བོད་ཀྱི་སྲིད་བྱུས་ཉམས་ཞིབ་ཁང་གིས་དཔར་སྐྲུན་ཞུས་པའི་བོད་ཀྱི་སྤྲུལ་སྐུའི་ལམ་ལུགས་སྐོར་གྱི་དཔྱད་རྩོམ་ཕྱོགས་བསྒྲིགས་ཞེས་པའི་དེབ་ཅིག་འདི་ཚེས་༡༤ཉིན་ བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་རྣམ་གཉིས་དབུ་བཞུགས་ཐོག་བོད་མིའི་སྒྲིག་འཛུགས་ཕྱི་དྲིལ་ཀམ་པུ་ཊར་སྡེ་ཚན་གྱི་ཚོགས་ཁང་དུ་དབུ་འབྱེད་གནང་སོང་ལ། སྐབས་དེར་འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ་ད་ལྟའི་འཆར་བོད་ཀྱི་སྲིད་བྱུས་ཉམས་ཞིབ་ཁང་ནས་དཔེ་དེབ་འདི་འདྲ་ཞིག་འདོན་སྤེལ་གནང་དགོས་ཡག་འདི་གནད་བཀག་གང་འདྲ་ཞིག་ལ་གཟིགས་ཀྱི་ཡོད་པའི་སྐོར་ལ་བཅར་འདྲི་ཞུས་པར་ཁོང་གིས་ད་ལྟའི་འཆར་རྒྱ་ནག་གཞུང་གིས་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་ཤུགས་ཆེ་བྱེད་བཞིན་ཡོད་དུས་བོད་ཀྱི་སྤྲུལ་སྐུའི་ལམ་ལུགས་སྐོར་ཉམས་ཞིབ་གནང་རྒྱུ་སྔར་ལས་གལ་ཆེ་བ་ཆགས་ཀྱི་ཡོད་པ་འགྲེལ་བརྗོད་གནང་སོང་།
དེ་བཞིན་ཁོང་གིས་མུ་མཐུད་ནས་གསུང་ཡག་ལ་རྒྱ་ནག་གཞུང་གིས་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་ཕྱོགས་ཐད་ལ་ཐེ་བྱུས་བྱེད་པ་ནི་ཆོས་དད་དང་འབྲེལ་བ་མེད་པར་རྒྱ་ནག་རང་ཉིད་ཀྱི་ཆབ་སྲིད་དགོས་མཁོའི་ཆེད་བེད་སྤྱོད་བྱེད་བཞིན་ཡོད་སྟབས། བོད་ཀྱི་སྤྲུལ་སྐུའི་ཡང་སྲིད་ངོས་འཛིན་ཐོག་རྒྱ་ནག་གཞུང་གིས་ཐེ་བྱུས་བྱ་རྒྱུའི་ཐོབ་ཐང་མེད་པ་ཡང་གསུངས་གནང་སོང་།
ཡང་དེ་དང་ཕྱོགས་མཚུངས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་པ་དང་དེབ་དེའི་རྩོམ་སྒྲིག་པ་ཚེ་རིང་བསམ་གྲུབ་ལགས་ཀྱིས་ཀྱང་དེབ་དེའི་ནང་གཙོ་བོ་བོད་བརྒྱུད་ནང་བསྟན་ཆོས་བརྒྱུད་སོ་སོའི་ལུགས་སུ་བླ་སྤྲུལ་ཡང་སྲིད་ངོས་འཛིན་གནང་ཕྱོགས་སྐོར་ཞིབ་འཇུག་གསལ་སྟོན་གནང་ཡོད་པ་སོགས་ཀྱི་སྐོར་ལ་གསུངས་གནང་སོང་།
གཞི་རྩའི་བོད་ཀྱི་སྤྲུལ་སྐུའི་ལམ་ལུགས་སྐོར་གྱི་དཔྱད་རྩོམ་ཕྱོགས་བསྒྲིགས་ཀྱི་དེབ་དེའི་ནང་བོད་དུ་སྤྲུལ་སྐུའི་ལམ་ལུགས་དར་ཁྱབ་བྱུང་ཚུལ་དང་ངོས་འཛིན་བྱེད་ཚུལ་རགས་ཙམ་བརྗོད་པ་དང་། སྐུ་ཕྲེང་གཅིག་ལ་ཡང་སྲིད་གཉིས་བྱུང་བའི་རྒྱབ་ལྗོངས་དང་མཇུག་འབྲས་ལ་ཅུང་ཙམ་དཔྱད་པ། བོད་ཀྱི་སྤྲུལ་སྐུའི་ལམ་ལུགས་ཀྱི་རིག་པའི་གཞུང་ལུགས་ཐོག་མ་གསར་རྙེད་བྱུང་བའི་སྐོར་ལ་རྟོག་ཞིབ་བཅས་ཁྱོན་བོད་ཀྱི་སྤྲུལ་སྐུའི་ལམ་ལུགས་དང་འབྲེལ་བའི་དཔྱད་རྩོམ་དགུ་ཕྱོགས་བསྒྲིགས་གནང་བའི་དཔེ་དེབ་ཅིག་ཆགས་ཡོད་པ་རེད་འདུག
