རྒྱ་གར་གྱི་ཕྱུག་བདག་ཚོང་པ་ཨ་ཌ་ནིའི་རྙོག་གླེང་རྐྱེན་གྱིས་རྒྱ་གར་གྲོས་ཚོགས་ལས་མཚམས་བཞག

རེས་གཟའ་ལྷག་པའི་ཉིན་རྒྱ་གར་གྱི་གྲོས་ཚོགས་འོག་མ་ཉིན་གཉིས་པར་ལས་མཚམས་བཞག་དགོས་བྱུང་འདུག་པ་དང་། དེ་ཡང་རྒྱ་གར་གྱི་གྲོས་ཚོགས་འོག་མའི་ནང་ཕྱོགས་འགལ་སྲིད་དོན་ཚོགས་པའི་གྲོས་ཚོགས་འཐུས་མི་ཚོས་ཉེ་དུས་ཨ་རིའི་ནང་རྒྱ་གར་གྱི་ཕྱུག་བདག་ཚོང་པ་གོ་ཏམ་ ཨ་ཌ་ནིས་གཡོ་ཁྲམ་བྱས་པའི་ནག་འཛུགས་བྱུང་བ་དེའི་སྐོར་ལ་གྲོས་ཚོགས་ནང་བགྲོ་གླེང་བྱེད་དགོས་པའི་གླེང་སློང་བྱས་རྗེས་ཉིན་གཉིས་པར་གྲོས་ཚོགས་ཀྱི་ལས་མཚམས་འཇོག་དགོས་བྱུང་འདུག ཨ་རིའི་ནང་ཨ་ཌ་ནི་ལ་ནག་ཉེས་གྱོད་འཛུགས་བྱུང་རྗེས་ཚོང་ལས་ཁང་དེའི་མ་རྐང་རིན་ཐང་ཤུགས་ཆེར་ཟག་ཀྱང་། ད་ཆ་ཏོག་ཙམ་སླར་གསོ་ཡོང་གི་ཡོད་པ་རེད།

བདུན་ཕྲག་སྔོན་མར་ཨ་རིའི་གཞུང་འབྲེལ་མི་སྣ་ཚོས་གོ་ཏམ་ ཨ་ཌ་ནི་དང་དེའི་ཚ་བོ་ས་གྷར་ ཨ་ཌ་ནི་གཉིས་དང་། ཨ་ཌ་ནི་གྷི་རིན་ཞེས་པའི་བཟོ་ཚོང་ཁང་གི་འཛིན་སྐྱོང་འགན་འཛིན་ཝི་ནིཏ་ ཇེན་བཅས་ཀྱིས་ཚོང་ལས་གན་རྒྱ་ཐོབ་ཐབས་ལ་ཨ་རིའི་སྒོར་མོ་ས་ཡ་ ༢༥༠ ལྐོག་རྔན་སྤྲད་པ་མ་ཟད། ཨ་རིའི་མ་རྩ་འཇོག་མཁན་ཚོར་མགོ་བསྐོར་བསླུ་བྲིད་བྱས་པའི་ནག་ཉེས་བཙུག་ཡོད་པ་རེད།

ཨ་ཌ་ནིས་འགོ་ཁྲིད་པའི་ཚོང་ལས་ཁང་དེས་ནག་ཉེས་དེ་དག་གཞི་མེད་ཡིན་ལུགས་བཤད་དེ་ངོས་ལེན་བྱས་མེད་པ་མ་ཟད། ཁྲིམས་ཐོག་ཁ་མཆུ་རྒྱག་སྲིད་པ་རེད་ཅེས་བཤད་འདུག

རྒྱ་གར་གྱི་ཕྱོགས་འགལ་སྲིད་དོན་ཚོགས་པ་རྣམས་དང་ལྷག་པར་ཀོང་རེས་སྲིད་དོན་ཚོགས་པས་སྲིད་བློན་ན་རེན་ཌྲ་ མོ་དྷི་དང་གཞུང་འཛིན་བྷི་ཇེ་པི་སྲིད་དོན་ཚོགས་པ་གཉིས་ཀྱིས་ཨ་ཌ་ནི་འགོག་སྲུང་བྱས་ནས་རྒྱ་གར་ནང་ཚོང་ལས་ཁང་དེར་ཞིབ་འཇུག་བྱེད་འཇུག་གི་མི་འདུག་ཅེས་སྐྱོན་འཛུགས་བྱེད་ཀྱི་ཡོད་ནའང་། སྲིད་བློན་མོ་དྷི་དང་བྷི་ཇེ་པོ་གཉིས་ཀྱིས་དེར་ངོས་ལེན་བྱེད་ཀྱི་མེད་པ་རེད།

བདུན་ཕྲག་འདིར་རྒྱ་གར་གྱི་གྲོས་ཚོགས་ཀྱི་དགུན་དུས་ཚོགས་དུས་འགོ་འཛུགས་བྱས་ཡོད་ནའང་གྲོས་ཚོགས་འཐུས་མི་ཚོས་ཨ་ཌ་ནི་ལ་ནག་འཛུགས་བྱས་པ་དེའི་སྐོར་བགྲོ་གླེང་བྱེད་དགོས་ཀྱི་ཡོད་ཅེས་སྐད་འབོད་བྱས་ནས་ཉིན་གཉིས་པར་གྲོས་ཚོགས་ཀྱི་ལས་དོན་མཚམས་འཇོག་བྱེད་དགོས་བྱུང་འདུག

