཀྱིས་དགོངས་པ་བཞེས་དགོས་པ་ཞིག་རེད་ཅེས་ལན་འདེབས་གནང་བྱུང་།།
བོད་དོན་ལས་འགུལ་བ་ཚེ་རིང་ཡི་ཤེས་དང་འཆི་མེད་རྟ་མགྲིན་རྣམ་གཉིས་ཀྱིས་རྒྱ་གར་བྱང་ཕྱོགས་ཅན་དྷི་གྷར་གྲོང་ཁྱེར་དུ་གསར་འགོད་ལྷན་ཚོགས་ཤིག་བསྐོངས་ཏེ་རྒྱ་གར་གཞུང་གིས་རྒྱ་གར་དུ་ཅ་དངོས་བཟོ་སྐྲུན་བྱ་དགོས་ཞེས་པའི་སྲིད་ཇུས་ལམ་ལྷོངས་ཡོང་བར་རྒྱ་གར་མི་དམངས་ཀྱིས་རྒྱ་ནག་གི་ཅ་དངོས་བེད་སྤྱོད་བྱ་རྒྱུ་མཚམས་འཇོགས་བྱེད་དགོས་པའི་ལས་འགུལ་སྤེལ་གྱི་ཡོད། ཁོ་ཚོས་ཐེངས་འདིའི་ལས་འགུལ་དེའི་དགོས་འདུན་གཅིག་ཕྱིར་བསྡུ་ཞུས་ཀྱང་བོད་དོན་དྲིལ་བསྒྲགས་ཆེད་དུ་རྒྱ་གར་རྒྱལ་ཡོངས་སུ་སྐོར་སྐྱོད་བྱ་རྒྱུའི་འཆར་གཞིར་འགྱུར་བ་མེད་ཅེས་ཁྱབ་བསྒྲགས་བྱས་ཡོད་པ་བཅས་ཀྱི་སྐོར། བཞུགས་སྒར་རྡ་རམ་ས་ལ་ནས་ཨ་རིའི་རླུང་འཕྲིན་ཁང་གི་གསར་འགོད་པ་བསྟན་འཛིན་བཟང་མོ་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
