༄༅།། ཐེ་ཝན་དུ་བཅའ་སྡོད་ཨ་མི་རི་ཀའི་སྐུ་ཚབ་དོན་གཅོད་ཀྱིས་མཚོ་གླིང་དེའི་སྲིད་འཛིན་དང་གྲོས་ཚོགས་འཐུས་མིའི་འོས་བསྡུ་ཁག་དྲང་སྙོམས་དང་ཕྱིའི་ཤུགས་རྐྱེན་འོག་ཏུ་མ་ཚུད་པ་ཞིག་བྱ་རྒྱུ་གནད་འགག་ཆེན་པོ་ཡིན་ཞེས་ནན་བརྗོད་བྱས་འདུག ཕྱི་ཟླ་༡༢་པའི་ཚེས་༤་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གཟའ་ཟླ་བའི་ཉིན་ཨ་རིའི་དོན་གཅོད་ཁང་གི་འགན་འཛིན་སན་ཌ་ར་ཨོ་ཌི་ཀིར་ཀེས་ཐེ་ཝན་གྱི་རྒྱལ་ཡོངས་སློབ་གྲྭ་ཆེན་མོར་གཏམ་བཤད་བྱས་པའི་སྐབས་སུ་ངས་སྔོན་ཆད་ལན་མང་བཤད་པ་ལྟར་སྲིད་དོན་ཚོགས་པ་གང་ལ་འོས་བསྡུའི་རྒྱལ་ཁ་ཐོབ་ཀྱང་ཁྱེད་པར་མེད། ཨ་མི་རི་ཀས་ཐེ་ཝན་ལ་འཛིན་པའི་སྲིད་ཇུས་ནི་འགྱུར་མི་སྲིད། ང་ཚོས་ཐེ་ཝན་གྱི་འོས་འདེམས་ལ་ཕྱོགས་རིས་བྱེད་ཀྱི་མེད། ཨ་མི་རི་ཀ་ཐེ་ཝན་གྱི་འོས་བསྡུ་དང་དམངས་གཙོའི་ལམ་ལུགས་ལ་ཡིད་ཆེས་ཡོད། ང་ཚོས་ཐེ་ཝན་གྱི་དམངས་གཙོའི་ལམ་ལུགས་ལ་རྒྱབ་སྐྱོར་དང་༢༠༢༤་ལོར་སུ་ཞིག་འགོ་ཁྲིད་ལ་འདེམས་ཐོན་བྱུང་ཡང་དེ་དང་ལས་དོན་མཉམ་སྒྲུབ་བྱ་རྒྱུའི་རེ་ལྟོས་འཆང་ཡོད་ཅེས་བཤད་འདུག
ཕྱི་ཟླ་དང་པོའི་ཚེས་༡༣་ཉིན་ཐེ་ཝན་ལ་སྲིད་འཛིན་དང་རྒྱལ་ཡོངས་གྲོས་ཚོགས་ཀྱི་འཐུས་མི་རྣམས་འོས་འདེམས་བྱེད་ཀྱི་ཡོད་ཅིང་། སྲིད་འཛིན་ཚེ་དབྱིན་ཝེན་དང་མཐོ་རིམ་གཞུང་འབྲེལ་མི་སྣ་ཚོར་ཐེ་ཝན་གྱི་སྤྱི་ཡོངས་འོས་འདེམས་ལ་རྒྱ་ནག་གིས་ཐེ་ཇུས་བྱས་ནས་པེ་ཅིང་གི་ཕྱོགས་གཏོགས་སྲིད་དོན་ཚོགས་པ་ཁག་ལ་འོས་འདེམས་ཀྱི་རྒྱལ་ཁ་འཐོབ་ཏུ་འཇུག་ཐབས་བྱེད་ཀྱི་ཡོད་པའི་བློ་འཚབ་བྱུང་། ཁ་སང་གཟའ་ཉི་མའི་ཉིན་སྲིད་འཛིན་ཚེ་དབྱིན་ཝེན་གྱིས་ཐེ་ཝན་པ་འོས་ཤོག་འཕེན་མཁན་ཚོར་ཧོང་ཀོང་ལ་ཅི་ཞིག་བྱུང་བ་དེར་བསམ་བློ་བཏང་ནས་འོས་ཤོག་འཕེན་དགོས། ཞི་བདེ་ལ་ངེས་པར་དུ་རྒྱལ་སྲུང་སྟོབས་ཤུགས་ཡར་རྒྱས་གཏོང་རྒྱུ་ཁས་ལེན་བྱེད་ཐུབ་པའི་ཆོད་སེམས་བརྟན་པོ་འཛུགས་དགོས་ཞེས་བསྟན། ལོ་རྗེས་མའི་ཐེ་ཝན་གྱི་འོས་བསྡུ་དེར་གཞུང་འཛིན་དམངས་གཙོ་ཡར་ཐོན་ཚོགས་པ་དང་གོ་མིན་ཏང་། ཐེ་ཝན་མི་དམངས་ཚོགས་པ་བཅས་འགྲན་ཞུགས་བྱས་ནས་འོས་བསྡུའི་དྲིལ་བསྒྲགས་ལས་འགུལ་ཚ་ཚ་འུར་འུར་དུ་སྤེལ། གོ་མིན་ཏང་དང་ཐེ་ཝན་མི་དམངས་ཚོགས་པས་རྒྱ་ནག་ལ་འབྲེལ་བ་དམ་ཟབ་འཛིན་གྱི་ཡོད་པའི་ལྟ་ཚུལ་ཐོན་འདུག
ཐེ་ཝན་གྱི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མིར་སྲིད་འཛིན་གཞོན་པ་ལེ་ཆིང་ཏེ་དང་སྲིད་འཛིན་གཞོན་པའི་འོས་མིར་ཨ་མི་རི་ཀར་བཅའ་སྡོད་ཐེ་ཝན་གྱི་གཞུང་ཚབ་པ་ཟུར་པ་ཞའོ་མེ་ཆིང་གཉིས་ལངས། ཕྱོགས་འགལ་ཚོགས་པ་གོ་མིན་ཏང་གི་སྲིད་འཛིན་འོས་མིར་ཧུག་ཡུག་དབྱི་དང་དང་ཐེ་ཝན་མི་དམངས་ཚོགས་པའི་སྲིད་འཛིན་འོས་མིར་ཁེ་ཝེན་ཀྲི་བཅས་ལངས། ཐོག་མར་གོ་མིན་ཏང་དང་ཐེ་ཝན་མི་དམངས་ཚོགས་པ་གཉིས་མཉམ་འབྲེལ་བྱས་ནས་སྲིད་འཛིན་འོས་མི་གཅིག་གདམ་རྒྱུའི་གྲོས་སྡུར་བྱས་ཀྱང་སྲིད་འཛིན་གྱི་འོས་མི་དེར་སུ་གདམ་དགོས་མིན་ཐད་གྲོས་མཐུན་མ་བྱུང་བར་གཅིག་སྒྲིལ་མ་ཐུབ། ཐེ་ཝན་གྱི་གསར་འགྱུར་ལས་ཁང་ཁག་དང་ཞིབ་འཇུག་ཁང་ཁག་གིས་མི་མང་འོས་ཤོག་འཕེན་ཚོར་སྐད་ཆ་དྲིས་པའི་གྲུབ་འབྲས་ལ་གཞིགས་ཚེ། དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེ་དང་སྲིད་འཛིན་གཞོན་པའི་འོས་མི་ཞའོ་མེ་ཆིང་གཉིས་ལ་འོས་ཤོག་འཕེན་མཁན་མང་བ་ཡོད་པའི་གནས་ཚུལ་ཐོན་འདུག
ཕྱི་ཟླ་༡༢་པའི་ཚེས་༡་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་ལ་སྤྱི་ཡོངས་འོས་འདེམས་མ་བྱས་གོང་དུ་རྒྱ་ནག་གིས་མཚོ་གླིང་དེའི་སྲིད་དོན་པ་ཚོ་བློ་འགུགས་བྱ་རྒྱུ་ཤུགས་ཆེ་རུ་བཏང་ཞིང་། ཐེ་ཝན་གྱི་སྲིད་དོན་པ་བརྒྱ་ཕྲག་མང་པོར་ལམ་གྲོན་སོགས་སྤྲད་ནས་རྒྱ་ནག་ལ་ལྟ་སྐོར་དུ་གདན་འདྲེན་ཞུས། རྒྱ་ནག་གིས་ཐེ་ཝན་གྱི་འོས་བསྡུ་ནི་ཞི་བདེ་དང་དམག་འཁྲུག་གཉིས་ཀྱི་གདམ་ཀ་ཞིག་རེད། ཐེ་ཝན་མི་དམངས་ཀྱིས་གདམ་ཀ་མ་ནོར་བ་ཞིག་བྱ་དགོས། དམངས་གཙོ་ཡར་ཐོན་ཚོགས་པ་ནི་ཁ་བྲལ་རིང་ལུགས་ཀྱི་ལམ་དུ་སྐྱོད་པའི་སྲིད་དོན་ཚོགས་པ་ཉེན་ཁ་ཅན་ཞིག་རེད་ཅེས་གོ་མིན་ཏང་དང་དེའི་ཕྱོགས་གཏོགས་སྲིད་དོན་ཚོགས་པ་ཁག་ལ་འོས་ཤོག་ཐོབ་ཏུ་འཇུག་ཐབས་སུ་འབད། ཐེ་ཝན་གྱི་བཅའ་ཁྲིམས་ནང་དུ་རྒྱ་ནག་ཚུད་པའི་ཕྱིའི་རྒྱལ་ཁབ་ཁག་ནས་འོས་བསྡུའི་དྲིལ་བསྒྲགས་ལས་འགུལ་གྱི་རོགས་དངུལ་ལེན་མི་ཆོག་ཅེས་འཁོད། དེས་ན་ཐེ་ཝན་གཞུང་གིས་གཞི་རིམ་གྱི་སྲིད་དོན་པ་༢༢་ཀྱིས་འོས་བསྡུའི་སྒྲིག་གཞི་དང་བདེ་འཇགས་སྲུང་སྐྱོབ་ཀྱི་ཁྲིམས་ལ་འགལ་འཛོལ་བྱུང་ཡོད་མེད་ཞིབ་འཇུག་བྱེད་ཀྱི་ཡོད་པའི་གནས་ཚུལ་ཐོན་འདུག
ཐེ་ཝན་གྱི་མིང་འདོན་མ་བྱས་པའི་གཞུང་འབྲེལ་མི་སྣ་ཞིག་གིས་ཟླ་བ་སྔོན་མ་གཅིག་པུར་ཐེ་ཝན་གྱི་གྲོང་གསེབ་ཁག་གི་འགོ་ཁྲིད་དང་ཚོ་ཤོག་ཁག་གི་སྡེ་དཔོན། གཞི་རིམ་མང་ཚོགས་ལ་ཤུགས་རྐྱེན་ཐེབས་ཐུབ་པའི་མི་༤༠༠་ལྷག་རྒྱ་ནག་ལ་ཕྱིན་འདུག ཁོ་ཚོར་ལམ་གྲོན་དང་མགྲོན་ཁང་གི་རིན་པ། ཟས་རིན་སོགས་བཅག རྒྱ་ནག་སྐམ་ས་ཆེན་མོའི་ཐེ་ཝན་ལས་དོན་ལྷན་ཁང་གིས་འགྲིམ་འགྲུལ་ལས་ཁུངས་ཁག་དང་མགྲོན་ཁང་། ཟ་ཁང་དེ་ཚོར་གྱོང་གསབ་སྤྲད་འདུག ཐེ་ཝན་གྱི་བདེ་འཇགས་ཚན་པ་ཁག་གིས་གནད་དོན་དེར་ཞིབ་འཇུག་བྱ་དགོས་པར་གྱུར། དེ་ནི་ཐེ་ཝན་གྱི་བདེ་འཇགས་དང་དམངས་གཙོའི་འོས་འདེམས་ལ་ཧ་ཅང་གི་ཉེན་ཁ་ཆེན་པོ་རེད་ཅེས་རོ་ཡེ་ཊར་སི་གསར་ཁང་གི་གསར་འགོད་པར་ནང་མོལ་བྱས་ཤིང་། རོ་ཡེ་ཊར་སི་གསར་འགྱུར་ལས་ཁང་གིས་རྒྱ་ནག་གཞུང་ལ་ཐེ་ཝན་གྱི་སྲིད་དོན་པ་རྣམས་མགྲོན་འབོད་བྱེད་ཀྱི་འདུག་ཟེར་བའི་གནས་ཚུལ་དེ་བདེན་པ་རེད་དམ་ཞེས་དྲིས་ཀྱང་ལན་འདེབས་བྱས་མེད་པའི་གནས་ཚུལ་ཐོན་འདུག
