༄༅།། ཧོང་ཀོང་གི་གྲོང་སྡེ་ཁག་གི་འགོ་ཁྲིད་ཚོ་འོས་འདེམས་བྱས་པའི་སྐབས་སུ་མི་མང་འོས་ཤོག་འཕེན་མཁན་བརྒྱ་ཆ་༢༧.༥་ལས་མ་ལོངས། ཧོང་ཀོང་གི་དམངས་གཙོ་དོན་གཉེར་བའི་འོས་མི་རྣམས་གྲོང་སྡེའི་འགོ་ཁྲིད་ཚོའི་འོས་བསྡུར་མཉམ་ཞུགས་བྱེད་དུ་བཅུག་མེད་པའི་གནས་ཚུལ་ཐོན་འདུག ཕྱི་ཟླ་༡༢་པའི་ཚེས་༡༡་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། མང་ཚོགས་ཀྱིས་ཧོང་ཀོང་གི་གྲོང་སྡེ་ཁག་གི་འགོ་ཁྲིད་ཚོའི་འོས་བསྡུར་རྒྱ་ནག་གི་ཕྱོགས་གཏོགས་རྒྱལ་གཅེས་རིང་ལུགས་པའི་འོས་འདེམས་ཞེས་མིང་བཏགས། ཧོང་ཀོང་ལ་མི་འབོར་ས་ཡ་༧་དང་འབུམ་༤་ལྷག་ཡོད་པ་དེའི་ཁོངས་སུ་མི་གྲངས་ས་ཡ་༤་དང་འབུམ་༣་ཐོ་འགོད་བྱས་པའི་འོས་ཤོག་འཕེན་མཁན་ཡིན་ཞིང་། ༢༠༡༩་ལོར་ཧོང་ཀོང་གི་གྲོང་སྡེ་ཁག་གི་འགོ་ཁྲིདཚོ་འོས་བསྡུ་བྱས་པའི་དུས་སུ་མི་མང་བརྒྱ་ཆ་༧༡.༢་ཀྱི་འོས་ཤོག་འཕངས། ཧོང་ཀོང་གི་དམངས་གཙོའི་ཤོག་ཁག་ལ་ཕྱོགས་ལས་རྣམ་པར་རྒྱལ་བའི་རྒྱལ་ཁ་ཐོབ་སྟེ་ས་གནས་གཞུང་གིས་དམངས་གཙོའི་ལས་འགུལ་ལ་དྲག་གནོན་བྱས་པར་ངོ་རྒོལ་གྱི་རྣམ་འགྱུར་བསྟན།།
ཁ་སང་གཟའ་ཉི་མའི་འོས་བསྡུའི་སྐབས་སུ་པེ་ཅིང་གི་ཕྱོགས་གཏོགས་པ་འོས་ཤོག་འཕེན་མཁན་མང་བ་བྱུང་སྟེ་ཧོང་ཀོང་གི་གྲོང་སྡེ་ཁག་གི་འགོ་ཁྲིད་ཚོའི་ས་མིག་ཕལ་མོ་ཆེ་རྒྱ་ནག་གི་བཀོད་ཇུས་འོག་ཏུ་ཤར་སྐྱོད་བྱེད་མཁན་ཚོར་ཐོབ། ཧོང་ཀོང་གི་འགོ་ཁྲིད་ཇཱོན་ལིས་གསར་དུ་འདེམས་ཐོན་བྱུང་བའི་གྲོང་སྡེ་ཁག་གི་འགོ་ཁྲིད་ཚོ་སྤྱི་ཚོགས་ཀྱི་རྒྱབ་ལྗོངས་མ་འདྲ་བ་སྣ་ཚོགས་ཤིག་ནས་བསླེབས་འདུག