༄༅།། ཨུ་རུ་སུའི་བྷ་ཤ་ཀོར་ཏོ་སི་ཐན་སྤྱི་མཐུན་ས་ཁུལ་གྱི་མི་མང་༡༥༠༠་ལྷག་གིས་སླར་ཡང་ངོ་རྒོལ་ལས་འགུལ་སྤེལ་ཡོད་པའི་གནས་ཚུལ་ཐོན་འདུག ཕྱི་ཟླ་དང་པོའི་ཚེས་༡༩་ཉིན་ཕྱི་རྒྱལ་དུ་དཔར་འགྲེམ་བྱེད་བཞིན་པའི་མོ་སི་ཀོ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། གཟའ་འཁོར་འདིར་ཨུ་རུ་སུའི་གཞུང་གིས་བྷ་ཤ་ཀོར་ཏོ་སི་ཐན་གྱི་ཐོབ་ཐང་རྩོད་ལེན་པ་གྲགས་ཅན་ཧྥ་ཡིལ་ཨལ་སི་ནོབ་འཛིན་བཟུང་བྱས་ཤིང་། ཁོ་ལ་མི་རིགས་དགྲར་འཛིན་གྱི་ཞེ་འཁོན་བསླངས་པའི་ནག་ཉེས་བཙུགས་ཏེ་ལོ་བཞིའི་ཁྲིམས་ཐག་བཅད། དེ་རིང་གཟའ་པ་སངས་ཉིན་བྷ་ཤ་ཀོར་ཏོ་སི་ཐན་སྤྱི་མཐུན་ས་གནས་དེའི་མང་ཚོགས་རྣམས་ས་ལཱ་ཝ་ཏ་ཡུ་ལ་ཡེབ་ཐང་ཆེན་དུ་འདུས་ནས་གཞས་བཏང་བ་དང་བྲོ་འཁྲབ། ཨུ་རུ་སུའི་གཞུང་གིས་འཕྲལ་དུ་བྷ་ཤ་ཀོར་མི་རིགས་ཀྱི་ཐོབ་ཐང་རྩོད་ལེན་པ་ཧྥ་ཡིལ་ཨལ་སི་ནོབ་གློད་གྲོལ་གཏོང་དགོས་ཞེས་སྐད་བརྒྱབ། ཨུ་རུ་སུའི་དྲག་ཆས་ཉེན་རྟོག་པས་ཁྲིམས་འགལ་གྱི་འདུ་འཛོམས་བྱེད་མི་ཆོག་ཅེས་མི་མང་ངོ་རྒོལ་བ་རྣམས་མཐའ་བསྐོར།།
བྷ་ཤ་ཀོར་ཏོ་སི་ཐན་གྱི་མི་མང་ངོ་རྒོལ་བ་ཚོས་དྲག་ཆས་ཉེན་རྟོག་པས་མི་མང་ཁག་ཅིག་འཛིན་བཟུང་བྱས་ནས་རླངས་འཁོར་ནང་དུ་འཇུག་གི་ཡོད་པ་དང་འཇིགས་སྐུལ་བྱེད་བཞིན་པའི་བརྙན་འཕྲིན་བླངས་ཏེ་དྲྭ་ལམ་དུ་བཀྲམ། ཕྱི་དྲོའི་ཆུ་ཚོད་དང་པོའི་ཐོག་ཏུ་ངོ་རྒོལ་ལས་འགུལ་མཚམས་བཞག་ཀྱང་མི་༡༠་གྲངས་ཤིག་འཛིན་བཟུང་ཐེབས། བྷ་ཤ་ཀོར་ཏོ་སི་ཐན་གྱི་ནང་སྲིད་ལས་ཁུངས་ནས་ཨལ་སི་ནོབ་འཛིན་བཟུང་དང་ཁྲིམས་ཐག་གཅོད་ཡུལ་བྷེ་མག་གྲོང་རྡལ་གྱི་ངོ་རྒོལ་ལ་ཞུགས་པའི་མི་གཉིས་ལ་ཁྲིམས་འགལ་གྱི་ནག་ཉེས་བཙུགས། ཨུ་རུ་སུའི་གཞུང་ནས་སྐྱེ་བོ་གང་ཞིག