༄༅།། རྒྱལ་ཁབ་དང་མི་རིགས་ཁག་གི་ཆབ་སྲིད་དང་དཔལ་འབྱོར་སོགས་ཀྱི་འབྲེལ་བ་ནི་འཛུགས་སླ་བ་ལྟར་ཆད་ཀྱང་སླ། ཆོས་རིག་གི་འབྲེལ་བ་ནི་བརྟན་པོ་དང་ཡུན་དུ་གནས་ཤིང་། གལ་སྲིད་ཆོས་རིག་གི་འབྲེལ་བ་དེ་ཆད་ན་སླར་གསོ་བྱ་རྒྱུ་ཤིན་ཏུ་དཀའ་བའི་གནས་ཚུལ་ཐོན་འདུག ཕྱི་ཟླ་༡༢་པའི་ཚེས་༢༥་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱིས་འདས་པའི་ལོ་བརྒྱ་ཆ་ཕྲག་མང་པོར་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་ལམ་སྲོལ་ལྟར་ཕྱི་ཟླ་དང་པོའི་ཚེས་༧་ཉིན་ཡེ་ཤུའི་འཁྲུངས་སྐར་སྲུང་བརྩི་ཞུས། ༢༠༢༢་ལོའི་ཕྱི་ཟླ་༢་པའི་ཚེས་༢༤་ཉིན་ཡུཀ་རེན་ལ་ཨུ་རུ་སུའི་བཙན་འཛུལ་བྱུང་ནས་དམག་འཁྲུག་ལངས། ༢༠༢༣་ལོའི་ཕྱི་ཟླ་༧་པའི་ནང་ཡུཀ་རེན་གྱིས་གཞུང་འབྲེལ་ཐོག་ཏུ་འཛམ་གླིང་སྤྱི་བསྟུན་ནས་ཕྱི་ཟླ་༡༢་པའི་ཚེས་༢༥་ཉིན་སྟོན་པ་ཡེ་ཤུའི་འཁྲུངས་སྐར་སྲུང་བརྩི་ཞུ་རྒྱུའི་ཐག་བཅད། དེར་བརྟེན་ཨུ་རུ་སུ་དང་ཡུཀ་རེན་ལ་མི་རིགས་དང་སྐད་ཡིག ཆོས་ལུགས་བཅས་ཀྱི་འབྲེལ་བ་དམ་ཟབ་ཡོད་པར་དོ་ཕོག་བྱུང་བའི་གནས་ཚུལ་ཐོན་འདུག
ཡུཀ་རེན་གྱིས་ཡེ་ཤུའི་འཁྲུངས་ཚེས་བསྒྱུར་བ་ནི་རྒྱལ་ཁབ་དེར་བཙན་འཛུལ་བྱུང་བའི་རྗེས་སུ་ཨུ་རུ་སུའི་རིག་གཞུང་གི་ཤུགས་རྐྱེན་ཉམས། ཡུཀ་རེན་ཆོས་དང་རིག་གཞུང་། བསམ་བློའི་འདུ་ཤེས་བཅས་པ་ཡུ་རོབ་ཕྱོགས་སུ་ཁ་ལོ་སྒྱུར་གྱི་ཡོད་པའི་རྟགས་སུ་མངོན། ལེ་སི་ཡ་དང་ཨོ་ལེཀ་ཟན་བཟའ་ཚོ་གཉིས་དང་ཕྲུ་གུ་ཚོར་ཐེངས་དང་པོར་ཉི་མ་གཅིག་ལ་སྟོན་པ་ཡེ་ཤུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུའི་གོ་སྐབས་ཐོབ། ལེ་སི་ཡས་ང་ནི་ཡེ་ཤུ་གནམ་བདག་ཆོས་ལུགས་ཀྱི་རྗེས་འབྲང་བ་ཡིན། ངའི་ཁྱོད་ག་ནི་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བ་རེད། ལོ་འདིར་ང་དང་ཁྱོ་ག