གསོ་བ་རིག་པའི་ལྷན་ཚོགས་ཀྱིས་གོ་སྒྲིག་འོག་འགྲོ་ཕན་སྨན་རྩིས་ཁང་གི་མཐོ་སློབ་ཚོགས་ཁང་དུ་འདི་ཚེས་༡༡ཉིན་གསོ་བ་རིག་པའི་ཉིན་མོ་སྲུང་བརྩི་ཞུས་གནང་སོང་ལ་ཐེངས་དེའི་མཛད་སྒོའི་ཐོག་སྐུ་མགྲོན་གཙོ་བོ་འཕྲོད་བསྟན་དྲུང་ཆེ་ཟླ་བ་ཚུལ་ཁྲིམས་ལགས་དང་། གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམ་པ་དྲུང་མཚོ་ཚེ་རིང་ཐག་གཅོད་ལགས། དེ་བཞིན་སྐུ་བཅར་སྨན་པ་རྣམ་གཉིས་གཙོས་པས་སྨན་པ་ཁག་ཅིག་ལྷན་འཛོམས་གནང་སོང་ལ་སྐབས་དེར་སྐུ་མགྲོན་གཙོ་བོ་མཆོག་ནས་མ་འོངས་པར་གསོ་བ་རིག་པའི་ལྷན་ཚོགས་ཚགས་ཚུད་ཡོང་ཆེད་འབྲེལ་ཡོད་ཚོགས་པ་ཚོས་ཤུགས་རྒྱག་དགོས་པ་གལ་ཆེན་པོ་ཡིན་པ་གསུང་གནང་སོང་།
དེ་བཞིན་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་དྲུང་མཚོ་ཚེ་རིང་ཐག་གཅོད་ལགས་ཀྱིས་བོད་པའི་སྨན་པ་ཞིག་ཡིན་ཕྱིན་གསོ་བ་རིག་པའི་ལྷན་ཚོགས་ནང་སྨན་སྦྱོར་དེབ་སྐྱལ་བྱ་དགོས་རྒྱུ་འདི་ཁྲིམས་སྒྲིག་གིས་བསྐུར་བའི་ལས་འགན་ཞིག་ཡིན་པ་དང་། སྨན་རྩིས་ཁང་ནས་ཐོན་པའི་བོད་པའི་སྨན་པ་རྣམས་རྒྱ་གར་གྱི་སྨན་པ་དང་གཅིག་མཚུངས་ཕྱག་ལས་གནང་ཆོག་པའི་སྙན་ཞུ་ཡང་འབུལ་ཡོད་པ་གསུང་གནང་བྱུང་།
གཞི་རྩའི་གསོ་བ་རིག་པའི་ལྷན་ཚོགས་འདི་བཞིན་སྤྱི་ལོ་ ༢༠༠༣ ལོར་བོད་མི་མང་སྤྱི་འཐུས་ལྷན་ཚོགས་ནས་གསོ་བ་རིག་པའི་ལྷན་ཚོགས་ཀྱི་ཁྲིམས་ཡིག་གཏན་འབེབས་གནང་སྟེ། སྤྱི་ལོ་ ༢༠༠༤ ལོར་གསོ་བ་རིག་པའི་ལྷན་ཚོགས་དངོས་སུ་དབུ་འཛུགས་གནང་བ་ཞིག་ཡིན་པ་རེད་འདུག་ལ་གསོ་བ་རིག་པའི་ཉིན་མོ་སྲུང་བརྩི་འདི་བཞིན་སྤྱི་ལོ་༡༩༦༡སྤྱི་ཟླ་༩ཚེས༡༡ཉིན་བོད་ཀྱི་བླ་ན་མེད་དབུ་ཁྲིད་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་བཙན་བྱོལ་དུ་སྨན་རྩིས་ཁང་བཙུག་ཕྱོགས་དང་འབྲེལ་བོད་ཀྱི་སྨན་པ་བགྲེས་བ་ཁག་ཅིག་བཞུགས་སྒར་དུ་བཀའ་བཀུག་གནང་བའི་ཉིན་མོ་དང་སྟབས་བསྟུན་སྲུང་བརྩི་གནང་སྒོ་བཙུགས་པ་ཞིག་ཡིན་པ་རེད་འདུག
