༄༅།། ཕྱི་ཟླ་གསུམ་པའི་ཚེས་༡༥་ཉིན་ནས་འགོ་ཚུགས་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་ནི་སྔོན་རྩིས་ཀྱི་གྲོས་ཚོགས་ཤིག་ཡིན་རུང་ཕྱི་ཚེས་༢༥་ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་གཞུང་འབྲེལ་གྲོས་གཞི་ཞིག་བཏོན་ནས་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་འཕོ་འགྱུར་བཏང་སྟེ་གྲོས་ཚོགས་ཀྱི་གྲོས་གཞི་ལ་མང་ཚོགས་ཀྱི་དོ་སྣང་ཆེན་པོ་བྱུང་སྟེ་གྲོས་ཆོད་དེར་འབྲེལ་བ་ཡོད་པའི་བཅའ་ཁྲིམས་ཁག་ཅིག་ལ་སྒྱུར་བཅོས་བཏང་སོང་། རེས་གཟའ་སྤེན་པའི་ཉིན་གྲོས་ཚོགས་ཚོགས་ཀྱི་དུས་མཐའ་མ་དེར་གྲོས་ཚོགས་སུ་གྲོས་སྡུར་བྱུང་བའི་ཁྲིམས་སྒྲིག་སྐྱར་བཅོས་ཁག་གི་བརྗོད་པ་གསུམ་པའི་ཐོག་ཏུ་དེ་སྔོན་ཆེས་མཐོའི་ཁྲིམས་ཞིབ་ཁང་གིས་བོད་མི་མང་སྤྱི་འཐུས་ལྷན་ཚོགས་ཀྱིས་ཚོགས་དུས་བཅུ་པ་ཕར་འགྱངས་བྱས་པ་འགལ་འཛོལ་བྱུང་འདུག་ཅེས་བཀོད་པའི་བཅའ་ཁྲིམས་དོན་ཚན་༤༠་པར་འགྱུར་བ་བཏང་སོང་།།
གཞན་ཡང་ཆེས་མཐོའི་ཁྲིམས་ཞིབ་ཁང་གིས་ཕྱི་ལོ་༢༠༡༩་ལོར་རྩ་འཛིན་ཁྲིམས་ཡིག་ཏུ་ཁྲིམས་ཀྱི་ངོས་བཞེས་དང་འབྲེལ་བའི་དོན་ཚན་༦༩་པའི་ནང་གསེས་ཏ་པ་གསར་འཇུག་གིས་གྲོས་ཚོགས་སུ་ངོ་བཤུས་ཕུལ་ཏེ་བཅའ་ཁྲིམས་དོན་ཚན་༦༧་པ་གཞིར་བཟུང་ལག་བསྟར་གསར་འཇུག་བྱ་རྒྱུའི་གནད་དོན་དེ་བཅའ་ཁྲིམས་སུ་འཁོད་ཡོད་མེད་གླེང་སློང་བྱུང་ཞིང་། གྲོས་ཚོགས་སུ་བཅའ་ཁྲིམས་དོན་ཚན་༦༦་པའི་ཁྲིམས་ཞིབ་ཁང་གི་སྐུ་དབང་དང་༦༧་པ་རྩ་འཛིན་ཁྲིམས་ཡིག་དང་སྒྲིག་གཞི་བཅས་ལ་སྐྱར་བཅོས་ཀྱི་གྲོས་གཞི་བཏོན་ནས་དོན་ཚན་༦༧་པར་འགྱུར་བ་སོང་། སྔོན་མ་གཏན་འབེབས་ཟིན་པའི་རྩ་འཛིན་ཁྲིམས་ཡིག་ཁག་ཀྱང་གྲོས་ཚོགས་ཀྱིས་བཀའ་ཁྲོལ་གཏན་འབེབས་ཞུ་དགོས་པར་གྱུར་སོང་།།
བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་འཕོ་འགྱུར་བཏང་བ་དེས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས་ཀྱིས་གཙོས་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན། དེ་བཞིན་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དང་ཚོགས་མི་རྣམས་པ། རྩིས་ཞིབ་ལས་ཁང་གི་སྤྱི་ཁྱབ་རྩིས་ཞིབ་པ་བཅས་པའི་ས་མིག་སྟོང་པ་འཐོན་ཚེ། འདེམས་སྒྲུག་ཚོགས་ཆུང་ཁག་གི་ཚོགས་མི་བསྐོ་བཞག་བྱེད་མཁན་གྱི་ཚོགས་ཆུང་བཅས་པར་ཁྲིམས་ཞིབ་པ་ཆེ་བ་དང་སྲིད་སྐྱོང། དེ་བཞིན་བོད་མི་མང་སྤྱི་འཐུས་ཚོགས་གཙོ་ཚོགས་གཞོན་བཅས་པ་ངེས་པར་དུ་ཚང་དགོས་པས་ཁྲིམས་ཞིབ་པ་ཆེ་བ་འཕོ་འགྱུར་བཏང་བ་དེས་གྲུབ་ཆ་དེ་ཚང་མེད་པར་འགྱུར་བཏང་བར་མ་ཟད། དེ་དང་འབྲེལ་བའི་བཅའ་ཁྲིམས་དོན་ཚན་བཞི་ལ་འགྱུར་བ་ཕྱིན་སོང་།།
