མདོ་སྨད་བླ་བྲང་བཀྲིས་ཁྱིལ་གྱི་བླ་མ་གུང་ཐང་སྐུ་ཕྲེང་བདུན་པ་མཆོག་གིས་མདོ་སྨད་མདོ་ལྷོ་རྩ་ཐང་དུ་དཔལ་དུས་ཀྱི་འཁོར་ལོའི་དབང་ཆེན་གནང་བཞིན་ཡོད་པ་དང་དེར་ས་ཕྱོགས་གཞན་ནས་ཡོང་མཁན་རྣམས་མང་ཚོགས་རྣམས་རྒྱ་གཞུང་ཉེན་རྟོག་པས་དུས་དབང་ཞུ་བར་མ་བཏང་བར་ལམ་ནས་ཕྱིར་སློག་གཏོང་བཞིན་ཡོད་པ་རེད་འདུག་ལ་ཕྱི་ཚེས་༡༢ ཉིན་ཆུ་དམར་ལེབ་ནས་ཡིན་པའི་རྒྱ་གཞུང་གི་ཉེན་རྟོག་པ་ཟུར་བ་དང་གུང་ཁྲན་ཏང་ཡོན་ཚེ་སྦོ་ཟེར་བ་ཞིག་དུས་དབང་ཞུ་བར་ཕྱིན་པ་ཁྲིམས་འགལ་ཡིན་པའི་ཉེས་འཛུགས་འོག་འཛིན་བཟུང་བཀག་ཉར་བྱས་འདུག་ཅེས་རང་མིང་བརྗོད་འདོད་མེད་པའི་འབྲེལ་ཡོད་མི་སྣ་ཞིག་གིས་འདི་གར་གནས་ཚུལ་བརྗོད་བྱུང་།
གནས་ཚུལ་ངོ་སྤྲོད་པས་མུ་མཐུད་དུ་བརྗོད་དོན་ནང་གུང་ཐང་སྐུ་ཕྲེང་བདུན་པ་མཆོག་གིས་མདོ་སྨད་མདོ་ལྷོ་རྩ་ཐང་དུ་ཟླ་བ་འདིའི་ཟླ་བ་འདིའི་ཕྱི་ཚེས་༡༤ནས་༡༧བར་ཉིན་གྲངས་བཞི་རིང་ལ་དཔལ་དུས་ཀྱི་འཁོར་ལོའི་དབང་ཆེན་ཐེངས་དང་པོ་གནང་བཞིན་ཡོད་པ་དང་དེར་དད་ལྡན་སེར་སྐྱ་མང་ཚོགས་འབུམ་ཕྲག་བརྒལ་བ་ཆོས་ཞུར་བཅར་འདུག ཡིན་ནའི་ས་ཕྱོགས་གཞན་ནས་ཡོང་མཁན་རྣམས་རྒྱ་གཞུང་ཉེན་རྟོག་པས་ལམ་ནས་བཀག་ཏེ་དུས་དབར་ཞུ་བར་གཏོང་གི་མེད་པ་རེད། ཕྱི་ཚེས་༡༢ ཉིན་དགོངས་མོ་ཕ་ཡུལ་སྒ་སྐྱེ་དགུ་མདོ་ཆུ་དམར་ལེབ་རང་ནས་ཡིན་པའི་རྒྱ་གཞུང་ཉེན་རྟོག་པ་ཟུར་བ་དང་གུང་ཁྲན་ཏང་ཡོན་ཡིན་པ་ཚེ་སྦོ་ཟེར་བའི་སྐྱེས་པ་ཞིག་ཨ་མ་རྒས་མོ་ཞིག་དང་བཟའ་ཟླ་བུ་ཕྲུག་བཅས་ནང་མི་གསུམ་ཁྲིད་ནས་མདོ་སྨད་མཛོད་དགེ་རྩ་ཐང་དུ་གུང་ཐང་སྐུ་ཕྲེང་བདུན་པ་མཆོག་གིས་དུས་འཁོར་དབང་ཆེན་གནང་སར་དུས་དབང་ཞུ་བར་འགྲོ་བའི་ལམ་བར་ཁྲིན་ཏུ་རྫོང་གི་ཟ་ཁང་ཞིག་ལ་ཉིན་་གུང་ཟ་མ་ཟ་བཞིན་པའི་སྐབས་སུ་རྒྱ་གཞུང་ཉེན་རྟོག་པ་ཡོང་ཏེ་ཁོང་ཚོ་གང་དུ་འགྲོ་མཁན་ཡིན་མིན་ལ་དྲི་བརྩད་བྱས་པ་དང་དུས་དབང་འཁོར་དབང་ཆེན་དུ་འགྲོ་མཁན་ཡིན་ན་ཐོ་འགོད་བྱེད་དགོས་ཚུལ་བརྗོད་པ་དང་ཐོ་འགོད་བྱས་ཟིན་རྗེས་ཅུང་ཙམ་ནས་མི་གཞན་ཞིག་ཡོང་ཏེ་དུས་འཁོར་དབང་ཆེན་ལ་འགྲོ་ཆོག་གི་མ་རེད་ཟེར་ནས་ཚེ་སྦོའི་ནང་མི་རྣམས་བཙན་དབང་གིས་ཕ་ཡུལ་དུ་ཕྱིར་སློག་བཏང་བ་དང་ཚེ་སྦོ་ལ་ཁྱོད་ཀྱིས་ད་བར་ལོ་ངོ་༣༢ རིང་ས་གནས་འདྲ་མིན་ནང་ཉེན་རྟོག་པ་དང་ལས་འགན་འདྲ་མིན་ཁུར་མྱོང་བའི་གུང་ཁྲན་ཏང་ཡོན་རྒན་གྲས་ཤིག་ཡིན་སྟབས་ཁྲིམ་ལུགས་ཆ་ཚང་ཤེས་བཞིན་དུ་དེ་འདྲ་བྱས་པ་ནི་ཧ་ཅང་ཚབས་ཆེན་དང་ཁྲིམས་འགལ་ཡིན་ལུགས་རྗོད་དེ་ཁོང་ད་ལྟ་ཉེན་རྟོག་པས་བཀག་ཉར་བྱས་ཡོད་པ་རེད། ཚེ་སྦོ་ནི་ད་བར་ལོ་ངོ་༣༢ རིང་ལ་རྫ་སྟོད་སོགས་ས་གནས་འདྲ་མིན་ནང་ཉེན་རྟོག་པ་དང་ཡུལ་ཚོའི་འགོ་ཁྲིད་འཕྱུགས་རིགས་ཚན་པའི་འགོ་ཁྲིད་སོགས་ལས་རིགས་འདྲ་མིན་གྱི་འགན་ཁུར་བྱེད་མྱོང་བ་དང་གུང་ཁྲན་ཏང་ཡོན་རྒན་གྲས་ཤིག་ཡིན་པ་དང་ད་ལྟ་རང་ལོ་དྲུག་བཅུའི་ནང་བསླེབས་ཡོད་པ་རེད་འདུག
ད་དུང་དུས་དབང་ལ་མི་མང་བས་གནས་ཚུལ་ལྷག་སྲིད་པའི་དོགས་ཟོན་འོག་ཕྱོགས་ཁག་ནས་དུས་དབང་ལ་ཡོང་མཁན་བོད་མི་རྣམས་ལམ་བར་ནས་བཀག་ཏེ་ཕྱིར་སློག་གཏོང་གི་ཡོད་པ་རེད་འདུག
སྤྱིར་མདོ་སྨད་བླ་བྲང་བཀྲ་ཤིས་འཁྱིལ་གྱི་རྗེ་བླ་མ་གུང་ཐང་སྐུ་ཕྲེང་བདུན་པ་བློ་བཟང་འཇམ་དབྱངས་དགེ་ལེགས་བསྟན་པའི་མཁན་ཆེན་མཆོག་གིས་མདོ་ལྷོའི་མཛོད་དགེ་རྩྭ་ཐང་བྱེའུ་སྙིང་ཐང་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་དང་པོ་གནང་རྒྱུར་རྒྱ་ནག་གཞུང་ལ་རྒྱུན་རིང་ནས་ཆོག་