དེ་སྔོན་རྒྱ་ནག་གཞུང་གིས་བཙོན་དུ་བཅུག་པའི་ཚོང་པ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ད་ལྟ་རང་ཁྱིམ་དུ་སྨན་བཅོས་བྱེད་མུས་སུ་ཡོད་པའི་སྐོར་ཁུངས་ལྡན་གནས་ཚུལ་ཤེས་མཁན་ཞིག་གིས་འགྲེལ་བརྗོད་བྱེད་ཀྱི་འདུག དེ་ཡང་བོད་ནས་མིང་དངོས་སུ་བརྗོད་འདོད་མེད་མཁན་གྱི་གནས་ཚུལ་མཁོ་སྤྲོད་པ་ཞིག་གིས་འདི་ག་རླུང་འཕྲིན་ཁང་ལ་བརྗོད་དོན། འདི་ལོའི་ཕྱི་ཟླ་༦པའི་ཚེས་༢༧ཉིན་ལྷ་ས་གྲོང་ཁྱེར་ཁྲིན་ཀོན་ཆུས་མི་དམངས་ཁྲིམས་ཁང་དུ་ཁྲིམས་བཤེར་ཞིག་བྱས་སོང་། གཞི་རྩའི་ཆ་ནས་མགོན་པོ་སྐྱིད་ལགས་ཁྲིམས་ཁང་དུ་འབོད་འགུག་བྱས་པ་དང་། སྔ་ཕྱིར་ཐེངས་གཉིས་ལ་ཁྲིམས་བཤེར་བྱས་པ་རེད། ཁྲིམས་བཤེར་གྱི་རྣམ་པ་ཙམ་ལས་ཐག་གཅོད་ཅི་བྱེད་རྒྱ་གཞུང་གི་ལག་ན་ཡོད་སྟབས་དྲང་བདེན་གྱི་སྒོ་ནས་གནས་ལུགས་བཤད་པ་དང་། ཐག་གཅོད་འདྲ་ཅི་ཡང་བྱུང་མི་འདུག་ཅེས་འགྲེལ་བརྗོད་བྱེད་ཀྱི་འདུག
གནས་ཚུལ་མཁོ་སྤྲོད་པས་མུ་མཐུད་བརྗོད་དོན་ལ། ད་དུང་སྔ་རྗེས་སུ་རྒྱ་ཞུང་གི་མི་སྣའི་མགོན་པོ་སྐྱིད་ལགས་སུ་གཅར་རྡུང་ཐེངས་འགར་བཏང་བའི་རྐྱེན་གྱིས་སྨན་ཁང་ལ་བསྐྱོད་དེ་ཡུན་རིང་སྨན་བཅོས་བྱས་ནས་འདུག་དགོས་བྱུང་འདུག་ཅིང་། ད་ལྟ་སྨན་ཁང་ནས་ཐོན་ཏེ་རང་ཁྱིམ་དུ་སྨན་བཅོས་བྱས་ནས་སྡོད་མུས་དང་། སྐུ་གཟུགས་ཀྱི་གནས་སྟངས་དེ་ཙམ་ཡག་པོ་མི་འདུག མ་འོངས་བར་དེ་སྔ་ནང་བཞིན་ངོ་རྒོལ་གྱི་ལས་འགུལ་འདྲ་སྤེལ་བ་ཡིན་ན་ཁྲིམས་འགལ་ནག་ཉེས་ཕོག་སྲིད་པ་མ་ཟད། དུས་བཀག་བཙོན་འཇུག་ཀྱང་བྱེད་སྲིད་པར་བརྟེན་ཁྲིམས་ཁང་མདུན་སོགས་སུ་ངོ་རྒོལ་ལས་འགུལ་སྤེལ་མི་ཆོག་ཅེས་བཤད་འདུག དེ་དང་ཆབས་ཅིག་མགོན་པོ་སྐྱིད་ལགས་ཀྱི་ནང་མི་ཉེ་འབྲེལ་ཚོས་ཀྱང་ཁོང་ལ་བསླབ་བྱ་བརྒྱབས་ཏེ་གནས་སྐབས་རིང་སྐུ་གཟུགས་བདེ་ཐང་ཆེད་སྨན་བཅོས་དང་ངལ་གསོ་བྱེད་རོགས་ཞེས་ཞུ་བ་ཡང་ཡང་བྱས་པ་ལ་བརྟེན་ཉིན་ཤས་གོང་ནས་འདི་གར་རང་ཁྱིམ་དུ་སྨན་བཅོས་བྱས་ནས་སྡོད་མུས་རེད་ཅེས་འགྲེལ་བརྗོད་བྱས་འདུག