ཕྲུ་གུ་གཉིས་བཅས་ང་ཚོ་བཟའ་མི་ཚང་མས་ཉིན་གཅིག་ལ་ཡེ་ཤུའི་འཁྲུངས་སྐར་དུས་ཆེན་མཉམ་དུ་སྲུང་བརྩི་ཞུས་པ་ཡིན། འདི་ནི་ཡུཀ་རེན་ལ་ཐུན་མོང་མ་ཡིན་པའི་ཆོས་རིག་གི་སྲོལ་རྒྱུན་ཞིག་ཡོད་པ་སླར་གསོ་དང་དར་སྤེལ་བྱུང་བའི་ཉིན་མོ་རེད་ཅེས་དགའ་ཚོར་གྱིས་བརྟས། ཡུཀ་རེན་གྱི་གཞུང་གིས་ཡེ་ཤུའི་འཁྲུངས་ཚེ་བསྒྱུར་བར་མི་དམངས་རྣམས་འཐད།།
ཨུ་རུ་སུའི་བཙན་འཛུལ་བྱུང་ནས་ཡུཀ་རེན་གྱིས་ཨུ་རུ་སུ་དམར་ཤོག་གི་མཚོན་རྟགས་ཐོ་བ་དང་ཟོར་བ། སྐར་མ་དམར་པོ་དང་ལེ་ཉིང་སོགས་ཀྱི་སྐུ་འདྲ་རྣམས་རྩ་མེད་བཏང་སྟེ་ཨུ་རུ་སུ་དམར་ཤོག་གི་ཤུལ་རྒྱུན་བཅད། ཨུ་རུ་སུའི་རྩོམ་པ་པོ་ཚོས་བྲིས་པའི་བརྩམས་ཆོས་ཁག་ཀྱང་དཔེ་ཁང་དང་དཔེ་མཛོད་ཁག་ནས་བསྡུས་ཏེ་ཡུཀ་རེན་གྱི་རྩོམ་པ་པོ་དང་མཁས་པ་ཚོས་བྲིས་པའི་བརྩམས་ཆོས་རྣམས་དཔར་དུ་བསྐྲུན་ནས་བཀྲམ། ཡུཀ་རེན་གྱི་ངོ་བོ་དང་རིག་གཞུང་། ཆོས་ལུགས་ཀྱི་སྲོལ་རྒྱུན་རྣམས་གསལ་པོར་བསྟན། ཡེ་ཤུའི་འཁྲུངས་ཚེས་ཕྱི་ཟླ་༡༢་པའི་ཚེས་༢༥་ལ་བསྒྱུར་བ་ནི་ཡུཀ་རེན་སླར་འཁྲུངས་ཀྱི་དུས་ཆེན་ཡང་རེད་ཅེས་མང་ཚོགས་ཀྱིས་དགའ་བ་སྒོམ། ལོ་ན་༤༤་ལ་སོན་པའི་དམག་མི་ཡེབ་ཧེན་ཀོ་ནི་ཡཀ་ཞེས་པ་ཞིག་གིས་འདི་ནི་ལོ་རྒྱུས་ཀྱི་དྲང་བདེན་ཐོབ་པ་ཞིག་རེད། ང་ཚོ་འཛམ་གླིང་སྤྱིའི་འགྲོས་དང་མཐུན་པར་མདུན་སྐྱོད་བྱས་པ་ཁོ་ན་མིན་པར་རྒྱལ་ཁབ་འདིའི་སྲོལ་རྒྱུན་རྣམས་བཙན་རྒྱལ་རིང་ལུགས་ཀྱི་གཉའ་གནོན་འོག་ནས་ཐར་པ་རེད་ཅེས་བསྒྲགས།།
