རྒྱ་ནག་གིས་ཡར་ཀླུང་གཙང་པོ་བཀག་སྟེ་རྒྱ་གར་ལ་དཀའ་ངལ་འཕྲད་ཤས་ཆེ།

༄༅།། རྒྱ་ནག་གིས་ཡར་ཀླུང་གཙང་པོ་བཀག་སྟེ་ཆུ་ཤུགས་གློག་ཁང་ཆེ་ཤོས་དེ་འཛུགས་སྐྲུན་བྱ་རྒྱུའི་ཐག་བཅད། མ་འོངས་པའི་དུས་སུ་རྒྱ་གར་དང་བངྒ་ལ་གཉིས་ལ་ཡར་ཀླུང་གཙང་པོའི་ཆུ་རྒྱུན་ཆད་ནས་དཀའ་ངལ་འཕྲད་རྒྱུའི་གནས་ཚུལ་ཐོན་འདུག ཕྱི་ཟླ་༡༢་པའི་ཚེས་༢༦་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་ཡར་ཀླུང་གཙང་པོ་བཀག་སྡེ་འཛམ་གླིང་གི་ཆུ་ཤུགས་གློག་ཁང་ཆེ་ཤོས་དེ་འཛུགས་སྐྲུན་བྱ་རྒྱུའི་ཆོག་མཆན་བཀོད། ༢༠༢༠་ལོར་རྒྱ་ནག་གི་གློག་ཁང་འཛུགས་སྐྲུན་ལས་ཁུངས་ཀྱིས་ཡར་ཀླུང་གཙང་པོའི་ཆུ་ཤུགས་གློག་ཁང་དེ་ལེགས་འགྲུབ་བྱུང་ན་ལོ་རེར་གློ་ཚད་KWh་ཐེར་འབུམ་༣༠༠་རེ་མཁོ་འདོན་ཐུབ་རྒྱུའི་ཚོད་དཔག་བྱས་འདུག དེང་སྐབས་རྒྱ་ནག་གི་འབྲི་ཆུའི་འགག་གསུམ་གྱི་ཆུ་ཤུགས་གློག་ཁང་ཆེན་མོ་ནི་འཛམ་གླིང་གི་ཆུ་ཤུགས་གློག་ཁང་ཆེ་ཤོས་དེ་ཡིན་ཞིང་། གློག་ཁང་དེ་ནས་ལོ་རེར་གློག་ཚད་KWh་ཐེར་འབུམ་༨༨་རེ་མཁོ་འདོན་བྱེད་ཀྱི་ཡོད་པའི་གནས་ཚུལ་ཐོན་འདུག

ཁ་སང་གཟའ་ལྷག་པའི་ཉིན་རྒྱ་ནག་གི་ཞིན་ཧྭ་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡར་ཀླུང་གཙང་པོའི་ཆུ་ཤུགས་གློག་ཁང་ནས་ཐོན་རྒྱུ་ཡིན་པའི་གློག་དེས་མཁའ་རླུང་འབག་བཙོག་མེད་པ་དང་རྒྱ་ནག་གི་གློག་གི་འབྱུང་ཁུངས་རྡོ་སོལ་མིན་པའི་རང་བྱུང་ནུས་ཤུགས་ལ་བསྒྱུར་རྒྱུའི་ཕུགས་བསམ་བཅངས་ཡོད་པ་མངོན་དུ་འགྱུར་བར་ལེགས་སྐྱེས་ཆེན་པོ་ཞིག་འབུལ་ངེས་རེད། དེ་བཞིན་རྒྱ་ནག་གི་བཟོ་བཀོད་དང་འཛུགས་སྐྲུན་ཚན་པ་ཁག་གི་བཟོ་པ་ཁྲི་ཚོ་མང་པོར་ལས་ཀ་བཀོད་སྒྲིག་བྱེད་ཐུབ་ཅེས་བསྒྲགས། ཡར་ཀླུང་གཙང་པོའི་ཆུ་རྒྱུན་ཀྱི་སྤྱི་ལེ་༥༠་ཐམ་པའི་ནང་ཚུད་དུ་གཏིང་ཚད་མཱི་ཊར་༢༠༠༠་ཅན་གྱི་གཡང་གཟར་ཞིག་ཡོད་པ་དེར་ཆུ་ཤུགས་གློག་ཁང་འཛུགས་སྐྲུན་བྱས་ན་ས་བབ་ཀྱི་མཐུན་རྐྱེན་གང་ལེགས་འཛོམས་ཀྱང་འཛུགས་སྐྲུན་འཆར་འགོད་ལ་དཀའ་ངལ་མེད་པའང་མིན། རྒྱ་ནག་གིས་འབྲི་ཆུའི་འགག་གསུམ་གྱི་ཆུ་ཤུགས་གློག་ཁང་ཆེན་མོར་ཨ་སྒོར་ཐེར་འབུམ་༣༤.༨༣་འགྲོ་གྲོན་བཏང་ཡོད་ཅིང་། ཡར་ཀླུང་གཙང་པོའི་ཆུ་ཤུགས་གློག་ཁང་འཛུགས་སྐྲུན་ཆེད་དུ་འགྲོ་གྲོན་ལྡབ་བཞི་མང་བ་གཏང་དགོས་པའི་་ཚོད་དཔག་བྱས་འདུག

རྒྱ་ནག་གིས་འབྲི་ཆུའི་འགག་གསུམ་གྱི་ཆུ་ཤུགས་གློག་ཁང་ཆེན་མོ་འཛུགས་སྐྲུན་བྱས་ཏེ་མི་གྲངས་ས་ཡ་༡་དང་འབུམ་༤་གནས་སྤོས། ཡར་ཀླུང་གཙང་པོའི་ཆུ་ཤུགས་གློག་ཁང་ཆེན་མོ་འཛུགས་སྐྲུན་བྱས་ན་མི་མང་ཅི་ཙམ་གནས་སྤོ་བྱ་དགོས་མིན་གསལ་བསྒྲགས་མ་བྱུང་། ཁོར་ཡུག་ཉམས་ཞིབ་པ་ཚོས་ཡར་ཀླུང་གཙང་པོ་བཀག་ནས་འཛམ་གླིང་འདིར་དཔེ་ཟླ་མེད་པའི་ཆུ་ཤུགས་གློག་ཁང་ཞིག་འཛུགས་སྐྲུན་བྱས་ཚེ། བོད་ཀྱི་སྐྱེ་ཁམས་ལ་གནོད་འཚེ་ཚབས་ཆེན་འཕོག་རྒྱུ་གདོན་མི་ཟ། ཅིའི་ཕྱིར་ཞེ་ན་གློག་ཁང་དེ་འཛུགས་སྐྲུན་བྱེད་པར་ཡར་ཀླུང་གཙང་པོ་ཁ་སྒྱུར་བྱས་ནས་རི་བོ་གནམ་ལྕགས་འབར་བ་བརྟོལ། རི་ཁོག་ཏུ་ཕུག་ལམ་ལྟ་བུའི་རིང་ཚད་སྤྱི་ལེ་༢༠་ཐམ་པའི་ཆུ་ཡུར་ཞིག་འཛུགས་བྱས་ནས་ལྷོ་ཆུ་བྱང་དུ་འདྲེན་དགོས་པ་རེད་ཅེས་བསྟན། པེ་ཅིང་གི་དབང་འཛིན་པ་ཚོས་ཡར་ཀླུང་གཙང་པོའི་ཆུ་ཤུགས་གློག་ཁང་ནས་རྒྱ་ནག་གི་གློག་གི་དགོས་མཁོ་གསུམ་ཆའི་གཅིག་ཐོན་ཐུབ། ཡར་ཀླུང་གཙང་པོའི་སྨད་ཕྱོགས་ཀྱི་རྒྱལ་ཁབ་ཁག་ལ་འཐུང་ཆུ་དང་ཞིང་ཆུ་འདྲེན་གཏོང་ཆད་མི་སྲིད་ཅེས་བསྒྲགས།།