སྦྱིར་ན་མང་ཚོགས་ཉམ་ཆུང་ཞིག་གིས་རྒྱལ་ཁབ་སྲིད་གཞུང་ལ་བོད་རིགས་ཚོང་པ་རྡོ་རྗེ་བཀྲ་ཤིས་ལགས་སུ་དྲང་བདེན་དང་ཕྱི་གསལ་ནང་གསལ་གྱི་སྒོ་ནས་ཁྲིམས་བཤེར་ཐེངས་གཅིག་བྱེད་དགོས་བའི་རེ་མདུན་བཏོན་པ་དེ་ནི་སྒོང་ང་རྡོ་ཐོག་གཡུག་པ་དང་གཅིག་མཚུངས་རེད། ཨ་ལན་བརྡ་ལན་ཅི་ཡང་མེད་པའི་སྒང་ལ་ད་དུང་ཞི་བའི་རེ་འབོད་ཞུ་མཁན་མང་ཚོགས་ཉམ་ཆུང་བུ་མེད་ཞིག་ལའང་གཅར་རྡུང་དང་འཇིགས་སྐུལ་བྱས་བ་རེད་ཅེས་བརྗོད་ཀྱི་འདུག དེ་ལྟར་ན་དེ་སྔ་༢༠༡༠ལོའི་ཕྱི་ཟླ་༦པའི་ཚེས་༢༦ཉིན་བོད་ཀྱི་རྒྱལ་ས་ལྷ་སར་རྒྱ་ནག་གི་འབྲིང་རིམ་མི་དམངས་ཁྲིམས་ཁང་ཟེར་བས་གསང་བའི་ཁྲིམས་བཤེར་བྱས་པ་བརྒྱུད། ཚོང་པ་རྡོ་རྗེ་བཀྲ་ཤིས་ལགས་སུ་བུ་ལོན་སྔ་གཡར་དང་འབྲེལ་བའི་ངན་ཇུས་བཤམས་པའི་ཉེས་འཛུགས་འོག་ཚེ་བཙོན་གྱི་ཁྲིམས་ཐག་བཅད་ནས་གྲྭ་བཞི་བཙོན་ཁང་དུ་བཙོན་འཇུག་བྱས་ནས་ད་ཆ་མི་ལོ་༡༥་འགྲོ་ལ་ཉེ་བ་དང་། ཁོང་གི་གཅེན་མོ་མགོན་པོ་སྐྱིད་དང་བཟའ་ཟླ་གཉིས་དང་གཅེན་པོ་རྡོ་རྗེ་ཚེ་བརྟན་ལགས་བཅས་ཀྱིས་སྔ་རྗེས་སུ་ཞུ་འབོད་ཀྱི་ལས་འགུལ་སྤེལ་བར་བརྟེན་གཅེན་པོ་རྡོ་རྗེ་ཚེ་བརྟན་ལགས་སུ་དེ་སྔ་མི་ལོ་༦་དུས་བཀག་བཙོན་འཇུག་ཁྲིམས་ཐག་བཅད་པ་རེད།
གཅེན་མོ་མགོན་པོ་སྐྱིད་ལགས་ཐེངས་ལྔ་འཛིན་བཟུང་བཀག་ཉར་དང་འདྲི་བརྩད་བྱས་པ་མ་ཟད། གཅར་རྡུང་སོགས་བཏང་མྱོང་ཡོད་པ་རེད་འདུག ལྷག་པར་ཕྱི་ལོ་༢༠༡༨་ལོའི་རྗེས་ནས་བཟུང་རྒྱའི་བཙོན་འོག་ཏུ་ཡོད་པའི་བོད་རིགས་ཚོང་པ་རྡོ་རྗེ་བཀྲ་ཤིས་ལགས་ནང་མི་དང་ཐུག་འཕྲད་གཏན་ནས་བྱེད་བཅུག་མེད་པར་བརྟེན་ད་ལྟའི་འཆར་ཁོང་གི་སྐུ་གཟུགས་ཀྱི་གནས་སྟངས་སྐོར་ཤེས་རྟོགས་ཐུབ་དཀའ་བའི་གནས་སུ་ལྷུང་ཡོད་པ་རེད།
གནས་ཚུལ་བྱུང་ཁུངས་ནས་བཏུས།
གསར་འགོད་པ། ཀུན་བཟང་བསྟན་འཛིན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།