མཆན་ཞུས་པ་ལྟར་ཆོག་མཆན་ཐོབ་པ་ལྟར་ཉེ་ལམ་ཕྱི་ཟླ་༧པའི་ནང་དུས་དབང་གནང་རྒྱུ་གཏན་འཁེལ་བྱས་ནས་གྲ་སྒྲིག་བྱས་ཟིན་ཀྱང་སྤྱི་ཟླ་༨པའི་ནང་ཀན་ལྷོ་ཁུལ་བཙུགས་ནས་ལོ་འཁོར་བདུན་བཅུ་འཁོར་བའི་ཁུལ་སྟོན་དང་། གཞུང་འབྲེལ་ཚོགས་འདུ་ཁག་ཅིག་ལ་འཁེལ་ཡོད་སྟབས་རྒྱ་གཞུང་གིས་གློ་བུར་དུ་གནས་སྐབས་ཕྱིར་ཐེན་བྱེད་བཅུག་འདུག་
གཞི་རྩའི་གུང་ཐང་སྐུ་ཕྲེང་བདུན་པ་བློབཟང་འཇམ་དབྱངས་དགེ་ལེགས་བསྟན་པའི་མཁན་ཆེན་མཆོག་ནི། ཕྱི་ལོ་ ༢༠༠༢ ལོའི་ཧོར་ཟླ་བའི་ཚེས་ཉེར་བདུན་ཉིན་གཙོས་མཛོད་དགེ་སྒར་སྙིང་བཀྲ་ཤིས་ཆོས་འཕེལ་གླིང་གི་ཤར་ཕྱོགས་སུ་རོང་འབྲོག་གི་ལྷ་སྡེ་བྲག་རྫོང་སྡེ་བར་ཡབ་བསོད་ནམས་ཚེ་རིང་དང་ཡུམ་བན་དེ་འཚོ་གཉིས་ཀྱི་སྲས་སུ་སྐུ་འཁྲུངས་པ་དང་། དགུང་ལོ་ལྔའི་ཐོག་ཀུན་མཁྱེན་རིན་པོ་ཆེས་གུང་ཐང་སྐུ་ཕྲེང་དྲུག་པ་བསྟན་པའི་དབང་ཕྱུག་མཆོག་གི་ཡང་སྲིད་དུ་ངོས་འཛིན་གནང་བ་དང་ཡོངས་ཀྱི་དགེ་བའི་བཤེས་གཉེན་ཆེན་མོ་ཨ་ཁུ་དཔལ་ལྡན་ཚང་ཡོངས་འཛིན་དུ་བསྟེན་ནས་སློབ་གཉེར་གནང་། ཕྱི་ལོ་ ༢༠༢༡ ལོར་བླ་བྲང་བཀྲ་ཤིས་འཁྱིལ་དུ་ཕར་ཕྱིན་དམ་བཅའ་བཞག་ནས་ཕྱི་ལོ་ ༢༠༢༣ ལོའི་ཟླ་ ༡༡ ནང་བླ་བྲང་བཀྲ་ཤིས་འཁྱིལ་བའི་ཁྲི་བར་ཕེབས་ངེས་རེད་འདུག
འདི་ལོ་སྤྱི་ཟླ་༧པའི་ནང་ལ་ཡང་མདོ་སྨད་མཚོ་སྔོན་ཞིང་ཆེན་མཚོ་ལྷོ་མང་རྫོང་ངམ་མང་ར་ཡུལ་གྱི་ཨ་ཐིས་དགོན་པའི་དགོན་བདག་ཨ་ཐིས་རིན་པོ་ཆེ་ཡིས། མང་རྫོང་ས་གནས་སུ་དཔལ་དུས་ཀྱི་འཁོར་ལོའི་དབང་ཆེན་གནང་རྒྱུ་གཏན་འཁེལ་ཟིན་ནས་གྲ་སྒྲིག་ཆ་ཚང་བྱས་ཚར་སྐབས་གློ་བུར་དུ་བཀག་སྡོམས་བྱས་པ་དང་དུས་འཁོར་གྱི་རྡུལ་མཚོན་དཀྱིལ་འཁོར་ཡང་བཙན་དབང་གིས་བཤིགས་པ་སོགས་བྱས་ཡོད་པ་རེད།