ཁོ་ཚོས་གྲོང་སྡེ་ཁག་གི་ངོ་ཚབ་ཆ་ཚང་ཞིག་མཚོན་ཐུབ་པ་དང་སྤྱི་དམངས་ལ་སྲི་ཞུ་གང་ལེགས་སྒྲུབ་ཐུབ་རྒྱུ་རེད་ཅེས་བསྔགས་བརྗོད་ཞུས། ཧོང་ཀོང་གི་གྲོང་སྡེ་ཁག་གི་འགོ་ཁྲིད་ཚོ་ནི་ས་གནས་དེའི་མང་ཚོགས་ཀྱིས་ཐད་ཀར་དམངས་གཙོའི་ལམ་ནས་བདམས་པའི་འགོ་ཁྲིད་རྣམས་ཡིན་མོད། འོན་ཀྱང་རྒྱ་ནག་གཞུང་ནས་ཧོང་ཀོང་གི་གྲོང་སྡེ་ཁག་གི་འགོ་ཁྲིད་འོས་བསྡུའི་ལམ་ལུགས་ལ་འགྱུར་བ་བཏང་སྟེ་རྒྱལ་གཅེས་རིང་ལུགས་པ་ཚོས་གྲོང་སྡེ་ཁག་ལ་འཛིན་སྐྱོང་བྱ་དགོས། འོས་མི་ཞིག་ལ་ཉུང་མཐའ་ཡང་རྒྱ་གཞུང་གིས་བསྐོས་པའི་འདེམས་བསྐོ་ལྷན་ཚོགས་ཀྱི་འཐུས་མི་དགུས་རྒྱབ་སྐྱོར་འཐོབ་དགོས་ཞེས་ཆ་རྐྱེན་བཏོན།།
རྒྱ་ནག་གཞུང་གིས་བསྐོ་བཞག་བྱས་པའི་ཧོང་ཀོང་གི་འདེམས་བསྐོ་ལྷན་ཚོགས་ཀྱི་འཐུས་མི་ཚོས་དམངས་གཙོའི་ཤོག་ཁག་གི་འོས་མི་ཚོར་རྒྱབ་སྐྱོར་བྱེད་མི་སྲིད་པས་འོས་འདེམས་ལ་མཉམ་ཞུགས་བྱ་རྒྱུ་དཀའ་ངལ་ཆེན་པོ་ཞིག་ཏུ་གྱུར། ཧོང་ཀོང་གི་གྲོང་སྡེ་ཁག་གི་འགོ་ཁྲིད་བརྒྱ་ཆ་༨༠་ཡས་མས་ཤིག་མང་ཚོགས་ཀྱིས་ཐད་ཀར་འོས་འདེམས་བྱེད་ཀྱི་ཡོད་ཅིང་། ༢༠༡༩་ལོའི་ཕྱི་ཟླ་༧་ནང་རྒྱ་ནག་གཞུང་ནས་ཧོང་ཀོང་གི་འོས་བསྡུའི་ལམ་ལུགས་ལ་འགྱུར་བ་བཏང་སྟེ་གྲོང་སྡེ་ཁག་གི་འགོ་ཁྲིད་བརྒྱ་ཆ་༢༠་ཐམ་པ་མི་མང་ལ་གདམ་དུ་འཇུག་རྒྱུའི་ཐག་བཅད། ཧོང་ཀོང་གི་དམངས་གཙོ་དོན་གཉེར་བ་མང་ཆེ་བ་༢༠༡༩་ལོའི་ངོ་རྒོལ་ལ་ཞུགས་ནས་འཛིན་བཟུང་ཐེབས། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མའོ་ནིང་གིས་གསར་དུ་འདེམས་ཐོན་བྱུང་བའི་གྲོང་སྡེ་ཁག་གི་འགོ་ཁྲིད་ཚོས་ཧོང་ཀོང་གཞུང་དང་མི་དམངས་གཉིས་ལ་ཟམ་པ་ལྟ་བུའི་སྲི་ཞུ་ཞིག་བསྒྲུབ་ཐུབ་པའི་ཡིད་ཆེས་ཡོད་ཅེས་གསར་འགོད་གསལ་བསྒྲགས་སྤེལ། ཧོང་ཀོང་ས་གནས་གཞུང་གིས་མང་ཚོགས་ལ་འགྲེམ་སྟོན་ཁང་ཁག་གི་འཛིན་བྱང་རིན་མེད་དུ་སྤྲད། རོལ་དབྱངས་སྤྲོ་ཚོགས་བསྡུས་ནས་འོས་ཤོག་འཕེན་དུ་ཡོང་དགོས་པའི་སྐུལ་ལྕག་བཏང་རུང་ཕན་ཐོགས་མ་བྱུང་།།