ཕྱི་ཟླ་༡༡་པའི་ཚེས་༣༠་ཉིན་ཐེ་ཝན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་གྱི་རྒྱ་ནག་ལས་དོན་ལྷན་ཁང་གི་བློན་ཆེན་ཇུག་ཐེ་སན་གྱིས་མཚོ་གླིང་དེའི་གཞི་རིམ་སྲིད་དོན་པ་ཚོ་རྒྱ་ནག་ལ་སྤྲོ་འཆམ་དུ་འཁྲིད་བཞིན་པ་ནི་འོས་འདེམས་ལ་ཐེ་ཇུས་བྱེད་ཀྱི་ཡོད་པ་ཧ་ཅང་གསལ་པོ་རེད། རྒྱ་ནག་གིས་ཐེ་ཝན་མི་དམངས་ཀྱིས་གདམ་ཀ་མ་ནོར་ཞིག་བྱ་དགོས་ཟེར་བའི་གོ་དོན་ནི་དམར་ཤོག་ཚོགས་པར་བློ་ཐག་ཉེ་མཁན་ཚོ་གདམ་དགོས་ཟེར་བའི་གོ་དོན་ལོས་ཡིན། རྒྱལ་སྤྱིའི་སྤྱི་ཚོགས་དང་ཨ་རིའི་སྲིད་འཛིན་ཇཱོ་བྷ་ཌན་སོགས་ནས་རྒྱ་ནག་ལ་ཐེ་ཝན་གྱི་འོས་བསྡུར་ཐེ་ཇུས་མ་བྱས་ན་ལེགས་ཞེས་ནན་སྐུལ་མོད། འོན་ཀྱང་རྒྱ་ནག་དམར་ཤོག་ཚོགས་པས་ཐེ་ཇུས་མ་བྱས་པ་ག་ལ་སྲིད། རྒྱ་ནག་གི་ཐེ་ཇུས་དང་ཤུགས་རྐྱེན་འགོག་པར་ཐེ་ཝན་གྱི་ཁྲིམས་འཛིན་ལྷན་ཁང་གིས་བྱ་ཐབས་ཁག་ཅིག་ལག་ལེན་བསྟར། རྒྱ་ནག་གི་ས་གནས་དམར་ཤོག་ཚོགས་པ་ཁག་གིས་ཐེ་ཝན་གྱི་ས་གནས་འགོ་ཁྲིད་ཚོར་མགྲོན་འབོད་བྱེད་ཀྱི་ཡོད་པར་ཞིབ་འཇུག་བྱ་རྒྱུ་མགོ་བརྩམས་འདུག་ཅེས་བསྒྲགས།།
ཐེ་ཝན་གྱི་རྒྱ་ནག་ལས་དོན་ལྷན་ཁང་གི་བློན་ཆེན་ཇུག་ཐེ་སན་གྱིས་རྒྱ་ནག་གི་མེ་ཀྲུག་ས་གནས་ནས་མ་ཛུ་(Mazu)་ལྷ་མོར་དད་པ་བྱེད་མཁན་མི་ཁག་ཅིག་ཐེ་ཝན་དུ་ཡོང་འཆར་འདུག རྒྱ་ནག་ནས་མི་༢༣༩་ཡོང་འཆར་ཡོད་པ་དེ་དག་གི་གྲས་ཀྱི་མི་༢༡༨་མ་ཛུ་ལྷ་མོར་དད་པ་བྱེད་མཁན་གནས་སྐོར་བ་མ་རེད། ཁོ་ཚོ་ཐེ་ཝན་དུ་ཡོང་ཆོག་པའི་ཐོངས་མཆན་འཐོབ་པར་དགོས་ངེས་ཀྱི་ཁ་སྐོང་ཡིག་ཆ་ཁག་ཀྱང་སྤྲོད་མི་འདུག་ཅེས་བཀྲལ། བདུན་ཕྲག་སྔོན་མའི་གཟའ་ཕུར་བུའི་ཉིན་ཐེ་ཝན་གྱི་སྤྱི་ཁྱབ་ཁྲིམས་འཛིན་པ་ཤུན་ཏེ་ཀྲའོ་ཡིས་མི་ཞིག་འགྲིམ་འགྲུལ་བྱས་ན་གནམ་གྲུ་དང་མགྲོན་ཁང་སོགས་ཀྱི་འགྲོ་གྲོན་རྣམས་རང་ངོས་ནས་གཏོང་དགོས་པ་རེད། གང་དུ་ཕྱིན་ཀྱང་རིན་པ་སྤྲོད་མི་དགོས་པར་ཟ་ས་ཞིག་མེད་ཀྱང་ཐེ་ཝན་གྱི་གཞི་རིམ་སྲིད་དོན་པ་ཚོར་རྒྱ་ནག་གཞུང་གིས་འགྲོ་གྲོན་བཏང་ནས་ཕྱིན་འདུག