༄༅།། ཉེ་ཆར་ཐེ་ཝན་གྱི་འོས་བསྡུར་རྟོག་ཞིབ་ལྟ་སྐོར་སོགས་ལ་འབྱོར་བའི་རྒྱ་ནག་པ་ཚོས་མཚོ་གླིང་དེའི་དམངས་གཙོའི་ལམ་ལུགས་ནི་ཟིང་ཆ་དང་འཁྲུགས་འཛིངས་ཆེ་བ་ཞིག་ཡིན་རུང་ཕུགས་སུ་ཡིད་སྨོན་སྐྱེ་དགོས་པ་ཞིག་ཡིན་པའི་ངེས་ཤེས་རྙེད། གཟའ་འཁོར་སྔོན་མར་ནེའུ་ཡོག་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཐེ་ཝན་གྱི་རྒྱལ་ས་ཐེ་པེའི་མེ་འཁོར་འབབ་ཚུགས་སུ་རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་ཚུའི་ཚུའི་ཞེས་པ་ཞིག་གིས་མཚོ་གླིང་དེའི་བུད་མེད་༦་གྲོས་ཚོགས་འཐུས་མིར་ལངས་ཏེ་འོས་བསྡུའི་དྲིལ་བསྒྲགས་ལས་འགུལ་སྤེལ་གྱི་ཡོད་པར་བལྟས། ཁོ་མོས་ང་ཚོ་ཆབ་སྲིད་ལ་ཞུགས་པའི་ལོ་ཟླ་ནི་ཧ་ལམ་དུས་མཉམ་ལྟ་བུ་ཞིག་ཡིན་སྲིད། ཁོ་ཚོ་ཐེ་ཝན་གྱི་གྲོས་ཚོགས་འཐུས་མིར་ལངས་ནས་འགྲན་སྡུར་བྱེད་ཀྱི་ཡོད་ཀྱང་ང་དང་རྒྱ་ནག་གི་དམངས་གཙོ་དོན་གཉེར་བ་རྣམས་བཙན་བྱོལ་བར་གྱུར་པ་རེད་ཅེས་དམངས་གཙོའི་ལམ་ལུགས་དེར་ཡིད་སྨོན་ཤོར། སྔ་ལོ་ཚུའི་ཚུའི་ལ་རང་ཡུལ་དུ་བདེ་འཇགས་མེད་པར་ལྷོ་ཤར་ཨེ་ཤི་ཡའི་རྒྱལ་ཁབ་ཅིག་ཏུ་བྲོས།།
ནེའུ་ཡོག་དུས་བབ་ཚགས་པར་གྱི་གསར་འགོད་པ་ཚུའི་ཚུའི་སོགས་རྒྱ་ནག་གི་བུད་མེད་༨་ཀྱི་རྗེས་སུ་འབྲངས་ནས་ཐེ་ཝན་གྱི་དམངས་གཙོའི་འོས་བསྡུར་རྟོག་ཞིབ་ཏུ་བསྐྱོད། ཁོ་ཚོའི་རྟོག་ཞིབ་སྐོར་སྐྱོད་དེ་རྒྱ་ནག་སྐམ་ས་ཆེན་མོར་སྐྱེས་པ་དང་ཧོང་ཀོང་དུ་ལོ་༢༠་ལྷག་ལ་གསར་འགོད་པའི་ཆེད་ལས་བསྒྲུབས། པྲོག་དབྱིབས་ནད་ཡམས་དུས་སུ་ཐེ་ཝན་དུ་སྤོས་པའི་གསར་འགོད་པ་ཀྲང་ཅེ་ཕིང་བཀོད་སྒྲིག་བྱས། ཁོ་མོས་རྒྱ་ནག་གི་བུད་མེད་དེ་ཚོར་ཐེ་ཝན་གྱི་དམངས་གཙོའི་ལམ་ལུགས་དང་དེའི་དགེ་སྐྱོན་རྣམས་དངོས་མྱོང་ཐུབ་ཏུ་འཇུག་རྒྱུའི་དམིགས་ཡུལ་བཅངས། རྒྱ་ནག་གི་བུད་མེད་དེ་རྣམས་འོས་བསྡུའི་དྲིལ་བསྒྲགས་ལས་འགུལ་སྤེལ་ཡུལ་ཁག་ཏུ་བསྐྱོད་པ་དང་གཏམ་བཤད་ཁག་ལ་མཉན། ཐེ་ཝན་གྱི་སྲིད་དོན་པ་དང་མི་མང་། སློང་མོ་བ་དང་སྤྱི་ཚོགས་ཀྱི་མཐའ་ཟུར་དུ་ཕུད་པའི་མི་ཚོར་སྐད་ཆ་དྲིས། ཐེ་ཝན་ལ་བཙན་བྱོལ་དུ་འབྱོར་བའི་རྒྱ་ནག་གི་སྐྱེས་པ་ཞིག་གིས་སྐམ་ས་ཆེན་མོར་བཤད་མི་ཆོག་པའི་ཆབ་སྲིད་ཀྱི་མཚར་གཏམ་རྣམས་བཤད་ནས་བཞད་གད་བསླངས།།
ཐེ་ཝན་གྱི་འོས་བསྡུའི་རྟོག་ཞིབ་སྐོར་སྐྱོད་ནི་རྒྱ་ནག་གི་བུད་མེད་དེ་ཚོར་ཡིད་སྨོན་དང་དགའ་མོས། གོ་རྟོགས་སད་པ་དང་མིག་ཆུ་ཤོར་དགོས་པ་ཞིག་ཏུ་གྱུར། ཁོ་ཚོ་༡༩༤༧་ནས་༡༩༨༧་བར་དུ་གོ་མིན་ཏང་སྲིད་གཞུང་གིས་མི་ཁྲི་ཚོར་མང་པོར་རྒྱ་ནག་གི་གསང་ཉུལ་གྱི་ནག་ཉེས་བཙུགས། མི་༡༠༠༠་ལྷག་བསད་པའི་ཇིང་མེ་དཀར་པོའི་འཇིགས་སྐུལ་རྗེས་དྲན་སྤྱི་གླིང་དང་ཐེ་ཝན་གྱི་སྲིད་དོན་བཙོན་པ་རྣམས་བཙོན་འཇུག་བྱ་ཡུལ་བཙོན་ཁང་ཁག་ལ་ལྟ་སྐོར་དུ་ཁྲིད། ཐེ་ཝན་བཙན་དབང་རིང་ལུགས་ནས་དམངས་གཙོར་གྱུར་པ་ནི་རྒྱ་ནག་སྐམ་ས་ཆེན་མོར་བློ་ཡུལ་དུ་ཤོང་དཀའ་བ་ཞིག་ཡིན་པ་ངོས་ཟིན། དེང་སྐབས་རྒྱ་ནག་གི་ཕྱི་ལོགས་སུ་གནས་འཁོད་ལོ་ན་༢༠་རྩ་གྲངས་སུ་སོན་པའི་གསར་འགོད་པ་ཡ་མེ་ཞེས་པ་ཞིག་གིས་ཐེ་ཝན་པ་ཚོར་འདི་དག་ཐམས་ཅད་འདས་དོན་ཞིག་ཡིན་སྲིད། ང་ཚོ་ལ་ནི་ད་ལྟ་བ་དང་ད་དུང་ཡང་མྱོང་བཞིན་པ་ཞིག་རེད་ཅེས་བཀྲལ། རྒྱ་ནག་གི་བུད་མེད་དེ་རྣམས་ཉི་ཧོང་དང་ལྷོ་ཤར་ཨེ་ཤི་ཡའི་རྒྱལ་ཁབ་ཁག ཨ་རི་བཅས་ནས་ཐེ་ཝན་གྱི་འོས་བསྡུར་རྟོག་ཞིབ་ཏུ་བསླེབས།།
ནེའུ་ཡོག་དུས་བབ་ཚོགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། རྒྱ་ནག་གིས་ཐེ་ཝན་ལ་དངོས་ཤུགས་བརྒྱུད་གསུམ་ནས་འཇིགས་སྐུལ་བྱ་རྒྱུ་ཤུགས་ཆེ་རུ་བཏང་སྟེ་མཚོ་འགག་ཕྱོགས་གཉིས་ཀྱི་རྒྱ་ནག་པ་རྣམས་ཕན་ཚུན་འགྲོ་འོང་བྱེད་དུ་འཇུག་རྒྱུ་བཀག ལོ་བཅུ་ཕྲག་གཅིག་གི་སྔོན་དེར་ཐེ་ཝན་གྱི་འོས་བསྡུར་དོ་སྣང་ཡོད་པའི་རྒྱ་ནག་པ་རྣམས་མཚོ་གླིང་དེར་རྟོག་ཞིབ་ཏུ་བསྐྱོད་རྒྱུ་དང་རྒྱ་ནག་ལ་དམངས་གཙོ་དར་སྤེལ་གཏོང་ཐུབ་མིན་ཐད་གླེང་སློང་། ཐེ་ཝན་པ་མང་ཆེ་བས་རྒྱ་སྐད་བཤད་ཤེས་པས་སྐམ་ས་ཆེན་མོ་ནས་ཡོང་བའི་རྒྱ་ནག་པ་ཚོར་སྐད་བརྡ་མི་འཕྲོད་པའི་དཀའ་ངལ་མེད། རྒྱ་ནག་གི་སྤྱི་ཚོགས་སུ་འཕྲད་པའི་དཀའ་ངལ་སེལ་ཐབས་ཐེ་ཝན་ལ་མིག་དཔེ་བལྟས་ནས་བཙལ་རྒྱུའི་གོམས་གཤིས་ཤིག་འཇགས། ༢༠༡༢་ལོར་རྒྱ་ནག་གི་ཤེས་ཡོན་ཅན་དང་ཁེ་ལས་པ། མ་རྩ་འཛུགས་མཁན་སོགས་མི་བཅུ་ཕྲག་གཅིག་ལྷག་ཐེ་ཝན་གྱི་འོས་བསྡུར་རྟོག་ཞིབ་ཏུ་བསྐྱོད་ནས་སྤྱི་ཚོགས་དྲྭ་ལམ་ཁག་ཏུ་སྤྱི་མཐུན་རིང་ལུགས་དང་རྩ་ཁྲིམས་རིང་ལུགས་ཀྱི་དགེ་སྐྱོང་རྣམས་གླེང་།།
རྒྱ་ནག་པ་བུད་མེད་དེ་རྣམས་ལོ་ན་༢༠་རྩ་གྲངས་ནས་༧༠་ཡས་མས་སུ་སོན་ཡོད་པ་དང་འགའ་ཞིག་ཚུའི་ཚུའི་དང་འདྲ་བར་ལོ་ངོ་རེ་ཟུང་གོང་དུ་རྒྱ་ནག་ནས་ཕྱི་ལ་ཐར། ཁོ་ཚོ་ཁག་ཅིག་ལོ་མང་རིང་ཕྱི་རྒྱལ་དུ་བསྡད་དེ་ཆེད་ལས་དང་ཚོང་ལས་གཉེར་ནས་ཆབ་སྲིད་པ་ཡིན་པའི་རྣམ་པ་མི་མངོན། ཨན་ཇཱི་ལ་ཁྲེན་ཞེས་པ་ནི་ཨ་རིའི་པོར་ཊི་ལན་ཌི་ནས་གུང་སེང་དང་བསྟུན་ཏེ་ཐེ་ཝན་གྱི་འོས་བསྡུར་རྟོག་ཞིབ་ཏུ་ལྷགས། ཁོ་མོ་ཨ་རིའི་སྤྱི་དམངས་ཡིན་རུང་རྒྱ་ནག་གི་རིག་གཞུང་ལ་དུང་ཞེན་མ་བརླགས། ཁོ་མོས་ང་ལ་ཐེ་ཝན་གྱི་འོས་བསྡུའི་རྟོག་ཞིབ་སྐོར་སྐྱོད་འདིས་བློ་སྒོ་ཕྱེ་བ་དམངས་གཙོའི་རྒྱུད་རིམ་དེ་ཅི་འདྲའི་སྐྱོ་གར་ཞིག་ཡིན་པ་ངོ་འཕྲོད་དུ་བཅུག་སོང་། རྒྱ་ནག་གི་ཕ་མ་གཞན་ལྟར་ངའི་ཕ་མ་ཚོས་ཀྱང་ཆབ་སྲིད་ལ་ཐེ་ཇུས་མ་བྱོས་ཞེས་ང་ལ་གདམས་མྱོང་། ད་ནི་མི་ཚང་མས་སྤྱི་ཚོགས་ཡར་རྒྱས་གཏོང་བར་ལེགས་སྐྱེས་འབུལ་དགོས་པའི་ཚོར་བ་ཞིག་སྐྱེས་བྱུང་ཞེས་སྨྲས། མི་འགའ་ཤས་ཀྱིས་མི་ཚང་མས་རང་གི་མངོན་འདོད་བསྒྲུབས་ན་སྤྱི་ཚོགས་ཡར་རྒྱས་གཏོང་ཐུབ་ཅེས་ལྟ་ཚུལ་བརྗོད།།