་གིས་མང་ཚོགས་ལ་སྐུལ་སློང་བྱས་ནས་ངོ་རྒོལ་ཁྲོམ་སྐོར་བྱེད་དུ་བཅུག་ན་ལོ་བཅོ་ལྔའི་ཁྲིམས་ཐག་གཅོད་རྒྱུ་ཡིན། གཞུང་གི་ལས་སྣེ་ཚོར་རྒོལ་འཛིང་བྱས་ན་ལོ་༡༠་ལ་བཙོན་འཇུག་བྱ་རྒྱུ་ཡིན་ཞེས་བསྒྲགས། ཁ་སང་གཟའ་ཕུར་བུའི་ཉིན་ཨུ་ཧྥ་གྲོང་ཁྱེར་གྱི་ཁྲིམས་ཁང་གིས་ངོ་རྒོལ་ལས་འགུལ་ལ་ཞུགས་པའི་མི་༦་ལ་ཉིན་༡༠་ནས་༡༣་བར་དུ་བཙོན་འཇུག་བྱ་རྒྱུའི་ཁྲིམས་ཐག་བཅད།།
ལོ་ན་༣༧་ལ་སོན་པའི་བྷ་ཤ་ཀོར་མི་རིགས་ཀྱི་ཐོབ་ཐང་རྩོད་ལེན་པ་ཨལ་སི་ནོབ་ཀྱིས་འདས་པའི་ལོ་བཅོ་ལྔའི་རིང་ས་གནས་དེའི་བདག་དབང་དང་ཆབ་སྲིད། སྐད་ཡིག་དང་མི་རིགས་ཀྱི་ཐོབ་ཐང་བརྩད། ཁོ་པ་བྷ་ཤ་ཀོར་ཏོ་སྒྲིག་འཛུགས་ཚུད་པའི་ལས་འགུལ་ཚོགས་པ་འགའ་ཞིག་གི་ཚོགས་མི་ཡིན་ཞིང་། ༢༠༢༠་ལོའི་ཕྱི་ཟླ་༥་པའི་ནང་ཨུ་རུ་སུའི་གཞུང་གིས་བྷ་ཤ་ཀོར་ཏོ་སྒྲིག་འཛུགས་དེ་ཁྲིམས་འགལ་གྱི་ཚོགས་པ་ཞིག་ཏུ་བརྩིས། བྷ་ཤ་ཀོར་ཏོ་སི་ཐན་སྤྱི་མཐུན་ས་ཁུལ་ལ་མི་འབོར་ས་ཡ་༤་དང་འབུམ་༡་ལྷག་འདུག ས་གནས་དེའི་ཆགས་ཡུལ་ནི་ཨུ་རལ་རི་ཁུལ་དུ་ཡོད་ཅིང་། ༢༠༢༠་ལོར་ཨུ་རུ་སུའི་བཟོ་ཚོང་ལས་ཁང་ཞིག་གིས་རི་ཁོག་ནས་བུལ་ཏོག་གི་གཏེར་ཁ་བསྔོགས། ཧྥ་ཡིལ་ཨལ་སི་ནོབ་ཀྱིས་ས་གནས་མང་ཚོགས་ཀྱི་འགོ་ཁྲིད་ནས་གཏེར་ཁ་སྔོག་ཡུལ་དེ་གནས་རི་རྩ་ཆེན་ཞིག་ཡིན་ཞེས་ངོ་རྒོལ་བྱས་ནས་བཀག ཨུ་རུ་སུའི་གཞུང་གིས་ཁོར་ཡུག་སྲུང་སྐྱོབ་ཀྱི་ལས་འགུལ་དེ་འཇིགས་སྐུལ་རིང་ལུགས་ཀྱི་ལས་འགུལ་ཞིག་ཏུ་ངོས་འཛིན་བྱས་འདུག
ཕྱི་ཟླ་དང་པོའི་ཚེས་༡༨་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། བྷ་ཤ་ཀོར་ཏོ་སི་ཐན་གྱི་འགོ་ཁྲིད་ར་ཌི་ཀཱ་བི་རོབ་ཀྱིས་ངས་ས་གནས་མི་དམངས་ལ་མཐའ་ལྷུང་རིང་ལུགས་པ་ཚོས་ལས་འགུལ་བའི་གདོང་འབག་གྱོན་ཡོད་པ་གསལ་བཀྲོལ་བྱེད་མ་ཐུབ་པར་ཟིང་འཁྲུག་ལངས་པ་ཡིན་སྲིད། ཁྱེད་ཚོས་ཁོར་ཡུག་སྲུང་སྐྱོབ་པ་དང་རྒྱལ་གཅེས་རིང་ལུགས་པ་ཡིན་ཞེས་གདོང་འབག་ཡག་པོ་ཞིག་གྱོན་ཆོག་གི་རེད། དོན་དངོས་སུ་ཁྱེད་ཚོའི་མཐར་ཐུག་གི་དམིགས་ཡུལ་ནི་རྦད་དེ་ཐ་དད་ཅིག་རེད། སྒྲིག་འཛུགས་དེའི་ཚོགས་མི་ཁག་ཅིག་ཕྱི་རྒྱལ་དུ་བསྡད་འདུག ཁོ་ཚོ་རྒྱབ་གཏོད་པ་ཡིན་པ་དང་འཇབ་དམག་རྒྱག་དགོས་པའི་ངན་སྐུལ་བྱས་ཏེ་བྷ་ཤ་ཀོར་ཏོ་སི་ཐན་སྤྱི་མཐུན་ས་ཁུལ་ཨུ་རུ་སུའི་མངའ་འོག་ནས་རང་བཙན་བྱེད་དུ་འཇུག་གི་ཡོད་པ་རེད་ཅེས་དར་འཕྲིན་དྲྭ་ལམ་དུ་ཨུ་རུ་སུའི་གཞུང་གི་སྲིད་ཇུས་ལ་རྒྱབ་སྐྱོར་གྱི་འཕྲིན་ཐུང་ཞིག་སྤེལ།།
བྷ་ཤ་ཀོར་ཏོ་སི་ཐན་གྱི་འགོ་ཁྲིད་ར་ཌི་ཀཱ་བི་རོབ་ཀྱིས་རྒྱབ་གཏོད་པ་ཞེས་ནག་ཉེས་འཛུགས་ཡུལ་གཅིག་ནི་རུ་སི་ལཱན་གྷ་བྷ་སོབ་ཡིན་པར་མ་ཟད། ཁོ་པས་ཨལ་སི་ནོབ་དང་མཉམ་དུ་བྷ་ཤ་ཀོར་ཏོ་ལས་འགུལ་ཚོགས་པ་བཙུགས་པས་ཨུ་རུ་སུའི་གཞུང་གིས་ཕྱི་རྒྱལ་གྱི་གསང་ཉུང་ཞེས་ཞྭ་མོ་གཡོགས། གྷ་བྷ་སོབ་རང་ཡུལ་དུ་འདུག་མ་ཐུབ་པར་ལི་ཐུ་ཝེ་ཎི་ཡར་བྲོས། ཁོ་པས་གསར་འགོད་པར་བྷ་ཤ་ཀོར་ཏོ་སི་ཐན་གྱི་མི་འབོར་བརྒྱ་ཆ་༣༠་ལྷག་བྷ་ཤ་ཀོར་མི་རིགས་ཡིན་མོད། འོན་ཀྱང་ཕུ་ཊིན་གྱི་གདུག་རྩུབ་སྲིད་ཇུས་འོག་ཏུ་བྷ་ཤ་ཀོར་མི་རིགས་ཀྱི་སྐད་ཡིག་དང་རིག་གཞུང་ཉམས། ང་ཚོས་གཏེར་ཁ་སྔོག་འདོན་ལ་ངོ་རྒོལ་བྱས་ཀྱང་མི་རིགས་དགྲར་འཛིན་བྱས་པ་རེད་ཅེས་ཉེས་མིང་བཏགས་པ་ནི་ལོག་འགྲེལ་རེད། ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་དམག་བརྒྱབ་ནས་བྷ་ཤ་ཀོར་མི་རིགས་ཀྱི་སྐྱེས་པ་རྣམས་དམག་ཁོངས་སུ་བསྡུ་བཞིན་པར་ངོ་རྒོལ་ཡོད་ཅེས་བཤད། ཨུ་རུ་སུ་རྒྱལ་ཡོངས་སུ་དམག་འཁྲུག་ལ་ངོ་རྒོལ་བྱེད་ཕོད་ཀྱི་མེད་ཀྱང་བྷ་ཤ་ཀོར་ཏོ་སི་ཐན་སྤྱི་མཐུན་ས་ཁུལ་དུ་ངོ་རྒོལ་བྱེད་ཀྱི་ཡོད་པའི་གནས་ཚུལ་ཐོན་འདུག