ཕྱི་ཟླ་༡༢་པའི་ཚེས་༢༥་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་བ་ཕལ་མོ་ཆེ་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བ་ཡིན་ཞིང་། རྒྱལ་ཁབ་དེའི་ཡེ་ཤུའི་ཆོས་སྡེ་ཁག་ཀྱང་ཨུ་རུ་སུའི་ཡེ་ཤུའི་ཆོས་སྡེ་ཁག་གི་ཁོངས་སུ་གཏོགས་པར་མ་ཟད། ཡུཀ་རེན་གྱི་དབུ་བླ་དེ་ཨུ་རུ་སུའི་ཡེ་ཤུ་ཆོས་སྡེའི་གདན་ས་སྟེ། མོ་སི་ཀོའི་ཡེ་ཤུའི་ཆོས་སྡེའི་དབུ་ཁྲིད་ཀྱིས་བསྐོ་དགོས། ༢༠༡༤་ལོར་ཨུ་རུ་སུའི་དམག་གིས་ཡུཀ་རེན་གྱི་ཀེ་རེ་མཱི་ཡ་གླིང་ཟུར་བཙན་གྱིས་ཕྲོགས། ༢༠༡༩་ནས་ཡུཀ་རེན་གྱིས་ཡེ་ཤུའི་ཆོས་སྡེ་ལོགས་སུ་བཙུགས། ཡུཀ་རེན་ལ་ཨུ་རུ་སུའི་ཡེ་ཤུའི་ཆོས་སྡེའི་དབང་ཚད་དང་ཤུགས་རྐྱེན་ཉམས་འགོ་ཚུགས། ཨོག་ས་ན་པོ་ཝི་ཡ་ཀལ་ཞེས་པ་ཞིག་གིས་ཕྱི་ཟླ་༡༢་པའི་ཚེས་༢༥་ཉིན་གུང་སེང་བཏང་བ་ནི་རང་གི་ངོ་བོ་སླར་གསོ་བྱུང་བ་ཞིག་རེད། ང་ཚོ་རང་གི་ཁྱིམ་མཚེས་དེར་རྒྱང་འགྱེད་ཀྱི་ཡོད། ཁོ་ཚོས་ཡུཀ་རེན་གྱི་རྒྱལ་ཁབ་རྩ་མེད་དང་མི་དམངས་དམར་གསོད། ང་ཚོའི་ས་ཞིང་མེད་བསྲེགས་དང་ཁང་ཁྱིམ་རྩ་སྣུབ་བྱེད་ཀྱི་འདུག་ཅེས་ཨུ་རུ་སུར་ཆོས་དང་རིག་གཞུང་། མི་རིགས་དང་རྒྱུན་སྲོལ་བཅས་ཀྱི་འབྲེལ་བ་བཅད་པའི་རྒྱུ་མཚན་བགྲངས།།
ཡུཀ་རེན་གྱི་ཀ་རི་ཝོ་རིབ་ནི་ཡ་གྲོང་གསེབ་ཀྱི་མི་མང་བརྒྱ་ཕྲག་འགའ་ཞིག་ཡེ་ཤུའི་ལྷ་ཁང་དུ་འདུས། ས་གནས་དེའི་ཡེ་ཤུའི་བླ་མས་མི་རྣམས་དགའ་སྟོན་ཆེད་དུ་འདུས་པ་མིན་པར་གསོལ་བ་སྨོན་ལམ་གདབ་ཏུ་ཡོང་བ་རེད། ས་གནས་འདིར་མི་འབོར་༡༥༠༠་ལས་མེད། དེའི་ཁོངས་ནས་མི་༡༦་དམག་འཁྲུག་ནང་དུ་བསད་སོང་ཞེས་གསར་འགོད་པར་གླེང་མོལ་བྱས་འདུག ལོ་ན་༢༧་ལ་སོན་པའི་ཨོ་ལཱ་མེ་ནིག་ཞེས་པ་ཞིག་གིས་ང་ཚོའི་མི་ཧ་ཅང་མང་པོ་དམག་འཁྲུག་ནང་དུ་ཤི་སོང་། མི་དམངས་ལ་ཡེ་ཤུའི་འཁྲུངས་སྐར་དུས་སུ་བྱིན་རླབས་འཇུག་གི་རེད་བསམས་པའི་ཚོར་བ་དང་དགའ་ཚོར་མི་འདུག