༄༅།། རྒྱ་ནག་དམར་ཤོག་གི་སྲིད་བློན་གཞོན་པ་ཟུར་པ་ཀྲང་གའོ་ལིས་འཛམ་གླིང་ཡོངས་སུ་སྐད་གྲགས་ཡོད་པའི་རྒྱ་ནག་གི་དྲྭ་གྲུག་རྩེད་འགྲན་པ་ཕེང་ཧྲུའི་ལ་ལོ་བཅུའི་རིང་བཙན་དབང་ཆགས་སྤྱོད་དང་ལྐོག་ཏུ་གབ་མཐུན་བྱེད་དུ་བཅུག་པའི་གནས་ཚུལ་བྱུང་ཡོད་ཅིང་། ཉེ་ཆར་ཕྱི་ཟླ་༡༡་པའི་ཚེས་༢་ཉིན་ཕེང་ཧྲུས་རང་ལ་རྒྱ་ནག་གི་སྲིད་གཞོན་གཞོན་པ་ཟུར་པ་དེས་བཙན་དབང་དང་ལོག་གཡེམ་ཇི་ལྟར་བྱས་པའི་གནས་ཚུལ་རྣམས་རྩོམ་ཡིག་ཏུ་བཀོད་ནས་དྲྭ་ལམ་དུ་ཡོངས་གྲགས་སུ་བཀྲམ། དེ་ནས་རྒྱ་ནག་གི་དྲྭ་ལམ་ཁག་ཏུ་ཕེང་ཧྲུའི་མཐོང་ཐོས་མེད་པར་གར་སོང་ཆ་མེད་དུ་གྱུར་པར་མ་ཟད། ད་ལྟ་རྒྱལ་སྤྱིའི་རྩེད་འགྲན་པ་དང་འགྲོ་བ་མིའི་ཐོབ་ཐང་ཚོགས་པ་སོགས་ཀྱིས་རྒྱ་ནག་གཞུང་ལ་ངོ་རྒོལ་བྱས་ནས་པེ་ཅིང་གི་ཨོ་ལིམ་ཕིཀ་རྩེད་འགྲན་ལ་མཉམ་ཞུགས་བྱ་རྒྱུ་ཕྱིར་འཐེན་བྱེད་དགོས་ཞེས་ལས་འགུལ་སྤེལ་རྒྱུ་ཤུགས་ཆེ་རུ་སོང་། དེ་རིང་ཕྱི་ཟླ་༡༡་པའི་ཚེས་༢༣་ཉིན་རྒྱ་ནག་གཞུང་གིས་ཐེངས་དང་པོར་ཕེང་ཧྲུའི་གནས་ཚུལ་ཅུང་ཙམ་སྤེལ་ཡོད་པ་སོགས་ཀྱི་སྐོར། རྒྱལ་སྤྱིའི་གསར་ལམ་ཁག་ལ་ཐོན་པའི་གནས་ཚུལ་རྣམས་འཕྲིན་ལས་ཆོས་སྒྲོན་གྱིས་སྙན་སྒྲོན་ཞུ་ཡི་རེད།།
