༄༅།། ཕྱི་ཚེས་༡༥་ཉིན་སྐབས་བཅུ་བདུན་པའི་བོད་མི་དམངས་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཐེངས་གཉིས་པའི་ལས་ཉིན་གཉིས་པའི་ཕྱི་དྲོའི་ཚོགས་ཐུན་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་རྒྱ་ནག་གཞུང་གིས་བོད་ནང་ལོགས་སུ་བོད་ཀྱི་ཆོས་དང་སྐད་ཡིག་རྩ་མེད་བཟོ་རྒྱུའི་སྲིད་བྱུས་ཤིག་ལག་བསྟར་བྱེད་བཞིན་ཡོད་པ་འདིས་འབྱུང་འགྱུར་ལོ་བཅུ་ཕྲག་གཉིས་ཙམ་གྱི་རྗེས་སུ་བོད་མི་རིགས་ཀྱི་ངོ་བོ་གནས་ཐུབ་མིན་གྱི་ཧ་ཅང་གི་ཉེན་ཚབས་ཆེ་བའི་སྲིད་བྱུས་ཤིག་ཡིན་པས་བོད་ནང་གི་བོད་པ་ཚོས་རང་གི་སྐད་ཡིག་སྲུང་སྐྱོབ་ལ་སྐུ་ལས་བསྐྱོན་གྱི་ཡོད་པ་བཞིན་ད་དུང་མུ་མཐུད་དུ་སྐུ་ལས་བསྐྱོན་དགོས་པའི་འབོད་སྐུལ་ཞུས།།
སྲིད་སྐྱོང་མཆོག་གིས་མུ་མཐུད་དུ་གསུངས་དོན་ལྟར་ན། གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་ཀྱི་འབྲུ་དོན་བཞིན་བཀའ་ཤག་གི་ངོས་ནས་ཞི་རྒྱ་ཆེ་བའི་ལས་འགུལ་སྤེལ་རྒྱུར་རྒྱབ་སྐྱོར་ཆ་ཚང་ཞུ་རྒྱུ་ཡིན་པར་མ་ཟད། རྒྱུན་མཐུད་ནས་སྤེལ་དགོས་པའི་ལས་འགུལ་མང་དག་ཅིག་ཡོད་པ་དེ་དག་གི་ཐོག་ཏུའང་ཤུགས་སྣོན་བསྐྱོན་རྒྱུ་ཡིན་ཞེས་ནན་བརྗོད་གནང་འདུག ད་རེས་ཀྱི་གྲོས་ཚོགས་ཀྱི་ལས་ཉིན་གཉིས་པར་སྤྱི་འཐུས་ཚོས་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཡོད་པའི་དགོང་ཚུལ་མང་པོ་བཏོན་ཞིང་། སང་ཉིན་ཚེས་༡༦་ནས་གྲོས་ཚོགས་སུ་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་༢༠༢༠་ནས་༢༠༢༡་བར་གྱི་ལས་བསྡོམས་ལ་བགྲོ་གླེང་རྒྱུན་སྐྱོང་གནང་གི་ཡོད་པ་བཅས་ཀྱི་སྐོར། བཞུགས་སྒར་རྡ་རམ་ས་ལ་ནས་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་ལན་ལག་ལས་ཁུངས་ཀྱི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།