རྒྱ་ནག་པ་ཐམས་ཅད་ཀྱིས་ཞིས་ཅིན་ཕིང་ལ་ཐེ་ཝན་གྱི་འགོ་ཁྲིད་འདས་པོ་ཅང་མིང་གོ་ལྟར་རིམ་གྱིས་དམངས་གཙོར་བསྒྱུར་ཐུབ་པའི་བློ་སྟོབས་དང་འདུན་པ་མེད་པ་ཤེས་ཤིང་། དུས་རབས་སྔོན་མའི་ལོ་རབས་༨༠་པའི་ནང་ཅང་ཅིན་གོས་རང་གི་ཨ་ཕ་ཅང་ཅེ་ཧྲིའི་སྲིད་དབང་སྒེར་གཅོད་ལམ་ལུགས་མཇུག་བསྡུས། ཁོང་གིས་ཐེ་ཝན་དམངས་གཙོའི་ཕྱོགས་སུ་ཁ་ལོ་བསྒྱུར། གསར་འགོད་པ་དང་སྲིད་དོན་གྱི་ལྟ་བ་མི་མཐུན་པ་ཟུར་པ། སྲིད་འཛིན་ཚེ་དབྱིན་ཝེན་གྱི་སློབ་སྟོན་པ་ཨན་ཊོ་ནིའོ་ཅང་གིས་མི་མང་པོས་ཐེ་ཝན་གྱི་དམངས་གཙོ་ནི་གནམ་ནས་ཟགས་པ་ལྟར་གྱི་འདུ་ཤེས་ཤིག་འཛིན་གྱི་འདུག ཐེ་ཝན་གྱི་དམངས་གཙོའི་ལམ་ལུགས་མི་ཇི་སྙེད་ཅིག་གིས་འཐབ་རྩོད་བྱས་ནས་ཐོབ་པ་རེད། རྒྱ་ནག་དམངས་གཙོར་འགྱུར་རྒྱུར་ཡུན་རིང་འགོར་རྒྱུ་རེད་ཅེས་ཐེ་ཝན་གྱི་དམངས་གཙོའི་བྱུང་རིམ་རྣམས་བསྟན། བདུན་ཕྲག་སྔོན་མར་རྟོག་ཞིབ་སྐོར་སྐྱོད་དུ་ཕྱིན་པའི་བུད་མེད་དེ་དག་གིས་སོ་སོའི་མིང་དངོས་སུ་བཤད་མི་ཕོད་པ་དང་ཐེ་ཝན་གྱི་དམངས་གཙོར་དགའ་མོས་བྱས་ན་རྒྱ་ནག་གཞུང་གིས་ཆབ་སྲིད་ཀྱི་ནག་ཉེས་སུ་བརྩི།།
ཐེ་ཝན་པ་ཚོས་འོས་འདེམས་བཀོད་སྒྲིག་དང་འོས་ཤོག་འཕངས། ཐེ་ཝན་གྱི་སྲིད་འཛིན་ལས་ཁུངས་མདུན་དུ་མང་ཚོགས་འདུ་འཛོགས་ཆོག་པར་གསར་འགོད་པ་ཡ་མེ་ངོ་མཚར་སྐྱེས། ཁོ་མོས་རྒྱ་ནག་གི་ཆེས་མཐོའི་འགོ་ཁྲིད་ཚོ་གནས་སྡོད་བྱ་ཡུལ་ཀྲུང་ནན་ཧེའི་རྩིག་གྱང་མཐོན་པོ་དང་དམག་གིས་བསྲུངས་ནས་སྐྲག་དགོས་པ་ཞིག་ཡིན་རུང་ཐེ་ཝན་གྱི་སྲིད་འཛིན་ལས་ཁུངས་མདུན་དུ་ལས་འགུལ་སྤེལ་ཆོག་པ་ནི་ཧ་ལས་དགོས་པ་ཞིག་རེད། ཐ་ན་ཆང་མ་ཞིག་གིས་ཚོགས་པ་བཙུགས་ནས་རང་གི་ཐོབ་ཐང