བོད་ཀྱི་ཡར་ཀླུང་གཙང་པོར་རྒྱ་གར་བ་ཚོས་བྲཱམ་པུ་ཏྲ་ཞེས་འབོད། ཆུ་བོ་དེ་རྒྱ་གར་གྱི་ཨ་རུ་ན་ཅལ་མངའ་སྡེ་འམ། མོན་ཡུལ་དང་ཨ་སམ་བརྒྱུད་ནས་བངྒ་ལ་རྒྱལ་ཁབ་ཏུ་འབབ། ཉམས་ཞིབ་པ་ཚོས་རྒྱ་ནག་གིས་ཡར་ཀླུང་གཙང་པོའི་ཆུ་རྒྱུན་བཀག་ན་དབྱར་གྱི་ཚ་ཆའི་དུས་སུ་རྒྱ་གར་དང་བངྒ་ལ་གཉིས་ལ་འཐུང་ཆུ་དང་ཞིང་ཆུ་འདྲེན་གཏོང་དཀོན་དུ་ཕྱིན་ཏེ་རྩི་ཤིང་ནགས་ཚལ་རྣམས་བསྐམས། ཆུ་འགྲམ་གྱི་མི་དང་རི་སྐྱེས་སྲོག་ཆགས་རྣམས་འཚོ་གནས་མ་ཐུབ་པར་རྩ་སྟོང་དུ་སོང་། ཆར་ཞོད་དུས་སུ་རྒྱ་ནག་གིས་ཡར་ཀླུང་གཙང་པོའི་ཆུ་མཛོད་ཀྱི་ཆུ་སྒོ་ཕྱེ་ནས་རྒྱ་གར་དང་བངྒ་ལ་གཉིས་ལ་ཆུ་ལོག་བརྒྱུགས་ཏེ་ས་ཞིང་ཨེ་ཀ་སྟོང་ཕྲག་མང་པོ་བསྣུབས། ཆུ་འགྲམ་གྱི་ཡུལ་མི་ཡ་ས་མང་པོ་ཆགས་ས་རྟེན་ས་མེད་པར་གྱུར། སྲིད་པ་ཆགས་ནས་བཟུང་སྟེ་ཡར་ཀླུང་གཙང་པོའི་ཆུ་རྒྱུན་ལ་བརྟེན་ནས་འཚོ་གནས་བྱེད་བཞིན་པའི་རྒྱ་གར་བ་དང་བངྒ་ལའི་མི་གྲངས་ས་ཡ་མང་པོ་རྒྱ་ནག་གི་སྙིང་རྗེའི་འོག་ཏུ་ཚུད་རྒྱུའི་རྟགས་མཚན་ཞིག་མངོན་ཞེས་གླེང་།།

ཕྱི་ཟླ་༡༢་པའི་ཚེས་༢༦་ཉིན་རྒྱ་གར་གྱི་ཨིན་ཌི་པན་ཌན་ཊི་(The Independent)་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་ཡར་ཀླུང་གཙང་པོ་བཀག་ནས་ཆུ་ཤུགས་གློག་ཁང་ཞིག་འཛུགས་སྐྲུན་བྱ་འཆར་ཡོད་པར་རྒྱ་གར་གྱི་གྲོས་ཚོགས་འཐུས་མི་ཚོས་ངོ་རྒོལ་བྱེད་ཀྱི་ཡོད་པ་སྟེ། སྲིད་བློན་མོ་དྷིས་འགོ་ཁྲིད་པའི་བྷ་ར་ཏི་ཡ་ཇན་ཏ་ཚོགས་པའི་གྲོས་ཚོགས་འཐུས་མི་ཞིག་གིས་ང་ཚོ་རང་གི་ཁྱིམ་མཚེས་དེར་ཡིད་ཆེས་མེད། ཁོ་ཚོས་ཅི་ཞིག་བསྒྲུབ་རྒྱུ་ཡིན་མིན་སུ་གཅིག་གིས་སྔོན་དཔག་མི་ཐུབ། རྒྱ་ནག་གིས་ཡར་ཀླུང་གཙང་པོ་ཆ་ཚང་ཁ་སྒྱུར་བྱས་ནས་ང་ཚོའི་བྱང་(Siang)་དེ་སྐམ་པོར་གཏོང་བའམ། ཡང་ན་ཆུ་སྒོ་ཕྱེ་ནས་སྔོན་ཆད་བྱུང་མྱོང་མེད་པའི་ཆུ་ལོག་རྒྱུག་ཏུ་འཇུག་སྲིད་ཅེས་གྲོས་ཚོགས་སུ་གཏམ་བཤད་བྱས་འདུག