ཧོང་ཀོང་གི་ཁྲུས་གསོལ་སློབ་གྲྭ་ཆེན་མོའི་སྲིད་གཞུང་དང་རྒྱལ་སྤྱིའི་འབྲེལ་ལམ་སློབ་དཔོན་ཁེ་ནེ་ཐ་ཆན་གྱིས་མི་མང་འོས་ཤོག་འཕེན་མཁན་ཉུང་དོན་ནི་ཧོང་ཀོང་མི་དམངས་རྣམས་ཆབ་སྲིད་ལ་འདུན་པ་ཉམས་པའམ། ཡང་ན་ངོ་རྒོལ་བྱས་ནས་འོས་བསྡུར་མཉམ་ཞུགས་མ་བྱས་པ་ཞིག་མ་རེད། ཧོང་ཀོང་མི་དམངས་རྣམས་ཕྱོགས་ཡོངས་ནས་རེ་ཐག་ཆད་དེ་ཆབ་སྲིད་ལ་དོ་སྣང་བརླགས། མི་དམངས་རྣམས་ཆབ་སྲིད་ལ་མཉམ་ཞུགས་བྱེད་དུ་འཇུག་གི་མེད་པས་རེད། ཧོང་ཀོང་གཞུང་དང་དེའི་ཕྱོགས་གཏོགས་ཚོས་འོས་བསྡུའི་དྲིལ་བསྒྲགས་ལས་འགུལ་སྤེལ་ཏེ་མང་ཚོགས་ལ་སྐུལ་སློང་བྱས་ཀྱང་ས་གནས་དེའི་ལོ་རྒྱུས་སུ་བྱུང་མྱོང་མེད་པའི་མི་མང་འོས་ཤོག་འཕེན་མཁན་ཉུང་བ་བྱུང་བ་ནི་སྲིད་གཞུང་ངོ་གནོང་དགོས་པ་ཞིག་རེད་ཅེས་བཀྲལ། ཧོང་ཀོང་སློབ་གྲྭ་ཆེན་མོའི་ཆེ་བསྟོད་ཆབ་སྲིད་སློབ་དཔོན་ཇཱོན་བྷན་སི་ཡིས་ཀྱང་མི་མང་འོས་ཤོག་འཕེན་མཁན་བརྒྱ་ཆ་༢༨་ལོངས་མེད་པས་འོས་བསྡུ་དེ་ཚུལ་མཐུན་མིན་པ་ལྟར་གྲོང་སྡེ་ཁག་གི་འགོ་ཁྲིད་ཚོ་ཡང་ལུགས་མཐུན་གྱི་འགོ་ཁྲིད་མ་རེད་ཅེས་བསྒྲགས།།
ཕྱི་ཟླ་༡༢་པའི་ཚེས་༡༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་དྲག་གནོན་བྱས་ནས་ཧོང་ཀོང་གི་དམངས་གཙོའི་ཤོག་ཁག་གི་སྟོབས་ཤུགས་ཉམས་དམས་སུ་བཏང་ཡོད་པར་མ་ཟད། དམངས་གཙོ་སྤྱི་ཚོགས་མཐུན་ཚོགས་ཀྱི་ལས་འགུལ་བ་༣་འོས་ཤོག་མ་འཕངས་གོང་དེར་འཛིན་བཟུང་བྱས་ཤིང་། ཁོ་ཚོས་དམངས་གཙོའི་ལམ་ལུགས་དང་ཡོངས་སུ་འགལ་བའི་གྲོང་སྡེ་ཁག་གི་འགོ་ཁྲིད་འོས་འདེམས་དེར་ལྕགས་ཁྲའི་ནང་གི་འོས་བསྡུ་ཞེས་ངོ་རྒོལ་ལས་འགུལ་སྤེལ་རྒྱུའི་གྲབས་བཤམས། རྒྱ་ནག་གཞུང་གིས་གྲོང་སྡེ་ཁག་གི་འགོ་ཁྲིད་ཀྱི་འོས་མིའི་ལོ་རྒྱུས་ལ་ཞིབ་འཇུག་བྱས་ནས་ངོ་རྒོལ་ལས་འགུལ་ཁག་ལ་ཞུགས་ཡོད་མེད། ཁོ་ཚོ་རྒྱ་གཞུང་གིས་གཏན་འབེབས་བྱས་པའི་རྒྱལ་ཁབ་བདེ་འཇགས་བཅའ་ཁྲིམས་ལ་འགལ་ཡོད་མེད་རྩད་བཅད། རྒྱལ་ཁབ་བདེ་འཇགས་བཅའ་ཁྲིམས་ལ་འགལ་འཛོལ་བྱུང་བ་ཚོར་སྲིད་གཞུང་གིས་བསྐོས་པའི་འདེམས་བསྐོ་ལྷན་ཚོགས་ཀྱི་འཐུས་མི་ཚོས་རྒྱབ་སྐྱོར་བྱེད་ཆོག་གི་མེད་པའི་གནས་ཚུལ་ཐོན་འདུག