ཡེ་ཤུའི་འཁྲུངས་སྐར་གྱི་རྟེན་འབྲེལ་གྲ་རྒྱས་ལོད་དང་ངོ་བོ་གཉིས་ལ་རྦད་དེ་འགྱུར་བ་ཐེབས་སོང་ཟེར། ལོ་༦༣་ལ་སོན་པའི་ཨ་མ་ཞིག་གིས་ངས་ཉིན་ལྟར་དམག་སར་ཡོད་པའི་བུའི་བདེ་འཇགས་དོན་དུ་གསོལ་བ་འདེམས་ཀྱི་ཡོད། དམག་འཁྲུག་གིས་མིའི་གཤིས་ཀའང་སྒྱུར་གྱི་འདུག ང་ཚོའི་དགའ་སྟོན་ངོ་མ་ནི་རྒྱལ་ཁ་ཐོབ་པའི་རྗེས་སུ་འབྱུང་རྒྱུ་དང་ཡུཀ་རེན་ལ་རྒྱལ་ཁ་ཐོབ་ངེས་རེད་ཅེས་བཀྲལ།།
ཕྱི་ཟླ་༡༢་པའི་ཚེས་༢༥་ཉིན་ནེའུ་ཡོག་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ༡༩༩༡་ལོར་ཡུཀ་རེན་ལ་ཨུ་རུ་སུ་དམར་ཤོག་གི་དབང་བསྒྱུར་འོག་ནས་རང་བཙན་ཐོབ། རྒྱལ་ཁབ་དེ་རིམ་བཞིན་ནུབ་ཕྱོགས་སུ་ཁ་ལོ་བསྒྱུར་ནས་ཨུ་རུ་སུར་རྒྱང་བཀྱེད། ཕུ་ཊིན་གྱིས་ཡུཀ་རེན་ལ་བཙན་འཛུལ་དམག་འཁྲུག་བསླངས་ཏེ་འབྲེལ་བ་སྡུག་ཏུ་ཕྱིན་ནས་ཡུཀ་རེན་གྱིས་ནུབ་ཕྱོགས་སུ་འབྲེལ་བ་ཉེ་རུ་གཏོང་རྒྱུར་ཤུགས་སྣོན་བརྒྱབ། ༢༠༢༣་ནས་ཡུཀ་རེན་གྱིས་ཕྱི་ཟླ་༡༢་པའི་ཚེས་༢༥་ཉིན་ཡེ་ཤུའི་འཁྲུངས་སྐར་སྲུང་བརྩི་ཞུ་རྒྱུའི་ཐག་བཅད་པ་ནི་ཨུ་རུ་སུར་ལོ་སྟོང་ཕྲག་གི་ཆོས་རིག་སོགས་ཀྱི་འབྲེལ་བ་ཡོད་པ་ཆད་པ་རེད། ཡེ་ཤུའི་འཁྲུངས་ཚེས་བསྒྱུར་ན་ཆོས་ལུགས་ཀྱི་དུས་ཆེན་གཞན་ཁག་དང་མཛད་སྒོ་ཚུགས་སྟངས་ཀྱང་འགྱུར་སྲིད། ཡུཀ་རེན་བ་ཚོར་ཡེ་ཤུའི་འཁྲུངས་ཚེས་བསྒྱུར་བ་ནི་ཨུ་རུ་སུའི་ཆོས་རིག་གི་དབང་བསྒྱུར་འོག་ནས་བཅིངས་འགྲོལ་ཐོབ་པའི་ཚོར་སྣང་ཞིག་ཡོང་གི་འདུག་ཅེས་གནས་ཚུལ་སྤེལ་འདུག
ཧ་ལི་ཡ་ན་ཤི་ཝེ་ཛི་ཞེས་པ་ཞིག་གིས་ང་ཚོ་ཧ་ཅང་དགའ་པོ་བྱུང་། ཆོས་ལུགས་ནི་འཚོ་བའི་གྲུབ་ཆ་གཙོ་བོ་དེ་ཡིན། ཡེ་ཤུའི་འཁྲུངས་ཚེས་བསྒྱུར་ཏེ་ཡིད་དབང་རབ་ཏུ་འཕྲོག་པའི་ཡུཀ་རེན་གྱི་ཆོས་ལུགས་སྲོལ་རྒྱུན་རྣམས་འཛམ་གླིང་སྤྱི་ལ་སྦྲེལ་བ་རེད་ཅེས་དགའ་ཚོར་གྱི་རྣམ་འགྱུར་ཐོན། སྲིད་འཛིན་ཛེ་ལན་སི་ཀིས་དེ་རིང་ཡུཀ་རེན་བ་རྣམས་གཅིག་གྱུར་བྱུང་བ་རེད། ང་ཚོས་མཉམ་དུ་ཉིན་གཅིག་དང་ཚེ་གྲངས་གཅིག་ལ་ཁྱིམ་ཚང་ཆེན་པོ་འདིའི་ནང་དུ་ཡེ་ཤུའི་འཁྲུངས་སྐར་སྲུང་བརྩི་བྱེད་ཀྱི་ཡོད་ཅེས་གཏམ་བཤད་གནང་འདུག