་རྩོད་ཀྱི་ཡོད་པ་དེ་རྒྱ་ནག་ཏུ་འབྱུང་མི་སྲིད་པ་ཞིག་རེད་ཟེར། ཐེ་ནན་ས་ཁུལ་དུ་མང་ཚོགས་ཀྱིས་རྔ་དང་མཁར་རྔ་བརྡུངས། ཤོག་པག་བརྒྱབ། ལིན་ལི་ཀྲེན་ཞེས་པའི་རྒྱན་ཆའི་ཚོང་ཁང་བདག་པོ་ཞིག་གིས་འདི་དམངས་གཙོའི་ཁྱད་ཆོས་རེད། རྒྱ་ནག་པ་ཚོ་རང་དབང་ལ་དགའ་བ་ངས་ཤེས་ཀྱི་ཡོད། ཡིན་ནའང་ཁོ་ཚོར་རང་དབང་འཐབ་རྩོད་བྱེད་ཐུབ་པའི་སྙིང་སྟོབས་མི་འདུག་ཅེས་བཤད། ཐེ་ཝན་གྱི་རྒན་གཞོན་བར་གསུམ་དང་དབུལ་ཕྱུག་གཉིས་ཀ་འོས་བསྡུར་མཉམ་ཞུགས་བྱས་ནས་རྒྱ་ནག་གི་བུད་མེད་དེ་ཚོར་བག་ཆགས་ཟབ་མོ་ཞིག་བཞག་ཡོད་པའི་གནས་ཚུལ་ཐོན་འདུག
ཕྱི་ཟླ་དང་པོའི་ཚེས་༡༩་ཉིན་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་པ་ལྟར་ན། ཧོང་ཀོང་གི་གོ་ལ་གཅིག་གྱུར་ཉམས་ཞིབ་ཁང་གི་འགན་འཛིན་བྷོ་ནི་གྷ་ལ་སེར་གྱིས་ལེ་ཆིང་ཏེ་སྲིད་འཛིན་ལ་འོས་འདེམས་བྱུང་བ་དང་ཁོ་པས་ཅི་ཞིག་བཤད་ཀྱི་ཡོད་པར་རྒྱ་ནག་གིས་མཉན་དགོས། རྒྱ་ནག་གིས་ཐེ་ཝན་ལ་འབྲེལ་མོལ་སླར་གསོ་མ་བྱས་ན་གོ་ནོར་ཐེབས་རྒྱུ་དང་གོ་བ་ལོག་སྒྲུབ། མཐའ་མཇུག་རྩིས་ལོག་ཐེབས་རྒྱུའི་ཉེན་ཁ་ཤིན་ཏུ་ཆེ་ཞེས་ནན་སྐུལ་བྱས་པར་མ་ཟད། ཕྱི་འབྲེལ་དུས་དེབ་ནང་དུའང་༢༠༢༣་ལོའི་ཕྱི་ཟླ་༩་ནང་བསམ་ཚུལ་དྲིས་ནས་ཐེ་ཝན་པ་བརྒྱ་ཆ་༤༨.༩་ལ་མ་འོངས་པར་རང་བཙན་བྱ་རྒྱུ་དང་ཐེ་ཝན་པ་བརྒྱ་ཆ་༢༦.༩་ལ་གནས་བབ་སོར་གནས་བྱ་རྒྱུ། ཐེ་ཝན་པ་བརྒྱ་ཆ་༡༡.༨་ལ་མཚོ་འགག་ཕྱོགས་གཉིས་གཅིག་གྱུར་བྱ་དགོས་པའི་འདུན་པ་འདུག དེས་ན་ཐེ་ཝན་གྱི་སྲིད་དོན་ཚོགས་པ་ཁག་དང་སྲིད་དོན་པ་སུ་ཞིག་ཡིན་རུང་མང་ཚོགས་ཀྱི་འདུན་པའི་རྗེས་སུ་འབྲང་རྒྱུ་བརྗོད་ཅི་དགོས། མི་དམངས་ཀྱི་མངོན་འདོད་ལ་འགལ་བ་ཞིག་སུ་གཅིག་གིས་ཀྱང་བསྒྲུབ་མི་ནུས་ཞེས་ཞིབ་འཇུག་སྙོན་ཐོ་བཏོན་པའི་གནས་ཚུལ་ཐོན་འདུག
གླེང་སྟེགས།