ཐེ་ཝན་མི་དམངས་ལ་ཕྱི་ནས་ཤུགས་རྐྱེན་ཐེབས་ཐབས་བྱེད་ཀྱི་ཡོད་པའི་ཚད་གཞི་ནི་སྔོན་ཆད་བྱུང་མྱོང་མེད་པ་ཞིག་རེད། ཐེ་ཝན་པ་ཚོ་རྒྱ་ནག་གི་མགོ་སྐོར་བསླུ་ཁྲིད་འོག་ཏུ་མ་ཚུད་པ་བྱ་དགོས། རྒྱ་ནག་གི་བཀོད་འདོམས་ལ་དེ་བས་ཀྱང་ཉན་མི་རུང་ཞེས་ནན་གྱིས་བསྐུལ།།
ཐེ་ཝན་གྱི་བདེ་འཇགས་ཚན་པའི་ལས་སྣེ་གཞན་ཞིག་ནས་རྒྱ་ནག་གིས་ང་ཚོའི་གཞི་རིམ་སྲིད་དོན་པ་ཚོ་དམིགས་འབེན་དུ་བཟུང་འདུག འདས་པའི་ཟླ་ཤས་ནང་དུ་ཐེ་ཝན་དབུས་ཕྱོགས་ཀྱི་གྲོང་གསེབ་ཁག་གི་འགོ་ཁྲིད་དང་ཚོ་ཤོག་ཁག་གི་སྡེ་དཔོན་༣༠༠་ལྷག་རྒྱ་ནག་ཏུ་ཁྲིད་ཡོད་པར་མ་ཟད། ཕྱི་ཟླ་༩་པའི་ནང་དུ་རྒྱལ་ས་ཐེ་པེ་དང་དེའི་ཉེ་འཁོར་གྱི་གཞི་རིམ་འགོ་ཁྲིད་༢༠་ལྷག་དང་དེ་དག་གི་བཟའ་མི་་ཚོར་རྒྱ་ནག་གིས་འགྲོ་གྲོན་བཏང་ནས་ཧྲང་ཧེ་ལ་སྤྲོ་འཆམ་དུ་ཁྲིད་འདུག གཟའ་འཁོར་འདིར་ཐེ་པེ་གསར་པ་དང་དེའི་ཉེ་འཁོར་གྱི་ས་གནས་སྲིད་དོན་ཚོགས་པ་ཁག་གི་སྲིད་དོན་པ་༡༠་ལྷག་རྒྱ་ནག་ཏུ་ཕྱིན་འདུག ལོ་བཞིའི་སྔོན་གྱི་འོས་བསྡུ་དང་བསྡུར་ན་༢༠༢༤་ལོའི་འོས་བསྡུའི་སྔོན་དེར་ཐེ་པེ་གྲོང་ཁྱེར་ནས་རྒྱ་ནག་ཏུ་འགྲོ་མཁན་མང་བ་བྱུང་འདུག་ཅེས་བཀྲལ། ༢༠༢༣་འགོ་ཚུགས་ནས་ཕྱི་ཟླ་༡༡་པའི་ཟླ་མཇུག་བར་དུ་ཐེ་ཝན་གྱི་གྲོང་གསེབ་ཁག་གི་འགོ་ཁྲིད་དང་ཚོ་ཤོག་ཁག་གི་སྡེ་དཔོན་སོགས་མི་༡༠༠༠་ལྷག་རྒྱ་ནག་ལ་སྤྲོ་འཆམ་དུ་ཁྲིད། རྒྱ་ནག་ལ་འབྲེལ་བ་དམ་ཟབ་འཛིན་དགོས་པའི་ལངས་ཕྱོགས་འཛིན་པའི་ས་གནས་ཁག་ཏུ་རྒྱ་ནག་གིས་ཐེ་ཇུས་བྱ་རྒྱུ་ཤུགས་ཆེ་རུ་བཏང་ཡོད་པའི་གནས་ཚུལ་ཐོན་འདུག
