ཡོ་རོབ་མཐུན་ཚོགས་ཀྱི་ཕྱི་འབྲེལ་དབུ་ཁྲིད་ཀྱིས་ཡུག་རན་དམག་དང་རྒྱ་ནག་འབྲེལ་བ་ཡོད་ཅེས།

༄༅། མ་འོངས་ལོ་ལྔའི་རིང་ཡོ་རོབ་མཉམ་འབྲེལ་མཐུན་ཚོགས་ཀྱི་ཕྱི་འབྲེལ་ཐད་ཀྱི་ཆེས་མཐོའི་དབུ་ཁྲིད་ལ་བདམས་ཐོན་བྱུང་བའི་ཨཱེ་སི་ཐོ་ནི་ཡ་ཡུལ་གྲུ་སྲིད་བློན་ཟུར་པ་ལྕམ་ཁཱ་ཡར་ ཁཱ་ལ་སེ་(Kaja Kallas)ནས་གཟའ་མིག་དམར་ཉིན་མོ་ཡོ་རོབ་གྲོས་ཚོགས་ཀྱི་འཐུས་མི་ཚོའི་མདུན་དུ་གསན་ཉན་སྐབས་ཡུག་རན་ནས་ཨུ་རུ་སུར་ཁ་གཏད་ཀྱི་དམག་འཐབ་བྱེད་བཞིན་པར་ཡོ་རོབ་མཉམ་འབྲེལ་ནས་མུ་མཐུད་དེ་རྒྱབ་སྐྱོར་ཤུགས་ཆེ་བྱེད་དགོས་པ་མ་ཟད་ཨ་མི་རི་ཀར་ཡང་མུ་མཐུད་དེ་རྒྱབ་སྐྱོར་དགོས་པའི་སྐུལ་ལྕག་དང་དམག་འཁྲུག་འདིའི་ཐོབ་ཤོར་གྱིས་རྒྱ་ནག་གི་ཁེ་ཕན་ལ་འབྲེལ་བ་ཆེན་པོ་ཡོད་པའི་སྐོར་ང་ཚོས་གསལ་བརྗོད་ཐུབ་དགོས་ཅེས་གསུངས་པ་དང་།

ཡང་ཡོ་རོབ་གྲོས་ཚོགས་ཀྱི་འཐུས་མི་ཚོའི་མདུན་དུ་གསན་ཉན་འདིའི་ཐོག་ལྕམཁཱ་ལ་སི་ཡིས་ཨ་མི་རི་ཀས་ཁེར་རྐྱང་རིང་ལུགས་པའི་སྲིད་ཇུས་ཤིག་ལག་ལེན་གནང་མི་རུང་བ་དང་།ཨ་མི་རི་ཀས་རྒྱ་ནག་གི་སྟོབས་ཤུགས་རྒྱ་སྐྱེད་ལ་བློ་འཚབ་གནང་གི་ཡོད་ཚེ་ཡུག་རན་དམག་དང་རྒྱ་ནག་གི་ཁེ་ཕན་འབྲེལ་བ་ཆེན་པོ་མཁྱེན་དགོས་རྒྱུ་ནི་རྒྱ་ནག་གི་རྒྱབ་སྐྱོར་མེད་པར་ཨུ་རུ་སུས་ཡུག་རན་ཐོག་ལ་དམག་དྲངས་པའི་ནུས་པ་ཆེན་པོ་ཞིག་ཡོང་མི་སྲིད་པ་རེད་ཅེས་ཡོ་རོབ་མཉམ་འབྲེལ་གྱི་དབུ་ཁྲིད་གཞན་མང་པོ་ཞིག་གི་དགོངས་ཚུལ་ལྟར་འགྲེལ་བརྗོད་གནང་ཡོད་པའི་སྐོར་རོ་ཌེ་སི་གསར་ཁང་གིས་གནས་ཚུལ་སྤེལ་ཡོད།

