༄༅།། ཐེ་ཝན་གཞུང་གིས་རྒྱ་ནག་ནས་གློ་ཚད་ཁྱབ་སྲིད་པར་དོགས་ཟོན་ཧ་ཅང་ནན་པོ་དང་སྔོན་འགོག་གི་གྲ་སྒྲིག་བྱ་དགོས་པའི་བཀོད་ཁྱབ་བཏང་ཡོད་ཅིང་། ཕྱི་ཟླ་༡༡་པའི་ཚེས་༢༦་ཉིན་ཐེ་ཝན་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། ཁ་སང་གཟའ་ཉི་མའི་ཉིན་ཐེ་ཝན་གྱི་ནད་རིགས་སྔོན་འགོག་ལྟེ་གནས་ཁང་གི་འགན་འཛིན་གཞོན་པ་ལོ་དབྱི་ཀྲུན་གྱིས་རྒྱ་ནག་གི་ས་གནས་ཁག་ཏུ་བྱིས་པ་ཚོར་གློ་ཚད་འགོས་ནས་ནད་པ་ཇེ་མང་དུ་འགྲོ་བཞིན་འདུག ཐེ་ཝན་གྱི་སྨན་ཁང་ཁག་གིས་གློ་ཚད་སྔོན་འགོག་ཐུབ་པའི་གྲ་སྒྲིག་གང་ལེགས་བྱ་དགོས། རྒྱ་ནག་བྱང་ཕྱོགས་ཀྱི་སྨན་ཁང་ཁག་ཏུ་ཆམ་རིམས་ལྟ་བུའི་གློ་ཚད་འགོས་པའི་ནད་པ་བརྒྱ་ཆ་༦.༢་འདུག དེ་ནི་འདས་པའི་ལོ་གསུམ་ལ་བསྡུར་ན་ནད་པའི་གྲངས་འབོར་བརྒྱ་ཆ་༢.༥་མང་དུ་ཕྱིན་པ་རེད། དེང་སྐབས་རྒྱ་ནག་ཏུ་ཁྱབ་བཞིན་པའི་གློ་ཚད་དེར་གཉའ་འཇོམས་སྨན་གྱིས་ཀྱང་ཕན་ཐོགས་མི་འདུག ཟླ་བ་གཉིས་གསུམ་ཞིག་གི་ནང་ཚུད་དུ་རིམས་ནད་དེ་ཁྱབ་གདལ་གྱི་ངར་སྒང་དུ་སླེབས་ཐུབ་པའི་རེ་བ་ཡོད་ཅེས་གསར་འགོད་པ་ཚོར་གླེང་མོལ་བྱས་འདུག
ཐེ་ཝན་གྱི་ནད་རིགས་སྔོན་འགོག་ལྟེ་གནས་ཁང་གི་འགན་འཛིན་གཞོན་པ་ལོ་དབྱི་ཀྲུན་གྱིས་མུ་མཐུད་དུ་བཤད་པ་ལྟར་ན། རྒྱ་ནག་གཞུང་ནས་འཛམ་གླིང་འཕྲིན་བསྟེན་སྒྲིག་འཛུགས་ལ་སྤྲད་པའི་ཡིག་ཆའི་ནང་དུ་ལོ་འདིའི་ཕྱི་ཟླ་༥་ནས་གློ་ཚད་དེ་ཁྱབ་འགོ་ཚུགས་སོང་ཞེས་འཁོད་འདུག ཉེ་ཆར་ཕྱི་ཟླ་༡༠་ནས་རྒྱ་ནག་རྒྱལ་ཡོངས་སུ་གློ་ཚད་དང་ཆམ་རིམས། དབུགས་འཚང་གི་ནད་རིགས་ཁག་ཅིག་མང་དུ་ཕྱིན་འདུག དེས་ན་ང་ཚོས་ལོ་རྗེས་མའི་དཔྱིད་ཀ་བར་དུ་རྒྱ་ནག་གི་གློ་ཚད་ནད་འབུ་དེར་དོགས་ཟོན་བྱ་དགོས། གློ་ཚད་དེ་བྱིས་པར་འགོ་རྒྱུ་སྤྱིར་བཏང་ཞིག་ཡིན་རུང་མི་རྒན་པ་ལའང་སྡང་། རྒྱ་ནག་ཏུ་ཚོང་ལས་གཉེར་བཞིན་པའི་ཐེ་ཝན་གྱི་ཚོང་པ་ཚོ་མཚོ་འགག་ཕྱོགས་བར་དུ་འགྲིམ་འགྲུལ་བྱས་ནས་རྒྱ་ནག་གི་གློ་ཚད་ཀྱི་ནད་འབུ་ཐེ་ཝན་ལ་འཁྱེར་ཡོང་སྲིད། རྒྱ་ནག་ཏུ་ནད་ཡམས་ཤིག་ཁྱབ་ཀྱི་ཡོད་པར་ང་ཚོས་དོགས་ཟོན་ནན་པོ་བྱ་དགོས། ཐེ་ཝན་གྱི་སྨན་ཁང་ཁག་ཏུ་གློ་ཚད་ཁྱབ་པའི་ནད་པ་འདྲ་བསླེབས་ཚེ། ནད་པ་དེ་གང་དུ་ཕྱིན་ཡོད་མེད་དང་སུ་ལ་ཐུག་ཡོད་མེད་རྣམས་ཞིབ་འཇུག་བྱ་རྒྱུ་གནད་འགག་ཆེན་པོ་རེད་ཅེས་བསྟན།།
ཕྱི་ཟླ་༡༡་པའི་ཚེས་༢༦་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གཟའ་ཉི་མའི་ཉིན་རྒྱ་ནག་འཕྲོད་བསྟེན་ལྷན་ཁང་ནས་ས་གནས་ཀྱི་འགོ་ཁྲིད་ཚོར་གློ་ཚད་སྨན་བཅོས་བྱ་ཡུལ་སྨན་ཁང་མང་དུ་ཐོངས། རྒྱ་ནག་གི་པྲོག་དབྱིབས་ནད་དུག་སྔོན་འགོག་སྲིད་ཇུས་ཕྱིར་འཐེན་བྱས་པའི་རྗེས་སུ་གློ་ཚད་ཚབས་ཆེན་ཞིག་ཁྱབ་གདལ་འགྲོ་བཞིན་འདུག་ཅེས་གསལ་སྟོན་བྱས། རྒྱ་ནག་འཕྲོད་བསྟེན་ལྷན་ཁང་གི་མགྲིན་ཚབ་པ་མཱི་ཧྥེང་གིས་གློ་ཚད་ཁྱབ་གདལ་འགྲོ་བཞིན་པ་དེ་ཆམ་རིམས་ལྟ་བུའི་ནད་འབུ་བགོ་སླ་བའི་ནད་རིགས་འགའ་ཞིག་ལ་འབྲེལ་བ་འདུག ས་གནས་ཁག་གིས་གློ་ཚད་སྨན་ཁང་དང་སྨན་བཅོལ་བྱ་ཡུལ་མང་དུ་གཏོང་དགོས། སྨོན་བཅོས་ཀྱི་སྲི་ཞུའི་དུས་ཡུན་རིང་དུ་ཐོངས། སྨན་དང་ཁབ་སོགས་འདང་ངེས་མེད་པའི་དཀའ་ངལ་ཡོད་ན་མྱུར་དུ་སེལ་ཐབས་བྱོས། ནད་རིགས་སྔོན་འགོག་གི་ལས་དོན་འཐུས་ཤོར་མེད་པར་སྒྲུབས། སློབ་གྲྭ་ཁག་དང་བུ་བཅོལ་ཁང་། རྒན་གསོ་ཁང་སོགས་ལ་མི་གཏོང་རྒྱུ་ཚོད་འཛིན་བྱ་དགོས་ཞེས་གསར་འགོད་ལྷན་ཚོགས་བསྐོངས་པའི་གནས་ཚུལ་ཐོན་འདུག