རུ་སི་ལཱན་གྷ་བྷ་སོབ་ནས་སྲིད་འཛིན་ཕུ་ཊིན་གྱིས་ཨུ་རུ་སུའི་མི་རིགས་དཀར་པོ་ལས་ཀྱང་ཁ་ཆེ་དང་གྲངས་ཉུང་མི་རིགས་གཞན་ཁག་དམག་སར་མང་བ་གཏོང་གི་འདུག ང་ཚོ་ཨུ་རུ་སུའི་མངའ་ཁོངས་སུ་འདུག་འདོད་མེད། ང་ཚོ་ཅིའི་ཕྱིར་འདུག་དགོས་པ་རེད། ང་ཚོ་རིམ་གྱིས་ཤི་ནས་རྩ་ཡལ་དུ་འགྲོ་དགོས་པ་རེད་དམ། སྲིད་ཇུས་དེས་ང་ཚོ་རིམ་གྱིས་འཆི་རུའང་འཇུག་རྒྱུ་མ་རེད། ང་ཚོ་མྱུར་དུ་རྩ་མེད་གཏོང་རྒྱུ་རེད། གཟའ་པ་སངས་ཉིན་བྷ་ཤ་ཀོར་ཏོ་སི་ཐན་གྱི་རྒྱལ་ས་ཨུ་ཧྥ་གྲོང་ཁྱེར་དུ་ངོ་རྒོལ་རྒྱ་ཆེན་པོ་ཞིག་བྱ་འཆར་ཡོད། ཁ་སང་གི་ངོ་རྒོལ་ལ་བལྟས་ནས་མི་དམངས་རྣམས་སྐྲག་ནས་འདུག་དགོས་པ་དེར་ཡི་ཐང་ཆད་ཡོད་པའི་རྣམ་པ་ཞིག་མངོན་ཞེས་བསྟན། ཕྱི་ཟླ་དང་པོའི་ཚེས་༡༥་ནས་མི་༥༠༠༠་ལྷག་གིས་ཁྲིམས་ཁང་དུ་ངོ་རྒོལ་བྱ་རྒྱུ་འགོ་ཚུགས། ཨུ་རུ་སུའི་གཞུང་གིས་ངོ་རྒོལ་ལས་འགུལ་གྱི་སྣེ་ཁྲིད་པ་དང་མདུན་དུ་ཐོན་མཁན་རྣམས་འཛིན་བཟུང་བྱས་པའམ། ཡང་ན་ཁོ་ཚོར་ཉིན་ཤས་ཀྱི་ཁྲིམས་ཐག་བཅད་ནས་བཀག་ཉར་བྱེད་ཀྱི་ཡོད་པའི་གནས་ཚུལ་ཐོན་འདུག
ཕྱི་ཟླ་དང་པོའི་ཚེས་༡༩་ཉིན་ནེའུ་ཡོཀ་དུས་བབ་ཚོགས་པར་ལ་གནས་ཚུལ་ཐོན་པ་ལྟར་ན། ཡུཀ་རེན་གྱི་དམག་འཁྲུག་གིས་ཨུ་རུ་སུ་དང་གྲངས་ཉུང་མི་རིགས་ཁག་གི་འབྲེལ་བ་སྡུག་ཏུ་སོང་། བྷ་ཤ་ཀོར་ཏོ་སི་ཐན་གྱི་ངོ་རྒོལ་དེས་ཨུ་རུ་སུའི་སྤྱི་ཚོགས་ལ་གཡོ་འགུལ་ཆེན་པོ་ཞིག་ཐེབས་པ་མཚོན་ཐུབ། སྔ་ལོ་ཧྥ་ཡིལ་ཨལ་སི་ནོབ་ཀྱིས་བྷ་ཤ་ཀོར་མི་རིགས་ལ་དཔལ་འབྱོར་དང་རིག་གཞུང་གི་རང་སྐྱོང་ཆེན་པོ་དགོས། ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་ནས་དམག་ཁྲལ་བསྡུ་སྟངས་དྲང་སྙོམས་མི་འདུག ང་ཚོའི་རྣམ་རིག་ཅན་དང་དཔའ་རྒོད་རྣམས་སྲེག་ཟའི་ཟས་སུ་གྱུར། འདི་ནི་ང་ཚོའི་དམག་འཁྲུག་མ་རེད། ང་ཚོའི་ས་ཆར་དཔུང་འཇུག་བྱས་ཡོད་པ་མ་རེད་ཅེས་སྤྱི་ཚོགས་དྲྭ་ལམ་དུ་གསར་འགྱུར་སྤེལ། དེ་ནས་བཟུང་སྟེ་ཨུ་རུ་སུའི་གཞུང་གིས་ཨལ་སི་ནོབ་དམག་འཁྲུག་གི་སྲིད་ཇུས་ལ་རྒྱབ་སྐྱོར་མེད་པ་དང་ཁ་བྲལ་རིང་ལུགས་པ། མི་རིགས་རིང་ལུགས་པ་ཞིག་ཏུ་བརྩིས་ནས་འཛིན་བཟུང་བྱ་རྒྱུའི་གོ་སྐབས་ཤིག་ལ་བསྒུགས་པའི་གནས་ཚུལ་ཐོན་འདུག
སྲིད་འཛིན་ཕུ་ཊིན་གྱི་གཏམ་བཤད་འབྲི་མཁན་ཟུར་པ་དང་དེང་སྐབས་ཕྱི་རྒྱལ་ལ་བཙན་བྱོལ་དུ་བྲོས་ཡོང་ཡོད་པའི་བྷ་ཤ་ཀོར་བ་ཨ་བྷ་སི་གྷ་ལི་ཡ་མོབ་་ཀྱིས་བཤད་པ་ལྟར་ན། ཨུ་རུ་སུའི་གཞུང་མི་རིགས་རིང་ལུགས་དང་ཁ་བྲལ་རིང་ལུགས་ལ་ཧ་ཅང་སྐྲག ད་དུང་ཡང་ཕུ་ཊིན་དང་ཉེ་འཁོར་གྱི་འགོ་ཁྲིད་ཚོ་ཨུ་རུ་སུ་དམར་ཤོག་རྒྱལ་ཁབ་ཁ་འཐོར་དུ་ཕྱིན་པའི་སྡུག་བསྔལ་མ་བསངས་པར་ལུས་འདུག ཁོ་ཚོ་ཨུ་རུ་སུ་སླར་ཡང་ཁ་འཐོར་དགུ་འཐོར་དུ་འགྲོ་རྒྱུའི་སེམས་ཁྲལ་ལངས་ཏེ་མི་རིགས་མཐུན་སྒྲིལ་དང་མངའ་ཁོངས་གོང་བུར་གཅིག་གྱུར་བྱ་རྒྱུ་གཙིགས་སུ་འཛིན་གྱི་འདུག་ཅེས་བཀྲལ། བྷེ་མག་གྲོང་རྡལ་དུ་ངོ་རྒོལ་བྱེད་མཁན་ཞིག་གིས་ང་ཚོ་ནི་ཨུ་རུ་སུ་མནའ་འབྲེལ་རྒྱལ་ཁབ་ཀྱི་འབངས་མི་བྷ་ཤ་ཀོར་ཏོ་སི་ཐན་སྤྱི་མཐུན་ས་ཁུལ་གྱི་མི་དམངས་ཡིན། ང་ཚོ་མཐའ་ལྷུང་རིང་ལུགས་པ་མིན་ཞེས་ཕུ་ཊིན་ལ་ཐད་ཀར་སྐྱོན་བརྗོད་བྱས། བྷ་ཤ་ཀོར་ཏོ་སི་ཐན་གྱི་ངོ་རྒོལ་ལས་འགུལ་འདི་ཨུ་རུ་སུའི་ས་གནས་གཞན་ཁག་ཏུ་ཁྱབ་སྲིད་པའི་ཉེན་ཁ་ཆེ་ཞེས་གནས་ཚུལ་སྤེལ་འདུག
གླེང་སྟེགས།