སྔ་ལོ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པ་ཏོག་དབྱིབས་ནད་དུག་ཁྱབ་བརྡལ་གྱི་དམ་དྲག་འགོ་འཛུགས་བྱུང་བའི་སྐབས་སུ་ཚོགས་དགོས་ཀྱང་ཉིན་གྲངས་གཅིག་ལས་ཚོགས་མ་ཐུབ། དེའི་སྐབས་སུ་ཡུ་རོབ་ཀྱི་སྤྱི་འཐུས་ཤིག་སྐབས་བརྒྱད་པའི་ཚོགས་དུས་སུ་བཅར་མ་ཐུབ་པའི་དབང་གིས་ཚོགས་དུས་གཉིས་བསྟུད་མར་ཆད་དེ་སྤྱི་འཐུས་ནས་འཕོས། སྐབས་བཅུ་པའི་གྲོས་ཚོགས་སུ་ཨོ་གླིང་རྒྱལ་ཁབ་ཏུ་གནས་འཁོད་སྤྱི་འཐུས་གཉིས་ཕེབས་ཐུབ་མེད་པས་གྲོས་ཚོགས་མ་འཚོགས་གོང་དུ་དོ་བདག་སོ་སོར་འཕོ་འགྱུར་གཏོང་སྲིད་པའི་གླེང་སློང་བྱུང་། ཡིན་ནའང་ཐེངས་འདིའི་གྲོས་ཚོགས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་སྒྲུབ་ཕྱོགས་ཀྱི་དོན་ཚན་༧༨་པའི་ནང་གསེས་༣་པར་འགྱུར་བ་ཞིག་བཏང་ནས་སྤྱི་འཐུས་དེ་དག་འཕོས་མ་སོང་།།
བོད་མི་མང་སྤྱི་འཐུས་ལྷན་ཚོགས་ཀྱི་མཚན་མཐོང་དོད་དང་ཉིན་རེའི་ལས་དོད། ཐོབ་ཐང་གཞན་དག་བཅས་ཀྱི་སྒྲིག་གཞི་ཁག་ཅིག་དང་བཙན་བྱོལ་བོད་མིའི་གཞུང་དངུལ་འདུ་འགོད། ལོ་འཁོར་སྔོན་རྩིས་དང་དངུལ་རྩིས་སྟངས་འཛིན་བཅས་ཀྱི་སྒྲིག་གཞི་གཅིག་བཅས་ལའང་སྐྱར་བཅོས་བཏང་ཞིང་། གྲོས་ཚོགས་ཀྱིས་ཁྲིམས་ཞིབ་པ་གསུམ་འཕོ་འགྱུར་བཏང་བའི་གནད་དོན་ཐད་མང་ཚོགས་ཀྱིས་སྐྱོན་བརྗོད་ཞུ་མཁན་ཤུགས་ཆེན་བྱུང་རྗེས་གནད་དོན་དེ་དང་འབྲེལ་བའི་བཅའ་ཁྲིམས་སྐྱར་བཅོས་སྐབས་སུ་གྲོས་ཚོགས་འཐུས་མི་རྣམས་ལ་སྔོན་གྱི་ཐག་གཅོད་ཕྱིར་བསྡུ་བྱ་དགོས། སྤྱི་འཐུས་ལྷན་ཚོགས་ཀྱིས་ནོར་འཁྲུལ་བྱས་ན་འཕོ་འགྱུར་གཏོང་སའི་ཐབས་ལམ་མི་འདུག དེ་ལྟ་བུའི་ཁྲིམས་ཤིག་ཀྱང་བཅའ་ཁྲིམས་སུ་གསར་འཇུག་བྱ་དགོས་གྲོས་གཞི་བཏོན་པ་སོགས་ལ་གྲོས་སྡུར་བྱུང་སྟེ་རེས་གཟའ་སྤེན་པའི་ཉིན་ཚོགས་གཙོའི་མཇུག་སྡོམ་གསུང་བཤད་དུ་སྒེར་གྱི་གཟིགས་ཚུལ་ལྟར་གསུངས་སོང་། བོད་མི་མང་སྤྱི་འཐུས་ལྷན་ཚོགས་ཀྱིས་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་འཕོ་འགྱུར་བཏང་བ་དེས་ཕྱི་ཟླ་ལྔ་པའི་ཟླ་མཇུག་ཏུ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་བར་བརྒལ་ཚོགས་གཙོ་དང་སྲིད་སྐྱོང་བཅས་པར་དམ་བཅའ་འབུལ་ཡུལ་ཁྲིམས་ཞིབ་པ་ཆེ་བ་ངེས་པར་དུ་བསྐོ་བཞག་ཟིན་པ་དགོས་ཀྱི་ཡོད་པས་དེ་སྔོན་ལ་གྲོས་ཚོགས་འཕར་མ་ཞིག་ཚུགས་གཏན་ཁེལ་ཏེ་ཕྱི་ཟླ་ལྔ་པའི་ནང་འཚོགས་སྲིད་པ་བཅས་ཀྱི་སྐོར། བཞུགས་སྒར་རྡ་རམ་ས་ལ་ནས་ཨ་རིའི་རླུང་འཕྲིན་ཁང་གི་གསར་འགོད་པ་བསྟན་འཛིན་བཟང་མོ་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