ཀོང་རེས་སྲིད་དོན་ཚོགས་པའི་འགོ་ཁྲིད་ར་ཧུལ་ གྷན་དྷི་ནི་གོ་ཏམ་ ཨ་ཌ་ནི་ལ་སྐྱོན་བརྗོད་ཤུགས་ཆེར་བྱེད་མཁན་གཅིག་ཡིན་པ་དང་། ཁོང་གིས་གོ་ཏམ་ ཨ་ཌ་ནི་འཛིན་བཟུང་བྱེད་དགོས་ཀྱི་རེད་ཅེས་གསུངས་འདུག

གྲོས་ཚོགས་ཀྱི་ཕྱིར་ཡོད་པའི་གསར་འགོད་པ་ཚོར་ཁོང་གིས་གསུངས་དོན། མི་དེར་ཨ་རིའི་ནང་ནག་ཉེས་གྱོད་འཛུགས་བྱས་ཡོད་པ་དང་ང་ཚོའི་གཞུང་གིས་ཁོང་སྲུང་སྐྱོབ་བྱེད་ཀྱི་ཡོད་རེད་ཅེས་གསུངས་འདུག

ད་བར་རྒྱ་གར་གཞུང་གིས་ཨ་ཌ་ནི་ལ་ཨ་རིས་ནག་ཉེས་གྱོད་འཛུགས་བྱས་པའི་སྐོར་ལ་འགྲེལ་བརྗོད་གང་ཡང་བྱས་མེད་ནའང་། གཞུང་འཛིན་བྷི་ཇེ་པོ་ཚོགས་པས་རྙོག་ཁྲ་དེ་ནས་རྒྱང་རིང་ཙམ་སྡོད་རྒྱུར་འདོད་པ་བྱས་འདུག

བྷི་ཇེ་པི་སྲིད་དོན་ཚོགས་པའི་མགྲིན་ཚབ་པ་གྷོ་པལ་ ཀྲིཤ་ན་ ཨ་གྷྲ་ཝལ་གྱིས་རེས་གཟའ་མིག་དམར་ཉིན་བརྗོད་དོན་ལ་ ཚོང་པ་དེ་རང་ཉིད་ཀྱིས་འགན་སྲུང་བྱེད་དགོས་ཞེས་དང་། ནག་ཉེས་གང་བྱས་ཡོད་པ་དེ་ཁྲིམས་ཐོག་ནས་ཐག་གཅོད་ཡོང་གི་རེད་ཅེས་འགྲེལ་བརྗོད་བྱས་འདུག

རེས་གཟའ་ལྷག་པའི་ཉིན་ནག་ཉེས་གྱོད་འཛུགས་བྱེད་སའི་བཟོ་ཚོང་ཁང་ཨ་ཌ་ནི་ གྷི་རིན་ཞེས་པ་དེས་བརྗོད་དོན། གོ་ཏམ་ ཨ་ཌ་ནི་ལ་ཨ་རིའི་ནང་གཏའ་མ་འཇོག་སྟངས་སྒྲིག་ཁྲིམས་དང་འགལ་འཛོལ་གྱི་ཉེས་པ་བྱུང་ཡོད་པ་དེར་ཉེས་ཆད་འགེལ་སྲིད་ནའང་། ཨ་རི་གཞུང་གིས་ཕྱི་མིས་ལྐོག་ཟ་རུལ་སུངས་ཀྱི་ཁྲིམས་ཡིག་འོག་ཉེས་འཛུགས་བྱས་ཡོད་མ་རེད་ཅེས་འགྲེལ་བརྗོད་བྱས་འདུག

ཨ་རིའི་གཞུང་འབྲེལ་མི་སྣ་ཚོས་གོ་ཏམ་ ཨ་ཌ་ནི་དང་གཞན་ཚོས་མིང་འདོན་མ་བྱས་པའི་རྒྱ་གར་གཞུང་གི་ལས་བྱེད་གཅིག་ལ་ལྐོག་རྔན་སྤྲད་ནས་ཨོ་ཌི་ཤ་དང་། ཏ་མིལ་ ན་ཌུ། ཆ་ཏིས་གྷར། ཨན་ཌྲ་པར་དེཤ་བཅས་ཀྱི་ནང་ཉི་འོད་གློག་འདོན་ནུས་ཤུགས་ཐོབ་ཐབས་བྱས་འདུག་ཅེས་ཉེས་འཛུགས་བྱས་འདུག་པ་དང་། རུའི་ཌར་གསར་སྤེལ་ཁང་ལ་གནས་ཚུལ་བྱུང་ཁུངས་གཅིག་གིས་བརྗོད་དོན་ལ་ ཨན་ཌ་ྲ པར་དེཤ་མངའ་སྡེ་གཞུང་གིས་ཨ་ཌ་ནི་བཟོ་ཚོང་ཁང་ལ་བོག་མ་སྤྲོད་རྒྱུ་ཕྱིར་འཐེན་བྱེད་སྲིད་པ་རེད་ཅེས་བཤད་འདུག་ཀྱང་། མངའ་སྡེ་གཞུང་གི་ལས་བྱེད་ཚོས་དེའི་སྐོར་འགྲེལ་བརྗོད་བྱེད་རྒྱུར་འདོད་པ་བྱས་མི་འདུག