ཡོ་རོབ་མཉམ་འབྲེལ་གྱི་དབུ་ཁྲིད་ཚོས་དམག་དེ་ནི་ཨུ་རུ་སུ་དང་ཡུག་རན་དབར་གྱི་དམག་འཁྲུག་ཞིག་ཡིན་ནའང་ཨུ་རུ་སུ་དང་ཨི་རན། བྱང་ཀོ་རི་ཡ།རྒྱ་ནག་བཅས་མནའ་མཐུན་པ་ཡིན་པས་འཛམ་གླིང་སྤྱིའི་བདེ་འཇགས་དང་འབྲེལ་བ་ཡོད་པ་ལུང་འདྲེན་གནང་གི་ཡོད།

ཨེ་སི་ཐོ་ནི་ཡ་ཡུལ་གྲུའི་སྲིད་བློན་ཟུར་པ་ལྕམ་ཁཱ་ལ་སཱེ་ནི་གཟའ་འཁོར་ཁ་ཤས་ཀྱི་རྗེས་སུ་ད་ལྟའི་ཡོ་རོབ་མཉམ་འབྲེལ་མཐུན་ཚོགས་ཀྱི་ཕྱི་འབྲེལ་དབུ་ཁྲིད་ཇཱོ་སེ་ཕཱུ་ བྷོ་རོའི་(Josep Borrell) ཚབ་ཏུ་མ་འོངས་པའི་ལོ་ལྔའི་རིང་རྒྱལ་ཁབ་༢༧ཡོད་པའི་ཡོ་རོབ་མཉམ་འབྲེལ་མཐུན་ཚོགས་ཀྱི་ཕྱི་འབྲེལ་དབུ་ཁྲིད་ཀྱི་འགན་བཞེས་གནང་རྒྱུ་ཡིན་པ་རེད།

ཡང་དེའི་བར་ན་ནུབ་ཆིངས་སྒྲིག་འཛུགས་ཀྱི་དྲུང་ཆེ་མེཀ རཱོ་ཌེ་(Mark Rutte) ཡིས་གཟའ་མིག་དམར་ཉིན་མོ་ཨུ་རུ་སུས་རྒྱ་ནག་དང་བྱང་ཀོ་རི་ཡ། ཨི་རན་བཅས་ལ་མཉམ་འབྲེལ་གྱིས་དམག་དོན་དང་དཔལ་འབྱོར་གྱི་འབྲེལ་ལམ་ཤུགས་ཆེ་འཛུགས་བཞིན་པ་དེས་ཡོ་རོབ་གླིང་ཆེན་དང་རྒྱ་གར་རྒྱ་མཚོའི་ཁུལ་དང།

བྱང་ཨ་མི་རི་ཀ་བཅས་ཀྱི་བདེ་འཇགས་ལ་ཉེན་ཁ་འཚབ་ཆེ་བཟོ་བཞིན་ཡོད་ཅེས་གསུངས་ཡོད་པ་དང་ཁོང་ནས་ཕཱ་རན་སིའི་སྲིད་འཛིན་དང་མཇལ་འཕྲད་ཆེད་དུ་ཕཱ་རན་སེར་ཕེབས་ཐོན་མ་གནང་གོང་དུ་དེ་ལྟར་གསུངས་ཡོད་པ་དེ་ནི་ཨ་རིའི་སྲིད་འཛིན་ལ་འདེམས་ཐོན་སྐུ་ཞབས་ཌོ་ནར་ཌམ་ནས་གསན་འཇོག་ཆེད་དུ་ཡིན་པའི་སྐོར་གསར་འགྱུར་ཁག་ནས་འགྲེལ་བརྗོད་བྱས་ཡོད།

སྐུ་ཞབས་ཌོ་ནར་ཌམ་ནས་འོས་འདེམས་ཀྱི་དྲིལ་བསྒྲགས་སྐབས་སུ་སྲིད་འཛིན་ཇཱ་བྷ་ཌན་སྲིད་གཞུང་ནས་ཡུག་རན་དམག་ལ་རོགས་སྐྱོར་ཤུགས་ཆེ་དྲགས་པར་སྐྱོན་བརྗོད་དང་གལ་སྲིད་ཁོང་ཉིད་སྲིད་འཛིན་ལ་འོས་འདེམས་བྱུང་ཚེ་ཡུག་རན་དམག་དེ་འཕྲལ་དུ་མཚམས་འཇོག་ཐུབ་པ་བྱ་ཡི་ཡིན་ཞེས་གསུངས་ཡོད་པས་ཨ་རིའི་སྲིད་གཞུང་གསར་པས་ཡུག་རན་ལ་མུ་མཐུད་དེ་རྒྱབ་སྐྱོར་གནང་མིན་ལ་ཡུག་རན་དང་ཡོ་རོབ་ཀྱི་རྒྱལ་ཁབ་ཚོར་བློ་འཚབ་ཡོང་གི་ཡོད་པ་རེད།

ཡང་སྐུ་ཞབས་ཌམ་ནས་སྲིད་འཛིན་གྱི་འགན་བཞེས་གནང་བའི་རྗེས་སུ་རྒྱ་ནག་དང་འབྲེལ་བའི་ཐད་ལ་སྲིད་ཇུས་གང་འདྲ་ཞིག་འཛིན་མིན་ལ་ཕྱི་འབྲེལ་མི་སྣ་ཚོས་ཚོད་དཔག་འདྲ་མིན་བྱེད་བཞིན་པའི་སྐབས་དེར་གཟའ་ཟླ་བའི་ཉིན་མོ་སྐུ་ཞབས་ཌམ་ནས་རྒྱུན་རིང་རྒྱ་ནག་ཐོག་ལ་སྐྱོན་བརྗོད་ཤུགས་ཆེ་གནང་མཁན་སྤྱི་མཐུན་སྲིད་དོན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁཱོ་རུ་བྷིའོ་(Marco Rubio)ཕྱི་སྲིད་དྲུང་ཆེར་བསྐོ་རྒྱུའི་མཚན་འདོན་གནང་བ་དང་ཡང་རྒྱ་ནག་ཐད་ལ་ལྟ་བ་ཧ་ཅང་མཁྲེགས་འཛིན་ཅན་གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་མེཀ་ཝཱ་ཛི་(MichaelWaltz)རྒྱལ་ཁབ་བདེ་འཇགས་སློབ་སྟོན་པར་བསྐོ་རྒྱུའི་གསལ་བསྒྲགས་གནང་ཡོད་པ་རེད།

སྐུ་ཞབས་ མར་ཁཱོ་རུ་བྷིའོ་(Marco Rubio)ནི་༢༠༢༠ལོར་རྒྱ་ནག་གཞུང་ནས་ཧོང་ཀོང་གི་དམངས་གཙོ་སྲུང་སྐྱོབ་དང་རྒྱ་ནག་གི་བྱ་སྐྱོད་ལ་སྐྱོན་བརྗོད་ཀྱི་གྲོས་ཆོད་འདོན་མཁན་གཙོ་བོ་ཞིག་ཡིན་པ་ལ་བརྟེན་ནས་ཨ་རིའི་གྲོས་ཚོགས་འཐུ་མི་ཁག་ཅིག་ཧོང་ཀོང་སོགས་རྒྱ་ནག་གི་ས་ཁོངས་སུ་ཡོང་མི་ཆོག་པའི་ཉེས་ཆད་འགེལ་རྒྱུའི་གསལ་བསྒྲགས་བྱས་པའི་ཁོངས་སུ་ཡོད་པས་གལ་སྲིད་ཁོང་ཨ་རིའི་ཕྱི་སྲིད་དྲུང་ཆེར་བསྐོ་བཞག་གཏན་འཁེལ་བྱུང་ཚེ་རྒྱ་ནག་གཞུང་ག་བྱེད་འདི་བྱེད་མེད་པ་ཆགས་རྒྱུ་ཡིན་པ་སྲིད་དོན་དབྱེ་ཞིབ་པ་ཚོས་འགྲེལབརྗོད་གནང་གི་ཡོ་པ་རེད།