ཧོང་ཀོང་གི་འགོ་ཁྲིད་ཇཱོན་ལིས་འོས་ཤོག་འཕངས་པའི་རྗེས་སུ་གྲོང་སྡེ་ཁག་གི་འགོ་ཁྲིད་ཚོས་མང་ཚོགས་ཀྱི་བདེ་སྡུག་སེམས་ལ་འཛིན་ཤས་ཆེ། ཅིའི་ཕྱིར་ཞེ་ན་ཁོ་ཚོ་རྒྱལ་གཅེས་རིང་ལུགས་པ་ཡིན་པ་དང་མང་ཚོགས་ལ་ཞབས་འདེགས་སྒྲུབ་ཀྱི་རེད་ཅེས་གླེང་། ༡༩༩༧་ལོར་རྒྱ་ནག་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་ལག་ལེན་བསྟར་ཆོག ཧོང་ཀོང་ལ་༥༠་ཐམ་པའི་རིང་ཚད་མཐོའི་རང་སྐྱོང་གི་ཐོབ་ཐང་སྤྲོད་དགོས་ཞེས་དབྱིན་ཇིའི་ལག་ནས་རྩིས་བླངས། ༢༠༢༠་ནས་རྒྱ་ནག་གཞུང་གིས་ཧོང་ཀོང་ས་གནས་ཀྱི་ཕྱོགས་འགལ་སྲིད་དོན་ཚོགས་པ་རྣམས་སྒོ་བརྒྱབ། དམངས་གཙོ་དོན་གཉེར་བ་རྣམས་བཙོན་དུ་བཅུག ཧོང་ཀོང་གི་རིམ་པ་ཁག་གི་འགོ་ཁྲིད་དེར་རྒྱ་ནག་ལ་གཞུང་དྲང་བློ་དཀར་ཡིན་པ་ཤ་སྟག་བདམས། ནུབ་ཕྱོགས་རྒྱལ་ཁབ་ཁག་གིས་པེ་ཅིང་གི་དབང་འཛིན་པ་ཚོས་ཧོང་ཀོང་ལ་ལག་ལེན་བསྟར་གྱི་ཡོད་པའི་རྒྱལ་ཁབ་བདེ་འཇགས་བཅའ་ཁྲིམས་ནི་ཆབ་སྲིད་ཀྱི་ལྟ་བ་མི་མཐུན་པ་རྣམས་མགོ་བོ་འབུར་འཇོམས་བྱ་རྒྱུའི་ཆེད་དུ་རེད་ཅེས་སྐྱོན་བཙུགས།།
ཕྱི་ཟླ་༡༢་པའི་ཚེས་༡༡་ཉིན་ཧོང་ཀོང་གསར་འགོད་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། རྒྱལ་གཅེས་རིང་ལུགས་པ་འབའ་ཞིག་གི་འོས་བསྡུ་བྱ་ཡུལ་ཁག་ཏུ་ཧོང་ཀོང་གཞུང་གིས་ཉེན་རྟོག་པ་པ་ཁྲི་ཚོ་༡་ལྷག་བཀྲམ། འོས་ཤོག་ཕན་ཐོགས་མེད་པ་འཕེན་དགོས་ཞེས་མི་མང་ལ་སྐུལ་སློང་བྱེད་མཁན་མི་༦་འཛིན་བཟུང་བྱས་ནས་འོས་བསྡུར་ཐེ་ཇུས་བྱས་པའི་ཉེས་འཛུགས་ཕོག ད་ལོའི་འོས་བསྡུར་ཧོང་ཀོང་བ་ས་ཡ་༡.