བྱང་ནི་མོན་ཡུལ་གྱི་ས་གནས་ཤིག་ཏུ་གོ་དགོས་པ་དང་རྒྱ་ནག་གི་མོན་ཡུལ་ཧྲིལ་པོ་བོད་ཀྱི་ལྷོ་ཕྱོགས་ཡིན། དེར་བརྟེན་རྒྱ་གར་གྱིས་ཨ་རུ་ན་ཅལ་ཞེས་འབོད་པའི་མངའ་སྡེ་དེ་བོད་ཀྱི་ས་ཆ་ཡིན་པ་དང་བོད་ནི་རྒྱ་ནག་གི་ཆ་ཤས་ཡིན་པས་ལྷོ་བོད་ཀྱང་རྒྱ་ནག་གི་མངའ་ཁོངས་སུ་གཏོགས་ཞེས་རྩོད་པ་འཕངས།།

རྒྱ་གར་གྱི་ཧྥར་སི་ཊི་པོ་སི་ཊི་(Firstpost)་གསར་ཁང་གིས་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན། རྒྱ་ནག་གིས་ཡར་ཀླུང་གཙང་པོའི་ཆུ་ཤུགས་གློག་ཁང་འཛུགས་སྐྲུན་ལ་ཨ་སྒོར་ཐེར་འབུམ་༡༣༧་འགྲོ་གྲོན་གཏོང་འཆར་འདུག དེ་ནི་འཛམ་གླིང་ཡོངས་སུ་འཛུགས་སྐྲུན་ལས་གཞི་གཅིག་ལ་འགྲོ་གྲོན་བཏང་བ་མང་ཤོས་དེར་འགྱུར་རྒྱུ་ཡིན་པར་མ་ཟད། རི་བོ་གནམ་ལྕགས་འབར་བའི་གཡང་གཟར་དེ་ཉིད་དུ་གློག་ཁང་འཛུགས་སྐྲུན་བྱ་རྒྱུ་ཡིན་མིན་ཡང་གསལ་པོ་མི་འདུག རྒྱ་ནག་ལ་ཡར་ཀླུང་གཙང་པོ་ཁ་ཕྱོགས་བསྒྱུར་ནས་རི་བོ་གནམ་ལྕགས་འབར་བ་བརྟོལ། ཡར་ཀླུང་གཙང་པོ་འདྲེན་པར་ཆུ་ཡུར་སྤྱི་ལེ་༢༠་འཛུགས་སྐྲུན་བྱེད་ཐུབ་པའི་ཚན་རིག་ལག་རྩལ་ལྡན་མིན་ཡང་བཤད་དཀའ། རྒྱ་ནག་གིས་ཡར་ཀླུང་གཙང་པོ་ཆ་ཚང་ཁ་སྒྱུར་མ་བྱས་ཀྱང་གཙང་པོ་དེའི་ཆུ་ཕྱེད་ཀ་བྱང་ཕྱོགས་སུ་འདྲེན་དགོས་པར་འགྱུར་ས་རེད་ཅེས་གསར་འགྱུར་སྤེལ་འདུག

རི་བོ་གནམ་ལྕགས་འབར་བའི་ཆགས་ཡུལ་ནི་ས་ཡོམ་རྒྱག་ས་ཞིག་ཡིན་པ་དང་ཡར་ཀླུང་གཙང་པོའི་ཆུ་ཤུགས་གློག་ཁང་འཛུགས་སྐྲུན་རྗེས་སུ་ས་འགུལ་བརྒྱུགས་ན་ཆུ་རགས་ཁ་ཤོར་ཏེ་སྨད་ཕྱོགས་ཀྱི་ཡུལ་སྡེ་ཁག་རྨེག་མེད་དུ་འཇོམས་རྒྱུ་ལྡོག་ཏུ་མེད། རྒྱ་ནག་གིས་ས་ཞིབ་ནན་ཏན་བྱས་ཡོད། ད་དུང་འཕྲུལ་རིག་ལག་རྩལ་ཡར་རྒྱས་ཕྱིན་ཡོད་པས་ཡར་ཐོན་གྱི་ཆུ་ཤུགས་གློག་ཁང་ཞིག་འཛུགས་སྐྲུན་བྱ་རྒྱུར་ཚན་རིག་དང་མཐུན་པའི་རྨང་གཞི་བརྟན་པོ་བཏིངས་ཡོད། ཆུ་ཤུགས་གློག་ཁང་དེས་ཉེ་འཁོར་གྱི་ཉི་གློག་དང་རླུང་ཤུགས་ཀྱི་གློག་རྣམས་མཁོ་འདོན་བྱེད་པར་ཕན་ཐོགས་སྒྲུབ་ཐུབ་ཅེས་ཉེན་ཁ་མེད་པའི་སྒྲུབ་བྱེད་བཀོད། ༢༠༢༢་ལོར་ཤཱེ་ན་ཝི་ཝེབ་ཌོ་ནེ་ལོན་མཱེ་(Genevieve Donnellon-May)་ཞེས་པའི་ས་ཁམས་ཆབ་སྲིད་དང་གོ་ལའི་འཐབ་ཇུས་ཉམས་ཞིབ་པ་ཞིག་གིས་ཡར་ཀླུ་གཙང་པོ་ནི་རྒྱ་དཀར་ནག་གཉིས་ཀྱི་སྤྱི་ཚོགས་དང་དཔལ་འབྱོར་འཕེལ་རྒྱས། མང་ཚོགས་ཀྱི་འཚོ་བ་བཅས་ལ་གནད་འགག་ཆེན་པོ་རེད་ཅེས་དཔྱད་རྩོམ་སྤེལ།།

ཉམས་ཞིབ་པ་ན་ཝི་ཝེབ་ཌོ་ནེ་ལོན་མཱེའི་རྩོམ་ཡིག་ནང་དུ་རྒྱ་གར་གྱི་འཐུང་ཆུ་གཙང་མའི་འབྱུང་ཁུངས་བརྒྱ་ཆ་༣༠་ཐམ་པ་ཡར་ཀླུང་གཙང་པོ་རེད། རྒྱ་གར་གྱི་ཆུ་ཤུགས་གློག་གི་ཐོན་སྐྱེད་བརྒྱ་ཆ་༤༠་ཡར་ཀླུང་གཙང་པོ་ནས་མཁོ་འདོན་ཐུབ་ཀྱི་འདུག ཡར་ཀླུང་གཙང་པོ་རྒྱ་ནག་གི་འཐུང་ཆུ་གཙང་མའི་འབྱུང་ཁུངས་ལ་ཕན་ཐོགས་ཆེན་པོ་མེད་ཀྱང་བོད་ཀྱི་ཞིང་ལས་དང་ནུས་ཤུགས་འབྱུང་ཁུངས་བཟོ་ལས། བོད་ཀྱི་སྤྱི་ཚོགས་དཔལ་ཡོན་སོགས་ལ་ཡར་ཀླུང་གཙང་པོ་གལ་འགངས་ཆེན་པོ་རེད། རྒྱ་དཀར་ནག་གཉིས་ཀྱི་མི་འབོར་ཅི་ཙམ་འཕེལ་རྒྱས་བྱུང་ན་དེ་ཙམ་གྱིས་ཕྱོགས་གཉིས་ཀར་འཐུང་ཆུ་གཙང་མའི་འབྱུང་ཁུངས་ཀྱི་དགོས་མཁོ་ཆེ་རུ་སོང་། ཡར་ཀླུང་གཙང་པོའི་ཆུ་སྟོད་ཕྱོགས་རྒྱ་ནག་གི་དབང་བསྒྱུར་འོག་ཏུ་ཚུད་ཡོད་པས་རྒྱ་གར་ལ་བློ་འཚབ་འབྱུང་ངེས་རེད། ནམ་ཞིག་རྒྱ་དཀར་ནག་གཉིས་ཀྱིས་ཆུའི་ཐོན་ཁུངས་བརྩད་ནས་འགལ་ཟླ་ཆེ་རུ་འགྲོ་སྲིད་ཅེས་དཔྱད་བརྗོད་སྤེལ་འདུག