ཡུཀ་རེན་གྱི་ཡེ་ཤུའི་ཆོས་སྡེའི་མགྲིན་ཚབ་པ་མཱི་ཁེ་ལོ་ཨོ་མི་ལི་ཡན་གྱིས་མོ་སི་ཀོའི་ཆོས་སྡེའི་དབུ་ཁྲིད་ཀྱིས་ཨུ་རུ་སུ་དང་ཛར་གོང་མ་རྣམས་ལྷ་ལྟར་རྟོག་བཟོ་བྱས་ནས་མི་རྣམས་དེ་ལ་ཡིད་ཆེས་བྱེད་དུ་བཅུག་པ་རེད། ཨུ་རུ་སུར་རིག་གཞུང་གི་འབྲེལ་བ་བཅད་ན་ང་ཚོའི་ཁྱད་པར་དེ་སྟོན་ཐུབ། ཡུཀ་རེན་ཆབ་སྲིད་དང་དཔལ་འབྱོར། སྤྱི་ཚོགས་དང་རིག་གཞུང་གི་ཆ་ནས་ཨུ་རུ་སུ་དང་མ་འདྲ་བ་ཡིན་པའི་དབྱེ་བ་ཕྱེ་ཟིན་པ་རེད་ཅེས་བཀྲལ།།
ཡུཀ་རེན་གྱི་རྒྱལ་ས་ཀིབ་མོ་ཧི་ལ་སློབ་གླིང་གི་ཆོས་ལུགས་སློབ་དཔོན་ཧྥི་ལི་པོབ་ཡེ་ཆིས་ཡུཀ་རེན་བ་མང་ཆེ་བས་ཡེ་ཤུའི་འཁྲུངས་ཚེས་བསྒྱུར་བར་དང་ལེན་བྱས་པ་དང་འགྱུར་བཅོས་དེས་ཡེ་ཤུའི་འཁྲུངས་སྐར་གྱི་དོན་སྙིང་ལ་འགྱུར་བ་མ་ཐེབས། ང་ཚོས་ཚེས་གྲངས་ཤིག་ལ་རྟེན་འབྲེལ་ཞུ་ཡི་ཡོད་པ་མིན་པར་སྟོན་པ་ཡེ་ཤུའི་འཁྲུངས་སྐར་ལ་རྟེན་འབྲེལ་ཞུ་ཡི་ཡོད་པ་རེད་ཅེས་བཤད། ཡུཀ་རེན་གྱི་ཆོས་སྡེ་ཁག་ཅིག་གི་བླ་མ་ཉུང་ཤས་ཀྱིས་སྲོལ་རྒྱུན་མཁྲེགས་འཛིན་དང་ཨུ་རུ་སུར་ཆོས་དང་རིག་གཞུང་གི་འབྲེལ་བ་རྒྱུན་འཁྱོངས། ཁོ་ཚོས་སྐབས་འགར་ལྐོག་ཏུ་ཡུཀ་རེན་གྱི་དམག་དོན་གསང་བའི་གནས་ཚུལ་རྣམས་ཨུ་རུ་སུར་མཁོ་སྤྲོད་བྱས་ནས་འཛིན་བཟུང་བྱས་པའང་བྱུང་ཞིང་། ཕུ་ཊིན་གྱིས་བཙན་འཛུལ་དམག་འཁྲུག་ནས་ཡུཀ་རེན་དང་ཨུ་རུ་སུ་གཉིས་ཀྱི་ཆོས་དང་རིག་གཞུང་། མི་རིགས་དང་དམངས་སྲོལ། སྐད་ཡིག་གི་འབྲེལ་བ་ཆད་པ་ནི་དམག་འཁྲུག་ལ་ཕམ་ཉེས་བྱུང་བ་ལས་ཀྱང་ཐབས་རྡུགས་རེད་ཅེས་གནས་ཚུལ་སྤེལ་འདུག