འཛམ་གླིང་འཕྲོད་བསྟེན་སྒྲིག་འཛུགས་ཀྱིས་རྒྱ་ནག་ལ་བྱིས་པ་གཙོས་མི་མང་ལ་གློ་ཚད་ཅིག་ཁྱབ་ཀྱི་ཡོད་པ་དེའི་ནད་རྟགས་དང་ནད་འབུའི་ངོ་བོ། སྨན་བཅོས་ཇི་ལྟར་བྱེད་ཀྱི་ཡོད་པ་དང་ས་གནས་གང་དུ་ཁྱབ་ཡོད་མེད། ནད་པའི་གྲངས་འབོར་སོགས་ཞིབ་ཕྲ་འཁོད་པའི་ཡིག་ཆ་མཁོ་སྤྲོད་བྱ་དགོས་ཞེས་འབོད་སྐུལ་ཞུས། ༢༠༡༩་ལོར་རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཡོངས་ལ་པྲོག་དབྱིབས་ནད་དུག་ཁྱབ། རྒྱ་ནག་གཞུང་གིས་རང་ཡུལ་དུ་ནད་དུག་ཅིག་ཁྱབ་ཀྱི་ཡོད་པའི་གསང་བ་བྱས་པའི་རྐྱེན་གྱིས་འཛམ་གླིང་འཕྲོད་བསྟེན་སྒྲིག་འཛུགས་དང་རྒྱལ་སྤྱིའི་སྤྱི་ཚོགས་གཉིས་རྒྱ་ནག་ལ་ཡིད་ཆེ་བརླགས། རྒྱ་ནག་གི་ཐེན་ཅིན་བྱིས་པའི་སྨན་ཁང་དུ་ཉིན་ལྟར་ཕྲུ་གུ་ནད་པ་༡༥༠༠༠་རེ་སྨན་བཅོས་བྱེད་དུ་ལྷགས། རྒྱ་ནག་བྱང་ཤར་ཕྱོགས་སུ་ཆགས་ཡོད་པའི་ལེའོ་ནིང་ཞིང་ཆེན་གྱི་ཏ་ལཱེན་གྲོང་ཁྱེར་གྱི་སྨན་ཁང་ཁག་ཏུ་བྱིས་པ་ཚོར་ཉལ་ཁྲི་དང་ཁང་མིག་མ་ཐེམས་པར་ཕྱི་ལོགས་ཀྱི་སྲང་ཤུར་ནང་དུ་སྨན་བཅོས་བྱ་དགོས་པར་གྱུར། སྒོ་བསྟེན་སྨན་ཁང་ཁག་གིས་ནད་པ་གསར་པ་ལེན་མ་ཐུབ་པར་མི་མང་ལ་དཀའ་ངལ་འཕྲད།།
འཛམ་གླིང་འཕྲོད་བསྟེན་སྒྲིག་འཛུགས་ཀྱིས་ཕྱི་ཟླ་༡༠་པའི་ཟླ་དཀྱིལ་ནས་རྒྱ་ནག་བྱང་ཕྱོགས་སུ་སྔོན་ཆད་ལོ་གསུམ་གྱི་རིང་བྱུང་མྱོང་མེད་པའི་ཆམ་རིམས་གསར་པ་ཞིག་བསླེབས་འདུག རྒྱ་ནག་མི་དམངས་ཀྱིས་རང་ལ་གློ་ཚད་མི་འགོ་བའི་ཆེད་དུ་ཆམ་རིམས་སྔོན་འགོག་གི་སྨན་ཁབ་རྒྱག་དགོས་པ་དང་ནད་པར་རྒྱང་འགྱེད་དགོས། ནད་མནར་གྱི་དུས་སུ་ཁྱིམ་དུ་འཛུལ་ཏེ་ཕྱི་རུ་མ་འབུད། བརྟག་དཔྱད་བྱས་ནས་དུས་ཐོག་ཏུ་སྨན་བཅོས་བྱོས། ཁ་རས་གྱོན་དགོས་པ་དང་ཡང་ནས་ཡང་དུ་ཁང་པའི་སྒོ་དང་སྒེའུ་ཁུང་ཕྱེ་སྟེ་ཁྱིམ་དུ་མཁའ་དབུགས་གཙང་མ་ཡོང་དུ་འཆུགས། ནད་པ་ཡིན་མིན་གཉིས་ཀས་ལག་པ་ལན་མང་བཀྲུས་ཏེ་གཙང་སྦྲ་འཕྲོད་བསྟེན་བྱ་དགོས་ཞེས་ནད་འགོག་གི་ལམ་སྟོན་བྱས་འདུག