༡༩་མ་གཏོགས་འོས་ཤོག་འཕེན་དུ་ཡོང་མི་འདུག ཧོང་ཀོང་གི་གྲོང་སྡེ་ཁག་གི་འགོ་ཁྲིད་བརྒྱ་ཆ་༨༠་ཐམ་པ་ཧོང་ཀོང་གི་འགོ་ཁྲིད་དང་ས་གནས་དེའི་གཞུང་གིས་བསྐོ་བཞག་བྱས་པའི་འདེམས་བསྐོ་ལྷན་ཚོགས་ཀྱི་འཐུས་མི་ཚོས་གདམ་གྱི་འདུག གྲོང་སྡེ་ཁག་གི་འགོ་ཁྲིད་བརྒྱ་ཆ་༢༠་ཐམ་པ་མང་ཚོགས་ལ་དམངས་གཙོའི་ལམ་ནས་གདམ་དུ་འཇུག་གི་འདུག འདེམས་ཁོངས་ས་ཁུལ་ཁག་བསྐྱར་དུ་བགོ་བཤའ་བརྒྱབ་ནས་ཕྱོགས་འགལ་ཚོགས་པ་རྣམས་རྨེག་མེད་དུ་བཅོམ། གྲོང་སྡེ་རེར་གཞུང་གི་འགོ་ཁྲིད་རེ་བསྐོས་ནས་མི་སེལ་བའི་དུས་སྐབས་དང་གཅིག་མཚུངས་རེད་ཅེས་གསར་འགྱུར་སྤེལ།།
ཧོང་ཀོང་གཞུང་གིས་མི་དམངས་འོས་ཤོག་འཕེན་མཁན་ཤིན་ཏུ་ཉུང་བའི་རྒྱུ་རྐྱེན་ནི་འོས་འདེམས་ལམ་ལུགས་ལ་འགྱུར་བ་བཏང་བས་རེད། ༢༠༡༩་ལོར་གྲོང་སྡེ་ཁག་གི་འགོ་ཁྲིད་འོས་བསྡུ་བྱས་པའི་དུས་སུ་མི་མང་འོས་ཤོག་འཕེན་མཁན་བརྒྱ་༧༡་ལྷག་བྱུང་བར་གཤིབ་སྡུར་བྱས་ན་འགྲིག་གི་མ་རེད་ཅེས་གནད་འགག་ཆུང་དུ་གཏོང་ཐབས་སུ་འབད། གཟའ་ཉི་མའི་ཉིན་ཧོང་ཀོང་གི་འོས་བསྡུའི་འཕྲུལ་ཆས་ཁག་ལ་སྐྱོན་ཞུགས་ཏེ་འོས་ཤོག་འཕེན་མ་ཐུབ། མི་དམངས་ལ་ཤོག་ལེབ་བཀྲམ་ནས་འོས་ཤོག་འཕེན་དུ་བཅུག་པ་དང་འོས་བསྡུའི་དུས་ཡུན་དགོང་མོའི་ཆུ་ཚོད་༡༠་པར་མཚམས་འཇོག་དགོས་པ་མཚན་དཀྱིལ་བར་དུ་བསྲིངས། ཧོང་ཀོང་གི་ཉེན་རྟོག་པས་ལོ་ནན་༧༧་ལ་སོན་པའི་རྒད་པོ་ཞིག་ལ་འོས་བསྡུར་གཏོར་བརླག་བྱ་ཐབས་བྱས་པའི་ནག་ཉེས་བཙུགས་ནས་གཟའ་ཟླ་བའི་ཉིན་ཁྲིམས་ཁང་དུ་ཡོང་དགོས་པའི་བཀའ་ཕབ། ཧོང་ཀོང་གི་གྲོང་སྡེ་ཞིག་གི་འགོ་ཁྲིད་ཟུར་པར་ལྐོག་ཟ་བྱས་པའི་ནག་ཉེས་བཙུགས་ནས་འཛིན་བཟུང་བྱ་དགོས་ཟེར། རྒྱལ་གཅེས་རིང་ལུགས་ཀྱི་འོས་བསྡུར་འཐད་པ་མེད་པ་ཐམས་ཅད་དགྲ་ཕྱོགས་སུ་བརྩིས་ནས་འཛིན་བཟུང་བྱེད་ཀྱི་ཡོད་པའི་གནས་ཚུལ་ཐོན་འདུག