རྒྱ་ནག་གི་སྤྱི་དམངས་སྒེར་པ་ཚོས་ཞི་ཨན་གྲོང་ཁྱེར་གྱི་སྨན་ཁང་ཁག་ཏུ་ནད་པས་འཚང་ཁ་རྒྱག་གི་ཡོད་པ་དང་བྱིས་པ་ཚོས་བརྟག་དཔྱད་བྱ་རྒྱུར་སྒུག་ཡོད་པར་མ་ཟད། བྱིས་པ་ཁག་ཅིག་ལ་དབུགས་འཚང་འགོག་བཅོས་ཀྱི་རླངས་ཁབ་བརྒྱབ་སྟེ་སློབ་གྲྭའི་རང་སྦྱོང་བྱེད་ཀྱི་ཡོད་པའི་འཕྲིན་ཐུང་རྣམས་དྲྭ་ལམ་ཐོན།།
བདུན་ཕྲག་སྔོན་མའི་གཟའ་པ་སངས་ཉིན་རྒྱ་ནག་གི་རྒྱལ་སྲིད་སྤྱི་ཁྱབ་ཁང་གིས་ལོ་འདིའི་དགུན་ཁ་དང་དཔྱིད་ཀའི་བར་དུ་ཆམ་རིམས་དེ་ཁྱབ་གདལ་གྱི་ངར་སྒང་དུ་སླེབས་ས་རེད། གློ་ཚད་འགོ་ཁྱབ་མང་དུ་འགྲོ་རྒྱུ་དང་ས་གནས་ཁག་ཅིག་ཏུ་ནད་པ་མང་དུ་འགྲོ་རྒྱུའི་ཉེན་ཁ་འདུག དེ་བཞིན་རྒྱ་ནག་ལ་པྲོག་དབྱིབས་ནད་དུག་ཀྱང་བསྐྱར་ལོག་རྒྱག་སྲིད་པའི་ཉེན་ཁ་ཆེ་ཞེས་བསྒྲགས། རྒྱལ་སྲིད་སྤྱི་ཁྱབ་ཁང་གི་གསལ་བསྒྲགས་ནང་དུ་ས་གནས་སྲིད་གཞུང་ཁག་གིས་འགོས་ནད་ཀྱི་གནས་ཚུལ་ཞིབ་ཕྲ་དང་དུས་ཐོག་ཏུ་ཕྱིར་བསྒྲགས་བྱ་དགོས་ཞེས་བཀའ་ཕབ། རྒྱ་ནག་གཞུང་གིས་འཛམ་གླིང་འཕྲོད་བསྟེན་སྒྲིག་འཛུགས་ལ་སྔ་ལོ་ནས་པྲོག་དབྱིབས་ནད་དུག་སྔོན་འགོག་གི་སྲིད་ཇུས་ལག་ལེན་བསྟར་རྒྱུ་མཚམས་བཞག་པ་ཡིན། ད་ལྟ་གློ་ཚད་ཅིག་ཁྱབ་ཀྱི་ཡོད་པ་ནི་དགུན་ཁའི་སྤྱིར་བཏང་གི་ཆམ་རིམས་ཤིག་རེད། དེ་ནི་སྐྲག་དགོས་པ་ཞིག་མ་རེད་ཅེས་ལན་བཏབ། འོན་ཀྱང་རྒྱ་ནག་གི་ཏ་ལཱེན་དང་པེ་ཅིང་། ཐེན་ཅིན་དང་ཞི་ཨན་སོགས་གྲོང་ཁྱེར་མང་པོར་གློ་ཚད་ཅིག་ཁྱབ་ཀྱི་ཡོད་པ་ནི་བློ་འཚབ་བྱ་དགོས་པ་ཞིག་ཏུ་གྱུར་ཡོད་པའི་གནས་ཚུལ་ཐོན་འདུག
རྒྱ་ནག་གཞུང་གིས་ལོ་གསུམ་ལ་པྲོག་དབྱིབས་ནད་དུག་སྔོན་འགོག་སྲིད་ཇུས་ཤིག་ལག་ལེན་བསྟར། མི་གྲངས་ས་ཡ་མང་པོར་བརྟག་དཔྱད་བྱས་ནས་སྒོ་བརྒྱབ་བསྡམས། རྒྱ་ནག་གི་ཚོང་ལས་སོགས་ལ་བར་ཆད་བྱུང་སྟེ་ས་གནས་སྲིད་གཞུང་ཁག་བུ་ལོན་ནང་དུ་ཚུད། ད་ལྟ་སླར་ཡང་གློ་ཚད་ཁྱད་མཚར་ཞིག་ཁྱབ་ཀྱི་ཡོད་པ་སྔོན་འགོག་བྱ་དགོས་ན་རྒྱ་ནག་གི་ས་གནས་སྲིད་གཞུང་ཁག་ལ་སྨན་བཅོས་ཀྱི་འགྲོ་གྲོན་དང་ལས་བྱེད་པ་འདང་ངེས་མེད་པར་འཕྲོད་བསྟེན་མ་ལག་རྣམས་སྤོ་ལུག་རྒྱུའི་མཚམས་སུ་ལྷུང་། ད་ལྟའི་གློ་ཚད་འདི་སླར་ཡང་འཛམ་གླིང་ཡོངས་སུ་ཁྱབ་སྟེ་ནད་ཡམས་ཆེན་པོ་ཞིག་ཏུ་འགྱུར་མི་སྲིད་པའི་ངེས་པ་མེད། རྒྱ་ནག་གིས་པྲོག་དབྱིབས་ནད་ཡམས་དུས་སུ་མི་གྲངས་དུང་ཕྱུར་༡་ཡས་མས་ཤིག་ལ་ནད་དུག་འགོས་སོང་། མི་༡༢༡༠༠༠་ལ་སྲོག་སྐྱོན་བྱང་སོང་ཞེས་གཞི་གྲངས་བཏོན། ཉམས་ཞིབ་པ་ཚོས་རྒྱ་ནག་ལ་པྲོག་དབྱིབས་ནད་དུག་ཁྱབ་ནས་མི་ལ་འཆི་སྐྱོན་བྱུང་བའི་གྲངས་འབོར་ནི་གཞུང་གིས་ཕྱིར་བསྒྲགས་བྱས་པ་ལས་ལྡབ་བཅུ་མང་པ་ཡོད་པའི་ཚོད་དཔག་བྱས་འདུག
ཉེ་དུས་ཤིག་ནས་རྒྱ་ནག་གཅིག་པུ་མ་ཡིན་པར་ཨ་རི་དང་ཡུ་རོབ། ཨེ་ཤི་ཡའི་རྒྱལ་ཁབ་ཁག་ཏུ་པྲོག་དབྱིབས་ནད་དུག་འགོས་པའི་ནད་པ་མང་དུ་འགྲོ་བཞིན་ཡོད་ཀྱང་ནད་དུག་གི་ངར་ཤུགས་ཆག་སྟེ་སྔར་ལྟར་ཉེན་ཚབས་ཆེན་པོ་མིན་མོད། ཧོང་ཀོང་སློབ་གྲྭ་ཆེན་མོའི་ནད་རིགས་བརྟག་དཔྱད་རིག་པ་བ་བྷན་ཀོ་ལིང་ནས་ནམ་ཟླའི་འགྱུར་ལྡོག་གིས་རྒྱ་ནག་གི་ས་གནས་ཁག་ཏུ་གློ་ཚོད་ཕོག་པའི་ནད་པ་མང་དུ་འགྲོ་བཞིན་ཡོད་པ་རེད། རྒྱ་ནག་མི་དམངས་ཀྱི་ལུས་ལ་ནད་འགོག་ཟུངས་ཤུགས་ཀྱང་ཡག་པོ་ཞིག་ཆགས་ཐུབ་མི་འདུག་ཅེས་བཀྲལ། བདུན་ཕྲག་སྔོན་མའི་གཟའ་ཕུར་བུའི་ཉིན་རྒྱ་ནག་འཕྲོད་བསྟེན་ལྷན་ཁང་གིས་ཞིན་ཧྭ་གསར་འགྱུར་ལས་ཁུངས་བརྒྱུད་ནས་ཕ་མ་ཚོས་རང་གི་ཕྲུ་གུ་ཚོར་གློ་ཚད་མི་འགོ་བ་ཇི་ལྟར་བྱ་དགོས་པ་དང་སྨན་ཁང་ཁག་ཏུ་ནད་པ་མང་དྲགས་ཡོད་པ། སྨན་ཁང་དུ་སྒུག་ཡུན་ཧ་ཅང་རིང་པོ་འགོར་གྱི་ཡོད་པ་རྣམས་གསལ་བཀྲོལ་བྱས་ཀྱང་རྒྱ་ནག་ལ་སྨན་དང་འགོག་ཁབ་འདང་ངེས་ཡོད་མེད་ཅི་ཡང་བཤད་མེད་པའི་གནས་ཚུལ་ཐོན་འདུག
